شمس:-عندما يسرق الموت ملاكاً بهيئة بشر يحتضِنُهُ التراب دون حياءٍ او آدنى خجل وتمتلئ زوايا المنزل بأَحاديثهِ وضحكات ثغرهِ ليتسنى للشر ان يزاول حياته بتنعم اما الخير لابد ان يندثر ليأَكل الندم قلوب أَولئك الحمقى.
شمس:- مرت الايام بسرعة وجاءت فترة مراجعة طلاب السادس الاعدادي في العراق لأَجل التهيئة للامتحانات الوزارية.
حسن:-أوف داااتعب هوواي بالشغل لازم أَشد حيلي بالمراجعة مابقى شيء بس أَسبوع قبل الامتحانات الوزارية.😟
سامري:-جنت أَسولف ويا حسن وقت فراغه وأَحضر له فواكه حتى يأكُل لأَنهُ فترة مراجعة ودايتعب كولش وفوكاها دايشتغل اضافة
لهشي سودة عليه أَخييي .
سامري:- جان حسن مداخل دورات وانما معتمد على نفسه بحيث حتى الطلاب يجون لبيتنا حتى يشرح لهم كولشي مامفهوم عدهم
حسن:-جانت سامري تراجع لي ومرات أَمي
فكلما رجعت من الشغل أَجيب هديةوياي لهم
(شيء بسيط مثلآ)يفرحهم وينسيهم روتين
المُمل كُل يوميه.
شمس:-نصيحة لكم شباب ديربالكم على خواتكم
لأنه وصانا الله ورسوله بيهم ♥️
حسن:-أَمي بأَخر فترة صرت كلما أَكعُد أَسولف وياه أَذكر الموت وتدمغني على رأَسي ودموع تترس عيونه وظل تتحسر عليه وتكلي:
أَمي:-شنو هالسيرة أَسم الله عليك يمه من عمري على عمرك ملاكي حسن ااااوف اااوف لو تبطل سوالفك هذي.
حسن:- اتبسم بوجهه وأَتظاهر أَني بخير بس خايف بنفس اللحظة هل معقول ح أَموت وأَمي وسامري منو لهم بالحياة وأحمد خطيه هم
ووو...شلون ؟
حسن:-جنت أَكتب مسجات لأَحمد طيلة غيابه عن البيت بس ميرُد عليه حتى من رحت لبيت عمو ياس لشكم مرة مالكيت أَحمد.
سامري:-حتى من أَحمد راح لبيت عمو ياس ماكتفينا من شره بالعكس صار أَبوي يحرمنا
من كولشي أَسوء من قبل علمود أَحمد
أَحمد:-جنت أَشوف مسجات حسن وماأَرد:
شمس:-مسجات حسن لثلاث أَشهر لأَخيهِ أَحمد♥️
________________________________________
حسن:وينك أَحمد ماتكول عندك أَخو تسأَل عليه؟
حسن:أَشتاقيتلك أَحمد
حسن:أَهلك مفتقدينك بالبيت
حسن:مر ثلاث أَشهر على غيابك
حسن:أَحمد أَجيت شكم مرة لبيت
عمو وملكيتك وينك أَخوي
حسن:--------وبعد
شمس:-مكالمات لم يرد عليها أَحد 55 مرة والمسجات 1000 بفترات متفاوتة ؟؟
من المتصل سفير الانسانية دايقصد
(حسن بهذا الاسم بجهات اتصال أَحمد هشكل كاتب عليه )
حسن:- رجعت شي يوم من الشغل وجو حار كولش وهبوط صاير عندي بحيث كوه وصلت للبيت والكه أَبوي ينتظرني بالصالة كاعد؟؟
حسن:-الرؤية مشوشة عندي ودايخ والهث
من التعب والعرق يتصبب مني أَجيت وكعدت بسرعةعلى التخم بدون سلام
حسن:- ماأَحس غير واحد واكف كبالي ويصيح معصب بشكل هستيري ياساتر منو هذا وصرت أفرك بعيوني ؟
أَبوي:- من يوم أَشتغل حسن بالعمالة وهو ميتعامل وياي كأب له وضايج مني لدرجة
ميباوع بوجهي بعد لانهُ أَحمد وصل لهاي المواصيل بسببي حسب فكره.
أَبوي:-فدخل للصالة حسن مسلم عليه تقربت منه وصرت أَغلط عليه وأَكفر وهو ساكت كوه يفتح بعيونه لا يشيل أَيد ولارجل ويلهث عسريع :
(حقير متسلم على أَبوك مو أَمك معرفت تربيك
وأَتفلت بوجهه أَبن النعال )
حسن:- بويه اش بيك متكلي
/كوه داحجي معرف بعده أَغمى عليه.
سامري:-كام حسن بالسلامة لأَنهُ كان يعاني من الارهاق مزمن وعنده هبوط بضغط الدم ثاني
يوم أَضطر يطلع للشغل لانهُ أَبوي أَجبره يطلع رغم كال الدكتور يحتاج فترة راحة أَكثر.
حسن:- تمكن التعب من كل جسمي بسبب الارهاق لأيام متتالية فطلب مني الدكتور أَنه ارتاح لفترة بالبيت حتى أَستعيد عافيتي
مرة.
شمس:- لكن حجي كاظم كان له رأيٌ آخر في اِجازة حسن هل سيمر الامر كما أِراد حسن أَما كما أَراد والدهُ؟؟
أَبوي:-حسن جان نايم ورحتله للغرفة
واكعدت يمه حتى اسولف ويا لانه أَحمد
اتصل بيه يريد فلوس
أَبوي:-حسن أُكعد شسالفتك خل أَسولف وياك ؟؟
حسن:-هاااا بلي بويه خير ان شاء الله فكمت واكعدت بفراشي حتى اسمع لأبوي
أَبوي:-أَخوك أَحمد اِتصل عليه ويريد فلوس ومعندي فلوس كافية له فلازم تطلع للعمالة
باجر الصُبُح.
حسن:-شنووو ولللليش وحتلو أَحمد راد فلوس قابل شحيصير اذا انتظر كم يوم 😕
أَبوي:-أَطلع بس باجر بويه لأنهُ هذا أَحمد مايغده شره الا هيجي حبيبي أَنتَ؟؟
حسن:- ههههه صار بيه حبيبي أَبني ضحكتني
'يلحاسب نفسك أَبوي😔'(بقلبي داكول)
تُأَمرني أَكيد.
أَبوي:-جنت مجبر أَجامل حسن مرات علمود
أَحمد أَكتفي شره وهم ماأَريد ارفض له أَي شيء
أَبوي:- خوش بس (وجع بقلبك كد ما مأَذيني أَنتَ)
شمس:-كلام على لسان حجي كاظم لكم عن
ابنه حسن جنت أَحسب حسن منافس اليه
بتربية أَحمد أَكثر من آمه نفسه فجنت أَنقهر
منه لأَنُهُ رغم كولشي مربي ماطغى آبد ولا
ضاع بدنيا عكس أَحمد.
حسن:-دنكت رآسي ودموع تغرغرت بعيوني شكرا يابه خلي أَنام هسه يله تصبح على خير
شمس:- لحسن؟مدري شكد حزن بروحك ولاينعد وهذاك أَنت الغريب المنسي المفرهد أَبو دميعة
الحنين الماوكفله أَحد!!
أَبوي:-طلعت من الغرفة وحسن غطه رأَسه
ونام على فراشه.
حسن:-جنت كلما انقهر اكتب بالورق ضيجات السنين وأَهله المريت بيهن وحدة.. ..وحدة.
حسن:-فبهل الليلة طلعت ورق وصرت أَكتب معرف كأَنه جانت كلماتي يتخلله ريحة موت
بحيث الورق تبلل بدموع بوقته.
حسن:- دورغسلت قبل لاأَنام وصليت صلاة الليل ناجيت ربي على سجادتي ورفعت اِيديه له وأَني اكول:
••••••••••••••••••••••••••••••••••••••••••••••
ربي صبرت على كل شيءٍ مررتُ به في حياتي فلك الحمد كثيرآ حتى ترضى وان تُحسن خاتمتي ويتكفل بي عليٌ(ع) في قبري واستودعك نفسي وأَمُي وأَبي وسامري وأَحمد الضائع في منكر الفواحش وأَبغضها لديكَ وايضا كُل أَصدقائي وجميع المؤمنين والمؤمنات دون حصر وان تغفر لي ذنوبي جميعها ربي انك غفور رحيم.
حسن:-بعده نزلت اِيديه وركعت على التربة صرت أَبجي بحرقة قلب استغفر الله ربي واتوب اليك
ل3 مرات اااه اااااه سامحني ربي.
حسن:-رحت نمت بعده بفراشي بعد ما
خليت توقيت لموبايلي حتى أَكعُد الصبح
شمس:-طبعآ أَكثر حلقة آثرت فيا بشكل وأَنا أَكتبها لكم.
أَبوي:-كعدت متأَخر من النوم وأَكمز من الفراش بسُرعة اركضت لغرفة حسن واكعده من النوم
حسن:-دخل أَبوي لغرفتي يركض ويصيح بعلو صوته وعلك الضوه عليه هااااي شكو.
أَبوي:-ولك حسن أُاااكعد أُااكعد بسرعة تأخرت على أَبو تحسين تره الساعة ب8 صارت؟؟
حسن:-أيييي بويه أيييي كعدت ها اها
أَبوي:-والله لو ماأَني أَكعدك يمكن ظل نايم حضرت حسن دكوم يله متوث لهسه.
حسن:-كمت غسلت وجهي وداابدل وجنه أَمي واكفه بباب الغرفة وتكلي:
أَمي:-صباح الخير يبعد عافيتي وجهك الحلو ذبلان وعيونك مورمة حبيبي ها وين؟؟
حسن:-صباح الخير يمه نور عيني مابيه شي اليوم كولش تمام أَصلآ يحبيبتي أَنتِ وحاأَروح للشغل
أَمي:-تعال اِتريك عاد يبعد أَمك وعشيرته ديربالك على روحك فدوة
حسن:-أيييي أَجيت بس أَكُلج خاف يعجبني كلامج وأَبطل أَروح وأَني متأَخر اصلآ
أَمي:-هههههههه سودة عليه يروحي
أَمي:-كعدت على صوت الحجي كلت خلي أَكعد سامري وأَنسوي ريوك لهم
أَمي:-وج سامري كُعدي يمه حبيبتي
شمس:-تعرفون حركات أي أم من يكعدون
بناتهم تفتح الاضواء كله وتظل تصيح وتكلج ساعة هلكد وقت ومن تكُعدين تتفاجئين انها
الام ياسادة هذا المخلوق اللطيف ههههههه.
سامري:-أَييبي يمه كعدت ايييي تره بعد وكت.
أَمي:-ساعة بالتسعة عيني تره شوكت تكعدين ساندريلا.
حسن:-رحت للمطبخ وأَشوف أُمي تحضر الريوك وكفت وياه اساعده وشوي وتُكعد سامري
سامري:-صباح الخير عليكم
أَمي:- صباح الخير يروحي ،حسن:-صباح الخير أَميرتي بس ليش متأخرة شعجب
سامري:-كعدت ضايجه كوه شلت روحي من الفراش لانهُ جنت شايفه كابوس مرعب.
سامري:-معرف بس يمكن لأنه تعبانه حسن سندي
سامري:-خله حسن جف ايده على رأسي كالعادة وخربط شعري وكالي حتى يلاطفني:
حسن:-سلامتج من التعب أَميرتي
سامري:-🥺فدوى لقلبك حسن
أَمي:-يله نتريك حبايبي سامري صيحي أَبوج من الاستقبال (غرفة جلوس) عجل يمه عجل.
سامري:-أيييي هسه صار.
حسن:-كعدنا نتريك كُلنا كالعادة طبعآ أَبوي أَكل رآسي وره كل لكمة وصاح؟؟
أَبوي:- يله عجل بسرعة حتى تروح تأَخرت ماشبعت أكل مراح تموت إذا ماأَكلت 😡
أمي:-خلي يأكل براحته شبيك حجي عليه اليوم
هو مريض اصلا كوه كام ع حيله سودة عليه.
أَبوي:-أنتي تسكتين من يحجي رجل البيت
لوما أنتي ماصار هيج بينا آصلا كله من وره
رأسج غبرة🤬.
حسن:- من شفت أَمي تفشلت ودنكت وانقهرت من حجي أبوي المسموم كالعادة مكدرت أَسكت.
حسن:-كلت لأبوي كااافي كااافي لاتدعي أنتَ كُل همك العائلة وأحمد صكط صار من وراك وترجع تذب اللوم على أَمي المسكينة.
حسن:-احترام أمي وتقديرها من أحترامي وتقديري واذا استوجب اكسر ايد أي واحد يمد ايده عليه واكص لسان اي واحد يجيب طاريه بسوء ماطول النفس يصعد وينزل بيه يكاظم بكر😡.
أَبوي:-تحجي ويا أَبوك بكل وقاحة وتهدد متحترم ابن النعال راح أَفوته الك هالمرة علمود متأخر عن الشغل والا قسمآ أَخليك تموت بين اِيديه واعرف شلون اربيك.
حسن:-أيييي اني هم شبعت الحمدلله خل اروح أَحسن.
سامري:-بعد وكت حبيبي حسن (قلبي حاس أَكو شيء محلو حيصير ويا حسن بس شنو هو؟؟)
حسن:-لا أَميرتي خل أَودعكم واروح لانه دايتصلون عليه تأَخرت اليوم من صُدك؟؟
شمس:-سامري الذي يكتبهُ الله لامفر منه فمهما حاولنا تغيير ذلك سيتحقق ماكُتب لنا فقط.
شمس:- في يوم 2015/5/19صباحآ بعد أَن
ودع حسن أَفراد عائلته ذهب للعمل في أحد البيوت كعامل بناء كحال أَي شاب عراقي.
سامري:-باسني حسن من رآسي وآبتسم لي
هذيچ اِبتسامته الملائكية الي يعشقه قلبي
وكالي ديربالج على نفسج دائمآ صيري قوية.
أَمي:-حضني حسن لصدره بقوةوشمني كأنه
بعد مايشوفني بعد وكالي:
حسن: اااخ ااخ يريحتج ييمه وحضنج الدافي لاتبجين اذا صار عليه أَي شيء وديري بالج
على نفسج خاف ماارجع هالمرة ؟؟
أمي:-خاب دنجب دمغته كالعادة على رأِسه وصار يضحك بس قلبي يلعب ممرتاحة لكولشي بوقته.
أَبوي:-حضني حسن وبسرعة وخر عني تفاجآت وخله ايديناته على جتفي وباوع بعيوني لأول مرة جان يكولي:
حسن:-بويه ديربالك على أَمي وسامري أما أَحمد فضيعته من ايدك وانتهى للاسف.
أبوي:-؟؟؟ مدافتهم شجاي تمسلت ووخرت ايديناته من على جتفي.
حسن:-حتندم على كولشي حد مايصيبك الجنون
🥹 يابويه حتذكر كلامي شيء يوم.
أَبوي:-درت وجهي عنه وقلبي يرجف من الخوف كلماته أثرت بيه حيل وصحت بي يله دروح
كافيي هوواي لحيت اليوم وسكتت لك.
حسن:- مع السلامة واني اباوع لكل ركن بالبيت طلعت وأُمي وسامري وجهن مهموم عليه اما ابوي فراح للمضيف يم جدي.
حسن:-وصلت للبيت الي أَشتغل بي فتلكوني
العمال والتموا عليه فسلمت عليهم كلهم:
وينك متأخر... خو مصاير شي وياك
ساعة تدري شكد هسه.... تدري شكد اتصلنه عليك
مومن عاداتك حسن تتأَخر...وجهك أَصفر وتعبان
مبين عليك.... صاير شي والله قلبنا يمك....
هلا بيك بيناتنه مرة لخ أَخ عزيز على قلبنا.
حسن:-الحمدلله وشكرآ على كولشي
واعتذر عن التأَخير هالمرة.
صاحب البيت:-حسن تعاااال أَبني
حسن:-أَيييي عمو.
أَبوتحسين:-كولش متأَاااخر خو ماكو شي.
حسن:-الحمدلله على كل حال
أَبوتحسين:-مايوم سأَلتك واشتكيت كله الحمدلله
ربي يحفظك لشبابك.
حسن:-🧑🏻 شكرا عمو الك
حسن:-داتسأل بيني وبين نفسي مشفت صديقي علي؟؟
شعجب وعيوني دورت عليه بينهم حتى ماكو
معقول بي شي؟
حسن:-وفجأة واحد يخلي اِيديناته على عيوني
علي:-ويكلي احزر منو أَني؟
حسن:-علي صديقي غير وضحكت هههههه
علي:-نزلت اديناتي من على عيونه وحضنته بقوةيارفيق الدرب وين الغيبة متكُلي؟
حسن:-الحمدلله على كل حال أَني هسه
موجود كبالك وبخير مو؟؟
علي:-بس وجهك أصفر وتعبان مبين عليك
تضحك عليه بكدك أَني قابل🤨؟؟
حسن:-اَبتسمت كالعادة يله خل نكمل شغل
ونسولف مو أَحسن؟؟
علي:-يله خوش رغم مااصدك بحجيك
لان أعرفك متشتكي ابدآ مهما صار.
حسن:-خليت ايدي على متنه
وكتله يله نتوكل وان شاء الله خير
علي:-ونعمه بالله خلي أشوف عمو ابو تحسين
شيريد أول حتى نبدأ نشتغل؟
أبوتحسين:-ابني حسن صعد أَنت و علي جياس الاسمنت لسطح العالي وديريبالكم.
حسن:-أيييي عمو ان شاءالله
يله علي توكل حتى نخلص بسُرعة
علي:-أييي بس ديربالك على نفسك
واذا مالك خُلك لا تتظاهر بالقوة أكعد
واسكت أني أَكمل كولشي
علي:-صعدت أول جيسين أَسمنت لسطح وانزلت وصعدت غيرهن واتغالب ويا حسن كالعادة؟؟
حسن:-جنت أَصعد كوه وأَنزل بصعوبة أَحس نفسي لهسه مريض بس لازم أَخلص ؟؟
شمس:-كان في يومها الجو حارٌ في بغداد وحدث حادث في دار أبو تحسين لأحد العمال آدى لموته
عند ظهيرة ساعة 12:30 تقريبآ من ياترى؟؟
حسن:-فشلت جيسين أَسمنت وخليتهن ع متني وداريداصعد بدرج فبثالث درجة دخت فجأة
وفقدت توازني فنلوت رجلي وزلكت وأَوكع
على راسي من الخلف على طابوكة بالكاع.
حسن:-صحت بعلو صوتي وأَني اطيح علي ااالحكولي وينكم وومن كد ماطحت بقوة
حسيت رأسي أَنشك من وره
حسن:-بحيث الدم غرك الطابوكة وصرت أَنزف جسمي بدأَيوجعني ونشلت اطرافي لساني ثكل كولش لدرجة صرت مكدر أَحجي.
حسن:- فجأة والتموا عليه العمال خلاني علي بحضنه والكل منفجع من صار بيه ودم غرك كولشي فقدت الوعي بعد لحظات قليلة بس جانت ثمينة.
حسن:-أَخر اللحظات صرت أَشوف العمال
مخبوصين بيه وكل واحد يريد ينقذني بطريقته؟؟
شمس:-الغيرة العراقية لحد يتعجب طبعآ ؟؟؟
حسن :-سمعتهم يكولون واحد لثاني؟؟
العمال:-خل نخابر الاسعاف ستعجلوا الولد
راح يروح من ايدينااا....وعلي يكول خل أشيله
أكيد حيفزعنا أبو تحسين ويأخذه بسيارته...
لو ....روحوا وكفوا اي تكسي من الشارع العام
وخلي يجي .....او اتصلوا على واحد عرف كولوله عدنا ولد وكع من الدرج وحالته صعبة عسريع.
العمال:- حسن حسن لا تخاف كلنا وياك أَحنه اَخوتك.
حسن:- ظلوا يتراكضون علي يبجي عليه ويشهك
جان مثل الام الفاكدة ابنه حاله ويكلي:
علي:-لاتغمض عفيه لا لا حسن عمت عيني عليك
ياريتني أني ولا انت ااااخ اااخ ياضلعي
حسن:-كلما اغمض يضربني علي بجفه على خدي حتى أَظل صاحي ويكلي:
علي:-ولك والله أضيع بعدك لا لا عفيه ويصرخ عفيه وين أبو تحسين خل يأَخذه بسيارته فدوة
حسن:-أَبوتحسين صاحوا العمال حتى يأَخذني بسيارته علمود ماأَتاخر عن المستشفى.
شمس:-ظل حسن بوعيه لمدة 10 دقائق لكن ملك الموت كان له رأيٌ أخر رغم توفر ظروف أن يبقى على قيد الحياة.
حسن:-بدأ يصعب التنفس عندي وكوه أَجر النفس كأنه أَحد خانكني هااااه هاااه هااااه واَتبسم رغم كولشي صار بيه.
علي:-حسن مكدر يحجي أي شي من وكع بس
كدر ينطق الشهادة بأَنفاسه الاخيرةوبأَعتدال.
علي:-جنت القنه الشهادة وأَساعده
وأني يعتصر قلبي الوجع هذا هو أَكيد
هذي النهاية!
حسن:-أشهد أن لا إله إلا الله، أشهد أَن محمداً رسول الله، أشهد أن عليًا ولي الله وابتسمت بعدما شفت شريط حياتي كله مر كبال عيني وغمضت عيوني للابد.
علي:-حضنته وأَشمشم بي وصرت أَصيح لا لا حسن مو أَنت ولك مو تعاهدنا نظل سوه لللليش ااااه اااه يأَبن روحي لاع بعدك زغير
علي:-العمال وابو تحسين حاوطوه
ويبجون بحرقة قلب ااااه ااااه
علي:-اتدنه مني ابو تحسين وخله ايده على ظهري وظل يطبطب عليه و كالي بويه البقية بحياتك.
أبوتحسين:- دكوم شو!أبني علاوي خل نأَخذ حسن للمستشفى وهم لازم أَهله يدرون بهشي وميصير يظل هشكل حرام؟
علي:-ارفعت راسي وكتله أَيييي حياتك الباقية ح أنطي خبر لأهله أكيد بس رجليه ميعينني عمو
أبو تحسين:-ابني صير قوي كلنه على هذا الدرب
متكلي شبيدنا لاحول ولاقوة الا بالله العلي العظيم.
علي:-أيييي أيييي أوووف والله حرام بعده كمت شلت حسن وخليته بسيارة أَبو تحسين وودينه للمستشفى؟
علي:-اتصلت بحجي كاظم حتى أنطي أهله خبر عن موته لكن ...؟
شمس:-برأيكم شنو صار ؟؟
______________________________________
شمس:- ملاحظة في الحلقة القادمة لحظة بين حسن وعلي عند الدفن؟؟
علي:عند دفن حسن يقول:
باجر عكب باجر
جايك للبيت؟
وقت فرغلي روحك حتى أحاجيهاا💔
لتكلي القبر والجفن والتابوت
فكرة موتك مامقتنع بيها
عدل وظل عدل لو تندفن مرتين
يامحبوب عيني ومي سواجيهاا.
اااخ اااااخ ياأبن روحي مو هيج تاليها
-------------------------------------------
ان شاء الله الحلقة القادمة تنزل لكم ايضا قريبآ