"أسكربتات"

scripte "2"✨

'' إتزلزت ، إتهزيت جداً من جوايا خصوصاً إنه كان بيبصلي ..''

= خالد : للدرجادي ؟
- أحمد : وأكتر بكتير صدقني ..إنتوا جايين ليه ؟
- عمرو : عايزين نتكلم معاك
- أحمد : تتكلموا في إيه ، إيه اللي مابينا عشان نتكلم فيه
= خالد : أحمد أرجوك إسمعنا
- أحمد بغضب : أنا مش عايز أسمع حد خصوصاً إنت ، إنت فاكر إني نسيت اللي عملته في مروان ولا إيه
= خالد : عشان كدة إنت محتاج تسمعني ، محتاج تسمع مبرري
- أحمد : إنت بجد مصدق نفسك ؟ مصدق فيه تبرير للي عملتوه كلكوا ..إنت كنت بتكره مروان ، كنت بتغير منه وبتحقد عليه ..عمرك ماحبيته رغم إن هو كان بيحبك جداً ، تحب أفكرك من إمتي وإنت بتكرهه ؟
= خالد بحزن : ...

'' الموضوع كان صعب شرحه وهو أصلاً مش مديني فرصة ، زعلان جداً للحال اللي وصلنا ليه ، وزعلان إن أنا وأحمد واقفين قصاد بعض دلوقتي الوقفة دي ..إفتكرنا كلنا الذكريات القديمة ..اللي بدأت من أول ماعرفنا مروان تقريباً ..''

'' كنا في الأجازة مستنيين نتيجة الثانوية العامة ، كان لينا مكان مخصص بنتجمع فيه ، مكان متداري عن عيون الناس ..عشان نقدر نشرب فيه سجاير وماحدش يشوفنا ويقول لأهالينا ..''

- زياد : هاا ياخالد جبت السجاير
= خالد بإبتسامة : جبت الأحلي ..حشيش !
- عمرو بصدمة : يخربيتك ، هي وِصلت للحشيش ؟
= خالد : ياسيدي أهو بنجرب
- كريم : لا أنا مش هجرب ، أنا خايف
= خالد : يانُغة ، ماتنشف ياض وتسترجل كدة خايف من إيه
- زياد : ياخالد إحنا بنخاف نتقفش وإحنا بنشرب سجاير ، تقوم توصل لحشيش ؟
= خالد بضيق : بقولكوا إيه أنا مش عايز صداع أنا هشرب ، عايزين عايزين ، مش عايزين إنتوا أحرار ماتوجعوش دماغي

'' وطلعت سيجارة حشيش وولعتها وشربتها قدامهم ، وهما قعدوا يبصوا لبعض ويبصولي ، لحد ماقال عمرو ..''

- عمرو : خلاص هات سيجارة
- زياد : وأنا كمان
= خالد بإبتسامة : أيوة كدة

'' ووديت لكل واحد منهم سيجارة وبعد كدة بصيت لكريم وقولتله ..''

= خالد : وإنت يانُغة هتاخد ولا لأ ؟
- كريم بتأفف : هات ياعم

'' وخد سيجارة ، وقعدنا نشرب كلنا وكنا مُستمتعين ..''

= خالد : هو أحمد ماجاش ليه ؟
- عمرو : كلمته قبل مانت توصل علي طول ..قالي هيروح يجيب مروان ويجي
= خالد بضيق : ويجيب مروان ليه ؟
- عمرو : عادي يعني ياخالد إيه المشكلة
= خالد : أنا مش فاهم إمتي مروان دا بقا صاحِبنا عشان كل مانخرج يلزقلنا
- زياد : إنت اللي واخد منه جمب ماحدش فاهم ليه
- كريم : أو يمكن بتغير منه
= خالد : ماتظبط ياض لاظبطك ، مين دا اللي أغير منه وأغير منه علي إيه إن شاء الله
- كريم : حد فاهملك بقا

'' أنا فعلاً كنت بغير منه وبتضايق منه جداً ومن وجوده معانا ، عشان دايماً كنت حاسس إنه أحسن مننا ، واللي كان بيضايقني أكتر وجود أحمد معاه ، أحمد دا صاحبي أنا ! ..''