دارت الدنيا لتدق طبول قلبي
#جذبني_فمك_البني_٢
البارت السادس..
انه ردتك كبل من جان كلبي بخير
كبل لا صيح ياهو يصير جتالي
كبل من جنت اغمض خاطر اتلكاك
بعدين افتهمت الظلمة تحلالي.
__
أأنتَ حبيب ام عدو ؟
انتِ وردة من دمي ضاعت مني
ام اختبأتِ عني ؟
(ومن هنا بدأت رحلة العذاب )
السمعته صوته صح لالا متوهمة مو هو شجابه ردت ادخل جوه لان ما اريد اصدك هذا هو واليفصلني عنه باب واحد بعدني ما مستعدة لهذا اللقاء ابد ما مستعده .
توجهت حتى افوت للبيت اجاني صوته عاط ..
هجان : افتحي الباب لو اكسرة.
كمت اتبلعم من الخوف رجلي كامت ماتعيني دموعي تنزل من وحدهن فركت وجهي خليت ايدي على صدري اريد اجر نفس ما اكدر اريد هوى ماكو احس الدنيا كلها اختفت من كدامي بس اني وهو ...
كام يدفر بالباب قوي طلعت ماما من المطبخ عاكده حاجبها ..
ناهد: شكو منو هذا بالباب وليش كاعد يدفر بيه ؟
رفعت اكتافي بمعنى ما ادري ..
ناهد: شبيج خرسة ماتحجين بلعتي لسانج.
اريد اجاوبها ما اكدر اثناء توجه ماما للباب حتى تفتحه دفره بكل قوته وطلاكة الباب وكعت بالكاع سديت اذني من الصوت شفته هذا كدامي مغضب ملامح وجها..
يفتح ويسد بكف ايدة ، تراجعت ليورة وصلت باب المطبخ دخلت و ركضت فوك لغرفتي سديت الباب اتنفس سريع وكلبي يدك ..
ورة شويه سمعت صوت اقدام على الدرج مو واحد لا اكثر هوسه شباب يحجون قربت اذني من الباب ركزت اسمعه يكوللهم هنا نزلوهن والاغراض القديمة طلعوهن كلهن...
هذا شنو ديسوي على شنو ناوي
وخرت من الباب وصرت اروح واجي بغرفتي ما اعرف شنو اسوي كمت اكل بأظافري ما حسيت على نفسي الأ من ضكت طعم الدم باوعت على ايدي اظافري خلصانه وطالع اللحم كامت تأذيني فوك اذيته كلبي..
كمت افرك بركبتي شنو اسوي شلون راح اواجهه على شنو ناوي ..
نظراته ياربي نظراته كلها حقد وحتى كراهيه بيها .
معقوله كرهني ؟
لالا ما اصدك وليش يكرهني شنو سويت قابل واصلا اني سمعته كال افتحي الباب ياحسرتي ..
خاف متوهمة معقولة هيج كال بس نضراته مجانت بيها حنيه ولا اشتياق شفت الكره والملامة والحقد ماشفت شي ثاني خفت من عنده والله خفت..
عشر دقايق وكبت العيطة بالبيت فتحت الباب ومشيت للدرج وكفت فوك اباوع اريد اعرف شكو بس ماعندي جرأة انزل جوة..
عقيل : انت شنو جابك هنا وهذا اللوري مال الاغراض المن ، شو جايب عمال وخابص روحك...
جاوبه ببرود ومن طارف خشمه يحجي وياه كأنما هو صاحب البيت ..
YOU ARE READING
دارت الدنيا لتدق طبول قلبي
General Fictionانا أبنتكم أطرق أبوابكم وأي باب يمكنني البوح لها عما في داخلي.. الى من اروي حكايتي البتراء التي شيعتها قبل ان اعيشها وعشتها بمخيلتي عمياء صماء بكماء. ابتساماتي الحذرة خوفي المبرر ضوضاء يمزق ما بداخلي.. متعطشة للأرتواء بك ومنك ... ايها الحنين أين...
