اسيرة قدرك

البارت 36

-طلعت ويا هو باوعلي.. اذا تردين ابقي يم
امج اني طالع من الصبح..

-لا حبيبي ما اعوفك وحدك هو الصبح ذبني
عليهم و اطلع لو تريد تروح و ما تودعني
حجيتها بزعل و برطمت..

-هو ابتسم.. علمودج ولج ليش تروحين وترجعين..

-وصلنا لبيت حماتي هو كعد واني رتبت البيت
كله و لميت غراضنا لان بعد راح نطلع منه
عيب يبقى مهوس رجعت حضرت جنطته..

-رحت يمه انكسر خاطري عليه شفته بس
يصفن و مهموم مددت بحضنه و احاول اخفف
عنه و انو المهم سلامتهم و تخلص هاي السالفة
على خير هو جان مقهور اكثر شيء من ماجد
كال هو ارتاح و طلع ال**** و خله المصيبة
علينا عصب وضل يغلط عليه..

-كمت و خليت راسه على رجليه و العب بشعره.. على كيفك ويه نفسك فدوه والله كلها تهون
بعد شيفيد الحجي الي صار صار وان شاء الله
تكدرون تدبرون المبلغ كله..

-هو كال ان شاء الله حبيبتي هو بس ارجع ابيعها
للسيارة بس اسد هالسالفة و ارتاح وداعتج
ليلي ما نايمه من التفكير..

-بقينا نسولف عن هاي السالفة وبعدها ضل
يوصي بيه لا اطلع و لا اكعد يم ولد خوالي
اذا اجونا هو غيرته تكتل حتى اذا ما اسوي
شيء اضل خايفه منه..

-ثاني يوم طلعنا من الصبح بعد ما قفل البوب
وصلني لاهلي باس راسي.. ديري بالج
على روحج لا تخلين بالي يمج ودعته
واحس اختنكت كلش اضوج من يلتحق بس
هذا شغله بعد شسوي ما بيدي غير بس ادعيله
ربي يرجعه بالسلامة..

-طلعت سرى هو سلم عليها.. لا تخافين خويه
ان شاء الله محلوله شغلتج كلفت جماعة يتوسطون
و ما راح تدفعون للناس غير بس فلوس العلاج..

-تشكرت منه هو سلم وطلع بقت عيني عليه
لحد ما طلع من الفرع يلا دخلت احب حنيته
كلش علينا والله وكفته ويانا حتى
القريب ما سواها..

-دخلت يم امي الي فرحت بتحسنها و سرى
ضلت تسولف باسر كالت الله يخلي الج ريا
والله خجلني بوكفته وياي واني اقرب الناس
الي اخوتي ما وكفولي هيج..

-مر كم يوم واني يم اهلي كلبي يم بناتي اتصل
عليهن هواي بس كلبي طاك على شوفتهن
صارت كعدة الفصل مال ماجد اسر ما حضر
جان عنده دوام دفعوا مبلغ جبير كلش اسر
انطاهم فلوسه الي جامعها و حماي هم دفع
و كرايبهم يلا نسد الفصل و غلقوا موضوع
البنية الله يرحمها وماجد..

-اسر اتصل عليه كال افتحي الباب.. طلعت
بلهفه وشوك صار اسبوع ما شايفته اني فتحت
الباب و انصدم باسر ومهاب شايلين بناتي
و ام مهاب وياهم ركضت على بناتي و اشمشم
بيهن وهاي ريا الصغيره تباوعلي بزعل بوستها
و روحي ردت بشوفتهن هي مخليه راسها بركبتي و ترجع ترفع راسها و تباوعلي و تتهضم..