ဦးသာလွန်း အလိုအရသာဆိုလျှင် အရွယ်ရောက်ပြီး အမြီးမပေါက်သေးသော သား၊သမီး နှစ်ယောက်နှင့် ဒေါ်သန်းမြိုင် ဗျာပါသောက များတော့မည်။ ရာဇဝတ်ဝန်ထောက်ဟူ၍ ယုံမှတ်ကာ ပုံအပ်ကာမှ သူမဘဝ တမာရွက်ပြုတ်ရည်ကျဲကျဲလို ခါးသက်သွားရသည်။
ယခု ဒေါ်သန်းမြိုင်က သမီးဖြစ်သူ လွန်းမေကို အိမ်ထောင် ရက်သား ချပေးရန် စိတ်ကူးနေခြင်း ဖြစ်သည်။ သူမ၏ အသိ အောင်သွယ်တော် မမတင်၏ စပ်ဟပ်ပေးမှုဖြင့် မျက်စိကျလောက်စရာ သူငယ်တစ်ယောက်ကို တွေ့ထားလေသည်။
အရွယ်အားဖြင့် နှစ်ဆယ့်ခုနှစ်ဝန်းကျင်ပဲ ရှိကာ ကောလိပ်ဘွဲ့ရ တရားရေးဝန်ထောက် ဖြစ်သည်။ အမည်မှာ ဘရှိန်ဟု တွင်သည်။ မမတင်နှင့်ဆိုလျှင် တူတော်စပ်ပြီး သန့်သော မျိုးရိုးက ဖြစ်သည်။ တစ်ဦးတည်းသောသားဟု သိရပြီး မိဘများကတော့ ကွယ်လွန် သွားပြီဟု သိရသည်။
သတ်သတ်မှတ်မှတ် တွက်ချက်ရကြေးဆိုလျှင် သူမဘက်က အသာချည်းပဲ ဖြစ်၍ ချက်ချင်းမဆိုင်း လက်ခံခဲ့လေသည်။
ဆိုသာဆိုရမည်။ သူမ၏ သား လွန်းမြိုင်ရော၊ သမီး လွန်းမေပါ အဆင်း၊အချင်းနှင့် ပြည့်စုံပြီး လိမ္မာရေးခြား ရှိကြသည်။ ၎င်းတို့ကို ကောင်းမွန်စွာ အိမ်ထောင်ရက်သား ချပေးရန်မှာ ဒေါ်သန်းမြိုင်၏ ရည်မှန်းချက်ဖြစ်သည်။
လွန်းမြိုင်သည် မိခင်ဖြစ်သူ၏ ကျယ်လောင်လောင် အသံကြောင့် အပေါ်ထပ်မှ ဆင်းလာသည်။
မမလေးမှာ သူ့ချစ်သူ ကိုစံလှဆိုသူ ရှိပြီး ဖြစ်၍ မိခင်၏ အစီအစဉ်ကို များစွာ စိတ်ဆင်းရဲနေရလေသည်။ သို့တိုင်အောင် သူလည်း ဘာမှ မတတ်နိုင်။
"လူလေး မင့်မမလေးရော. . .''
ဧည့်ခန်းက ပန်းအိုးကို ရွှေလာ၊ ငွေလာရွက်များထိုးရင်း ဒေါ်သန်းမြိုင်က မေးသည်။
"ဆင်းလာမယ် ပြောတာပဲ''
"ဒီနေ့ ဘယ်မှ မသွားနဲ့နော် လူလေး. . .မင်းယောက်ဖ ဝန်ထောက်လောင်း လာမှာ၊ ရာထူးလေးများ မေးရမလားမသိဘူး၊ မိတ်ဆက်ရင် မိတ်ဆက်ကြည့်''
YOU ARE READING
One Shots by Heather (Myanmar Colonial Era)
RomanceGenre- One Shots (Retro Theme) 1. ဘရှိန်ရဲ့မြိုင် 2. ဘခက်ရဲ့ချစ်ဒုက္ခ 3. ဟော်လိုးဝင်းဖူးစာ
''ဘရှိန်ရဲ့မြိုင်''
Start from the beginning