"أسكربتات"

scripte "2"✨

'' وبعد كدة ضحكنا ومشي ، وفضلت أنا واقف في المطبخ ..بفكر في اللي كنت هعمله وفي اللي قالهولي أحمد ، لحد ماتفاجئت بمروان جايلي المطبخ ، وقف قدامي وقال ..''

- مروان : أنا كنت عايز أتكلم معاك شوية ممكن ؟

'' إستغربت جداً ، عايز يتكلم معايا في إيه ..''

= خالد بتنهيدة : خير ؟
- مروان : إنت ليه بتكرهني ؟
= خالد بإستغراب : أنا مابكرهكش ، ليه بتقول كدة
- مروان بإبتسامة : بس مابتحبنيش
= خالد : ...
- مروان : أنا عارف إنك مابتحبنيش ولاحظت كدة كتير من كلامك معايا ، ويمكن كمان تكون مابتحبش وجودي ، وآنا آسف جداً لدا ..أنا عارف إني ماحاولتش أكسر الحاجز دا بينا وحسيستك إني جاي أخطف أحمد منك
= خالد بصدمة : ...
- مروان بإبتسامة : عارف أنا من أول ماشوفتك وأنا معرفش ليه كنت حاسس إننا هنبقي صحاب جداً وإنك هتبقي أقرب صاحب ليا ، بس إعترف إنت كمان ، إنت كمان مادتنيش فرصة ..ومع ذلك أنا لسة عندي الإحساس دا رغم إن كل الظروف بتقول عكس كدة ، بس أنا عايزك تبقي صاحبي ياخالد ، أنا بحبك يلا أوي
= خالد : بتحبني فعلاً ولا دا أي كلام ؟
- مروان بضحك : والله العظيم أبداً ، وبعدين إنت عارفني أنا مش بكدب ، الكدب حرام
= خالد بضيق : ياباي ..ياأخي إسكت بقا كفاية وعظ بقا

'' ضِحك ، وأنا كمان ضحكت ، حسيت مروان فعلاً شخص كويس بس أنا اللي ماكنتش واخد بالي ..حضني ! ، كنت مستغرب بس كنت مبسوط ، وحضنته أنا كمان ، مش عارف إزاي كنت عايز أأذيه ، بصيتله وقولته ..''

= خالد : هقولك جملة مش هقولهالك غير مرة واحدة في عمري كله
- مروان : إيه هي ؟
= خالد : لو طلعت سارة في الآخر من نصيبك ، يبقي يابختها بيك
- مروان بإبتسامة : ....

'' وبعد كدة سيبته وخرجت في البلكونة ، اللحظة دي كانت فارقة جداً في حياتي ، نقطة تحول كبيرة ..فكرت في كل حاجة في حياتي أولهم سارة ، سارة فعلاً تستاهل واحد زي مروان مش أنا ، عالأقل هو واحد محترم وبتاع ربنا وفي حاله ، مش زي اللي بيشرب حشيش وصايع وكان يعرف بنات بالهبل وفي الآخر عايز يتجوز واحدة زي سارة ، طب هي هتختارني علي إيه بس ، فيا إيه حلو يميزني ؟ ..بس لأ ! ، أنا مش هسيب نفسي كدة أنا لازم أتغير وأتوب عن كل القرف اللي بعمله دا ..عشان نفسي ، أنا حابب أكون زي مروان ..ضحكت ! ، ماكنتش فاكر إني ممكن كنت أقول الجملة دي في يوم ..
قعدت حوالي نُص ساعة في البلكونة ، لحد مافجأة سمعت صريخ العيال من برا وبينادوني ، إتخضيت جداً ..خرجت جري لقيت مروان في الأرض بيتلوي من الوجع ووشه أحمر جداً ، إتصدمت ..إفتكرت العصير ! ..''

= خالد بصدمة : هو شرب العصير ؟
- زياد : شِربه ، الله يخربيتك إنت قولت إنك مش هتحط غير شوية بس

'' إزاي ماخدتش بالي ؟ ..إزاي ماكبتش العصير ؟ ، إزاي سيبته في المطبخ لوحده وكوباية العصير قدامه ؟ ، حريت عليه ومسكت دماغه ..''