"أسكربتات"

scripte "2"✨

= أحمد ..إزيك عامل إيه ؟

'' بصلي ، نظرته ليا كان فيها شئ من الإحتقار ، وبعدين رجع بصيلنا كلنا وقال ..''

- أحمد : طلباتكوا ، تشربوا إيه ؟
- كريم : أحمد إنت لسة مش عايز ترد علينا ؟
- بتنهيدة : من الواضح إن ماحدش فيكوا عايز يشرب حاجة ، لما تحبوا تطلبوا حاجة أنا موجود هناك ، إبقوا نادوني ..أو نادوا حد من زمايلي ، عن إذنكوا

'' كان لسة هيمشي ، مسكت إيده وقولتله ..''

= بحزن : أحمد رد عليا ، أنا خالد ..صاحب عمرك

'' بص لإيدي اللي ماسكة إيده وبعد كدة بصلي وعينه ماليها الغضب وقال ..''

- أنا صاحب عمري مات من زَمن وإنتَ عارف ، إنتَ بس يمكن عشان ماحضرتش جنازته ناسي إنه مات ، أو ناسي إن هو صاحب عمري ..عن إذنك

'' وبَعد إيدي عنه ومشي ، كلنا كنا ساكتين ..كلنا إتأكدنا إن جرح زمان لسة موجود في قلوبنا ، لسة بيوجع ..خصوصاً في قلب أحمد ، قاطع الصمت دا صوت آذان العِشاء ، قال عمرو ..''

- عمرو : ماتيجوا نروح نصلي

= قومنا كلنا وقررنا نروح نصلي في مسجد جمب الكافيه ، أحمد خرج من الكافيه قبلنا وكان ماشي قُدامنا ورايح المسجد دا ، إتفاجئنا إن هو اللي هيبقي الإمام وهيصلي بالناس في المسجد ، وكنت مبسوط إن هو هيبقي إمامي ..صلينا العِشاء ، بعد الصلاة روحتله ووقفت قدامه ومديت إيدي ليه وقولتله ..''

= خالد : تقبل الله

'' بَص لإيدي الممدودة وبعدين بصلي ، وسابني ومِشي ..إتنهدت بحزن ، وبعد كدة روحت للشباب وخرجنا من المسجد ووقفنا مع بعض ، قال زياد ..''

- زياد : طيب إحنا كدة هنتقابل تاني ولا لأ ؟
- عمرو : لا طبعاً هنتقابل تاني إن شاء الله ، إيه رأيكوا الأسبوع اللي جاي ؟
= خالد : تمام ماعنديش مشكلة

'' وإتفقنا كلنا عاليوم وإننا هنتقابل في الكافيه برده ..ومشينا ، قررت أروح لسارة ..خطيبتي ، كلمتها وقولتلها إن أنا جاي ، روحتلها وقعدنا مع بعض ، كان واضح جداً إني متأثر بمقابلتي لأحمد ..''

- مالك ياخالد فيه إيه ؟
= مافيش حاجة
- حصل حاجة بينك وبين صُحابك زعلتك ؟
= يعني ..مش بالظبط !
- يعني إيه مش بالظبط ؟
= قابلت أحمد
- وهو أحمد ماكنش معاكوا ؟
= أحمد رافض يرد علي أي حد فينا أو يقابل حد فينا ..حتي أنا ، قابلناه صدفة في الكافيه اللي كنا فيه ، بيشتغل جرسون هناك
- طب هو مقابلته ليكوا كانت عاملة إزاي ؟
= جافة جداً ، ولا كإنه كان يعرفنا
- للدرجادي ؟
= بتنهيدة : وأكتر

'' سِكتت وهي بصالي ، كنت شايف كلام كتير في عنيها ..سؤال محبوس جواها عايزة تسأله من وقت ماعِرفت إن أنا وأصحابي بِعدنا عن بعض ، وفي الآخر ماقدرتش وسألته ..''