دارت الدنيا لتدق طبول قلبي

البارت التاسع عشر

نغم : شنو احجي ماعندي كلام يعبر عن البداخلي شلون اساعدك فهمني...

صفن ويسولف كأنما ويه نفسه نسى وجودي بالغرفة .

هجان : مشكلتي بأخر سنتين قطعت كل علاقاتي لا ظل صديق ولا قريب ظليت وياها اصبح بصوتها وضحكتها واغفى على دلعها وغزلها ، هسه راح انام وما انتظرها الصبح تكعد تصبح عليه ، واطلع للشغل ما اتلهف ارجع للبيت حتى اخابرها واحجيلها تفاصيل يومي ،

والله على الصارلي لو ازرفهم طلق ما يبرد كلبي ولا يرفلي جفن وكون ما يموتون يظلون معلعلين بالمرض واتفرج عليهم واتشفى ، يستحقون هيج عقاب على الألم الكاعد اعيشه ، بس راح اصفيهم على ايدي وهالمرة بعقل واول واحد ابلش بيه ابن عمي وصاحبي الغدر بيه فهد..

نغم : شلون عرفته فهد الغدر بيك و فرقكم؟

هجان : هو...

نغم : يعني متأكد؟

هز راسه ب اي متحلف..

جريت نفس وسكتت شنو احجي ماعرف ، مدد وطلب مني اطفي الضوه طفيته وطلعت ، ثاني يوم اتصلت على  ملاك اريد اعرف سالفة فهد شنو ؟ حتى اكدر اتصرف واساعد هجان خاف يتهور ويروح يسوي شي كلنا نندم عليه
لان معشعش براسه موضوع الانتقام..

ثاني يوم اتصلت على ملاك يدك ويفصل وماتجاوب ظل بالي ، ظليت اليوم كله اتصل بيها ما تجاوبني ومرت ٤ ايام وملاك ماكو تخبلت اضطريت اتصل على ضيغم واسأله عليها ، اتصلت يرن ومايجاوب سديته وكمت اشتغل وبالي كله يمهم شنو صاير وياهم ليش مايجاوبون ثنينهم ، مرت ساعتين دك موبايلي رحت اركض لكيته ضيغم فتحت خط ..

نغم : هلو ضيغم شلونك؟.

ضيغم : الحمدلله وانتِ؟

نغم : الحمدلله ، ملاك شلونها ؟

ضيغم : زينه خابريها وسألي عليها..

حجاها بضوجة...

نغم : صاير شي ؟

ضيغم : مثلاً ؟

نغم : ليش تحجي ويايه من ورة خشمك تره كاعد اسأل عليكم مارايده شي ثاني.

ضيغم : نغم عوفي ملاك ولاتخربين حياتها ..

نغم : ليش هيج تحجي ويايه ؟

ضيغم : اعرفج كلش زين وحافظج حفظ على غيبي حياة اختج لا تدخلين بيها اعتبريه هذا تحذير الج.

نغم : سامع شي ؟

ضيغم : ليش انتِ مسوية شي ؟

نغم : لا .

ضيغم : هذا هو عود خابريها لاختج موجودة بالبيت..

سديته منه واتصلت عليها ماجاوبتني رجعت دزيت رسالة كتبتلها..

_ ملاك وينج صاير شي بينج وبين ضيغم ظل بالي جاوبيني ..

ثواني واتصلت جاوبتها..