"أسكربتات"

scripte "2"✨

= خالد : السلام عليكم دار قومٍ مؤمنين ، وإنا إن شاء الله بكم لاحقون ، أسالُ الله لنا ولكم العافية

'' روحت علي قبره وقعدت قدامه ..''

= خالد : إزيك يامروان عامل إيه ، أنا عارف إنك سامعني دلوقتي ، واحِشني جداً يامروان ، أنا آسف إني ماجيتلكش بقالي كتير ، بس أنا كل مابجيلك ببقي مكسوف منك ، ومكسوف من اللي عملته زمان ..إنت بجد سامحتني يارب ؟ ، أتمني تكون سامحتني ..أنا مش عارف أعيش يامروان ، مش مبسوط ، حاسس إن ربنا لسة غضبان عليا ..بيقولي مش كنت عايز تخليه مش في وعيه وتصوره فيديو وتنزله عشان الناس كلها تعرف إنه مش كويس ؟ ، طب هخليك إنت بقا تقع في الحفرة دي وأخلي الناس أولهم صُحابك مايصدقوش كلامك ويفتكروك شخص مش كويس

'' وقعدت أعيط ، عيطت كتير أوي وأنا بشكيله حالي ..''

= خالد ببكاء : أنا متضايق يامروان أوي ، أنا بقيت بتمني الموت ..أنا نِفسي أموت وأخلص من العذاب دا
- إن شالله أنا وإنت لأ

'' بصيت ورايا لقيته أحمد ، كنت مصدوم جداً ..قعد جمبي وبعدين قرب مني وباس راسي وقال ..''

- أنا مصدقك ..

'' سكت قواني ، وقال ..''

- وحشتني

'' ماقدرتش أمسك نفسي ، عيطت أكتر وحضنته وهو كمان عيط ..يالله ! ..
قعدنا نتكلم ونصفي كل حاجة ومروان شاهد علي كلامنا ، أحمد صدقني وإتصفينا ، هنرجع نبقي صحاب تاني ..''

- أحمد : صُحاب علي الطاعة ، مش هسيبك تاني ، مش هبعد عنك وأخليك تحس إني تخلّيت عنك
= خالد : مش هفكر بغباء تاني ، عمري ماهفكر في أذية حد تاني

'' وقومنا ، روحنا سوا ..
بس كان ناقص حاجة لازم نعملها ، لازم أروح لوالدة مروان وأعترفلها ولو حبت تبلغ عني هي وراحتها ، روحنالها كلنا بعد ماكلمنا الشباب أنا وأحمد وبعد ماهو صفي معاهم القديم لما سيبتهم ومشيت ..
روحنا بيت مروان وقعدنا مع والدته ، كانت فرحانة بينا وبوجودنا لاننا من ريحة مروان ، كنت محرج أعترف بس في النهاية تمالكت نفسي وقولتلها ، إعترفتلها باللي عملته ..وجبت الذنب كله عليا ، قولتلها إن إنا حتي اللي جيبت البدرة ، كانت بتعيط ، ولما خلصت كلامي قالت ..''

- ببكاء : الحمد لله ، يعني مروان ماتعاطاش حاجة بمزاجه ؟
= لأ
- ببكاء : الحمد لله يارب ، الحمد لله ..أنا كنت عارفة إن إبني مايعملش كدة
= لو حضرتك عايزة تبلغي عني أنا هاجي معاكي و...
- مقاطعةً : أبلغ إيه بس ، مروان الله يرحمه خلاص مات ..وأنا اللي يهمني إن هو ماكنش مدمن ، وإنت كمان ماكنش قصدك وأنا مصدقاك ، وإلا ماكنتش جيتلي وإعترفت ..أنا مسامحة ، مسامحة وقلبي راضي ، وبعدين ياواد مروان كان بيحبك ..أنا أعمل في حد كان بيحبه مروان كدة ؟

'' قومت وروحت بوست إيديها وراسها ، وإعتذرتلها كتير ..
ووعدتها إن أنا والشباب مش هنسيبها وهنيجي نزورها علي طول ، زي ماوعدنا بعض كلنا إننا هنزور مروان دايماً ، كل جمعة هنكون عنده ..''

= خالد : ولا الضالين ..آمين

'' دي أول جمعة نروح نزور فيها مروان ونقراله الفاتحة ، أول مرة نروحله كلنا وإحنا متجمعين وبقينا صحاب ومعاهدين بعض إن إحنا هنبقي صُحبة تعين بعض علي الطاعة ..
روحت البيت بعد ماقضيت يومي معاهم وفتحت الفيس بقلب فيه لحد ماإتفاجئت بصورتنا أنا والشباب وإحنا واقين قدام قبر مروان وكاتبين فوق الصورة ..''

'' ‏اللهم صحبةٌ إن متنا لا نمُت بِداخلهم ❤ ''

'' إتبسطت جداً لما شوفتها ، أخدت الصورة وبعدتها لصحابي علي الجروب ، كلنا كنا مبسوطين بيها ، وكلنا أكدنا إن مروان عمره ماهيموت في قلب كل واحد فينا ، أثر مروان في قلوبنا عمره مايتمحي ..لا الأيام تقدر تمحيه ولا حتي الذاكرة ..
قاطع تفكيري في مروان وصول رسالة من سارة ، قريتها في النوتفيكيشن من فوق ..''

- بقالَك أكبر من إسبوعين ناسي دبلتك معايا ومابتسألش عنها ، إبقي تعالي خُدها ..
صحيح كنت عايزة أقولك ، أنا عمري ماحبيت مروان والحقيقة إن هو عمره مالفت نظري إطلاقاً ، إنت اللي كنت دايماً لافت نظري رغم إن كل حاجة وحشة كنت بتعملها كنت بعرفها ، سُمعتك كانت زي الزفت سوري يعني ..من مشي مع البنات وشرب سجاير وحشيش وغيره وغيره كنت عارفاه ، وكنت دايماً بدعيلك تتغير وتبقي أحسن ..كنت دايماً بدعيلك إنك تبقي زي مروان ، وتبقي بتمني إنه يأثر عليك بما إنكوا كنتوا صحاب ، ماكنتش أعرف إن موته هو اللي هيأثر عليك ويغيرك ..
أنا ماوافقتش بيك غير لما إتأكدت إنك إتغيرت وسيبت كل حاجة غلط كنت بتعملها ، خليت بابا يسأل عليك كتير جداً ..وأنا صليت إستخارة أكتر من عشر مرات تقريباً عشان أتأكد من الراحة اللي في قلبي من ناحيتك دي كل مرة ، أنا وافقت بيك وأنا مرتاحة وراضية وواثقة فيك ومصدقة إنك إتغيرت ، اللي شوفته منك هو اللي بيقول كدة ..ممكن بقا ترجع تاخد دبلتك ؟

'' إتنهدت براحة وسعادة وبوست التليفون من فرحتي ..الحمد لله إن ربنا أكرمني بسارة ، وأكرمني بصحابي ..وخلاني في يوم أقابل مروان ..''

'' أنا دايماً بقول إن الصحاب دول هما الحظ الحلو في الدنيا ، لازم ننقيهم بعناية وبخوف وبحذر شديد ..ومدام قررت إني أصاحبك وقررت إنك تكون صاحبي ماينفعش أشوف غلط وأسكت عليه ، عشان بحبك وعشان المفروض إننا بنعين بعض علي الصح هنصحك وهحاول معاك مرة وإتنين وألف عشان ترجع ..
أنا بشوف الغيرة علي الصحاب حق ، والطرف اللي قدامي هو اللي بيحددلي غيرتي دي توصل لفين ..لانك صاحبي ولانك غالي عندي مش هستحمل أشوف حد ياخدك مني ، مش هطيق أشوفك مُنسحب مع حد تاني وسايبني ، الصاحب هو اللي بيزرع في صاحبه الغيرة ..
خلوا بالكوا من صحابكوا ، إتجمعوا دايماً علي الطاعة ..حسسوهم في وجود حد غريب بينكوا إنهم لسة غاللين عندكوا وإنكوا بتحبوهم ، الغيرة ممكن توصل لأفعال مؤذية ومدمرة جداً ..وإفتكروا دايماً أهم حاجة ..صاحبك دا ياهيدخلك الجنة ، ياهيرميك في جهنم ..فاخلوا بالكوا إنتوا مصاحبين مين ، وخلوا بالكوا من إحساسهم ومشاعرهم ناحيتكوا ..''

'' لا أُحلّل الإقتباس من دون الإسم ..🌻 ''

#حكايَاتنا_سوا
#هالة_أحمد