Once Upon A Dream

1

"ဟေ့ကောင်လေးတွေ ဟေ့ကောင်တွေ"

ဘေးနားကလူတွေဝိုင်းဆွဲတော့မှ သူတို့လဲလူချင်းကွဲရသည်။ ထယ်ယောင်းမကျေနပ်စွာ ခြေထောက်နှင့်တစ်ချက်လှမ်းကန်လိုက်သေး၏။

" မင်းတွေ့မယ် ဟေ့ကောင်"

တစ်ဖက်က မျက်ပေတုံးနှင့်ငနဲက ဆွဲထားသည့်လူတွေကို ရုန်းရင်း ထယ်ယောင်းကို ရန်စကားလှမ်းစသည်။

"အချိန်မရွေးပဲ ဟေ့ကောင်
ဒယ်ဂူ အထက်တန်းကျောင်း တန်းခွဲCက ကင်မ်ထယ်ယောင်း သတ္တိရှိရင် လာခဲ့"

"ဒယ်ဂူအထက်တန်းကျောင်း
တန်းခွဲCက ကင်မ်ထယ်ယောင်း "

ဩဇာသံအပြည့်ပါသော အသံတစ်သံကြောင့် ထယ်ယောင်းဇက်ကလေးပု၀င်သွားသည်။

စိမ်းညိုရောင်ဂျစ်ကားလေးပေါ်မှ သူ့ကို စိုက်ကြည့်နေသော ဆရာကြီးကို မြင်လိုက်ရ၍ ထယ်ယောင်း နှလုံးတွေ ဆောင့်ခုန်သွားသည်။
တစ်ဖက်ကငနဲကတော့ ပြေးတာတန်းနေချေပြီ။

" သတ္တိရှိရင် ရုံးခန်းကိုကြွခဲ့ပါအုံးဗျ နော"

ဆရာကြီးက အံကိုကြိတ်ကာဆိုရင်း ကားကိုမောင်းထွက်သွားသည်။ ဘေးနားလေးမှာ ထိုင်လိုက်သွားသော ကောင်လေးတစ်ယောက်ကို ခပ်ရေးရေးမြင်လိုက်ရ၏။
.
.
.
.
.
မနက်ခင်းတစ်ချိန်နီးပါး ဆရာကြီးဆီမှာအဆူခံလိုက်ရသည့်အပြင် လက်မှတ်လာထိုးကြသော ဆရာမတွေဆရာတွေကပါ အဆစ်ဆူကြခေါက်သွားကြ၍ ထယ်ယောင်းမအီမလည်ဖြစ်နေသည်။

ဘုစုခရုကတည်းကတတ်ခဲ့ကာ ကြီးပျင်းလာရတဲ့ ကျောင်းမို့ ထယ်ယောင်းကိုဆို ချစ်ကြသည် ဆူစရာရှိလဲ အကုန်လုံးဝိုင်းဆူကြခေါက်ကြလေသည်။

" ဘယ်လိုလဲ ခေါက်ဆွဲကြော်က တော်တော်မှအီရဲ့လား "

အတန်းထဲ၀င်လာလာချင်း တန်း၍စသော ဂျန်းယောင်းကိုလျှာထုတ်ပြရင်း ၀င်ထိုင်လိုက်သည်။

" Section Aမှာ ဆိုးလ်ကလာတဲ့ကျောင်းသားသစ်ရောက်တယ်တဲ့ "

အွန်းဆော့က ရေခဲမုန့်တစ်ဇွန်းကိုခပ်ကြီးကြီးသွပ်ရင်း ပလုပ်ပလောင်းစကားလာစသည်။
သူ့ကိုကြည့်ပြီး ထယ်ယောင်းသွားတွေပင်ကျဉ်လာသည်။