كابوس اليقظة

الثامن

مساء الخير

كابوس اليقظة
الجزء الثامن

كلام ابوي بالنسبة الي مثل الكفخة التجي لواحد جان صافن وتفززه..
بقيت صافنة بوجهه اريد اركز هو يحجي صدك لو شنو!
بلعت ريگ وحجيت وانا مامصدكة..شنو يعني تريد تزوجني
لمهند؟!
جر نفس وجاوب..اي بابا ماكو بالدنيا كلها واحد حريص عليج
ومايظلمج مثله..
ههه بابا انت شايف مهند شلون يعاملنيي!!!؟زين انت مو زوجت
مهند بيدك ..زين مرته مو حامل!!! حجيت بقهر وبجيت..
احسن معاملة يعاملج شبي الولد؟والزواج الثاني شرع مو عيب
ولا حرام..

شنو شبي اصلا كول شنوو مابي..من فتحت عيني للدنيا وهو متحكم
بيه بكلشيييي وباقل فرصة تصحله يعيرني بمرضي..
لااا غلطانة مايعيرج بس اكيد بوضحلج سبب رفضنا لليخطبوج..
وهو هم نعم الله عليه تزوج وراح يخلف وبعدها خطبج يعني تصيرين
انت العزيزة والجديدة مو احسن ماتزوجج بالاول وتالي حط
على راسج مرة؟

اهاا مو هو سباق ومنو تصير الاولى..ليش شنو ميزات التصير زوجة
ثانية؟تدلل تصير الكل بالكل؟اشو امي ماصارت هيج وانا صغيرة
واتذكر دمعتها ولكمتها سوا..
امج غير..ماجنت احبها مثل مامهند يحبج وجان وضعي كله
مختلف..
مهند يحبني!ههههه ضحكتني صدك..اخر همه اصلا انا ..وامي انت
ظلمتها وكسرت خاطرها وهسه جاي تريد تكسر خاطري؟
وخاطر زينة البنية اليتيمة الي ضحكتو عليها ..

انجبي طاااايحة الحظ..حجه بصياح وخنزر..
دنكت راسي وبس دموعي تصب..
وهو كمل كلامه وينتر ..انت امبين مثل امج لا فهم ولا تفكير
وانا الغلطان سألتج ورايد اخذ رأيج..كومي لغرفتج يلا..ونهاية
الاسبوع يعقد عليج مهند..
كمت بدون مااجادله ..امشي وكوة اشوف طريقي من الدموع
فتحت الباب وطلعت لغرفتي كبل..

توني اكعد ع السرير ودخلت بيبي وسدت الباب وراها..
كمتلها وانا عيوني تصب..جرتني لحضنها واستندت عليه وكعدت
ع سرير ..بقيت مدنكة وابجي..رفعت راسي ومسحت عيوني
ووجهي..شو كافي عليمن تبجين يمه شنو زايدة عنده لو جايبج
من الشارع..
حجيت وانا اشهك..بيبي يريد يزوجني لمهنند..
حااامض على بوزه هو ومصخم ..انا شكتلج مو كتلج فتحي
عيونج كافي فطارية..

يعني شسوي انا شمدريني مهند هيجي نيته وياي..صح
دومه يكول انت مو اختي بس ماجنت ادري هذا قصده..
اصلا اصلا مااستوعب انا اتزوج انسان عشت وياه من اول ماانولدت
هو شلون اله نفس هيجي يسوي..
حبوبة نفسه دنية هذا وتدنى حتى ع فرخ الدجاج ..لا تهمين
ولا تفكرين مااخلي صلاح ينطيج اله وانا عايشة..

حجيت وانا اشهك وامسح بدموعي..بيبي مناضل اليوم
يريد يرجع يخطبني ..
صددك؟ياابرك الساعة هذا احسن وكت..
شلووون مو هسه عبالهم انا كتله مهند يريد يخطبني واستعجل
واجه وانوب يقفلون بالزايد..
وهذا الاحسن..خليهم يحسون انت تردينه وبينكم محبة..هذا الشي
راح يخربط وضعهم ويخليهم بقلق..