"أسكربتات"

scripte "2"✨

'' كلنا إتصدمنا تقريباً ، مروان يحب ؟ ..''

= خالد بإندهاش : غريبة بتحب ؟
- مروان بإحراج : ...
= خالد بسخرية : هو الحب بقا حلال يارجالة اليومين دول ولا إيه ؟
- مروان بصرامة : وهو من إمتي كان الحب حرام ياخالد ؟
= خالد : لا مش الفكرة بس أصلك دايماً بتكفّر أي حاجة نعملها وتدينا مواعظ ، فامش مستوعب إنك تيجي في الآخر وتحب
- مروان : أنا عمري ماكفّرت حاجة ، أنا دايماً كنت بنكر المنكر مش أكتر ، ماتعودتش أشوف الغلط وأسكت عشان السكوت دا أنا هتحاسب عليه ، وبعدين فيها إيه لما أحب هو أنا مش بشر ؟ ، من إمتي الحب كان عيب ، أو مين قالك قبل كدة إنه عيب أو غلط
= خالد : اممممم ، وعلي كدة بقا بتتكلموا وبتتقابلوا مش كدة ؟ ، حلال دا برده ياشيخ مروان ؟

'' قرّب مني مروان بجسمه وقالي ..''

- مروان : إنت ليه دايماً بتحاول تطلعني وِحش ؟ ، ليه مش بتديني فرصة أتكلم أو أشرح ؟ ، ليه دايماً بتميل للفِكر الوِحش عني ؟ ، إنت ليه عايز تشوفني وِحش !

'' إستغربت من اللي قاله ، أنا بعمل كدة ؟ ..ماجاش في دماغي أبداً إني ممكن أكون بعمل كدة أو إنه واخد باله ، أنا كنت بعمل كدة من غير قصد ، بدافع الغيرة ..''

- كريم : طب قولنا بقا ، البنت اللي بتحبها معاك في الكلية ؟
- مروان : لأ
- كريم : أمال إيه ؟
- أحمد بإبتسامة : مش هتصدقوا مين
- عمرو : ماتقول ياعم إخلص
- أحمد : فاكرين سارة فريد ؟
- كريم : اللي أصغر مننا بسنتين دي ؟
- أحمد : أيوة ، هي دي

'' إتصدمت جداً ، بصيت لزياد لقيته هو كمان مصدوم وبيبصلي ، ماكناش مستوعبين اللي بيقوله ..''

- أحمد : البنت ماشاء الله محترمة جداً ..ومروان كمان ، أنا من وقت ماقالي وأنا حقيقي مبسوط وشايف إن العلاقة دي هتنجح جداً ، ربنا يرزقك بيها ياصاحبي
= خالد : أنا ماشي

'' ماقدرتش أستحمل أكتر من كدة ، حسيت قلبي بينزف ..حسيت إن مروان بيسرق مني كل حاجة حلوة في حياتي ..''

'' بعد ماحكيت لأحمد لقيته ساكت وسرحان ، وبعدين بَص لزياد وقاله ..''

- أحمد : الكلام دا صح ؟
- زياد : أيوة

'' بصلي وقال ..''

- أحمد : وماقولتليش ليه ؟
= خالد : أقولك إيه وإمتي وفين ؟ ، إنت كنت بتسيب مروان لحظة ؟ ..إنت كنت بتقعد معايا لحظة ؟ ، إنت أصلاً كنت بتسأل عني ؟ ..إنت كنت مع مروان بس ، مادتنيش فرصة أقولك !
- أحمد : ومش ندمان إني بعدت عنك ، مش ندمان إني كنت قريب منه هو
= خالد بصدمة : ...
- زياد : فيه إيه ياأحمد ، أي نعم مروان كان شخص كويس جداً وعمره ماآذانا في أي حاجة بس خالد كمان صاحبك ، إحنا كمان صحابك ، إنت صاحبتنا أكتر ماصاحِبت مروان ومع ذلك عمرك مادافعت عن واحد فينا بالشكل دا
- أحمد بسخرية : إيه دا بقا ، إنت كمان غيران ولا إيه ؟ ، دا إنت في آخر سنتين الجامعة كنت قريب من مروان وعرفت كويس إنه يستاهل كل الحُرقة اللي أنا محروقله عشانها ، دا أنا متهيألي إنه كان السبب بعد ربنا إنك تتجوز مراتك ، دلوقتي مروان بقا كُخة وخالد هو اللي حلو وأنا جاي عليه ، إنت نفسك قولتلي إن خالد غيران من مروان وبيكرهه
= خالد بصدمة : إيه !!