حظي العسر

part 8

زينه لبست فستان اسود ساده وضيق من علي الصدر وفي حزام سلفر بيلمع من الوسط ونازل علي واسع وطرحه بنفس لون الحزام و جزمه سمرا بكعب وحطت ميكب خفيف وراحت لكنزي اوضتها وسمعت كنزي وهي بتكلم سيف

كنزي: ماشي يا سيف انا موافقه اتجوزك من وراهم بشرط العقد يكون رسمي عند ماذون
سيف بخبث: دا اهم حاجه ان يكون العقد رسمي دانا اتشرف بيكي قدام الدنيا كلها يا حبيبتي
كنزي: طيب يا سيف اقفل دلوقت وهكلمك بليل عشان في. بيخبط علي الباب
وقامت فتحت لزينه
كنزي بإعجاب: اوووووووو ايه الجمال دا كله يبنتي دانتي طلعتي جامده اوي
زينه بخجل: متشكره اوي دي عنيكي الي حلوه انتي ليه مجهزتيش مش قولتي هنروح فرح صاحبتك
كنزي بحزن: لا انا تعبانه مش قادره اروح في حته متزعليش مني يا زينه
زينه بتفهم: ولا يهمك يا حبيبتي انا كمان مش عاوزه اروح في حته...كنزي انتي مش عاوزه تقولي حاجه انا زي اختك وصدقيني اي حاجه هتكون سر
كنزي بتلعثم: حاجه حاجه زي ايه لا طبعا وصدقيني لو في حاجه هقولك
زينه: الي يريحك يا كنزي بس متعمليش حاجه تندمي عليها فكري كويس قبل ما تعملي اي حاجه
كنزي: انتي قصدك ايه
زينه: ولا حاجه انا بس حبيت اقولك كدا يلا اسيبك ترتاحي بقي( وفي دماغها كانت بتفكر تتصرف ازاي في الي سمعته ومش عارفه تعمل ايه)

تحت في الفيلا عمرو جه وفضل يزعق وينادي علي كنزي وناريمان طلعتله
ناريمان بخضه: في ايه يا عمرو بتزعق كدا ليه ايه الي حصل
عمرو بنرفزه: الست زينه هانم فين عاوزها في مكتبي
ناريمان: في ايه يبني بس قولي حصل ايه
عمرو: في ان الاستاذ سيف جه طلبها مني
ناريمان بغضب: اوعي تكون وافقت علي الواد دا عشان صاحبك
عمرو: اكيد موافقتش
ناريمان باستغراب: غريبه دي انا قولت انت وافقت
عمرو: انتي زعلانه اني رفضته انتي عاوزه ايه بالظبط اوافق ولا ارفض
ناريمان: لا ترفض طبعا بس برضو مستغربه سبب الرفض انا طول عمري بقولك تبعد عن سيف دا لاني مبستريحلوش وانت رافض وتقولي دا صاحبي ليه رفضته
عمرو: مش معني أنه صاحبي اني ائتمنه علي اختي الوحيده سيف مبستحقهاش ولو كت شايفه كويس او حتي في امل يتغير كت وافقت انا بعدي حاجات بمزاجي اه بس مش اهبل

زينه كانت نازله علي السلم وسمعتهم وهم بيتكلمو
ناريمان: طب انت عاوز كنزي ليه هي مالها
عمرو: عشان اكيد البيه مجاتلوش الفكره كدا فجاه اكيد متفقين سوا ولو دا طلع حاصل هي حره
ناريمان: لالا معتقدش ان كنزي تعمل كدا ابدا
عمرو: لا انا بقي اعتقد بنتك معجبه بيه من وهي عيله  وانا كت فاكره لعب عيال وراح لحاله بس الظاهر كدا لا
ناريمان: عمرو ملكش دعوه بكنزي هي مش صغيره انت رفضته وخلاص
عمرو لسه هيتكلم خد باله من زينه الي كانت واقفه علي السلم لسه مش عارفه تقولهم غلي الي سمعته ولالا عمرو مكنش عارف ينزل عينه من عليها كانت احلي مره شافها فيها فضل باصصلها لحد ما هي خدت بالها وبصت في الارض وبدات تنزل السلم وهو لسه باصصلها
ناريمان: عمرو عمرو روحت فين وبصت وراها شافت زينه
ناريمان: بسم الله مشاء الله ايه الجمال دا يا حبيبتي اللهم بارك
زينه بخجل : ربنا يخليكي يا طنط
عمرو : وحضرتك بقي لابسه ومتشيكه وراحه علي فين خير رجعتلك الذاكره وهنخلص منك اخيرا ولا ايه
زينه: انا بس كنزي كانت متفقه معايا نروح فرح بس هي نامت
ناريمان: ولا يهمك تعالي معايا النادي
عمرو بضيق: نادي ايه يا ماما الي هتروحه كدا دا لبس افراح انتي عاوزه تفرجي علينا النادي
ناريمان: وانت مالك انت وبعدين ايه علينا دي انت جاي معانا
عمرو : اومال هتروحي لوحدك يعني
زينه باحراج: احم لا متشكره انا كمان تعبانه وممكن انام شويه
عمرو: :احسن برضو وفرتي
وراح اوضه كان عاملها زي جيم كدا فيها كل الاجهزه الرياضيه

زينه كانت طالعه اوضتها وبعدين لقت اوضه المكتب بتاعه عمرو مفتوحه وسمعت صوت جوا ودخلت الاوضه شافت خيال حد بيتحرك وقبل ما تتكلم حد زقها اتخبطت في المكتب ووقعت اغمي عليها
#يتبع
بقلمي حبيبه وليد