جذبني فمك البني

البارت الثامن والثلاثون

ام سامر : مادام صارت كعده وعقد اذا اختج عدها فستان خليها تلبسه وتكعد هم يلبسون النيشان وهم ياخذون صور هيه هوسه هوسه اليوم ، والشي من يفوت تموت لذته..

فردوس : اي والله صحيح كومي سيلين بدلي هدومج عندج هوواي ملابس حلوه..

رحت لزمت اختي من ايدها وصعدنه دخلنه لغرفتنه كعدت على الجربايه واني طلعت فستانها اللي لبسته بعرس ضيغم وملاك ، نزعتها ولبستها وهيه مثل اللعابه بيدي بس صافنه ، جبت مكياج اريد اعدل وجها اخلي الكحله وترد تتليص بالدموع مالتها..

ايفين : شبيج حبيبتي شنو مفرحانه.

رفعت عينها وكالت ..

سيلين : عمج ذبحني اليوم.

ايفين : ليش شسوه.

سيلين : من باسني كال مبروك يا اغلى البشر من اليوم اني ابوج مثل احساسج ومثل ما طلبتي بس ابوج تعب ادعيله تعدي عليه سلامات وعافني وطلع يافرحه الي تضل بداخلي بعد السمعته واصلا اني مفرحانه وانتي تدرين واني ادري وهو يدري بس تغالطون نفسكم.

دنكت وكعدت بالكاع خليت ايدي على ركباتها وكتلها.

ايفين : ليش وافقتي اذا انتي مو سعيده.

سيلين : افونه كلشي بالدنيا يهون اله الكرامه اذا نجرحت تروحين برجلج للنار وتتركين الجنه بأهلها هاي من جهة و من جهة ثانيه بعد صعب ارجع اعيش بنصكم بعد ماعرفت مشاعر عمو اتجاهي تدرين اليوم هنا كاعد يمر عليه بسنه ، النضره راح تصير حرام والهمسه والكعده حتى انفاسنه اذا اختلطت سوه هم حرام ، انطيني حل واني اترك كلشي ..

ايفين : هم صحيح الله يساعدج اني مافكر هيج مثلج.

سيلين : كومي ننزل هسه يصيحونه

ايفين : اي يلا كومي ...

نزلنه وهيه كل شويه تريد تعثر بثوبها ، شكد حلوه ونازكه بس ملامح الحزن مخيمه عليها وظلمت ملامحها دخلنه للأستقبال جان سامر كاعد شافها ابتسم وكاملها وصل يمها لزم ايدها ومشوا سويه كعدو وضلت ايدها بيده واني بالي يم عمو ويم كسرته ،

بلشت مراسيم المهر لبسها وكل شويه يشاورها مبتسم وهيه ضايعه بالها ماعرف وين ردت انبهة خاف يشكون بشي بس مكدرت لان كلش قريب يمها حتى اذا شاورتها يسمعني...

اخذتلهم كم صوره ، وثنينهم حلوين ، سامر طويل الهيئة لا سمين ولا ضعيف شعره خفيف ولحيه خفيفه ابيضاني ، يعني شي على شي شكله دكتور نظيف ...

ذوله الاطباء اللي نشوفهم بحيث من نضافتهم نحس همه معايشين بجو العراق المغبر ، وشمسه العاليه بين قوسن على كوله اهلنا مالايحته شمس العرق ...

امه طلبت نطلع ونعوفهم براحتهم ، طلعنه بالهول وضلو وحدهم ، وره نص ساعه فات ايمن صاحني ..