دارت الدنيا لتدق طبول قلبي

البارت 37

دارت الدنيا لتدق طبول قلبي
#جذبني_فمك_البني٢

البارت السابع والثلاثون.

ضيغم

أمهلني قليلاً سأرتب حياتي من جديد وأعيدك غريباً كما كنت...

ملاك

خسرنا أول خسارة وگلنه تتعوض
وخسرنا الثانية وگلنه العتب عالحظ
ما ظلت بعد حجّة
اشبعد يا روحي نترجّة
هاي الثالثة وبيها السكوت أفرض..

يجاوبها ضيغم..

اذيتني بكد ماجنت خايف عليك وحابك...
_______

سيلين : يعني هسه ادخل؟

جر نفس عميق بتعب وملل كال...

ادهم : ادخلي شوفيه ليش مايريد يشوفنا وبلغيني...

سيلين : تمام..

راحت سيلين دخلت واني واكفة وبس اتفرج على خساراتي ، سديت اذني من حجه ادهم هيج ماردت اسمع باقي الكلام ردت اختلي بنفسي واعدم وساوس ذاتي ، هرولت لمكاني لاهثة بباب غرفته المنعني من دخولها رجيت راسي على الحايط يكفي اشم عطره حتى لو جان مخلوط بدمه وادوات التعقيم  ...

ردت احس بعبق عطره الجان يملي ريتي حتى لو بينا اسوار حديدية تمنعني من الدخول عليه...

ضربت راسي بالحايط اجه ادهم كنبص بالكاع وخله ايديه وره راسي حتى يمنع اذيتي ، عيونه تحجي وتبجي واني نفس الشي ، بعد غصة وتعب كلت..

ملاك : صارلي اسبوع كامل واكفة بالباب انتظر يطلع الدكتور حتى اسمع حالته ، وادخل اشوفه تالي مايريدني ، زين حالته شنو فهمك عليها وليش كاعد تبجي الشي جبير و طلع منها بس بخسائر صح ...

ادهم : شويه وارجع للأطباء الشرفوا على حالته وافهم منهم الصار لان ما قنعت بكلام هذا الطبيب..

ملاك : بالله عليك ابو مريم ريحني شنو عرفت بخصوص حالته؟

ادهم : بس اتأكد واحجيلج ياملاك اصبري..

عافني وراح لغرفة الاطباء حتى يستفسر عن حالة ضيغم..

ياالهي لحظات الأنتظار شكد صعبة ، ربع ساعة اقل اجه يمشي ، ادهم يترنح مشيته نظرته دموع عيونه كلها تشير لشي واحد الامور سيئة والوضع ميؤوس منه..

وصل يمي كعد بصفي بالكاع وارتاج على الحايط ، تنهد وجر نفس ، حجه بصوت مخنوك شرحلي حالته..

ادهم : اول مرة بحياتي ما اعرف شلون اوصل الموضوع الأريد احجيه ، اول مرة ما تترادف ببالي كلمات اهون عليج الراح تسمعيه ، لأول مره بحياتي احس نفسي عاجز وما اكدر اسوي شي ...

ارتفع صدره وهبط ، قبض كف ايديه وكح كحه قويه وكال...

ادهم: كلشي راح احجيه الج يعتبر اولي واغلبه شكوك يعني قابله للتغيير بمرور الزمن ...