"أسكربتات"

scripte "2"✨

'' بصيتله شوية وبعدين قولتله ..''

= لأ ! ، أحمد مش معايا أصلاً ، أحمد غرقان مع مروان

'' كان صعبان عليا إن سر زي دا أقوله لزياد وأحمد لأ ، بس هو اللي قرر يبعد ..
كنت بفكر كتير في الكلام اللي قالهولي زياد وإني أقطع علاقتي بكل البنات ، الموضوع كان صعب عليا جداً لإني كنت مصاحب شكاير بنات ، بس كنت بحاول كتير جداً ..لإني عارف ومؤمن إن سارة تستاهل حد يكون مايعرفش غيرها ، حد يكتفي بيها ..
وفضلت بحاول لحد مابقينا في 2 جامعة ، بما إن مجامعنا كلنا كانت زي الزفت في ثانوية عامة خصوصاً إن كلنا كنا علمي علوم دخلنا كلنا تجارة إلا مروان المتفوق طبعاً دخل صيدلة ..
وكالعادة كل يوم كان أحمد يكلم مروان ويجيبه يقعد معانا في الكافيتريا ، وكالعادة أنا لسة بتضايق من وجوده ..كنا بنتكلم في حاجات كتير ومواضيع مختلفة ، مروان كان متغير ..وأغلب الوقت ساكت ، فاقولتله ..''

= خالد : إيه يامروان ماحدش سامعلك صوت ليه ، ماتقول حاجة ياأخي ..إوعظنا شوية طيب أو كفرنا وقولنا إن العصير اللي بنشربه دا حرام مثلاً بدل مانت ساكت كدة

'' بصلي وماردش ولا كان فيه أي تعبير علي وشه ، قال أحمد ..''

- أحمد : والنبي ياجماعة سيبوا مروان في حاله اليومين دول
- مروان : إيه والنبي دي ؟ ، مش قولتلك قبل كدة '' مَن كَانَ حَالِفاً فليَحلِفُ بِاللّهِ أَو لِيَصمُت ..''
- أحمد : أستغفر الله العظيم ، حاضر أنا لسة بس مش متعود

'' إتضايقت جداً من اللي قاله ، وإتضايقت أكتر إن أحمد بيطيعه ..''

= خالد بضيق : إيه يابني دا ، إنت مش بتعرف تقول جملة عادية من غير ماتوعِظ ؟
- مروان : وهو حرام إني أوعظ ؟ ، حرام أشوف حاجة غلط وأحاول أصلّحها ؟ ..ولا هو بقا من الطبيعي إن الواحد يسمع حاجة غلط وهو عارف تصحيحها ويسكت ؟
- كريم : ماتصلوا عالنبي ياجماعة مالكوا سخنتوا علي بعض ليه كدة ؟

'' سِكتنا ، عمرو غيّر الموضوع وقال ..''

- عمرو : إنت كنت بتقول حاجة ياأحمد عن مروان ، كنت بتقول إنه مش مظبوط اليومين دول ، ليه ماله ؟

'' إبتسم أحمد وبَص لمروان وقاله ..''

- أحمد بإبتسامة : أقولهم ولا إيه ؟

'' برقله مروان وقال ..''

- مروان : أحمد ، إسكت من فضلك

'' كمان بقا فيه بينهم أسرار ؟ ..''

- أحمد : ماأقول ياعم عادي دول صُحابنا
- كريم : فيه إيه يامروان إنت مش واثق فينا ولا إيه ؟
- مروان : مش موضوع ثقة بس ..يعني الموضوع خاص شوية
= خالد بغيرة : ومادامه خاص بتحكيه لأحمد ليه ؟
- مروان : عشان أنا وأحمد واحد
= خالد بضيق : ...
- زياد : ماشي ياسيدي كتر خيرك ، ربنا يخليلك أحمد
- مروان : ياجماعة الموضوع مش كدة ، بس يعني ..
- أحمد مقاطعاً : خلاص بقا ياعم ، ماتقلقش منهم أنا واثق فيهم ، هقول بقا
- مروان بتنهيدة : ...
- أحمد : أصل ياجماعة مروان بيحب واحدة وولهان اليومين دول