#يومياتي_مع_أبو_الغضب_الحلقة2
#بقلمي_ولاء_رفعت_علي
_ يوم الأحد أرخم يوم ده عشان أنه بيجي بعد يومين الأجازة و كمان يوم أجازة واحد كده أسمه أحمد 🙄، و ده بغض النظر عن بدل ما أصحي علي صوت المنبه أقوم مخضوضة من صوت جرس الباب لما عم حسين الي بيجمع الزبالة ينده بصوتو الي يخض:
- زبالة.
يحسسك أنه بيشتمك مش بينبهك أنك تطلع الزبالة ، صحيت طلعت الباسكت الي أغلبه بامبرز 🤢
وبعد مهام من أهمها وديت أبني المدرسة ورجعت أفتكرت حاجه بقالي كتير عايزة أعملها وهي تجديد بطاقتي المنتهيه من ٢٠١٧ ومتسألونيش ليه قعدتي من وقتها لغاية دلوقت أقولكم مكنتش بحتاجها في حاجه بس مخلياها معايا ديماً في أي مشوار لأقف في كمين ولا حاجه ويقولولي بطاقتك
ويمكن خانة الحالة الإجتماعية الي مكتوب فيها آنسة مخلياني أحن للأيام دي! 🤔
المهم روحت السجل وكان معايا أبو الغضب، أنا عن نفسي مكنتش عايزاه يجي خصوصاً لما بعمل ورق أو بخلص إجراءات في أي جهة حكومية وخصوصاً السجل المدني، أي نعم التكنولوجيا وفرت حاجات كتير منها الوقت بس مازال الروتين هو هو.
أحمد: هاتي الورق الي معاكي وخليكي واقفة علي جمب.
لولي: طيب ما أحنا أخدنا رقم ولما يجي دورنا أبقي أدخل.
علامات الغضب بدأت تظهر علي وشه 😁
جبت ورا ورجعت في كلامي:
_ خلاص أعمل الي أنت عايزه بس خد بالك ماتقفش مع حد من الموظفين لو رخمو عليك عشان عمو البوليس الي قاعد علي المكتب الي هناك ده مش ينفخك.
رفعلي حاجبه وكلامي مش عاجبه فكملت:
_ قصدي يعني مايقولكش كلمة كده ولا كده.
صوت موظف الإستعلام من رقم ٣٠ إلي ٣٥ يدخل، أحنا كنا ٣٥ دخلنا، أديتله الورق وقعدت علي جمب بس سامعه كلامه مع الموظفة الي قالتلو أول مابصت علي بطاقتي:
_ 150 جنيه غرامه وأنت بطاقتك فيه كسر ماتنفعش.
رد عليها:
_ و أي الي ماينفعهاش دي لسه فاضلها تلات سنين عشان تتجدد.
مش عارفه ليه حسيتهم في اللحظة دي مارد وشوشني و مدام روز لما بتقولو معندناش تقارير شطبنا وقفلت الشباك علي أيده.
فوقت من تخيلاتي العبيطة 😅 علي زعيقو مع موظف تاني شكله بيرخم عليه من الأخر عايزين يعملو مصلحة مايعرفوش أنهم وقعو مع الشخص الخطأ ده أبوالغضب يا جدعان😁
كنت عايزة أقوم أروح أقوله أهدي يا أبو حميد بس لاقيتني بجري علي بره ما هو علي رأي الحكمة الي بتقول الجبن سيد الأخلاق
رجعت بعد شويه والحمدلله خلص الإجراءات وبعدها أتصورت الصورة الي واثقة هاطلع فيها شبه ريا وسكينة أو الكاتعة الي بتخطف العيال 🙄 ما هو ده الطبيعي في أي صورة بطاقة شخصية مصرية أصيلة تحولك من كائن مسالم إلي كائن تاني خارج من تأبيده 😁
أحمد: أستني رايحة فين؟.
لولي: مش خلصنا خلاص وهانروح؟.
YOU ARE READING
يومياتي مع أبو الغضب (إسكريبتات)
Humorمواقف رومانسية فكاهية مُقتبسة من حياتي الشخصية أنسجها لكم علي هيئة إسكريبتات باللهجة العامية المصرية أتمني أن تنال إعجابكم 🌹🌹
