"أسكربتات"

scripte "2"✨

'' بصيت لزياد وأنا مصدوم ..ماكنتش عارف أقول إيه ، حسيت إن الكل ضدي ، ماحدش فاهمني صح ..
إيه اللي يخلّي زياد يقول كدة ، إفتكرت موقف فجأة ! ..لما كنا في رابعة جامعة ، كنا أيام الإمتحانات ، وقاعدين كلنا في الكافيتريا ومروان طبعاً كان موجود وأحمد راح يطلبلنا أكل ، الفضول كان هيموتني عشان كدة سألت مروان وقولتله ..''

= خالد : مروان صحيح ، هو إنت ..لسة بتحب سارة ؟

'' إتفجئ من سؤالي وبعدين قال ..''

- مروان : بتسأل ليه ؟
= خالد : لا عادي عايز أعرف بس ، يمكن تكون نسيتها ومابقتش بتحبها ودي كانت فترة إنت واهِم نفسك فيها مش أكتر
- مروان : لا إتطمن ، أنا صعب أقول كلمة أنا مش حاسس بيها بجد ومش متأكد منها
= خالد : يعني لسة بتحبها ؟
- مروان : أيوة

'' حسيت بنار قايدة في قلبي ..''

= خالد : ماحاولتش تكلمها أو تعترفلها بحُبك ؟
- مروان : لأ طبعاً
= خالد : ليه
- مروان : عشان حرام ، مش عايز ألوّث حبي ليها بفعل ممكن يدمرنا

'' وهنا تدخّل زياد وقال ..''

- زياد : يعني أي واحد بيحب واحدة وبيكلمها كدة يبقي بيلوّث حبهم ؟
= مروان : طبعاً
- زياد : إزاي ؟
= مروان : ربنا سبحانه وتعالي قالك لما تحب واحدة إدخل من البيت علي طول قدام الناس ، حددلك تمشي إزاي لما تكون بتحب حد فالما تبقي بتخالف الشروط دي يبقي حرام ..العلاقات اللي بتبقي بدون رباط شرعي بتبقي مُهلكة وإستنزاف للمشاعر علي الفاضي ، وأنا مش عارف ليه ممكن ناس تعمل في نفسها كدة ، ثم مين قالك إنك هتتجوزها في الآخر ؟ مايمكن أهلها مايوافقوش ، أو أهلك إنت ..يمكن بعد ماوعدتها وهي وعدتك تخلوا ببعض ، طب وكان ليه من الأول ، مش يمكن لو كنت خبيت مشاعرك من الاول وماكلمتهاش كنت تحس بعدها بفترة إن المشاعر دي مش حقيقية وتنساها ، أو وجعها يبقي قليل لما تروح مثلاً لأهلها ويرفضوك ، علي الأقل ماتبقاش شوفت منها الحلو اللي يخليك متعلق بيها ، ولا هي كمان تكون خدت منك وعد معيشها علي أمل اللُقا
= خالد : طب مافيه علاقات كتير بتنجح بالطريقة دي
- مروان : حكمت عليها إزاي بالنجاح ؟
= خالد : إنهم بيتجوزا ، فيه علاقات كتير زي دي بتكمل للجواز
- مروان : مش كل الجوازات ناجحة حتي لو مكملة ، أنا من رأيي إنها علاقات ربنا مش مبارك فيها وطبيعي مش هيبقي مبارك في البيت ، معني إني أعمل ذنب وأكلم واحدة مش من حقي وآتي البيوت من ظهورها وأقعد أكلمها وأحب فيها بكلام مش مُحلل لينا في الوقت دا وغيره وغيره ..يبقي إيه الحاجة الصح في الموضوع عشان يبقي ربنا مبارك فيها ، إنت ماتعرفش شكل بيتهم من جوا بيبقي عامل إزاي ، ماتنخدعش دايماً بالصورة الظاهرية ..وزي مافيه علاقات قليلة بتنجح لحد ماتوصل للجواز علي رأيك ، فيه علاقات أكتر بتفشل ، وبعدين أبقي إزاي بحبها وماحافظش عليها حتي من نفسي ؟

'' دخل هو وزياد مع بعض في دوامة أسئلة ، حسيت إن زياد إتشد ليه وإقتنع بكلامه ، وبعدها قام زياد وسابنا ومسك تليفونه وكان بيكلم حد ، إتأخر علينا ، عشان كدة روحت أناديه ، سمعته وهو بيتكلم ، كان بيكلم إسراء ..''