Sea Bridge

SB 6.1

"7am gising ka na dapat tomorr---"

"Ang aga naman!"

"Balik ka nalang kaya sa Manila?" ani Ranz na kanina ko pa nirereklamuhan mula noong makarating kami dito sa boarding house.

Hindi naman ako ganoon ka-reklamadora, iniinis ko lang para makita ko kung hanggang saan ang pasensya.

Sinimangutan ko lang s'ya na binalewala n'ya lang naman at nagpatuloy sa pagpapaliwanag.

"8am dapat nandoon na sa academy para sa silent drill performance at openhouse. Tapos babalik kayo dito sa boarding house ng 2pm para magbihis. 4pm, babalik kayo para sa Acquaintance Party." paliwanag n'ya. "Jade, d'yan ka sa kama ko. Nics, may vacant bed sa kwarto nila sir Justin, nandon din naman 'yung landlady, dun ka na."

"Ikaw, saan ka?" tanong ko dahil sabi n'ya doon ko mahihiga sa kama n'ya.

"Dito nalang." sagot n'ya sabay turo sa manipis na mattress na nakalatag sa sahig.

Tumango ako at inayos ang mga isusuot ko para kinabukasan bago ako nahiga.

Kaninang hapon paglabas ng academy ay agad n'ya kaming sinundo sa Manila. Sinama namin si Nicole dahil bukod sa maiiwan s'yang mag-isa sa dorm ay inutusan din s'ya ni Ram na magcomply ng partner. Bale si Ram ang date ni Nicole bukas.

Pagdating namin dito after the 3-hour drive ay pinakilala kami agad ni Ranz sa mga kasama n'ya sa boarding house. Ang pamilyar lang sa'kin ay si Justin, Pau, Eli at si Jeric. May pinakilala pa s'yang dalawang kalbo na hindi ko natandaan ang pangalan at dalawang kabatch nyang 3rd class na ang pangalan naman daw ay Vince at Emman.

Literal na boarding house lang ito na may pat na kwarto, dalawang double deck beds kada isang kwarto, may maliit na sala, may shower room at banyo.

Dahil sa mga bisitang pamilya at partner ng mga kadete, medyo masikip kami ngayon sa boarding pero kung sila sila lang ang narito ay sapat na ang laki nito.

Si Gin, nandito rin sa Zambales pero hindi namin kasama at kasabay dahil nandoon s'ya kay Kevin na magiging partner n'ya din bukas. Kasama nina Gin sa boarding house ni Kevin si Ram.

Wala namang naging problema nang gabing iyon kaya nakatulog kami agad. Paggising nga lang namin, wala na 'yung mga kadete.

"Ate, nasaan sila Ranz?" I approached the landlady.

"Ay maaga ang aboard ng mga 'yon. before 6am dapat nandoon na sila. Pero 'wag kang mag-alala, may kasabay kayo papuntang PMMA." palangiti si Ate. Magiliw sa bisita. At sa kung paano n'ya kausapin sina Ranz kagabi ay parang anak na ang turing n'ya sa mga boarders nila.

Kumatok ako sa kwarto kung nasaan si Nicole. Nakatatlong katok yata ako bago sila nagbukas ng pinto.

"Sorry sis napasarap kwentuhan namin, 'di namin narinig katok mo. Tara pasok ka!" sabi ng isang babaeng singkit, maputi at mahaba ang buhok na mukhang naging instant tropa ni Nicole dahil kasama n'ya sa kwarto.

"Marella, girlfriend ako ni 1CL Justin." she offered her hand as I entered the room. "Ito naman si Ley, girlfriend ni Pau."

Nginitian ko s'ya pati si Ley at nakipag-handshake sa kanila. Medyo ang dami kong naeencounter na pangalan, sana matandaan ko lahat.

"Schoolmates pala si Gin at Marella, Nursing nga lang 'tong si Marella. Si Ley naman, from PUP, Business Ad." paliwanag ni Nicole. 

Hindi rin nagtagal ay tinawag kami ni ate Julie, 'yung landlady, para kumain ng breakfast kasalo ng mga bisitang pamilya ng mga kadete. Nagsipaligo at nagbihis na rin kami para sa openhouse na sinasabi nila. Tama nga si ate, marami kaming kasabay papunta.