"أسكربتات"

scripte "2"✨

= خالد : مش لازم تتقال باللسان ياعمرو ، وإنت فاهمني كويس !
- أحمد بغضب : إنت لسة بتبرر لنفسك ! ، إنت لسة بتقاوح ؟ ، لسة مش شايف نفسك شخص أناني ومؤذي
= خالد : عشان أنا مش كدة ! ، أنا مش وِحش للدرجادي ياأحمد وإنت أكتر واحد عارفني
- أحمد : كنت فاكر إني أعرفك ..بس إتضح إني غلطان ، إنت كنت بتكره مروان وكنت دايماً بتبص للي في إيده و...
= خالد مقاطعاً : إنت بتقول إيه ، والله ماكنت بكرهه والله عمري ماكرهته ..ثم إيه كنت بابص للي في إيده دي ؟
- أحمد بسخرية : إنت مش خطبت سارة برده ؟ ، اللي كان بيحبها ..واللي هي كمان كانت بتحبه ؟ وإنت كنت عارف دا كويس أوي

'' إتصدمت من إنه قال إن سارة كانت بتحبه ، معقول ؟ لا مش ممكن ، سارة لو كانت بتحبه ماكنتش هتوافق ترتبط بيا وهي عارفة إني صاحبه ، بصيتله وإبتسمت بسخرية وقولتله ..''

= خالد بسخرية : عرفت إني كنت صح لما قولت إنك فعلاً بعدت عني ..

'' قولتله مبرري ، وحكيتله يوم ماكلمت زياد وإحنا في ثانوي عشان يجيلي البيت عشان كنت عايزه في موضوع مهم ..''

= خالد بضيق : إتأخرت كدة ليه ؟
- زياد : ياعم لا إتأخرت ولا حاجة إنت اللي مستعجلني مش عارف علي إيه
= طب إقعد عايزك في موضوع
- قعدت ، خير عايزني في إيه
= بُص ومن غير مقدمات ..أنا بحب
- امممم ، وبعدين ؟
= هو إيه اللي بعدين ؟ ، إيه البرود واللامبالاة اللي إنت فيها دي ؟
- أعملك إيه يعني أتحزم وأرقصلك ؟
= ماتتكلم عِدل يازياد فيه إيه
- إنت اللي فيه إيه ، إيه الجديد في اللي إنت بتقوله ؟ مانتَ طول عمرك بتحب وبتاع بنات ، كل شوية تحب واحدة وتقعد معاها يومين وبعدين تسيبها وتروح للي بعدها
= لا يازياد لأ ، المرادي مختلفة ..المرادي أنا بحب بجد ، مش عايز أكلمها ومش عايز أقضي معاها يومين وأسيبها ، أنا عايز أكمل معاها يازياد ..يعني تبقي مراتي ، إنت فاهم ؟
- أنا فاهم بس مستغرب شوية ، وهي مين بقا دي ؟
= سارة ..سارة فريد البنت اللي في أولي ثانوي
- دي عيّلة !
= بسخرية : ماحنا كلنا عيال يازياد إحنا هنستعبط علي بعض
- طب إنت عايز مني إيه يعني ؟
= عايزك تقولي أعمل إيه ، أنا إخترتك إنت عشان عارف إنك حبّيب قديم ومن يوم ماعرفتك وإنت بتحب البت إسراء جارتكوا دي ونحنوح معاها
- بصرامة : أولاً لما تتكلم عنها تتكلم بأدب أحسنلك ، ثانياً ياريت ماتجيبش سيرتها من الأساس علي لسانك أحسنلك برده
= بسخرية : ماشي ياعم الغيور ، قولي بقا أعمل إيه ؟
- كلّمها قولها ..
= لأ ، مش حاسس إنها هترد ..مش حاسس إنها من البنات دي ، سارة محترمة
- خلاص ، خليك إنت كمان محترم
= بإستغراب : قصدك إيه ؟
- قصدي تحترم نفسك وتفكك من الصياعة مع البنات علي الفاضي والمليان ، مادام بتحب واحدة خليك مُخلص لها ..عشان لو هي مُحترمة عمرها ماهتوافق بعدين إنها ترتبط بواحد مقضيها ..
= ...
- قولي صحيح ؟
= نعم
- إنت ماقولتش الحوار دا لحد من صحابنا ؟
= لأ ومش ناوي أقول ، ولا إنت كمان تقول
- ليه ؟
= عشان هيستلموني تريقة
- يعني مش هتقول حتي لأحمد ؟