- هسه بس اتعشى واجي ان شاءالله
- يالة منتظرك .
هدوة : حاجيني شنهو الصار ، طكاج ؟
وسن : اي
- صخام الصخمة كون وعليش طكج
- جيف ما شهدت زور على عمي سرحان وولدة وكسرت بيه كدامهم .. طكني اني واني وطردنا بالشارع مفرعة ، ظليت اتوسل بيه ياله اطاني عباية الي ولمي .
- من كسر بيده كون ... ولج جويعدة ومستريحة وفروخج حدرج واخيوانج مؤيد وعليوي يروحون ويردون عليج وشمحتاجة وشتريدين ، عليش عملتي بروحج هجي وعميتي عليها وعلى فروخج ..
- عمة شعدي واظلن ، مرة وحيدة وبس تطلع كالو مطلكة وبت كاولية ها شجابت وها شحطت ولا اكدر افك حلكي ولا اكدر اتعدى عتبة الباب مو حقي احط زلمة واصم حلوك العالم بيه واكف الساناتهم عني ، الايدة بالماي مو مثل الايدة بالنار ، طلعت روحي يا عمة والله جزعت .
من يوم الجبت امي ولليوم يا بت الكاولية ويا الكاولية ، اي كليلي وين اوديها .. اذبها بالشارع لو بدار عجزة ؟ مرة مريضة كعدتها عندي كلت ما حضيت بحنانها واني صغيرة خل اكسب اخرتي بيها واباريها واكعد ، بس جزعت محد يخليني بحالي .
- حكج العيشة بلا رجل بديرتنا صعبة ، ناسنة اهل كالة ، بس يا عمه مو هجي ، تاخذينه حدر العباية .
- عمة حدر العباية ليش اني اتزوجت بمحكمة و زواج اشهود وامي تدري ، جا بعد اشهدمن .. اجي اخلي يخطبني من عمي سرحان ابو رجلي القديم ، كليلي شلون يصير .
- الا سرحان ، روحي لزناد وخلي يخطبج منه
- عمة اني وين اعرف عمي زناد ، عمري كله ما شايفته لو مرة لو مرتين من جان يجيكم خطار ، شو بالكماط من شرد للكويت ، بعد وين اعرفه ويعرفني واتعناله للسماوة .
- ميخالف يظل عمج .
- هسه اني عمة ما اريدن كلشي ، بس اريد جهالي وبس .. كلشي ما اريد والله كلبي فرفح بطلعتهم هيج متت متت وعلي .
- هسه اودي اعلى فروخج يجيبوهم ليج .. ارتاحي .. والله كريم .
طلع مأمون لبيت ابوه ، دخل نوسة ومروان والجهال كاعدين ياكلون وسرحان على سجادته كاعد وبيدا كتاب مفاتيح الجنان ويقرا دعاء كميل بصوت مسموع، ويردد
(..يا من اسمه دواء وذكره شفاء وطاعته غنى ، ارحم من رأس ماله الرجاء وسلاحه البكاء .....الخ
مأمون : وسن وامها عد بيت عمي حاكم .
بساع الكل انتبهله وسرحان كطع صوت الدعاء ، نزل العوينات وباوعله .. حجه مأمون : كمل كمل دعائك بوية ، بعدين نحجي .
مروان : وشرايدة ؟
- خل ابوي يكمل .
سرحان استعجل بالدعاء وختمه ب(برحمتك يا ارحم الراحمين ) وطبك الكتاب وباسه وحطاه بالكاع واندارله : شمالها ؟
الحلقة ١٤
ابدأ من البداية
