"أسكربتات"

scripte "2"✨

'' كنت حاسس إنه عبء كبير علي قلبي ، ذنب شايله ولسة هاشيله طول عمري ، أنا ماكنتش عايز أموته ولا كنت عايزه يشرب العصير ، أنا تراجعت في الآخر ..''

'' كنت متضايق جداً من مروان ، كنت بجد مش طايق وجوده معانا في شلتنا لما حسيته بيسحب واحد واحد ليه ، خصوصاً لما فجأة كلهم قرروا إنهم مش هيشربوا سجاير تاني ولا حشيش ، حسيت أني لوحدي ..
يوم ماتخرجنا وظهرت نتيجتنا كنا فرحانين جداً إننا خلاص مافيش تعليم تاني ، وقررنا نروح شقتي نسهر فيها ..كانت شقة بتاعة بابا بس ماحدش كان فيها ، وأنا من وقت للتاني كنت باخد صحابي وبنروح نسهر فيها ، كنت متفق مع صحابي من قبلها إننا هنتقابل في الشقة ، وكنت متفق مع عمرو إنه يجيبلي كيس بدرة من واحد ديلر هو عارفه ..وصلنا الشقة إحنا الأربعة قبل ماأحمد ومروان مايجوا ، طلع عمرو الكيس ووداهولي ..''

- عمرو : أهو الكيس ، قولي بقا ناوي علي إيه
- كريم بصدمة : يانهار زي الزفت عليكوا وعلي دماغكوا ؟ ، إيه دا ؟
- زياد بصدمة : إنتوا بتتعاطوا المخدرات دي ؟!
= خالد : بنتعاطي إيه وزفت إيه إنتوا إتجننتوا ؟
- زياد : أمال جايبه ليه ؟
= خالد : دا عشان مروان

'' بصولي كلهم بإستغراب ..''

- عمرو : إنت ناوي علي إيه ياخالد ؟
= خالد : هقولكوا ، بس ماحدش يقول لأحمد حاجة ..ولا طبعا لمروان
- قول
= خالد : أنا هحط حبّة من الكيس دا في كوباية عصير وأديها لمروان يشربها عشان يغيب عن الوعي ويهلوس وساعتها أنا هصوره فيديو وأنزلهوله علي النت وبس كدة
- كريم بصدمة : وليه عايز تعمل كدة
= خالد : عشان يبطل يعمل فيها دور الواعظ ويبطل يسحبكوا مني واحد ورا التاني
- زياد بصدمة : يخربيت شيطانك ياأخي ، إيه اللي إنت بتقوله دا ؟
= خالد : بقولكوا إيه إنزلوا من علي دماغي ماحدش له دعوة
- عمرو : بالظبط يبقي إنت اللي هتتحمل نتيجة اللي هتعمله دا ولوحدك
= خالد بسخرية : عارف ياخويا

'' كنت عايز أشوّه صورته ، عايز أطلعه شخص مش كويس وإتمنيت إن سارة هي كمان تشوف الفيديو عشان ماترتبطش بيه بعدين ..شوية وجم وقعدنا كلنا مع بعض كنا بنتكلم ونضحك ومبسوطين ، بالذات أنا ..شوية وقومت عشان أعملّنا العصير ، عملته وبعدين طلعت من المطبخ وقولت لأحمد ..''

= خالد : بقولك إيه ياأحمد ماتروح تجيبلنا أكل

'' ماكنتش عايز أحمد يبقي موجود في اللحظة دي ..''

- أحمد : طيب ، بس هات العصير اللي إنت عملته دا ، أنا سامع صوت الخلاط
= خالد بغضب : ياسيدي روح الأول وتعالي هسيبلك كوباية
- أحمد : إنت هتجيب العصير نشربه دلوقتي ولا مش هروح خالص ؟
= خالد بتذمر : طيب

'' دخلت المطبخ وصبيت العصير في أربع كوبايات بس ، وخرجت لهم وديت أحمد وعمرو وزياد وكريم ، وقولت لمروان ..''

= خالد : معلش يامروان مالناش نصيب في العصير دا ، هدخل أعملي أنا وإنت كوبايتين دلوقتي
- مروان : تمام مافيش مشكلة