كابوس اليقظة

22

April 9th 2022

صباح الخير

كابوس اليقظة
الجزي الثاني والعشرون

اخر شي اتذكره من صاح عليه مناضل اكوم اصبله غدا..كمت وطحت وبعد مااعرف شنو صار..
فتحت عيوني على صوت بنية تحاجيني وحاطة اللايت بعيني..غمضت بانزعاج وفتحت..اسمع صوت ناس يمي وهوسة ..شفت ممرضة تحاجيني ومابيه اجاوبها اشرتلها ع راسي..احسه يريد ينفجر وثكيل حيل..
كالت ضغطج كلش صاعد اجيتي بس هسه قسته الج احسن صرتي..

شكلتلي مغذي بي علاج وراحت..غمضت عيوني دايخة وصوت الناس احسه يدك براسي..هذا اليصرخ وهذا اليحجي وصوت عياط جهال ماجنها مستشفى عبالك سوك..
بقيت مغمضة شوي حسيت الصداع صار اقل..
ماقبلت الدكتورة اطلع كالت تبقين لباجر حتى المراقبة حتى نتطمن ع صحة الاطفال..
نقلوني لغرفة بيها اربع بنات كل وحدة وياها مرافقة شي امها شي اختها..

عدا انا وحدي..كلساع احتاج حمام واكوم كوة اسند نفسي..مناضل مايصير يدخل للردهة ممنوع..خابرني مرتين كال كاعد جوا انتظرج..كتله بعد مايقبلون اطلع الا باجر..كال خوش ابقى جوا وبالليل ارجع للبيت..
سديت الخط ومددت ع السرير كاشة روحي..فراش جلد بلا جرجف والمخدة شحالها..صفطت كلينس عليها ونمت.غمضت افرك براسي..تقربت يمي مرة شكلها اربعينية ..خيرج بنيتي محتاجة شي؟
لا خالة مشكورة ..

لا تستحين احنا هنا وحدة تعين الثانية..تشوفين ذيج فلانة وذيج فلانة صارلهن ثلث ايام هنا وصرنا اهل وحدة تخدم الثانية..
انت شنو تردين شنو تحتاجين احنا يمج حبيبة..
الله يحفظج خالة تسلمين..
ابتسمتلي ورجعت يم بتها كعدت تسولف وياها والبقية يشاركن الحديث..
وانا صافنة عليهن كل وحدة تحجي معاناتها والثانية تزيد لو تصبر عليها..

وانا صافنة استمع الهن اتصلت بية رشا..
قتحت خط وجاوبتها بصوت تعبان كوة احجي..سألت بخوف..شبيج شبيي صوتج؟؟
تخربطت وجابني مناضل للمستشفى..
لا صدك وليش ماكتولي خابرتوني هسه شنو وينج بعدج بالمستشفى!!؟
اي ماقبلو اطلع لازم ابقى لباجر..
ماتحسنتي شوية؟؟
لا افضل من مساع ..
يلا شوية واخابرج انا..

سديته منها ورجعت غمضت واستمع لحجي البنات ..
نص ساعة تقريبا ورجع دك الفون باوعت رشا..
فتحت خط قبل لا احجي كالت انت وين انا وصلت للمستشفى وخابرت مناضل مايرد..
بقيت محتارة مااندل اوصفلها سألت المرة اليمي كالت جيبي انا اوصفلها..
حاجتها وفهمتها وكلتلها راح انتظرج ببداية الردهة وهيج شكلي وهيج لابسة..
انطتني الفون وراحت كاات اروح اجيبلج اخيتج واجي..

بقيت عيني ع الباب انتظرها تجي..شفتها دخلت هي والمرة اشرتلها ع جهتي..فرحت باوعتلها بضحكة..اجت عليه بسرعة حطت علاليك جانت بيدها ع السرير وشبكتني وتسال..سودة عليه ليش ماخابرتي باقية بحدج ليش..
بعد انت ابتليتي بية بلوة ..
شو انلصمي احسن..كومي خل افرشلج الجرجف وهاج المخدة لبسيها..
طلعتهم وبدت تفرش وكملت وكعدتني..يلا مددي ارتاحي على مااحضرلج لفات حتى تاكلين..