Ang Pangarap
Ni: CorrectionFluid
Lakad.
Nakita mo ang iyong sariling naghahagilap ng daan
Tumutugpa ang mga paa mo sa kawalan
May hawak kang puting pumpon ng rosas na hindi mo alam kung para saan.
Lingon.
Nakasuot ka pala ng puting bestida, maayos at naka - postura
Tuwa sa kanilang mga mata'y makikita
May belo ka sa iyong ulo na tumatakip sa mukha mo ng marahan.
Lapit.
Nakasuot siya ng mamahalin at magarang kasuotan
Tunay kang nagulat at nagulumihanan
May lalaking nakangiti na nag - aabang sa iyong harapan.
Lukso.
Nadama mo ang pagtibok ng puso sa iyong katawan
Tiyak mo na ang iyong nararamdaman
May galak sa puso mo sa paglinaw ng iyong mga katanungan.
Lito.
Naramdaman mong muli ang kaguluhan sa iyong isipan
Tawa ang naging sagot mo sa sampal ng katotohanan
May pasa kang natamo tanda ng pagbagsak mo sa higaan.
