في المنفى

الجزء ماقبل الأخير

🍀...
في اواخر العقد الثاني من الألفية الثالثه...
فصل الشتاء..
الساعه التاسعه صباحا..
في مدرسة من مدارس البلاد..
مدرسة بوه وأمه قبل اكثر من 20 سنة..
"الجذر التربيعي ل9...."
جاوبوا بعض الطلبه ..3
عياد وهو يكتب بالخطاط ع السبورة:خلاص معناها ناخدوا 3 ونحطوها هني ونطلعوا بيها المجهول..
ركزوا كويس في الخطوة هادي..
فجأة..طق الباب..
نزل يده وقال وهو يشوف للباب:تفضل..
انفتح الباب وكانت وريده:معليشي استاذ عياد..
وخرت شويه وخش راجل في اواخر الخمسينات قال:السلام عليكم..
ردوا عياد والطلبه :وعليكم السلام..
ومشي الراجل قعمز في المقعد الاخير..
شبح عياد لوريده وابتسملها وهي ردتها ومشت طلعت وصكرت الباب..
وعياد رجع يكمل في شرح الدرس والموجه مركز معاه..
قعد بضع دقائق حوالي 10 دقايق بالزبط..بعدين استأذن من مصطفى وناض سأل الطلبه وكانوا يجاوبوا ويشاركوا معاه..
وعياد فرحان بيهم..
بعد انتهت الحصه..
برا الفصل...
الموجه:دققت هلبه في عمرك وامتى زاولت المهنه وبصراحه مش مصدق ان ليك عام بس تزاول فيها..استمر ياولدي العطاء متاعك مستواه عالي جدا وكأن عندك خبره عمرها 20 عام..
ابتسم عياد بفرح وقال:إن شاء الله..
🍀🍀🍀🍀
في جامعة البلاد..
اللي كبرت وتوسعت مع السنين وولى فيها كل التخصصات..
في كلية القانون..
في الكافتيريا..
كانت مقعمزة هي وصاحبتها يشربوا في النسكافيه ويهدرزوا..
مياده بضحكه:ماما مصكرة راسها قالت مافيش زواج لابعد التخرج..
صديقتها نشوى: واك مسكين بيقعد يراجي تلاته سنين ونص..
رفعت مياده حاجبها ونزلاته وقالت بضحكه:مافيش اعتراض على اوامر عمتك رحيله..
نشوى بضحكه:ربي يحفظهالكم ويصبره هو مسكين..
ضحكت مياده بخجل..
نشوى ابتسمت بعدين قالت:قداش عندي فضول ناحية حاجه ونبي نسألك عنها..
مياده:أسألي..
نشوى:امم..فيد خالتي راحيل اليسار في دبله ذهب موديلها قديم من لما عرفتك من الاعدادي واني نشوف فيها لابستها مافهمتش!..
عيون مياده تعبوا دموع تنهدت بألم وقالت:دبلتها لما كانت متزوجه بابا..
نشوى:لهالدرجة تحبه؟
مياده:ماما تعشق بابا بشكل لايوصف..قدامنا تبين انها ناسياته وطاوية صفحته من زمان لكن لما تقعد بروحها تفكر فيه هو وبس..
نشوى عيونها دمعوا وهي تقول:مافكرتوش ادوروا عنه تعرفوا اخباره..
مياده مسحت دمعه نزلت من عينها وقالت:بابا نسانا بالمرة يانشوى مسحنا من حياته احني معتبرينه ميت اصلا..
نشوى وجعتها صاحبتها وقالت:اسفه حبيبتي نكدت عليك سامحيني..
ابتسمت مياده من بين دموعها وقالت:لالاعادي ولايهمك شوشو..
شبحت لساعة تليفونها وقالت:هي نوضي قريب تبدا المحاضرة..
لمت حاجاتها وناضت..
وصاحبتها معاها..ومشوا الزوز للمدرج اللي فيه المحاضرة..
🍀🍀🍀🍀
الساعه الواحده ظهرا..
ماشيين الزوز مع بعض في الطريق حدا المزارع..
ام الخير:بنقعد اليوم في سانية رحيله لبعد العشي..
مصباح:ايه تبي تفتكي من وجهي..
ام الخير:هاربه من نشافك..
مصباح ضحك وقال:نشاف شني اني قاعدلك نونس فيك بعد خدوا الولاد وقعدتي بروحك..
ام الخير:اما ونس هدا اللي كله تنقريز ونفخ راس..
مصباح:ههههه..الحق مش فيك في اللي سيب الخدمه بش يقعد معاك..
ام الخير:ياريتك شاورتني قبل ماديرها..
مصباح يضحك وخلاص بعدين قال:هي مالا اني بنمشي لحوش فرج نهدرز عليه ونتغدا غادي..
ام الخير:سلم عليه وعلى مرته..
مصباح:يوصل..هي السلام عليكم..
ومشي على حاله..
وام الخير كملت طريقها للسانيه...
صدفة تلاقت هي ووريده جاية مع بنتها اسمها هديل عمرها 14 عام..
سلموا على بعض بعدين قالت وريده:ماشيه للسانيه..
ام الخير:ايه اليوم السهريه عند رحيله..خلاك نوري تمشي..
وريده:بعد ماقتله هديل بتقريها مياده في ماده صعبة عليها قال باهي..
ضحكت ام الخير وقالت:هي بري..
ومشوا التلاته مع بعض..
ام الخير:ماظنيش نلقوها فالسانيه توا..
وريده:دورتها على المزارع بروحها تبي ساعتين ومعاها..
ام الخير تنهدت وقالت:الله يرحم عمي صالح لولاه ماكانتش رحيله اليوم..
وريده:الله يرحمه ويرحم عمي عياد ياريته عاش وشاف بنته اليوم كيف ولت للا حق وبية في نفس الوقت..
ام الخير ابتسمت وقالت:الله يرحمه..
🌿🌿🌿🌿🌿
ماشي بطريقه لمزرعة من المزارع وهو يتكلم بالتليفون..
:ايه توا ماشيلها بنروح بيها.....باهي ان شاء الله...السلام عليكم..
ونزل التليفون وصكر..
وكمل طريقه للمزرعة اللي فيها عمته..
فهالوقت..
كانت واقفه في الأرض المزروعه فيها ذرة..
كان المنظر حلو هلبه..
وهي في نصه..لابسه قونه سودا طويله فوقها فانيليا صوف سودا..
وشاربه سودا مزخرفه بورد احمر..
والشال الأحمر على كتافها...
كانت سرحانه ودموعها فعيونها...
شوي فاقت من سرحانها لما نزلت منها دمعه..مسحتها بيدها اليسار..عيونها جو ع الدبله قعدت تشبحلها بحزن..بعدين قربتها ليها وباستها...
بعدها ربعت ايديها ولفت وقعدت تتمشى..وتتوزع في نظرها فالمكان كله..لين وصلت بداية المزرعه وتلاقت مع ولد خوها..
انخلعت وقالت:منين طلعت اللطف!
احمد بضحكه:قلت نجي نروح بيك اليوم..
راحيل ابتسمت بإمتعاض وقالت:هي روح بيا ياسيدي..
ضحك احمد..
وهي جاته تعنقت ذراعه وقعدوا يتمشوا..
احمد:ايه حقه رئيس البلديه قال بيجيك غدوة وين مافي مكتبك..
راحيل:ايه بكري كلمني الأستاذ وحيدا..
احمد:اياه عاد توا عمتي خشت ع المشاريع الكبيره..
راحيل بضحكه:مشاريع شني هي كلها ارض ساهمت بيها بش يبنوا عليها مستشفى..
احمد:وانتي عندك حاجه عاديه هادي!! في المنطقه هيا مافيش الا مستشفى وحده بس والباقي كله مصحات وعيادات اغلب الناس مش قادرة على مصاريفها المستشفى الجديد حيحل ازمه كبيره راهو..
راحيل هزت راسها وقالت:ان شاء الله..شبحتله وقالت..وانت امتى ناوي..
وقف احمد وقال بلهفه:امتى انتي تقولي باهي..
ضرباته ع ذراعه ضربه خفيفه وقالت:قصدي امتى ناوي تخدم بشهادتك..
احمد شبحلها بربع عين وكمل مشي وقال:وهاني نخدم في مستوصف المنطقه..
راحيل:ايه باهي..لكن كان تفتح عياده  كيف ماقالك بوك مش خير..
احمد:بعد ماتحني عليا ونتزوج نفتحها ان شاء الله في القريب العاجل..
قرصاته راحيل من ذراعه..
هو قعد يتوجع وبضحكه يقول:تي لا ياعمتي ياحرام عليك ديما نازله عليا..
طلقاته وقالت:تستاهل..
وصلوا للحوش..
فالوقت اللي درست فيه سيارة عياد..
انفتح الباب وخش عياد بالسيارة وكانت معاه مياده مروح بيها من الجامعه..
خشوا هما الزوز بعده..
والباب تصكر وراهم..
لقوا وريده وبنتها وام الخير والجازيه مقعمزين برا..
راحيل:مش صقع ياكبدي..
الجازيه:لالا الجو باهي..
احمد وهو يشوف لمياده وهي نازله من السياره قال:دايرين مكرونه ع الحطب..
وريده:ايه..مافيش احلا منها فالجو هدا..
احمد بهيام وهو يشوف لميادة اللي مشت وقفت جنب حناها:ايه والله مافيش احلا منها..💓
ومياده كانت تتجنب تشبحله لان عيون امها وخوها عليها..
وصل فيهم عياد وقال:يعطيكم الصحه..
ام الخير:درنا طاجين طباهج..
عياد بضحكه:والله انتم احسن وحدات باهي..
كلهم ضحكوا..
عياد:نمشي نغير ونصلي ونجيكم..
ومشي بسرعه خش داخل..
وريده:اليوم جي موجه الرياضيات وخشله الفصل..
راحيل طلقت احمد وقدمت لوريده وقالت بلهفه:ايه!
وريده:شكره هلبه وقال مش مصدق انه ليه عام بس يدرس..
راحيل ابتسمت بفخر..
الجازيه؛تمنيته خش هندسه مش علوم..راهو ولامهندس..
راحيل بإبتسامه:ديما يقولي المدرس خير من المهندس والدكتور والمحامي..المدرس هو اللي طلع هادوا كلهم..
ام الخير:ربي يحفظه عقله كبير ورزين وفايت سنه..
راحيل بإبتسامه:تسلمي..
الجازيه؛غير كان تحددوا موعد فرحه بس..
راحيل ؛غدوة بإذن الله بنمشي لحوش اهل بثينه وبنتفقوا ع الموعد..
مياده:ماما خليه في عطلة نص السنه بعد نكمل امتحانات..
احمد ابتسم..
راحيل:هو هدا اللي ناوياته ان شاء الله..
ابتسمت مياده بفرح..
وريده؛عقبالك ياحميده..
احمد:ادعي الله يهدي عمتي بس..
نخصاته راحيل..فنص..
وهما شادين ضحكتهم..ومياده متحشمه ع الاخر غيرت الموضوع وقالت:شن جو هدوله..
هديل؛تمام الحمد لله شن جوك انتي..
مياده بإبتسامه؛تمام الحمد لله حتى اني..
وريده؛جايبتهالك نبيك تقريها في النحو..
مياده؛باهي..خل نخش شويه بعدين نجيها..
وريده:باهي..
ومشت مياده بتخش..
وعيون احمد معاها..
عمته حطت يدها ع وجهه ولفاته ليها وقالت:برا لقطلنا ليم عصر..
ضحك احمد وقال؛حاضر..امري لله..
ومشي من حداهم..
وهما يضحكوا عليه...
🌷وعدا يوم الخميس عليهم اللي متعودين يلتموا فيه حلو بأجوائه العائليه المميزة..
في اخر السهره روح عياد بخالته ام الخير...وجي نوري روح بمرته وبنته..
واحمد روح للحوش اللي قاعد فيه جنب حوش جده بمسافه..
اما اهل الحوش اللي هدا خش رقد..
ماعدا راحيل..
اللي كانت مقعمزة ع طاولة المكتب قدام اللاب توب وهي لابسة نظارات طبيه..
كانت تثاوب جاها النعاس لكن ماقدرتش تنوض ترقد قبل تكمل اللي فيدها..
فجأة طق باب دارها..
استغربت وقالت:خش..
انفتح الباب..وبين عياد راسه وقال:نخش يام..
ابتسمت وقالت:خش..
خش عياد وصكر الباب ومشي قعمز ع كرسي تاني قعد يشوفلها وهو يقول:تقري؟
راحيل:لالا بكري كنت نقرا..توا ندير في بحث على حاجة..
عياد:شن هي..
راحيل:تخص رسالة الماجستير نبي ندير موضوع مهم ماندارش قبل..مرض يصيب هلبه نباتات مثمرة في بلادنا اهماله ممكن يخلي مستوى الزراعه عندنا ينزل..
عياد:حلو..ومرات رسالتك ادير حل لو فيها العلاج..
راحيل بضحكه:والله ياريت توصل للوزارة مرة وحده..
عياد بإبتسامه؛ربي يفتحها عليك وتوصلي اللي تبيه..امتحاناتك تبدا السبت ولا؟
راحيل:ايه وتم الأربعا..
عياد:موفقه ياعمري..
راحيل بإبتسامه:حبيبي غدوة بإذن الله بنمشي لحوش عمك جمعه بنحدد موعد الفرح..
حك عياد راسه من الخلف وقال:الحق اني جيتك بننشدك ع الموضوع هدا..
ضحكت وقالت:في عطلة نص السنه ان شاء الله..
عياد ابتسم وقال:ان شاء الله..ناض وقف وهو يقول..ماتعطليش فالسهر..
راحيل هزت راسها بإيجاب وهي مبتسمه..
وهو ردلها الأبتسامه ولف فتح الباب وطلع من الدار وصكر وراه الباب...
وراحيل رجعت لبست نظاراتها ولهت باللاب توب..
🍀🍀🍀🍀
الساعه 5:30 عصرا..
راحيل هي وامها في حوش اهل خطيبة عياد..
🌷بثينه اصغر من عياد بعامين وتكون اخت صاحبه شافها كدا مرة مروحه معاه لفت انتباهه خجلها وادبها وحتى انه مرة راقبها وهي فالكليه زاد تأكد انها متربيه صح ومحترمه كلم امه عليها فسنة التخرج ورفعها خطبتهاله وصاحبه واهل صاحبه فرحوا بالموضوع وحتى بثينه لأنها اساسا كانت معجبه بيه حتى هي..
🍀خشت وهي شاده صفرة فيها عصير وشكلاطه..
جت طول لعزوزتها وقالت:تفضلي عمتي..
راحيل وهي تشوفلها بإبتسامه:يزيد فضلك حبيبتي..
وخدت منها..
بعدين ضيفت الجازيه..وعطت امها وعمتها وحطت الصفره وقعمزت..
راحيل رشفت من العصير وقالت:شن حالك بثينه وشن دايرة فالقرايه..قالي عياد ناقشتي مشروعك..
بثينه:ايه قعدتلي ماده وحده ندير فيها امتحان ونكمل خلاص..
راحيل:بالنجاح ان شاء الله..
بثينه:ان شاء الله..
شبحت راحيل لأم بثينه وقالت:والله اني اليوم جايه بنحدد موعد الفرح..
ابتسمت بثينه بخجل..
امها: وامتى نويتوا ان شاء الله..
راحيل:في أول اسبوع من عطلة نص السنه..
ام بثينه:كويس..
عمة بثينه:ع الاقل الصغار يكونوا معطلين ونحضروا الفرح وبالنا مرتاح..
راحيل:ايه هو هدا...اهم شي مانكونش زريت عليكم كان مايناسبش حددوا انتوا الموعد..
امها:لا بالعكس مناسب هلبه..
راحيل:واني هكي شفته مناسب عاد لينا عام شادين البنت غلط نطولوا اكثر من هكي..
ابتسمت ام بثينه..
وبثينه كانت فرحانه بطير من فرحتها 💓..
🌾🌾🌾🌾
في ارض راحيل..
كانوا عياد واحمد مقعمزين في المقعد يشربوا في قهوة ويهدرزوا..
احمد:باهي انت كلمها ياعياد..
عياد:كلمتها يااحمد والله كلمتها هي مصرة ماتعطيهاش قبل تتخرج..
احمد:هي مش واثقه اني حنخليها تكمل عندي؟
عياد:هي قالت ان مسؤوليات الزواج بعدين حيخلوا ميادة تتاخر في قرايتها ومرات تسيبها مرة وحده..
احمد:اني مانخليهاش تسيب قرايتها.
رشف عياد من مق القهوة وقال:امي مسكرة راسها ياأحمد ماتحاولش معاها..
تنهد احمد بضيق وقعد ساكت..
سادت لحظات صمت كانوا فيها الزوز يفكروا وهما يشربوا في القهوة..
شويه احمد حرك عيونه ناحية عياد بعدين حط المق على تركينه وقال:عياد.
عياد:اممم..
احمد سكت شويه بعدين قال:وانت مقعمز مع روحك..مايخطرش على بالك..بوك؟!
عقد عياد حواجبه وقال بحده:لا..
احمد:باهي انتم ليش ماسألتوش عنه السنين هادي كلها؟
عياد:سأل علينا هو قبل ولادورنا!؟ من بعد ماتزوج وسافر معاش سمعت حسه..
احمد:فالنهايه بوك..ملزوم دوره تعرف اخباره ع الأقل تعرف لو كان حي ولاميت..
عياد بتهكم:لاحي..واكيد عنده صغار من مرته التانيه لاهي بيهم وحني مسحنا من حياته..وحتى حني مسحناه من حياتنا.شبح لأحمد بغضب وقال..اني معتبره ميت يااحمد اللي ينشدني عنه نقوله بوي ميت..نقول اني يتيم..
احمد قعد يشبح لعياد بنظرات ألم..
وعياد تلفت القدام وشرب من القهوة بعصبيه وعيونه تعبوا بالدموع..
اما احمد تلفت القدام حتى هو تنهد بضيق وخدي المق وقعد يشرب في قهوته...
🌾🌾🌾🌾
تاني يوم..
الساعه العاشرة والنصف صباحا..
راحيل وهي واقفه لابسه جلابيه انيقه لونها رمادي وشاربه رماديه مزحرفه من الأطراف باللون الوردي والأرزق الغامق وشنطة سودا تنشد شدان..كانت تكلم في الخدامه:ديري رز بالبصله ومبطن و ع تركينه شربة امي..
الخدامه:حاضر..
راحيل:يحضرلك الخير..مروحه الواحد ان شاء الله...
الخدامه:ان شاء الله..
راحيل:السلام عليكم..
ولفت ومشت بطريقها للباب..
لبست كندرتها الحاطيه وطلعت..
وهي ماشيه شافت امها تسقي فالورد.
وقفت وهي تشوف للورد لحظات..
"الورد للورد"...
ترددت هالجمله في وذنها بصوته..
شدت دموعها ورسمت ابتسامه ع وجهها وقالت:ياام.
التفتت الجازيه..
راحيل:ماشيه للجامعه..
الجازيه:بري بنيتي جعنك ديما رابحه وناجحه..
ابتسمت راحيل وبعتت لامها بوسه من بعيد..
ضحكت الجازيه..
وراحيل مشت لسيارته..
فتحتها وركبت..
حطت شنطتها ع الكرسي التاني..
وربطت حزام الأمان..وشغلت السيارة وتحركت..
بعد ماطلعت من الحوش..
تحركت وراها سيارة ولد خوها اللي كان يتكلم بالتليفون..
احمد:ماشيه بدير امتحانها توا...ايه......تمام...ان شاء الله..وعليكم السلام..
صكر احمد وحط تليفونه قدامه..ومشي بطريقه للمستوصف..
🌷في سيارة راحيل..
وهي تجري في مكالمه هاتفيه عن طريق السيارة..
راحيل:بعد ساعه ونص ياأستاذ وحيدا تعالى للمكتب..
وحيدا:خلاص ان شاء الله نتلاقوا بعد ساعه ونص السلام عليكم..
راحيل:وعليكم السلام..
صكرت منه..رن تليفونها طول...
فتحت وهي تقول:السلام عليكم حسين..
حسين:وعليكم السلام..اختي راحيل غدوة ان شاء الله حيتم توزيع السلات الغذائيه والمساعدات للناس في *****..
راحيل:باهي تو نبعت احمد يجيكم وبالله اشقولي بفطور يوم الاثنين..
حسين:كله جهزناله اختي..
راحيل:اسمع جو التصاوير والفيس والتلفزيون يتكرر مرة تانيه نتفاهم معاك انت ياحسين..
حسين:لالااطمني من هالناحيه شددنا هلبه في الاجراءات..
راحيل:كويس..خلاص بنصكر توا ماتبوا شي..
حسين:لالا سلامتك بس..
راحيل:تسلم السلام عليكم..
حسين:ووعليكم السلام..
صكرت راحيل...وخشت للجامعه..
درست قدام كلية الزراعه..ونزلت من السيارة وصكرتها ومشت خشت للكليه..
مشت قعمزت قدام القاعه اللي فيها الامتحان..وقعدت تراجع لين جي وقت الامتحان..
وخشوا الطلبه وهي معاهم..
كانت امتحانات نهائيه لطلبة الدارسات العليا في كلية الزراعه..
بعد ساعه وربع بالزبط سلمت ورقتها ومشت طلعت من القاعه..
لحقتها وحده من زميلاتها كانت اصغر منها بهلبه..
:خالتي راحيل..
التفتت راحيل وهي تمشي قالت:ايمان..
ايمان بإبتسامه:شن درتي؟
راحيل؛نقولوا باهي الحمد لله..
ايمان؛ايه تعتبر الأسئله ساهله..
راحيل:معناها جاوبتي كويس..
ايمان:ايه الحمد لله..
راحيل شبحت للساعه وقالت:قبل خاطري نقعد نهدرز عليك لكن والله مشغوله بنتي..نتلاقوا وقت تاني.
ايمان بإبتسامه:ولايهمك..في امان الله..
ابتسمت راحيل وحيتها بحركة اليد وكملت طريقها..
وايمان حتى هي مشت وراها وطلعت من الكليه بطريقها لكلية القانون...
وين وصلت فيها وخشتلها..
تلاقت هي ومياده ونشوى..
سلموا ع بعض وقعدوا يهدرزوا..
ايمان:توا كنت مع امك فالأمتحان
مياده:الله! شن تحسيها جوها مليح
ايمان:ايه قالت جاوبت
مياده:باهي الحمد لله
ايمان:خاطري نعرف علاش امك قرت دراسات توا بس؟
تنهدت مياده بإبتسامه وقالت:امي قبل خدت الشهاده التانويه بتقدير مقبول مايدخلهاش جامعه..لكن بعدين عاودت الثانوي كله..قعدت ادير في الامتحانات بس وخدت الشهاده بتقدير جيد جدا..يدخلها كذا كليه واختارت تخش الزراعه..انتسبتلها انتساب..وبعد كملت قرايه وتخرجت توفى جدي عياد الله يرحمه..فاضطرت توقف ولهت بالمزراع واملاك جدي اللي وكلها عليها قبل مايموت هو وخالي وتفرغتلنا حتى حني..
بعد ماخلاص اني قربت نكمل الثانوي وعياد قريب يتخرج قررت تكمل دراسات عليا..
نشوى:امك هادي ماشاء الله عليها عين ماضرها كامله ومكمله..حتى بين الناس موليه زي البيه قدرها كبير هلبه والناس كلها تعزها..
ايمان:قلبها طيب هلبه ومتواضعه لين خلاص..
مياده ابتسمت وقالت:من يوم يومها هكي ماما ربي يحفظها قلبي...
نشوى بضحكه:غير كان تحن على احمد بس..
ضحكوا مياده وايمان..
🍀🍀🍀🍀🍀
يوم الأثنين..
كانت راحيل تصيم فصيام النافله..
وع كل فطور كانت تجمع في العمال الأجانب "افارقه وغيرهم ودير في صفرة كبيره في السانيه وتوكلهم" والمتزوج منهم تبعتله ماكلته لحوشه ومعاه مبلغ من المال..
وكذلك اللي يطلعوا من عندها كانت تعطي فيهم..
كانت تقول ظروفهم صعبه وفوقها متغربين..واللي نعطيلهم فيه كله من ربي عطاني بش نعطيهم..
وكانت شهريا كذلك توزع فالتموين وفلوس وملابس ع العائلات اللي ظروفها صعبه..
مدايرة جمعيه خيريه وهالجمعيه طريقة توزيعهم للمساعدات كالتالي...يحطوا كل شي قدام الحوش المقصود..
يطقوا ويمشوا طول ..
غير مرة وحده من الاعضاء اللي تحب الاستعراض صورت ونزلت ع الفيس تحساب روحها هكي دارت انجاز بتقرب بيه من راحيل..
لكن بدل مايحل عليها رضا راحيل حل عليها غضبها حلتها تمسح الصور وطلعتها من الجمعيه...
🌾🌾🌾🌾
واقف حدا بوابة السانيه المفتوحه يتفرج ع العمال كيف ياكلوا..
وراحيل وبنتها وولدها يعولوا عليهم ويشوفوا في احتياجتهم..
احمد وهو يتكلم بالتليفون:ايه التلاته لاهيين....شنو!!؟.....ضحك بصدمه.....باهي باهي حاضر..
وصكر احمد وحط ع الكاميرا ووجهها ناحيتهم وحاول يخليهم مايلاحظوش..وقعد يصور فيهم..
وطبعا خدي لمياده قريب عشرين صورة...
🌿🌿🌿🌿
وتمر الأيام..
خلالها كانوا يجروا ويوتوا لعرس عياد...
راحيل كانت منشغله بيه هلبه تبي اديره عرس كبير ماصارش زيه...
برغم انشغالاتها التانيه..
كانت من ابرز الحضور يوم دشنوا مشروع المستشفى وكانت قنوات التلفزيون حاضرة وهي رفضت رفض قاطع تخلي الكاميرا تصورها..
اكتفوا فقط بذكر اسمها في اخبارهم المرئية والمقروئه..
كذلك..طلعت نتجيتها ونجحت بتفوق..
وولدها عياد دارلها حفله كبيرة كمفاجأة راحيل فرحت بيها ع الآخر..
وماننسوش احمد اللي يوميا وهو يجري فجرتها بش توافق ع موضوعه هو ومياده وهي قريب طريلها منه وتقوله معاش بنعطيها مرة وحده..
🌷🌷🌷🌷
وجي اسبوع العرس..
اللي نصبوا خيمته من يوم الاحد وبدت سهرياته اللي كانت كلها رابخه...
يوم الكسوة الصبح..
كانوا يشوفوا في السوابيت اللي جو من المحل اللي غلفهم..
شويه وبدت ام الخير تغني عليها وعلى عياد..
وخدت بنت وريده الدربوكه ادربك ودارو شوط حلو هلبه..
مشت ام الخير لراحيل وشدتها من يدها وقعدت ترقص فيها وتغني..
ياإميمة العريس تعالي..فرحانه وعطاك العالي..
ضحكت وتحشمت..
وهما قعدوا يغنولها ويصفقوا ويزغردوا..
وهي انطلقت وقعدت ترقص وتغني معاهم..
راحيل..وان شاء الله ديما افراح ياربي...وقليبي مرتاح ياربي..
وهما يزغردوا ويغنوا معاها..
🌷🌷🌷🌷
ليلة الدخول..
كانت الاجواء حلوة هلبه والخيمه معبيه لفمها..
مشوا بيجيبوا العروسه...
عياد ومعاه اخته مياده...
وراحيل تراجي فيهم..
ليلتها كانت لابسه عربي..تركيبه لونها ياجوري طالعه فيها حلوة بالمرة..
واقفه برا الخيمه تتكلم بالتليفون..
خش ولد اختها لما شافها ابتسم وبدون ماتنتبه صورها..
كملت هي مكالمتها وشافاته قالت:خيرك تبي حاجه؟
ارتبك وقال:لاغير جيت ننشد على العشي..
راحيل بشك:تنشد ع العشي...راني اني اللي نعرفك امشي لخيمة الرجاله وماتطلعش منها بكل..
احمد الله غالب عليه ماعنده مايقول غير:حاضر عمتي..
لكن والله طالعه حاجه اطلع طول..
فنصت فيه وقالت:اطلع طول..
طلع جري..
رخت عيونها وقعدت تضحك بعدين ولت للخيمه..
🍀🍀🍀🍀
وجي الموكب اللي جايب العروسه..
خشت سيارة العريس داخل بش ينزلوا العروسه..
جوها وريده ومياده نزلوها ومعاهم عمة العروسه ووحده من خواتها المتزوجات..
ومشوا بيها للخيمه..
وعزوزتها تزغرد طول ماهما يمشوا بيها..
برا..
كانوا الرجاله يوتوا لمولد العريس هما والفرقه اللي جايه بتحييه..
بعد ربع ساعه بدي المولد..
فالصفه القداميه..
كان العريس واقف فالنص على ايمينه خاله وعلى يساره ولد خاله ومن الجهتين اصحاب العريس..
ووراهم الجيران المعارف والفرقه..
كانوا النساوين داخل يسمعوا في المولد..
وراحيل غصب عنها دموعها كانوا ينزلوا..
وبنتها حداها ضامتها ودمع حتى هي..
دموع راحيل كانت دموع فرح وحزن...
اللي ولدها الكبير تزوج وبوه مش حاضر..
لو كان ميت كانت هانت شويه لكن اللي يعرفوه عنه انه حي وفي يوم زي هدا فرحة بكره مايحضرهاش..
🍀في اخر المولد كان احمد ياخد في الصور بتليفونه لولد عمته..
بعدين مشي ولد عمته للدروج وركب لشقته...
احمد تنهد وقالت:يارب قربلي البعيد..
"تو نكلم عمتك غدوة"
انخلع وفي نفس الوقت ضحك من الفرحه وحضن بوه..
🌿🌿🌿🌿
وجي اليوم اللي بعده..
ومفيد كلم راحيل وحتى منيرة مرته حاولت فيها لكن هي سكرت راسها اكثر وقالت..ماعنديش بنت نعطيها قبل تتخرج وهدا اخر كلام عندي..
مفيد احترم قرار اخته لكن منيرة خدت على خاطرها ومابينتش لراحيل انها زعلت..
🌷🌷🌷
سافروا العرسان لتركيا شهر عسل..
ومفيد روح بمرته وصغاره لبريطانيا..
واستمرت الحياة تمشي زي ماهي...
🌿🌿🌿🌿
وفاتوا الاسبوعين..
وروحوا العرسان...
كانت راحيل ناويه ديرلهم زردة لأن الربيع خش واجوائه في البلاد حلوة..
وهي تعودت ادير الزردة كل عام في حوشها القديم حوش العم صالح اللي تزوجت فيه..
قعد الحوش هداكا زي ماهو ماحركتش فيه حاجه كانت بس تنظف هي بروحها وماتخلي حد يقربه غيرها..
🍀الساعه 8:30 مساءا..
كان عياد واقف ع الشوايه هو اللي استلم مهمة الشوا..
وراحيل وام الخير ووريده يجهزوا في خبزة الفرن اللي كانت كل مرة ترميها وحده..
والجازيه مقعمزة حداهم على كرسي وتهدرز..
ومياده وبثينه يوتوا فالسلايط..
اما مصباح ونوري كانوا مقعمزين يشربوا في الشاهي ويهدرزوا..
عند مياده وبثينه..
بثينه بإبتسامه:احمد عيونه هني..
مياده بإبتسامه:عارفه..
بثينه:حكالي عياد ع محاولاته مع عمتي مش عارفه هي علاش رافضه هكي..
مياده:ع خاطر قرايتي ومش مقتنعه اني حنقدر نكملها عنده...
بثينه:كلامها فيه وجهة نظر..
مياده:ايه وحتى اني مقتنعه بيها..
عياد بصوت عالي شويه:كملت طرحات الشوا..
ومشي بصونيه كبيره ورفعها وين مافي مرته واخته..
 عياد حط الصونيه وقال:في من تقرموا..
بثينه:فيك انت..
ضحكت مياده..
وعياد قرص مرته من خشمها وهي تضحك...
بعدين حول يده وخدي طرف بطاطا مقليه حطه في فمه..
راحيل وهي شاده صونيه معبيه خبزة:هيا ياعيله تفضلوا..
ناضوا الرجاله ومشوا ناحيتهم..
ولحقوهم النساوين..
راحيل حطت الصونيه وشبحت لأحمد لقاته حاط التليفون ع وذنه وانسحب من حداهم..
هي ضيقت عيونها بشك وقالت في نفسها"اشبح شن في وراه اللي تليفونه مايطيحش من يده..كان طلع يلعب بذيله بنتي والله ماطايل ظفرها"...
.............
احمد:انت لازم تتشجع وتواجه خلاص لأمتى بتقعد هارب منهم؟!..........عمتي راحيل انت تعرفها اكثر مني قلبها مايعرفش الحقد...........حرك راسه يمين ويسار وقال...ربي يهديك ويصلح حالك ماعندي مانقول غير هكي..........باهي باهي.....تصبح على خير..
نزل التليفون...تنهد بضيق ولف بيمشي..
وقف في مكانه جامد لما شاف عمته واقفه وراه تشبحله بعيون متوسعات بصدمه..الدموع غرقوهم....

....يتبع.....