When A Witch Fall In Love ✓

Chapter 16: Video

Chapter 16:

Aubrey Sarmiento:

5 messages received

Hindi ko pinansin ang sunud-sunod na text messages sa aking kabanda ko at ni Seven. Alam kong tungkol lang iyon sa hindi ko pagsipot sa gig namin kagabi at ang pagkabasag ng puso ko. Flynn.

Pinigilan ko ang sarili ko na huwag tumulo ang luha pero pasaway dahil talagang tumulo siya. "Ano ba naman 'yan!" Pinunasan ko ang luha sa pisngi ko. Wala ngayon si Flynn. Absent o baka nag-cutting class dahil ayaw niya akong makatabi.

Nagsisisi ako kung bakit hindi ko sinabi sa kanya kaagad. Kung sinabi ko kaagad sa kanya, hindi dapat kami magkakaganito. Kasalanan ko ito.

May dahilan ka naman kung bakit hindi mo sinabi sa kanya agad.

Sumubsob ako sa mesa at hinayaang tumulo ang luha ko. Narinig ko ang pagbuhos ng ulan. "Ano ba 'yan? Nakikiramay ba sa akin itong panahon? Ang sakit!"

"Grabe siya."

"Mangkukulam talaga."

Marahan kong inangat ang ulo ko at nakatingin sa akin ang mga kaklase ko. "Bakit kayo nakatingin sa akin?" Umiwas sila ng tingin sa akin. Hindi ko alam kung bakit ganun ang tingin nila sa akin kanina. Parang galit na parang natatakot sa akin.

Pinunasan ko ang luha sa pisngi ko. Mayamaya'y nag-bell na, hudyat ng breaktime na. Agad na nagsialisan ang mga kaklase ko. Ako naman ay walang ganang kinuha ang bag bago lumabas. Lulugo-lugo akong naglalakad sa hallway. Nakadama ako ng pagkailang na matagal ko nang hindi naramdaman. Ilang dahil sa way ng pagtingin sa akin ng mga estudyante. Parang nang-uusig sila.

Nagtataka man ay nagpatuloy lang ako maglakad hanggang sa makapasok na ako ng canteen. Huminto ang ingay sa paligid ko at hindi ko alam kung bakit. Katulad nang kanina ay mapang-usig rin ang pamamaraan ng pagtingin nila sa akin. Hinayaan ko na lang iyon at lumapit kaagad ako sa counter.

"Pancake nga po at isang orange juice." Natigilan ako. Gusto kong maiyak dahil naalala ko na naman si Flynn. Bakit lahat ng nasa paligid ko ay si Flynn ang naaalala ko? Mapang-asar ka talaga, tadhana!

"Bente otso lang, hija."

Binayaran ko ang nagtitinda bago kunin ang tray ko. Lalo akong nailang dahil sinusundan nila ako ng tingin hanggang sa makakuha na ako ng pwesto. Nang susubo na ako ay biglang may bumato sa akin. Nang tiningnan ko iyon, isang basag na itlog. Hinanap ko kaagad ang nangbato sa akin ngunit sunud-sunod na ang pagbato sa akin ng mga itlog, spaghetti, juice at kung ano pa.

Tumayo ako at hinampas ko anh mesa. "Bakit ninyo ba ako binabato ng ganito?" Halos sigaw ko sa kanila. Gusto kong maiyak. Ano bang ginawa kong masama para gawin nila ito sa akin?