နှစ်ယောက်လုံးက သူတို့ဒယ်ဒီဝတ်ဆင်တတ်သည့်ပုံစံဖြစ်သော ချည်သားအင်္ကျီလက်ရှည်အဖြူနှင့် ရှားရောင်ဘောင်းဘီရှည်တို့အားဝတ်ဆင်ထားကြသည်။ ဧက,က ပုံစံတကျသပ်သပ်ရပ်ရပ်လေးဖြစ်သော်ငြား နိုနိုကတော့ထိုသို့မဟုတ်ပေ။
ဆံပင်များအားလုံးကို ကျောက်စိမ်းဆံထိုးဖြင့်ရစ်ပတ်ထိုးဖွဲ့ထားသော်ငြား ဆံမြိတ်တို့က နားထင်စပ်များနှင့်နားသယ်စပ်တို့မှ ကျဆင်းနေကြသည့်အပြင် ဂုတ်အစပ်များတွင်လည်း ဟိုတစ်စဒီတစ်စကျဆင်းနေသည်။
ထို့ပြင် ဝတ်ဆင်ထားသည့်အင်္ကျီကသူ့အင်္ကျီမဟုတ်ဘဲ သူ့ဒယ်ဒီဆီမှအတင်းတောင်းယူထားသည့်အင်္ကျီမို့ ဆိုဒ်ကကြီးနေကာ လည်ပင်းတွင်ဖရိုဖရဲဖြစ်နေပြီး ညှပ်ရိုးတို့ကအထင်းသားပေါ်နေသည့်အပြင် လက်ရှည်ကလက်ချောင်းတို့ပင် အနည်းငယ်မျှမပေါ်စေသည်အထိဖုံးအုပ်ပေးထား၏။
ထိုမျှမကသေး ဘောင်းဘီကလည်း အစ်ကိုဖြစ်သူ၏ဘောင်းဘီကိုယူဝတ်ထားပုံရသည်။ ခြေဖျားထိဖုံးအုပ်နေရုံမက ကြမ်းပြင်ထက်တွင်ပါပုံကျနေသည်မို့ လမ်းလျှောက်လိုက်တိုင်း ကြမ်းတိုက်နေသည့်အလား။
အသားလေးဖြူပြီး ရုပ်ခံလေးရှိနေသည်မို့ ကြည့်၍ကောင်းနေသော်ငြား အမြင်ကတော့ဘယ်လိုမှမတော်ပါ။ သို့သော်သွားပြောလိုက်လျှင်လည်း စကားမှားသွားပါက အထအနကောက်ကာ တစ်အိမ်လုံးကိုကောက်သွားတတ်သေးသည်မို့ အဝတ်အစားကိစ္စလောက်နှင့်တော့ ပြောမနေချင်တော့။
အထူးသဖြင့် မြီးကောင်ပေါက်အရွယ်အရူးထခြင်းလေးများအား လွှတ်ထားကာ စောင့်ကြည့်နေချင်သည့်စိတ်လည်းပါသည်မို့ သူ့ပုံစံနှင့်သူလွှတ်ထားဖြစ်သည်။
မည်သို့ပင်ဆိုစေကာမူ သားနှစ်ယောက်လုံးက ဆိုးသွမ်းနေကြသည်မဟုတ်သည်မို့ သူအနေနှင့်စိတ်ချရပါသည်။
"ဆိုတော့ နှစ်ယောက်စလုံး အဲ့ကျင့်စဉ်အတွက်စိတ်ဆုံးဖြတ်ထားကြပြီးပြီပေါ့"
"ဟုတ်"
"ဟုတ်"
မေးလိုက်တော့ နှစ်ယောက်လုံးက တက်ကြွစွာပြန်ဖြေလာကြပြီး နိုနိုကလည်းအပျင်းထူနေရာမှ ခန္ဓာကိုယ်လေးပါချက်ချင်းမတ်လာသည်မို့ ဘေဘေး ပြုံးလိုက်မိသည်။ သားကြီးကိုကြည့်လိုက်တော့လည်း သူ့ထံမှအဖြေကိုမျှော်လင့်နေဟန်ရှိသောမျက်ဝန်းတို့ဖြင့်ကြည့်နေသည်မို့ နှစ်ယောက်လုံး အမှန်တကယ်ဆန္ဒရှိနေကြကြောင်းပေါ်လွင်ပါ၏။
YOU ARE READING
တည်
RomanceTitle - တည် {တည္} Author - Neera Chapters - 52 chapters + 1 extra ကန့်လန့်ဆန်သောအချစ်၏ Extra 2 ကိုအရင်ဖတ်ပေးပါ။ ကန့္လန့္ဆန္ေသာအခ်စ္၏ Extra 2 ကိုအရင္ဖတ္ေပးပါ။
အခန်း - ၄၄
Start from the beginning