سجينة الروح

البارت السادس

سجينة الروح
للكاتبة Reem
البارت السادس

تانيتك عمر يمك ردت ارتاح
لكيتك واحه ميته ترابتك تذري
تانيتك تجبره لخاطري المكسور
جبرته بدمع بس ماجبر كسري
ليش تغيظني وأحجي الحجي المضموم
وتكول الناس عني مسودن يهذري
اذا تدري بعذابي وتدري اللي صار
لا تسأل عليه شباقي من صبري
خلصت العمر مابين جويه وآه
ومكالب بروحي وناركم حدري
ستوني الحزن مو كافي طفي النار
تبخر ماي صبري ونزرف جدري
يالرايد حجينه يظل جزر للدوم
وانت المد يفيدك ينمحي المقري
لان انت جرف وانه عليك الماي
اطلع عيوب جرفك لو كثر جزري
حاصرني الوكت وجروحي مسمومات
لا انت رحمتني ولا رحم دهري
تحزم جرح بيه وراد ياخذ ثار
التفت شاف الخناجر تطعن بظهري

يمامه : مااعرف شسوي منا عياط بناتي وايه خربت حرت بيها ومن هذا الولد الي اخذوه الامريكان هي كلها دقايق بس احسها عمر اخذ من حيلي وارجف واحجي وبصوت عالي دخيلكم كله ولا بناتي

اسمع مازن يعيط عليهم بالانكليزي مدااعرف شيحجي
مازن : من وصلنا لبغداد وقريب منطقه الغزاليه وكفتنا سيطره مال الامريكان اني لغتي الانكليزيه ممتازه رادوا هويتي انطيتها الهم ولان من العماره ركزوا عليها سألوني من وياك كتلهم عائلتي بنات عمي وزوجته مااعرف ليش الاسم جذب انتباهم وراح واحد من الجنود ثواني ورجع وعاط انزل من السياره ردت افتهم شبيهم منطوني مجال كتلهم ماانزل لو تخبلو وسحبوني بقوه اني اعزل يعني مااكدر اسوي شى بس الي اذاني بنات عمي وعياطهن خفت عليهن من الامريكان ليروحون يلزموهن غير اتخبل ومن انفتحت البيبان ورادوا ينزلوهن هنا تخبلت وكمت اغلط عليهم همه ضربوني براسي رغم الضربه كولش قويه بس بقيت صامد لان بالي كله يم البنات وبقيت اكولهم شتريدون منا احنا هنا بيتنا ربطو ايدي وصعدوني للهمر اريد واحد يفهمني شكو بس يعيطون رجفت وخفت على البنات وبقيت اكولهم عوفوهم مواخذتوني عوفوهم يرحون وهمه عديمين الشرف ولا يمهم

يمامه : كمت ارجف واعيط وطلبو ننزل من السياره حضنت بناتي وحاولت اكعد ايه المجند من شاف ايه مغمى عليها انطاني مي غسلت وجه بنتي وابجي واناشد ربي تعدي على خير ودق جامده بس تباوع بالوجوه وهمسه خبصت الدنيا تبجي موقف لعدوي مااتمناه صحت شوي ايه وحاولت انزلها ونزلنا وجان يصير ولد بوجهي بس هو ملثم ممبين شى منه شاور الجندي شو هذا هو والمجندات اشرولنا نصعد بالسياره كمت ارجف ذوله شناوين دخيلك ربي ذني بنات يتامه وبرگبتي وهذا الولد راح يضيع بسببي من صخام بوجهي شرجعني هذا الي ماعنده حظ دومه يوكع بمصايب شفت هذا الولد يفتر وياهم ويحجي وعيوني منزلت منه ايه صحت وبس تبجي وهمسه هم اريد اسكتهم حتى افتهم ماما اسكتوا دخيلكم بس ودق ساكته وتباوع بالوجوه

اجه الولد تقرب مني وكال شونج ام ودق
يمامه : رجفت والدموع بعدها مناشفه بعيوني منو انت وشون تعرفني ورفع القناع الي على وجهه وطلع صديق عادل وياه بالكليه اسمه كريم جنت ولا ارتاحله واحد عوينجي ونظرته ابد مونظيفه حتى من جان يزورنا احاول مااطلع واسلم عليه بس لأول مره احمدالله لان شفته غركانه وكريم القشه الي راح تنقذنا يمكن مسويه شى جوه ايد رب العالمين ودزلي كريم بهاي اللحظه طلع يشتغل مترجم ويه الامريكان ومن شافني كلهم هاي اعرفها زوجه قريبي وصديقي
وماعدهم شى يخوف
فدوه فهمني شبيهم ويه مازن

كريم : تعرفين هذا الولد
يمامه : هذا ابن فاضل اخو عادل
كريم : هاااا ابن فاضل وشجابه يمكم
يمامه : جنا بالعماره وصلنا رجعت وعساني مارجعت علمود امتحانات الجهال والولد خطيه يبقى يمنا كم يوم تخلص الامتحانات ونرجع للعماره

كريم : شافو اسمه واكو تشابه بالاسماء ويه شخص مطلوب الهم لهذا اعتقلو
يمامه : من خرب حظج يمامه فدوه كريم الولد طالب طب اسنان وماعنده لازايده ولا ناقصه وخوش ولد انت بعد تعرف اهل عادل ومستحيل هو نفس الشخص
شوفي ام ودق الي عليه اطلعج انتي والبنات من ايدهم واوصلج لبيتج اما سالفه مازن تاخذلها وكت يتأكدون مو هو الشخص المعني يطلعوه واني راح ابقى وياه لان ابن اخو المرحوم واحاول ادخل
يمامه : رحمه لأهلك اترجاك الولد راح يضيع واذا صار بيه شى والنبي اهله يذبحوني
كريم : على بختج ام ودق منو يكدر يلمس شعره منج واني موجود

يمامه : ( بگلبي احجي) اهوووو بدت اللواكه من يومه قذر ويباوع على زوجة صاحبه شترجى وهو يدري هسه ارمله احاول اماشي الوضع بس خلي يطلع مازن
اريدك سالم متقصر فدوه مازن امانتك وادري بيك رجال وكد كلمتك
كريم : من عيوني ام ودق يله امشينا اوديج لبيتج

وصعد واخذنا بالسياره جان البيت قريب كم فرع عن السيطره وصلنا للباب وراد يدخل الطايح الحظ اني بيا حال وارجف وبالي على الولد الي راح يضيع جان اكوله
فدوه كريم روح لمازن بلكت الله وتكدر اطلعه

كريم : اخاف محتاجه شى البيت صار مده عايفيه اخاف تخافون وحدكم
يمامه : لا تسلم بس فضلي سالفه مازن وهلا بيك بكل وقت
وراح من راحت روحه واني ارجف والخوف سيطر عليه لزمت البنات ودخلتهم همزين سكتن من البجي اله ودق ولا نطقت دخلت للبيت وصخ وكله تراب مهتميت حطيت الغراض وفتحت الكهرباء وكعدت البنات على التخم وانطيتهم بسكت وعصير خفت عليهن
ماما ودق هاج اكلي بس تهز براسها متريد
بنتي بيج شى احجي امي ليش ساكته
متحجي اوف ربي شجاها هاي البنيه هسه وكتها

مرت ساعتين وماكو اي خبر واني نار وشابه بيه متحملت لبست ربطتي
هسه اجي
أيه : وين ماما نخاف وحدنا
هسه اجي رايحه لبيت ابوعباس اخابر منهم لان الارضي مالتنا مكطوع اخابر على عمج لازم يجي اذا مازن صار عليه شى يعزوني ويصخموني لازم انطيهم خبر راح اقفل الباب من بره عليكم دقايق واجي كاعد تسمعيني ماما ودق انتبهي على خواتج وهي بس تهز براسها
وطلعت والحمدلله لكيت بيت ابوعباس موجودين وسلمت عليهم وكتلهم بس اخابر مردت اتاخر عفت البنات وحدهن ودكيت ويه كل رقم ادكه احس روحي تطلع ومنيتي قربت شراح يخلصني واجاني صوته الخشن وهو يصيح الو

حامد : الو منو وياي
يمامه : اني يمامه ابو جنه
حامد : هلا بيج ام ودق بشري انه عود وصيت مازن يتصل اول ماتوصلون بشري اشلونه الوضع يمكم
يمامه : متحملت وبجيت تعال فدوه شيخ الامريكان اخذو مازن
حامد : شنهي ليش
يمامه : وبديت احجيله الموقف وهو تخبل
حامد : جايگم انه جم ساعه وتلكوني يمكم انتي ارجعي لبيتج واقفلي بابج عليج ولاتفتحينه الأي احد فاهمه
يمامه : صار
الحجية جميله: خير يمه شمالك صوتك يرعد رعد بالدار
حامد : احلام احلام وينج
احلام :جيتك شيخ
حامد : حضريلي جنطتي بسرعه رايح لبغداد
الحجية جميله: چا غير يگلي شصاير تسودنت وماتحجي
حامد : يمه مازن ماخذي الامريكان ولازم اروح اشوف ليش
الحجية جميله: يبوووو ياعلم الأكشر راح وليدك يفاضل
من صخام الصخمج يمامه ضيعتي الوليد

حامد : يمه چا يمامه شخصها (شعليها)
الحجية جميله: اسكت يحميدان گله من وراك مشيت وره البومه هاي تالي اليمشي وره النسوان يبوووو عمت عيني راح وليدك يفاضل هاي الامانه الأمنها اخوك بيه وديته للموت لخاطر البومه وبناتها
حامد : يمه صدك جذب هسه غير تطينا صبر نفتهم شصار

الحجية جميله: انه اكلك شصار مشيت وره البومه واخذت وليد اخوك وطيته للموت وهسه جاي تگلي اطينا صبر چا اطيك صبر لمن اشوفن الولد ملفوف بالچفن
حامد : ياستار خل اروحن احضر السياره حتى مااتأخر وانتي ضلي نوحي وسبي وبعدنا گلشي مامفتهمين

الحجية جميله: ‫بعد عينك يايمه شلّي بسنيني‬
‫أموتن ريت بلچـــــــــن بيك اتلاگه‬
‫تعال و شوف حالي واسمع ونيني‬
‫ينور العين يمه الونـّـــــــــه حراگه‬
‫عگب خدري ودلالي الدنيه تسبيني‬
‫الستر ثوبي ومحـــال اتوگع افراگه‬
‫أنشدك يبني رد يــا ضنوه حاچيني‬

‫عليك الله الجوابـك روحي مشتاگه‬

‫فضيلة : دخيلك يابوفاضل شبيج يمه تنعين صدگ جذب الوليد بعده عايش وتنعين عليه ‬

الحجية جميله: اسكتي الوليد راح وگله من وره بت الگلب ضيعت وليداتي گبل وهسه ضيعت ابن فاضل تعالي وكابليني كليلي وين اولي اريدن احركها لا الحرك مايبرد گلبي هاي الططوه (وجه الشؤوم) هجمت بيتي
فضيلة : يمه اذگري الله البت شعليها كلها مقدر ومكتوب من ربج على كيفج ويه نفسج
الحجية جميله: يبوووو عليج وعلى حامد دومكم اتحايزون ليها راح تموتوني
فضيلة : چاغير نحجي الحگ

الحجية جميله: فچي حلچچ (فكي حلكج) حاميلها بعد اله انعل شيب الخلفوچ
فضيلة : سكتنا بس يمه لاتنعين واليرحم والديج هسه أخوي حامد يروح ويفهم الصار
الحجية جميله: هو شعم علينا وطيح حظنا غير حميد اااااااخ گون اكظنها من شعفتها (شعرها ) ام عطوب
فضيلة : والله ماعرفج تحجين على أخوي لو على يمامه
الحجية جميله: كولي بومه كولي غراب كرطه لاتكولين يمامه من فلك اصابهه

فضيلة : ابراهيم تعال يمه
ابراهيم : ها يمه امريني
فضيلة : يمه روح ويه ابوك حامد لبغداد لاتعوفه وحده
ابراهيم : هو خذه وياه عمي حسان
فضيلة : حسان
ابراهيم : اي يمه عمي حسان
فضيلة : اوف ياجمره گلبج فضيله بعده من يسمع طاري حسان يرجف رجف كون اطلعنك من ضلوعي وادوسنك ياگلب جي بعدك تعشكه لحسان
ابراهيم : يمه يمه شو صفنتي
فضيلة : هاااا لا يمه ماكو شى يله روح لشغلك

يمامه : بقيت ارجف صارالمغرب واندك الباب واحنا على كعدتنا حتى مكدرت اتحرك حاضنه بناتي وكاعده ومن اندكت كمزت مشيت بخطوات مهزوزه وخوف واباوع على بناتي مرعوبات وصحت بصوت ناصي منوو

مازن : اني عمه مازن افتحي الباب
يمامه : رحمتك ربي وركضت على الباب وفتحته تعال حبيبي الحمدلله على سلامتك اشرلي مازن يعني ملابسه ربطه ودنج
ابتسمت نسخه من عمه وطبيت اركض سحبت الربطه وطلعت شفته يحجي ويه كريم بس وكفت وره الباب اسمعهم شيحجون

مازن : تسلم مقصرت وجميلك ماانساه
كريم : انت ابن اخو الغالي الله يرحمه تدلل والحمدلله عدت على خير حاول تنتبه تره موكل مره اني موجود
مازن : همه اغبياء اني شعليه

كريم : همزين بين الاختلاف بالجد الرابع واسم الام على كلاً فضت بعد بس اريد اسلم على ام ودق والبنات
مازن : وكفت كباله اعذرني خويه تدري الدنيا ليل والوقت تأخر واكيد البنات نايمات تعال باجر من وكت وسلم

كريم : هاااا اي صحيح اجيكم باجر الظهر على الغده
مازن : هله بيك
كريم : مع السلامه
يمامه : روحه بلارده اعتقد حس مازن بيه موو راحه عفيه عليه مدخله بهليل ودخل مازن شونج عمه
يمامه : شوني غير ردت اموت عليك لو صاير بيك شى شبخلصني
مازن : وين البنات
يمامه : تعال ادخل جوه هنه كاعدات من الظهر على نفس الكعده
دخلت هاا ولكم شبيكم عبالك كاعدين بصف عقال وجان تكمز أيه وهمسه بحضني ويبوسن بيه
هههههههه ولكم كافي بوس

أيه : خفنا عليك شنو هذا الدم براسك
مازن : لج اااخ موو ايد اكو واحد يدوس على الجرح هيج لتخافين هسه اسبح واعالجه ويروح
همسه : دربوك الحراميه (ضربوك)
مازن : هههههه من فدووه للبنات اي ضربوني
همسه : خلي يولون مااحبهم انت احبك
مازن : وتبوس بيه ههههههه فدووه لهموستي رفعت عيني باوعت لودق كاعده وعيونها عليه وضعها ابد موطبيعي
وخرت البنات وتوجهت الها
ودق بيج شى
يمامه : من الظهر لهسه متحجي بس تأشر براسها
مازن : ودق احجي
جان توكف وتصير گبالي وهمست بصوت ناصي كوه سمعتها
ودق : لو صاير بيك شى جان عمري مسامحت نفسي
مازن : وانتي شعليج
ودق : اني الي رجعتكم لبغداد
مازن : لا قدر ويريد يصير وجان تنزل دموعها تفاجأت هاي ام لسان هيج هادئه
كتلها حتى الطف الجو لان مبينه حيل تعبانه وبصدمه من الموقف كله
لو ادري هيج تصير هادئه وصوتج ناصي جان من زمان سلمت نفسي للامريكان

ودق : الحمدلله على سلامتك وعفته ودخلت لغرفتي جانت الصدمه جبيره عليه اني صح مااطيقه لمازن بس الموقف الي مرينا بيه جان كفيل يدخلني بأنهيار عصبي بوقتها لان خفت يقتلوه واني السبب لهذا بقيت مصدومه وبس ادعي يرجع لان اعرف اذا صار بيه شى موبس تأنيب الضمير راح يموتني اهل ابويه مراح يرحمون امي لهذا اكتفيت بس بالسكوت والدعاء حتى يرجع مازن

مازن : عمه انتبهي على ودق تره وضعها موزين
يمامه : اعرف بس اكمل الي بأيدي وابقى يمها بس تعال هسه اعالجلك راسك بالاول
مازن : بس اسبح وابدل ملابسي واني اعالجه
يمامه : ها تخاف مني اني اعالجك شنو نسيت اني مخلصه معهد تمريض
مازن : والله نسيت هذا هو بس اسبح واجي عالجي لان حيل يأذيني
يمامه : لازم متسبح المي يخلي يلتهب
مازن : بس اغسل جسمي وجهي واحاول مااخلي المي يوصل للجرح
يمامه : واني راح ارتب البيت لان من اجينا واني كولشي مااكدر الزم من الخوف والقلق
مازن : خوما بلغتي احد
يمامه : اي خابرت عمك حامد
مازن : لا عمه شون تخابرين هسه الدنيا تنگلب

يمامه : شسوي انت كولي متحملت المنظر والموقف وكلت اخاف يصير عليك شى وبوگتها محد يرحمني لازم ابلغهم اقلها اذا بيدهم شى يتلاحكون الك
مازن : شراح يخلصج من جدتي جميله
يمامه : هههههه عادي تعلمت عليها لو شمااسوي تموت مني هلمره حفيدها جان صار بيه شى شتتوقع شون تستقبلني
مازن : والله عمه يمكن تكسر العوجيه على راسج ههههههه
يمامه : ههههههه نعمه اذا بس العوجيه يمكن البيت كله
واحنا نضحك جان تندك الباب بقوه
اوكفي عمه اني افتح
يمامه : ومنشوف غير حامد وحسان يدخلون شفت حامد شون حضن مازن بقوه تكول ابنه ويشم بيه ويبوس

حامد : يبعد ابوك الحمدلله شفتك سالم جدامي
مازن : لتخاف يابه اني زين والحمدلله
حسان : شنهي بويه هبطتنا ردنا نموت بالدرب من وراك ابوك حرگ الشارع حرگ حتى نوصل لبغداد ونشوفك
مازن : شبيدي ياعمي صارت بعد
يمامه : تفضلو ليش واكفين بالباب
دخلو للبيت وحاولت الملم اتعذرت منهم على منظر البيت
حامد : لايهمج غير جان متروك ياام ودق المهم انتي والبنات أشونجن بيجن شى
يمامه : لا الحمدلله وضعنا زين بس تعبانين من الموقف والهبطه
حامد : دفع الله ماكان اعظم تعال بويه احجيلي شنهي الصار وياهو طلعك

كعد مازن كولشي يحجي واني رحت اسوي اكل خطيه فضيله حملتني كومه شغلات كبب ومسواك حتى اللحم سالكته وحاطته بحافظات معدله فضيله حتى الخبز كالت حتى من توصلون متحتارون اخاف معزلين وهمزين فادني الاكل مالتها وكعدت اسوي اكل هلقاسمه الله وحضرت كولشي اني ماعندي سفره بالصاله ناكل بالمطبخ عندي ميز طعام صغير احتاريت خوما اكولهم تعالو اكلو بالمطبخ زحمه كلت افرش سفره بالكاع وهمه اصلاً متعلمين ياكلون بالكاع اخذت السفره داافرشها دنجت جان يصيح حامد لمازن
حامد : كوم بويه اخذ الفرش من عمتك وافرش
يمامه : لا اني افرش شيرادلها
حامد : هدي من ايدج وروحي خلصي شغلج مازن يفرش وصيحي ياخذ منج الاكل
يمامه : هذا شبيه يحجي وعيونه نار هم غلطت شسويت والله هذا الرجال موطبيعي

انطيت السفره لمازن ودخلت اجيب المواعين حسان راح يغسل ايده ومازن ديعدل الفرش دنجت وداحط المواعين جان يهمس بصوت ناصي لا ادنجين اطي المواعين لمازن وهو يحطهن باوعت عليه شفته صاك سنونه افتهمت لان مدنگه بس لبسي مستور مطالع شى شكد معقد هو منو الغريب ابن عمهم وابن اخوه يله بعد احسن
وانطي المواعين لمازن وكملت السفره واني حطيت اكل الي وللبنات وحدنا بالمطبخ لان ادري عدهم النسوان تاكل وحد والرياجيل وحد صحت البنات ودق شفتها نايمه بس أيه وهمسه كاعدات يله بنات تعالو اكلو

وجان تجي ايه تركض هي وهمسه كعدوا يم حامد همسه يم مازن وايه يم حامد
تعالو ماما هنا بالمطبخ العشا مالتكم
ايه : حبابه ماما اريد ويه عمو اكل
يمامه : كومي يابنتي تعالي يمي ناكل سوه
همسه : اني يم مازن ختيه لاسه بيه اواه (خطيه راسه مجروح ) اتل وياه (اكل وياه)
يمامه : وشعليه راسه بالاكل
همسه : مااا ماادوم (مااكوم)
حامد : عوفيهن ام ودق خلي البنيات يمنا وروحي اكلي براحتج بس ودق وين
نايمه دخلت عليها كعدتها مكعدت عفت الها اكل من تكعد اوكلها
هسه متكومن
ايه وهمسه : لا

يمامه : بكيفكم وعفتهم ودخلت اكل ايه حيل متعلقه بعمها دوم اشوفها تحجي وياه وتطلب منه وهو هم احسه حيل حبها وهمسه اصلاً دبدوبه البيت الحلووه الي من ايد لأيد اله ودق حذره من الكل والكل حذر منها
كملت كولشي ومازن نقل المواعين وغسلتهم وحاول اكمل شى بسيط من الشغل وتذكرت راس مازن معالجته وصحته تعال عمه اعالجك

حامد : ماكو مضمد هنا
يمامه : كاعد تشوف بيش الساعه يامضمد بهذا الوضع باقي واني مخلصه تمريض واعرف كولش زين اضمد جرحه
حامد : بس لو مضمد احسن
مازن :يابه ماكو فرق وعمه طول ماتعرف خلي تعالجه لان حيل يوجعني
وجبت عده الاسعافات وكعد مازن كدامي خطيه الضربه قويه كولش وعميقه ويرادلها خياط

راح اخيطلك الجرح عندي كل المستلزمات ميصيريبقى هيج مفتوح يلتهب
مازن : توكلي بالله عمه وخيطي المهم يفك الالم بعد مااتحمل
وبديت اخيط وخطيه يتأذه وبحركه لا ارادياً لزم ايدي مازن شو هذا حامد جر ايده حيل وكله
حامد : بويه تحمل والزم ايدي لا اطخن ام ودق

يمامه : بله هذا من كل عقله هو الولد بياحال وحركته لا ارادياً بسبب الخياط والالم صح بيني وبين مازن ١٠ سنوات بس احسه مثل ابني اخويه الصغير بس هذا حامد مدري شبيه كام ولزم ايد مازن اثنينهم والله شنو حتى ليطخني كملت الخياط والتعقيم وانطيته مسكنات وفرشتله ونام
وفرشت بصفه لحامد وحسان سلمها حسان مباشره نام اله حامد يفتر يطب ويطلع ويلوب عبالك سمجه مزوهره شبيه
دخلت سبحت ونومت البنات ونمت سمعت طكطكه فزيت صارت بيه خوفه بس اعرف الولد جوه مأمنه بس هم گلبي ميرتاح
لبست عبايه اسلاميه فوك دشداشتي لان قصيره وكصيفه وحطيت شال ونزلت اشوف شنو هذا الصوت لكيت باب المطبخ مفتوح مديت راسي على كيف لكيت حامد كاعد على الصبه مال الحديقة ويدخن
ورافع راسه للسما وبغير عالم
دخلت على كيف وسويت چاي
واخذته وطلعت تفضل ابو جنه

حامد : شنهي بعدج مانايمه
يمامه : جنت نايمه وسمعت صوت وكعدت وشفتك كلت اكيد هسه مال چاي
حامد : اي والله بوگته
كعدت مسافه عنه وبيدي استكان الجاي وهو يشرب جكاره وبيده الثانيه الچاي
يمامه : ليش منمت
حامد : مجايني نوم

يمامه : من وره مازن موو خايف عليه
حامد : مازن ولدي قطعه من روحي الله ماقسملي ولد وانطاني مازن ومنير ولد فاضل الله يرحمه يكونون ولدي وحزام ظهري واليوم اختاضيت (انقهرت) وكلت راح الولد مني
يمامه : اسم الله عليه الله يحفظه الك
شفته هادئ كلت خلي افتح الموضوع وياه
اكول ابو جنه
حامد : خير

يمامه : انت تعرف الوضع تعبان هنا وخاصه بمناطقنا
حامد : شنهي ياام ودق ادخلي بالموضوع لاتلفين وادورين
يمامه : شيخ اني مااكدر ارجع للعماره
حامد : شنهي بدينا انتي ماتوبين ليش ماتخافين على البنيات متشوفين الوضع شونه

يمامه : احنا اتفقنا كلها كم يوم ونرجع لبغداد بهيج حال راح نبقى سنين بالعماره لان اكيد الوضع بغداد مراح يتغير بين يوم وليله واني وبناتي منكدر نعيش هناك
حامد : والمطلوب
يمامه : اشيل منطقه بالرصافه أمن واحسن من هنا وهم ارجع لحياتي بغداد وكل واحد يبقى بوضعه وبمكانه
حامد : يعني ماتغيرين رأيج تره هنا البنيات بخطر وانتي كعد تجازفين

يمامه : وهنا وضعنا هم صعب الحجيه مراح تجوز مني ولا من البنات ويوميه راح تصير مشكله وهم بناتي راح يتعبن وبالذات ودق راح نبقى مشتتين واني كعدتي عدكم مراهمه يعني شكد اريد ابقى شهر شهرين هم يجي يوم ونرجع خلي من هسه نرجع وانتهى الموضوع
حامد : گبل قبلت تبقين هنا انتي والبنيات لان اهلج يمج هسه وحيدج شون أمن عليكم بوحدكم وبهاي الظروف التعبانه
يمامه : اهلي خابرتهم كلها ايام ويرجعون ويبعون بيتهم ويشترون بغير مكان واني احاول اشتري وياهم بنفس الفرع مثل هنا
حامد : الفرع اوف منه
يمامه : شبيه الفرع
حامد : لا مابي شى

يمامه : اترجاك شيخ خليني ابقى بغداد مااريد ارجع وعلى اتفاقنا القديم
حامد : اسمعي ام ودق احنا على اتفاقنا اي شى يصير ويحصل منج او من البنيات ترجعين للعماره اهلج اذا مااجوي يمج ممنوع تبقين وحيدج وانه الي عليه اشوفلج بيت انتي والبنيات ولازم اهلج يشترون يمج
يمامه : گلت أجر
حامد : شنهي وليش تأجرين

يمامه : تعرف هذا البيت صار ورثه لبناتي والي والبنات قصر ومينباع محجوز بأموال القاصرين ومااكدر ابيعه أجره وبايجاره أجر مشتمل ثاني
حامد : اجر هذا البيت والي يجي منه الج مصرف وللبنيات اما البيت انه اشتريلكم مشتمل ١٠٠ متر تكعدون بيه
يمامه : شكراً ميحتاج
حامد : اسمعي الكلام ولا تعاندين والبيت يسجل بسم البنات ومن حك ابوهن مو من جيبي

يمامه : قصدك ورث عادل الي بقى يمك
حامد : ياورث دوم تكولين ورث يمك احد گلج انه ماكل حك اخوي
يمامه : هاااا لا بس اكيد ورثه يمك (غير الزم لساني هو هذا وكت الحجي )
حامد : حسج وينه
يمامه : هااا هسه على اتفاقنا شيخ
حامد : ماشي ومن باجر ادورلكم بيت
يمامه : كمت تريد بعد جاي
حامد : لا مشكوره
يمامه : تصبح على خير
حامد : وانتي من اهل الخير
شيخلصك ياجرح كل مااسدنك تنفتح

يمامه : كمت منه گلت خلي اشوف البنات لكيتهن نايمات تقربت من ودق لزمتها ترجف يمه بنتي نار تنور ومشغلي اضرب على وجهه ميفيد ركضت على حامد
فدوه شيخ الحك ودق مصخنه ولا ايد ولا رجل
ركض ويايه كال خلي نشيلها وناخذها لأقرب مستشفى
فز حسان ومازن

مازن : وين رايحين المنطقه مطوقه وممنوع تجوال بيها وين رايحين وكلها امريكان
يمامه : دخيلكم بنتي تروح مني
مازن : عمه الزمي اعصابج لو ما انتي مخلصه تمريض رجعيها لغرفتها وسويلها كمادات وحاولي تغيرين ملابسها عندج خافض حراره
يمامه : عندي
مازن : انطي الها حاولي تشربيها
وانت عمي حسان ارجع نام وبويه حامد اخذراحتك اني باقي ويه عمه لحد متصير زينه ودق
حامد : شون انامن والبت تعبانه
مازن : لتخاف يابه شويه صخونه وتروح

مازن : جانت ودق تهذري بكلمات ممفهومه هاي من موقف الظهر هيج صارت عرفت مراح تعدي على خير
وبقت امها خطيه تسوي كمادات واني كاعد يمهم لحد منزلت حرارتها

اول مره انتبه على ودق رغم صغر سنها بس شكلها اكبر طويله ومعاني الانوثه طاغيه عدها استغفرت ربي وتعوذت من الشيطان بله بنت عمي وعرضي اباوع عليها وفوكاها طفله بس لسانها مال دلاله
بقينا للصبح حد مصارت زينه وكعدت وعدت سلامات
يمامه : ثاني يوم اندكت الباب وردت افتحها وعاط حامد

حامد : احنا مو هنا موبعينج
يمامه : العفو شيخ بس شفتكم تحجون گلت افتحه
حامد : ادخلي لدارچ يجوز هذا صديق عادل
وها مااريد اشوف خيالج هنا ولا اسمع حسج
يمامه : ماشي طبيت للمطبخ طبعاًمتأكده هذا مازن كال لعمه على كريم ذوله كارثه

يفهموها وهي طايره وصدوك كامو بواجبه وغدا وچايات وسوالف وتشكروه وحتى سمعتهم انطوه فلوس حلاوه طلعت مازن وكريم من شاف اخوت عادل و٣ رياجيل بالبيت متجرأ حتى يطلب يسلم عليه همزين خلصت منه العكره

وراها ثاني يوم رجعوا للعماره وبقى مازن يمنا واتكفل بتوصيل البنات للامتحانات ومشت على خير

حامد : رجعت للعماره وتلگتني الحجيه احلى ملگه
الحجية جميله: هااا يمه شنهي مات موو يبوووو عمت عيني راح وليدك يافاضل يبوووو من احترك ابيچ يمامه فلك طرچ ضيعتي الوليد
حامد : يمه صدگ جذب مازن مابيه شي ومثل السبع
الحجية جميله: چا وينه
حامد : عفته بغداد يم بنات عمه
الحجية جميله: چا عفت الوليد يم البومه ماحصلنا شى كلها ايام ويجينا ملفوف

حامد : لا اله الا الله ليش تفاولين عليه وربج الحارس
الحجية جميله: وليمته يردن المسعدات
حامد : ماراح يرجعن
الحجية جميله: يامن فلك انه امك ياحامد چا ليش مايردن
حامد : راح يضلن بغداد واشتريلهن دار بغير مچان ويكعدن هناك
الحجية جميله: چا خوش رحتلك يومين اشتريتلهن دار لو تروح سبوع تبيع گاع ابوك ليها
حامد : يمه هذاحگهن مامطيهن شى من جيبي فلوس عادل لو نسيتي من چنتي اتودين كوامه الفلوس لعادل وآنه ماادري
الحجية جميله: چا غير وليدي واخافن عليه لايعتاز ويمد ايده چا تريد يمد ايده للغرب

حامد : وهذني هم بنياته ومريته وهم الهن حگ
الحجية جميله:انت گتلي يرجعن يعيشن هنا وينك شو ماوفيت بحجيك
حامد : يردن يمه يردن يرادلها صبر لاتخافين
الحجية جميله: چا من اموت يردن واشبع بخور وماي ورد
حامد : ههههه لا تخافين حجيه عمرج طويل ويردن ونفس كعدتج هاي ومااوصيچ بعد راح تلعبين فلك بيهن
الحجية جميله: بس يردن وانه الهن
حامد : هههههههه والله ياحجيه ليش هذا الحقد گله على البت وهي مامسويه شى
الحجية جميله: چا من خربت الخوه بينكم ماسوت چا شسوي بعد
حامد : يمه اسگتي ولا تهيجين الجروح انه اروحن اشوفن المضيف وراي فصل جبير
الحجية جميله: الله يگويك يبعد رويحتي

يمامه : اتصلت باهلي وكتلهم على قراري وكيفو وراها باسبوع اتصل حامد على مازن وگله لكيت بيت بمنطقه شارع فلسطين مشتمل ١٠٠ متر جديد العمال مصارهم ايام من طالعين منه ومشتري حامد ومسجله بأسمس واسم البنات كيفت واتصلت اتشكر منه
مااعرف شون اشكرك بس ليش بشارع فلسطين لو منطقه اقل هناك البيوت غاليه
حامد : مااريد بنات اخوي يكعدن بمكان اقل من المكان الي عايشات بيه
يمامه : والله مااعرف شكلك وشلون اشكرك
حامد : الي اريدنه منج شى واحد
يمامه : شنو

حامد : عينج على البنيات لاتجبريني بيوم انفذ كلامي وشرطي
يمامه : عبالك واحد وضربني على راسي وذكرني بالشرط مثل الي نسيته او تناسيته مااريد اتذكره وهو يأكد عليه
حامد : سمعتيني ام ودق
يمامه : دااسمع ان شاء الله ميصير خاطرك اله طيب
وغلقت التلفون وبدت حياتي الجديده من يومها
انتقلت لبيتي الجديد ورتبته وجان مازن ويايه ابد معافني خطيه صح حقنه وبكولشي يدقق جنه عمه بس رجال يعتمد عليه بس جان دوم يتلافه الكعده ويه ودق لان اذا كعدوا بمكان واحد تكب العيطه عبالك رويسيه
ودق : ماما شوكت هذا يروح لبيتهم مكافي
يمامه : اشش ماما عيب صوتج ليسمعج

ودق : ياريت يسمع ويروح مو موتني كاعد على گلبي هلمره حصره اطلع بالباب وعاط ادخلي جوه هو شعليه
يمامه : اسكتي بنتي كافي
ودق : اهووو اسكتي واسكتي تكول كاعدين بالصف
يمامه : هسه ليش متصير مثل خواتج شو يحبوه ويلعبون وياه اله انتي بس تكعدين يمه اله تتعاركين
ودق : اموت منه واحد شايف نفسه واذا دكتور وبكولشي يعلق ويدخل روحه
يمامه : غير ابن عمج ياماما ويخاف عليج
ودق : شوكت تسجليني
يمامه : مصار ايام من اخذتي الشهاده وباجر اخذ مازن ونروح نسحلج
ودق : هم صخمان

يمامه : لسانج لا افرك حلكج كافي
ودق : خلي اروح لغرفتي احسن
يمامه : هاي البنيه راح تموتني وكحه نار شون بيه واني مينطيني گلبي اضربها وهي لسانها متبري منها عكس خواتها ولو منو اهلها شوكلها مخابيل واعصاب اكيد تطلع عليهم بس كون الله يعدي هلكم سنه على خير
وسجلت ودق بمتوسطه مال متميزات لان معدلها جان ٩٧ وانقبلت والحمدلله وايوته حبيبتي هلسنه خامس ابتدائي
وبدا الدوام ورجع مازن لبيت اقاربه بغداد الجديده وخاصه بعد مااهلي اشترو يمي بنفس الفرع صح نصار اخويه مقبل على المنطقه لان كال غاليه علينا بس ابويه قنعه وخطيه باعو بيتهم وقطعه كاع جان بابا يملكها واخذو بيت اصغر من بيت اهلي القديم ١٥٠ متر بس حلو ومرتب واستقروا بيه وكمت يوميه اروح يمهم او يجون يمي

مرت الايام ومن عدها بعد موصلت للعماره جانت دوم فضيله الوحيده الي تخابرني وتطمن المصرف مال البنات منكطع كل شهر يوصلي لو عن طريق حسان لو مازن
حامد شفته مرات معدودات يجي كل كم شهر يشوف البنات ويرجع طول هاي السنين حياتي مابيها شى مميز بس الركض وره البنات وتدريسهن والحيره بيهن وخاصه البنيه كل متكبر تزاد مشاكلها واني بناتي اثنين مراهقات ويراد انتباه الهن بكل تصرف اخاف عليهن من الهوا ودوم احاول اكون قريبه منهن حتى ميصير شى غلط وتدمر حياتنا رغم تمرد ودق وعصبيتها بس جانت شاطره بالدراسه والكل يحلف بأخلاقها بالمدرسه
بناتي كبرن وتغير شكلهن بس ودق طويله على اهل ابوها وجسمها بارز انوثته وحلوه ومغريه وعبالك اكبر من عمرها هسه هي صف ثالث متوسط وكاعد تمتحن بكلوريا
وميته خوف اريدها دوم تبقى متفوقه

وايوته تختلف عن اختها بسبب كثره الاكل وحبها اله وهي بطور النمو والمراهقه سمنت حيل شكد ردت امنعها من الاكل ميفيد تبقى تبجي اذا متاكل يعني بالاول متوسط وسمينه وزنها ٨٠ رغم هي بيضه وعيونها ملونه وشكره تجنن بس السمن مخربها وهي كله ولا الاكل اكطع عنها الهوا ولا اكطع الاكل وانقهر عليها بس مابيدي شى بناتي نقطه ضعفي ومااحب اقصر عليهن او اكون ام قاسيه وياهن رغم مرات القسوه مطلوبه بس مكدرت لان دوم افكر هنه محرومات من الاب ميصير احرمهن من الام وحنانها لهذا دللتهم وكل وحده بيهن
الها شخصيه مختلفه عن الثانيه

ودق : اني هسه عمري ١٥ سنه حالي حال البنات احب اتونس وافتر واغير جو بس جانت ماما متقبل وعدها اهم شى الدراسه اني ممقصره بدروسي بس ماعدها غير كلمه اعبري ١٨ سنه وشسوين سوي احسها تحسب يوم يوم من عمرنا وكل حركه ضحكه اي شى محسوب علينا
كمراهقه اكيد يجذب انتباهي الشباب والسيارات واحنا بمنطقه راقيه واشكال اشوف بس رغم هذا متجرأت مثل صديقاتي اصادق او احط عيني على اي ولد لان دوم ماما تكول غلطه وحده ادمر حياتنا ومجنت اعرف شتقصد لحد مااجه اليوم الي صدوك بغلطه غير مقصوده ادمرت
يتبع ...
ممكن تصويتكم للقصه 😊
تحياتي لًلًـّــ💎ــجٌٓمٍَُٓيِّعَْٓ