#قيود_العوف
بقلمـَي: ريتـَا
انا غراني فيّك مِن چنت حطاب
والمهيوبة أمددها
لمن چنت اخلي بكل جذع نيشان
إختاريتك الشجرة الأكعد بسِدها ..
لتنسون التصويت + التعليقات بين الفقرات + متابعة حسابي قلبي ❤️🔥
شبابات صوتوا دوسوا علىٰ النجمَة لتنسون مُهم🤏🏻
_________________________________
-شنو تقرب الكم المريضة ؟
-رغد: اختنا
هز راسة وگال ..
-صاير عندها أرتفاع ضغط الدم الطارئ
-منار: شدتگول دكتور ؟
-للأسف نسبة الارتفاع عالية جداً وهذا يسبب
مُضاعفات لذلك أنتظر ظهور نتائج التحاليل
اتصنمت بمُكاني رجع گال ..
-حالياً وضعهة مايسمح الهة تطلع لذلك تحتاج تبقىٰ يوم او يومين الىٰ أن نشوف التحسن بوضعهة وتظهر نتائج التحاليل ونشوف حالتهة ..
حچت رغد بصوت ملهوف وخايف ..
-رغد: زين دكتور يصيرر نفوت عليها نتطمن علىٰ وضعها ؟
-لا حالياً حالتهة ما تسمح نراقب وضعهة بالساعات الجاية ونقرر إن كان وضعهة يسمح بالضيوف ونبلغكم ..
گال الكلام واتشكرنا منه وراح ، لزمت راسي وگعدت على الكُرسي بعيني بچية وجاي اضمهة گلبي ممرتاح أبد حسيت علىٰ أيد تلتف حول كتفي ..
-رغد: الزعل وتعزلين نفسج بزواية هذي الأشياء ماتفيد بهاي المواقف وماتغير شيء ، الأفضل أنُ ندعي إلها
-منار: اااه يا رغد ااه كل ما شخص موجود بحياتي يتمرض لو يصير عليه شيء يرجع الي نفس الشعور نفس الوجع نفس الحسرة نفس الي حسيت بيه علىٰ أهلي
-رغد: أحمدي ربنا علىٰ كل حال ، محد أرحم و أحن منه علينا بس هو الي ويانة لحد أخر نفس بالروح
-منار: صرت أخاف أخاف أخسر بعد أخاف ناسي تروح مني مثل الڤوبيا هلشعور بكل موقف مثل هذا يلازمني خوف ورجفة وتفكير ..
-رغد: أحس بيج وفاهمتج وانا مثلج ، خسرت هواي كلش هواي اذا أعدد خساراتي ماا يخلصن وخسرت أمي أعظم خسارة الي بعدهة كل الخسارات تهون ، بس قويت گلبي و أتظاهرت بالتخطي علمود أعيش وعشت لخاطر اخواني وبيبي جميلة عشت لخاطر ناسي الاحبهم
-منار: داحاول رغد داحاول أتظاهر بالتخطي ، ويمكن نجحت بيه لدرجة صرت أضحك واسولف وعديت فترة بحياتي بس المواقف ترجعنة ترجعنة لنفس الشعور الي نحاول بكل مابينة من حيل وقوة حتىٰ نتخطاه ترجعنا لنفس الضعف
-رغد: وبكل مَرة اثبتي أنتِ أقوىٰ من الموقف ، إيمانج أقوىٰ عزيمتج أقوىٰ عندچ رب أرحم الراحمين يشوفج ويعرف بشنو تحسين يعرف من شنو مهضومة يعرف من شنو خايفة كل شيء بأرادة رب العالمين يتيسر ويتسهل الأهم أنچ ما تضعفين وتفقدين إيمانج وثقتج بيه
اتنهدت وهزيت راسي مثل كُل مرة أحاول أفرغ گلبي واصفي بالي وأتوكل علىٰ الله ..
مرت ساعات وتلفوني انخبص كُل دقيقة تمر يتصل شخص عليه و تتصل الحجية لأن خاالة امل راح تتخبل علىٰ جُمان علىٰ ماتعرف أخبارها شنو ، بكل مرة تسألني أبقىٰ صافنة لحد متاخذ رغد مني التلفون وحتىٰ أحيانًا اضطرت تكذب حتىٰ بس تخلي خالة أمل گلبها يرتاح ومتخاف أكثر لأن مو زين عليها
سدت التلفون وشمرتة يمي وگالت وهي تفتر ..
-رغد: شنو الموضوع ؟
-منار: ماا أعرف دخت محد ديگول شيء وكل شوية يفوتون ويطلعون عليها !
-رغد: ومايقبلون يفوتون وحدة من عندنا يمهة هسَة اتعارك والله
-منار: اوووف ياربي دخييلك ريح گلبيي صاير ناار
-رغد: وگلبي هم دخيييل أسمك
شوية ومنشوف ألا مرة متوسطة بالعمر تقدمت إلنا بحرارة سلمت علىٰ رغد واخذتهة بالأحضان أكلتها أكل بالسلام والحچي ،
انصدمت منو هاي أول مرة اشوفهة ، گلت يمكن قرايبهم أو من أهلهم بس الي صدمني أكثر وجه رغد من ابتعدت عنهة چانت مستغربة
من شافت وجوهنة وأشكالنا هيچ ضحكت وگالت
-يمة انا ام مصطفىٰ خابرني وليدي عوف و وصاني اجي
هـزت راسها الها وابتسَمت ..
-رغد: هلا بيج خالة بـس والله ماكو داعي تعبتي نفسَج احنة موجودين هنا
-ياا لا تحچين هيچ حبيبة بنيات حديثات حلوات وحدچن چا انا شعندي مگابلة وجه مصيطف وگاعدة بالبيت يمة واعوفنجن وحدچن وجميلة مابيهة تجي عمت عيني
-رغد: اسم الله عليج خالة سوي الي يريحج كل الهلا بيج بس ماينخاف علينا حتىٰ لو بنات
-ام مصطفىٰ: كفو منچن يمة بس انا يمچن كل شي يصير والله ماهدأ بالي من گال الي مصطفىٰ
-رغد: شنسوي خالة نحمد الله علىٰ كل حال نريد نرتاح ونتطمن هسة
-ام مصطفىٰ: ان شاء الله حبيبة
تقريباً سـَاعة واجت الممرضة گالت ..
-گعدت المريضة بس الدكتور يگول ميفوتون عليها سوىٰ شخص ورة شخص لأن متتحمل هوسة
-رغد: روحي منار دخلي انتِ
هزيت راسي ومشيت وراها دخلت عليها بهدوء رفعت راسهة بثقل من شفتهة شلون نايمة علىٰ السدية والأكسجين مشكل الها روحي انمردت گعدت يمهة ولزمت أيدها
-منار: يابعد حيلي كله
دمعت عيونهة رفعت أيدها رادت توخرة هزيت راسي
-منار: لا لتشيلينة جُمان خلي لتحچين شيء فدوه مو زين عليچ
ماوخرتة بس أسمعها تونون بكلمة أمي عرفتهة تسأل عليها جاوبتهة بسُرعة ..
-والله أمج زينة مابيهة شيء لتخافين عليها لتفكرين
ماگدرت أبقىٰ هواية ، مجرد شفتهة شوي وگلت إلها
-جُمان اني طالعة هنا موجودة يمج بس ميصير أبقىٰ يمج أكثر
دمعت عيوني وكملت بصوت متقطع ..
-عفية صيري زينة والله ماگدر بدونج اني ماگدر لتضعفين انتِ قوية مريتي بهواية أشياء وبقيتي قوية لتفكرين لتخلين المرض يضعفج .
ابتسمت الها والدموع متكتلة بعيني مسحتهن بطرف اصبعي وطلعت سديت ألباب ورجعت ظهري عليه أخذت نفس
ومر اليوم وخالة ام مصطفىٰ ما تركتنا ولا لحظة لحد ماصار الليل ورغد حلفت هية تبات يم جُمان وأني أرجع لأن خالة أمل وحدهة وعندهة أحتياجات والحجية متگدر أكيد
ومن غيَر تفكيرها وخوفهة اذا متعرف راجعة اليوم يصير بيهة شيء من خوفها علىٰ جُمان واحنة ماحچينة بشيء لحد متطلع نتيجة التحاليل
اخذت تلفوني رادت تخابر رغد الحارس وگالت خالة ام مصطفىٰ
-ام مصطفىٰ: لا يمة خابرت مصطفىٰ يجي
-رغد: ليش خابرتي خالة الحارس موجود ياخذهة للبيت ؟
-ام مصطفىٰ: ميخالف حبيبة قاسم وعوف يوصون بيكم مايرضون
-رغد: شنو صاير خالة ؟
رفعت أكتافهة بمعنىٰ (ما أدري) باوعت لرغد بأستغراب كُل مرة من نطلع مُكان واحد من الحراس يروح ويانة شبيهم هلمرة جايبين مرة ويانة وهسة صديقهم حيوصلني
نفخت بملل تعبانة ومابية حيل أفكر
أريد أرجع أشوف خالة واتطمن عليها ،
صُدگ ربع ساعة وطلعت وياي من المستشفىٰ صعدت بالسيارة يلة راحت ..
*****
-ام مصطفىٰ: هاچ حبيبة خالاتي أكلي الج لگمة
قدمت الي لفة و وياها عصير
-رغد: لا خالة ما أشتهي الف عافية عليچ
-ام مصطفىٰ: والله ماترجع وانا ام مصيطف حجايتي ماتصير ثنين تاكلينهة يعني تاكلينهة
ضحكت واخذتهة منهة گعدت وگالت
-اي هيچ ترىٰ ما يرد الچريم إلا البخيل
-والله ياخالة ما ادري بنفسي جوعانة ولا شبعانة مافكرت بروحي كل تفكيري بيهة
-أدري بيج عيوني بس وراج ليل طويل ، ترىٰ الي يبات بالمستشفىٰ عيونة ماتاخذ نوم كل شوية تفزين دسدي معدتج بيهة يابعد خالتج
اتنهدت وصفنت ، اليوم كله ما شفت الحجية ولا سمعت صوت واحد من أخواني اللتهيت وتلفوني مو يمي ونسيت أبلغ منار تجيبة وياها من تجي باجر فززني صوتها من گالت ..
-يمچ قضية شمس ؟
-اي خالة
-أريدههة منج
-بعيوني بس بعدني ما مشتغلة عليها عندي قضية حالياً ملتهية بيهة قربت تنتهي ان شاء الله ابدي بقضية شمس بعدهة اذا الله وفقني
-ان شاء الله بنيتي سمعت بيج گدها انا
ابتسَمت الها ، نص ساعة تقريباً واجة الدكتور وگال ما مسموح يباتون وياها بالغرفة أكثر من شخص وخالة ام مصطفىٰ كفت رداناتها وگالت
-ياااااع خووو ماكو شيء وانا اخلي بنيتي تنام وحيدتهة يمهة وهذول يطبون ويطلعون من الغرفة !!؟
عقد حاجبة وجاوبها بأستغراب .
-ياهمة هذول بلا زحمة ؟
فات من يمنة مُمرض وهي أشرت عليه وگالت ..
-هذوول اليفترون خاالة انا ماعووفها وحيدتهة انام يمهة بلة طفر عليها واحد
ضحك وگال ..
-هاي شغلتهم حجية وين يطفر عليها وين گاعدين ؟
-والله ماتمشي عندي انا رجلي علىٰ رجلهة
-مايصير الهوسة يم المريضة الهدوء والراحة اهم شيء الها كلامج مو مقبول
-عود مانسولف نسكت
-نسوان يتگابلن ومايسولفن
-وعلي ماا أمشي لو مدري شيصير وافوت للغرفة وابات يم رغيدة
جاي يحجي وياها ومنحس إلا مصطفىٰ فوگ راسنة سلم علىٰ الدكتور وأخذة علىٰ جهة بقىٰ يسولف وياه لدقائق وهو يهز براسة اله ومبتسم ..
اتقدموا اثنينهم وگفوا يمنة باوع الدكتور النا وگال بلطافة ..
-ألي أريدة منكم تكونون هادئين وماتسببون ضجة وهوسة للمريضة
-مانحچي اذا سمعت صوتنة عاتبني
أبتسم النا وراح گال إلها مصطفىٰ
-وين يسمع صوتج شني يكض الج الباب مو تسولفين يم البت يمة
-شوف البطران ولك انا يمتى مسولفة
-لا منين عمت عيني
مدت روحهة عليه وضربتة بچتفة
-ولك مصيطف هسة اهفك بالنعاال وروح أمي
انحصرت ضحكة من شفتهة هيچ باوع الي وفتح عيونة صار يأشر الهة بحواجبة ماراضي
-شنهي ولك واگف وترفع بحواجبك كل واحد چنة تيب أسود
-يمة صدگ چذب شماالج ماتگليلي
-شو چنك ماراضي خااايب مصيطف
-يمة راضي راضي أسكتي
-انچب ولك ياهي التسكت
أتقدم عليها سولف وياهة بصوت ناصي بس چان مسموع گلها ..
-يمة شمالج شني عيب من البنية وعلي زلمة شكبرني انا وشواربي ورتبتي والوادم تخاف مني وانتِ مستلمتني بالنعال
ردت عليه بصوت عالي
-انچب چا ضابط عليه انا امك لو شيبك يترس راسك تبقىٰ صغير بعيني واكتلك بالنعال
-يمة هية حلوة لحد صغير بعيني ليش خربتيهة بالباقي
-انچب مصيطف تجعبن عليه اول تالي تستحي من النعال ولك شمالك انا أمك هاي الحچاية مني مثل العسل
-دخييلك يبوو فاااضل دخيييلك
-خاف مستحي من رغيدة
-يمة طبعاً مستحي منهة چا بشرفج باوعيلي وگدام البنية تسولفين سوالف البيت
-ها يله خوش بعد ما اجيب طاري النعال گدامهة
-رحم الله والديج سويتي زين
-كافي دوختني راسي دايخ انا خل افوت بالغرفة
-اجيبلج شيء
-اي روح جيبلي أمية نشف ريجي انا والمگرودة هاي لا كلت لا شربت علىٰ لحم بطنهة
باوعت وراهة شافت العلاگة فارغة وگالت ..
-لا زين كلت اللفة
هنا من صدگ ضحكت ونزلت راسي ، چنت جوعانة وريحتهة خلتني اكلهة بدون مَــآ أحس علىٰ نفسي سدت جوعتي والله ..
راح عنهة يجيب ماي فتحت الباب وگلت إلها تعالي خالة وصلت للباب قبل لا تفوت وگالت
-وعلي يخالة ريحة الديتول سطرتني أرد الف راسي وانام
ضحكت وگلت إلها
-نامي نوم العوافي يارب تعبناج وياج خالة
-لا تگولين هيج حبيبة متعودة انا عندي أربع بنات وكل يوم وحدة منهن ساكنة المستشفىٰ
-الله يحفظهن الج ويسلمهن من كل شر
أخذت وجهي بأيدهة باستني بخدي وگالت ..
-وعلي يخالة سوالفج تفوت بگلبي چنج وحدة من بناتي
-الله يخليج
تقدم خطوة وقبل ماتفوت گالت ..
-هاي سولفتهن بالباب حتى مانسولف جوة لا يجينة الدكتور أنوب
ابتسمت وهزيت راسي دخلنة اثنينة چانت نايمة ، والغرفة هدوء بحيث الحركة تنسمع بيهة گعدت ورجعت ظهري ليورىٰ عيوني تحرگني وجسمي بيَه وجع لأن من الصبح لهسة ما أرتاحيت
اندگ باب الغرفة بخفة عرفتة مصطفىٰ رادت تگوم شفتهة تعبانة ومابيهة أشرت الها تبقىٰ گمت انه فتحت الباب
من شافني اتوتر بحيث قدم العلاگة ورجعهة وصفن علىٰ حركتة رجع قدمهة وگال
-العفوا
اخذتهة منة وهزيت راسي بدون كلام سديت الباب شفت خالة غافية عفتهة علىٰ الميز ورجعت لمُكاني وأول مارجعت علىٰ الكُرسي غفيت بس بخفة
بين الغافية وبين الصاحية أسمع ونين بالغرفة شخص يون بسرعة فزيت فتحت عيوني باوعت لخالة نايمة ألتفت لجُمان أسمعها تون
نهضت روحي رحت الهة بسُرعة گعدت يمهة چانت نايمة بس تون ونة الم وتهلوس
وهي تهلوس وتون حسيت روحي سمعت اسم عوف ، هزيت راسي وگلت أكيد متوهمة ودايخة جاي اسمع غلط بس رجعت لفظت اسمة بشكل واضح وهي تهلوس بأسمة أكثر من مرة .
مسحت وجهي بتعب تنقلت عيوني بالغرفة حسيت نفسي ضاق انكتم اختنگت نهضت ردت أطلع اشم هوىٰ فتحت الباب وطلعت صار بوجهي مصطفىٰ أستغربت وانصدمت بنفس اللحظة ..
-شتسوي هنا ؟
فرك عيونة وعدل گعدتة نزل راسة وگال ..
-محتاجين شيء ؟
-لا
-ليش طلعتي چا ؟
غمضت عيوني ورديت بتعب ..
-الغرفة تخنگ طلعت ردت أخذ نفس
-امي نايمة ؟
هـزيت اله راسي ، چان يسولف ومدنگ راسة واذا يرفعة لثواني معدودة گال .
-شلون صارت ؟
-تون بوجع گعدت علىٰ ونينها وهلوستهة
-الله يعافيهة من كل شر
-چانت تهلوس بأسم عوف وهي نايمة .
-هـآ
أتعمدت احچي گدامة لأن أعرف كل خطوة عوف يدري بيهة وهو الي موصي واذا صار هيچ شيء يعني عوف عندة شغل مُهم بس يبقىٰ متواصل ويَ أصدقاءة ..
صفن بيه شوية واتحمحم بعدهة نهض مشىٰ خطوتين وألتفت الي گال ..
-تردين شيء ؟
-لا شكراً
أبتسم وكمل طريقة وانا افتريت شوية بس تعبانة ونعسانة حيل رجعت للغرفة گعدت يم راسها قريت عليها آيات قرآنية وصليت علىٰ النبي
چانت امي كل ما نتمرض تمشي أيديها علىٰ جسمنا وتقرة الفاتحة سبع مرات وتگول هذا دواج وعند الله شفاج ..
ماحسيت علىٰ نفسي الا وانا أيدي تمشي علىٰ جسمهة وأقرأ بيها دمعت عيوني تذكرت الموقف وتذكرت أمي وختمتها بـ هذا دواج وعند الله شفاج
ابتعدت عنهة ورجعت لمُكاني
وهلمرة من التعب فعلاً غفيت وماحسيت علىٰ اي شيء بعد ...
********
ما أعرف شگد الساعة بس فتحت عيوني علىٰ وجع يدگ بجسمي وعيوني مثل المورمة ماا اگدر افتحهن طبيعي أغمض وأرجع افتحهن
الغرفة هدوء ، وريحة الديتول والمعقم تارستهة ترس رفَعت أيدي منرفعت حسيت أكو شيء مقيدهة
رفعت راسي وميلتة وانرسمت ابتسامة علىٰ وجهي من شفتة لازم أيدي بأيدة وحاط راسة علىٰ أيدي ونايم
چان جسمي مثل الخدران لأن مد اعرف شكد مر وقت واني علىٰ نفس النومة هاي حاولت أحرك نفسي بهدوء اول متحركت فز وفززني وياه شهگت وتألمت بصوت نهض بسُرعة وگال بهدوء
-عوف: أسم الله ألف أسم الله عيناي
باوعت اله ابتسَمت بوجهة وحچيت بصوت رايح تعبان ..
-جُمان: افتقدتك گعدت أكثر من مرة وماشفتك موجود
-عوف: اسف عيناي انتِ چنت مشغول والله لأنعل ابو الشغل الي خلاني بعيد عنج بهيچ ظرف اعذريني عيوني انتِ
يحچي ومرتبك ومتوتر وخايف مثل الطفل وعيونة تتنقل بوجهي بهيام ..
-جُمان: ميخالف لتعتذر
لزم أيدي وحچة بصوت ملهوف وخايف ..
-عوف: طيحتي گلبي روحي راحت مني أرد اندل دربي منين ماكو دخت واتدوهنت شبيچ شلون صار وياج هيج گليلي شنو الچان يوجعج وماتحچين ؟
-جُمان: مداعرف ليش هيچي صار وياية
-عوف: شنو الي صار وياچ بالضبط
-جُمان: صليت ونمت فزيَت لثواني وريگي ناشف واللهث عبالك چنت داركض أريد انهض روحي ماكو صار عندي وجه ودوخة وماگعدت ألا واني بهلغرفة
زفر نفسة وگال بتعب ..
-عوف: دخييلك يابويـة ياعلي .
-جُمان: شنو گال الدكتور ؟
-عوف: ما أعرف توني وصلت واجيت يمج ماگدرت أشوف أحد ردت بس أوصل وأشوفج
ابتسمت اله وحچيت بصوت تعبان ..
-جُمان: شگد الساعة هسة ؟
-عوف: بـ ٣ ونص الفجر
لزمت جهة گلبي فركتهة بأيدي چان بيهة وجع ومثل التقلصات شافني وگال بخوف ..
-عوف: شبيج شبي گلبج يوجعج شيء
-جُمان: گـلبي يـأذيني
-عوف: ريـت الوجع أندار بيـه ، شلون اخليج ما تتوجعين بس گليلي من عسـاه الوجع بگلبي ولا بـگلبج جُمان
ضغطت علىٰ أيده ورديت بأستنكار ..
-جُمان: أسم الله عليك لا تحچي هيج عوف لتفاول علىٰ نفسك بالمرض علمود ميصير !
-عوف: ولچ وحـق الله لو بيدي أسحب كل وجع منج واخليه بيه ، ترخصلج روحي كلها
-جُمان: ممتوجعة هواي ، وجع يروح ويرجع فترة قليلة
رد بصوت تعبان و شكلة مبين عليه الخوف ..
-عوف: شيطلع التحاليل ويريح روحـي ويهديهة
-جُمان: وإذا طلعت تحاليلي مو سليمة؟
-عوف: اسسكتي جُمان
-جُمان: وإذا طلع بيه شيء ؟
-عوف: ااشش
-جُمان: نفترض ؟
-عوف: اشش اسكتي كافي سولفتي هواي ومو زين
-جُمان: ليش تتهرب كل شيء جائز
-عوف: كافي جُمان مابيج شيء مابيج
حط أيديه علىٰ راسه يمسح بيه وهو منزلة ..
-جُمان: عوف
-عوف: لا تأذيني جُمان دخييلج لا تأذين گـلبي
-جُمان: بـس اني ممأذيتك !
-عوف: تأذيني بيـچ تأذيني من تحچين هذا الكلام ..
-جُمان: بـس اني اعرفك قوي ليش تأثرت بالحچيتة وهو مجرد أحتمال !
-عوف: ضعيف يمج أول مرة أعترف بيهة واحچيهة من أشوفج هيچ أضعف وعلي وماتبقالي قوة تعتين روحـي عت دخييل ربج لا تحچين بالموزين عوفي الاحتمالات .
-جُمان: كُل شيء يصير الدنيَا لوعتني هواي وخلتني أمر بهواية مواقف خلي بالك ترىٰ مراح انصدم اذا طلعت تحاليلي مو زينة والله عادي
-عوف: ولچ بـس فهميني شمالج تفاولين هيچ ها أها شوفي وجهج يرد الروح وشحلاتج چنج العافية ما بيچ شيء بعد
-جُمان: مَا مرتاحة والله
-عوف: لا ماكو شيء هاي لأن توهوسين لا تفكرين هيج دخييلج ريحي بالج لا تهمين .
-جُمان: ههههه شگد خايف عليه ؟
-عوف: شگد ؟
-جُمان: امممم !
-عوف: ما ادري لأن ماكو مستوىٰ يكفي أوصفة بيه عابر كل المستويات
-جُمان: ليش تخاف عليه من المرض ؟ ترىٰ عادي كل أنسان تمر فترة بحياتة يتعب بيهة ويصير عنده شيء
-اشش اسم الله عليج لا تجيبين طاري المرض مرة ثانية
-عووف !!!
-جُمان المرض سلب أعز أنسانة مني المرض نهشهة واخذهة من أيديه أكره طاريه تروح روحي لو جبتي هلطاري دخييلج روحي مو گد حمل فقدج !
ابتسمت وشحيت نظري عنه ميلت راسي وحچيت ..
-جُمان: صح ماعشت هيچ شعور ولا حاسة بيه ، بس چنك ابو وخايف علىٰ بنتة خوفك وحنانك وأفعالك كلهم حسسوني بهلشعور .
لزم أيديه اثنينهن ويمسح عليهن حط عيونة بعيوني صفن بيه لدقائق معدودة وهمس بصوت مليان حنية وكُله دفو ولهفة ..
-عوف: احـبنج جُمان احبـنج وهايم بيچ من الجدم للراس وحق رسول الله
طبگت حواجبي ورمشت بعدم استيعاب من الي حچاه اضطرب نبضي اتخربطت أحوالي صرت ابلع ريگ وعيوني تتنقل بوجهة بتوتر صار قريب مني رفع أيدي باسهة وگال .
-عوف: بكثر خوفي ولهفتي عليچ وضعفي يمچ متدوهن بيج انا أول مرة بحياتي أحب مرة بعد أمي وتدخل گـلبي وتفز الهة روحـي وانتِ أول مرة تغير قوانيني وتغير عوف وتصرفات عوف وداحي الباب متسودن عليچ
كزبر جسمي حسيت گلبي صار يدگ سررريع من ينطق كل كلمة بحنية ومشاعر بقيت صافنة بعيونة الي تلمع شافني مصدومة ومبحلقة عيوني بوجهة ومتوترة وأحوالي متخرربطة بلل شفتة وگال بحيرة ..
-عوف: مارايد منج رد ولا كلمة لا تحچين شيء ، يكفيني أشوفج بخير گدامي اتركي الكلام لغير وقت ..
ابتسَمت ودرت وجهي بخجل .. من صدگ أحس داخلي فرحان أول مرة يلامسني كلام شخص ويكزبر جسمي منه أخذت نفس براحة ودرت وجهي عليه شفتة متوتر ويمسح بجبتهة بأيديه ، ينزلهن يمسح أيد بأيد محتار شيسوي عيونة تتنقل منا ومنا إلا بوجهي ما أجت بعد
-عوف
-عيناي امريني
رمشت بثقل بوجهة وگلت بخجل وتردد ..
-هنـيالي بيك
انرسمت علىٰ وجهة ابتسامة واسعة وملامحة ارتخت حسَيتة ارتاح من هلكلمة مني گال بصووت ملهوف وفرحان ..
-دخيييل الحسييين تحچين صدگ جُمان انا الي هنـيالي بيچ لذة عيني روحها لروحي ومحمد عاشگج وداايخ بيج
درت وجهي وضحكت گلت بصوت تعبان ..
-يله كااافي
-ااخ هجم بيت العيارة
-اششش أسكت
-ميخالف ولا يهمج بعدين نتفاهم
-ههههههههههههه
-أتدوهن بهلضحكة
-عوف أريد أشوف امي گلبي مفرفح عليها أفكر بيهة أدري بيهة هسة گلبها نار وروحها تلوب ياعمري منو الهة الحجية متگدر طلعني مابيه شيء
-لا تخافين منار راحت الها وما اگدر أطلعج لحد ما الدكتور يأذن بهذا الشيء ما اگدر أخاطر بحالتج
سكتت وصرت أحرك بروحي جسمي مثل الخدران ضجت من النومة باوعلي وگال ..
-أعدل گعدتج مامرتاحة ؟
-ياريت جسمي خدر من هاي الوضعية مابيه انهض
-بعيوني
اتقرب مني وعدل المخدات رفع السدية شوية وعدل ظهري صار صدرة بوجهي كفخ عطرة خشمي استنشقتة طيب طييييب حييل بشكل ..
أبتعد عني وگال ..
-تنامين شوية ؟ ريحي راسج وعيونج
-اي
مد روحة اخذ بطل مي حط أيده ورة ظهري وشربني رفعت عيني بعينة أبتسم الي ورفع خشمة ابتعدت وابتسَمت علىٰ حركتة ..
-عساها العافية
-شكراً الله يعافيك
-جوعانة ؟ اجيبلج شيء تاكلينة ؟
-لا ما اشتهي شيء هسة
-براحتج ، بس تردين شيء انا يمج ماي عيني
وگف ابتعد خطوتين ليوىٰ وگال ..
-يلة نامي وارتاحِي انتِ
-وين رايح ؟
-هنا يمچ قريب
مسح على خدي وطلع ، رغم كل شيء بيه انا بس فرحت حيل فرحت نساني شعور الوجع ودخلني بشعور ثاني رجفة بجسمي بس مو رجفة مرض أبد رجفة فرح ابتسامتي مفارگت وجهي
من گلت اله هنيـالي بيك چنت أعنيها وبكل معنىٰ الكلمة ، هنيـالي بيه ماشفت احن منه بحيـاتي ماشفت شخص يحترمني ومعزز مُكانتي بكثرة ، سند وأول مرة اگولهة چنت دائماً اگول ممحتاجة سند بحياتي الله سندي وامي وهسة صار عوف فعلاً أحسة سند يرتاح بالي وفكري يمة ، روحي تفرفح من تشوفة
غمضت عيوني وابتسامتي علىٰ وجهي ، رجعت عليه التلقصات من جهة گلبي اذتني من الوجع ماردت أبقىٰ گاعدة حاولت أغمض عيوني وماا افتحهم بعد وغفيت ...
ما أعرف شكد مر وقت بس فزيت علىٰ صوت عالي يجي گدام باب الغرفة باوعت للغرفة فارغة محد بيها بس اني حركت نفسي وعدلت گعدتي شوية وفات عليه الدكتور وفات وراه عوف ورغد
أتقدم الي وگال بأبتسامة ولطافة ..
-صح النوم شلونهة وردتنا اليوم ؟
هزيت راسي وبادلتة الابتسامة ..
-الحمدلله
صار قريب مني شال الأجهزة وشال الكانيولا وگال
-صارت عندج نغزات بگلبج ؟ تقلصات ؟
-اي البارحة بـ أي وقت أفز أتألم من جهة گلبي وتقلصات تروح وترجع
اتنهد وهز راسة وزم شفتة بوجهي .. بس سرعان ما غير ملامحة وأبتسم بوجهي ألتفت لعوف شفتة متكتف وطابگ حواجبة أشر اله وطلعوا سوىٰ طلعت وراهم رغد بسرعة
بقيت صافنة مافاهمة شيء بس ماا اهتميت بقيت احرك بجسمي واحرك بظهري ...
********
وگف وكتف أيديه بأنزعاج وكال
-شنو دكتور ؟
باوع اله وگال ..
-گلت ألكم انُ المريضة صاير عندها أرتفاع ضغط الدم الطارئ بنسبة عالية جداً
هز راسة مرتين وگال
-اي ؟
-وبسبب الارتفاع الحاد للضغط صار عندها تضخم بالبطين الايسر
رجفت شفتي أخذت صفنة بوجه عوف الي باوع الي وملامحة كلها اتغيرت بلل شفتة وبقىٰ صافن بوجه الدكتور ..
-رغد: بـس دكتور ماچان بيهة شيء وما عندها أي أعراض ماشفت عندهة أي مشكلة تشير لهذا المرض ولا فد يوم شفتهة تشكي من وجع بمُكان مُعين !؟
-مو شرط ماتظهر الأعراض علىٰ المُصابين أحياناً ، و يكون ضغط الدم مرتفع لسنوات عند المريض ومايدري بنفسة لكن إذا أرتفع بنسبة عالية مثل هذي فـ للأسف يكون الناتج هو تضخم البطين الأيسر
كل كلمة يگولهة تخوفني وتقلقني وتوترني بقيت ساكتة أحس ماعندي طاقة ..
مسح وجهة وگال بخوف ..
-عوف: دكتور يأثر عليها ؟
-التضخم لوحدة مايسبب أعراض مُخيفة لكن مع أرتفاع الضغط راح يأثر على القلب ويكون دائماً عند المريضة ضيق بالتنفس قوي والآلام بالصدر ودوخة ويصير عندها حالات أغماء
زفر نفس عالي من قوتة أحس شگ صدرة عصر عيونة وحچة بنبرة خوف وقلق وياه ..
-عوف: شنو العلاج دكتور ؟ انا حاضر بكل شيء بأي شيء يعالجهة من هلمرض ومايسبب الها وجع والأعراض الي ذكرتهة
هز راسة بأستنكار وگال ..
- ضغط الدم مُزمن عند المريضة
صرخ بوجه الدكتور حييل لدرجة الدكتور جفل ، أول مرة اشَوف هيَج اسلوبة بحياتي ما شايفتة واصل لهلمرحلة گال بغضب..
-عوف: احچيييي ليش تلزگ بالحچي تحچي كلمة كلمة فهمنيييي الحل شنوو !!
بلع ريگ وجاوب وهو بعده مجفل ..
- ااااحم .. التضخم مُمكن نعالجة بالعلاج او يحتاج قسطرة لكن المشكلة تشكل اذا بقىٰ ضغطها علىٰ هذا المستوىٰ تتضاعف الأعراض وتصير عندها مشاكل بالقلب ..
رد عليه بحدة وگال ..
-عوف: وبالبداية ؟
-العلاج ، لذلك راح اكتب الها نوع من انواع العلاجات الي تخص التضخم ونشوف النتيجة ، ألمهم أنُ المريضة ماتتعرض للضغط والتعب او الصدمات أو التوتر او واحد من هذي الاسباب ألي راح تضاعف نسبة أرتفاع الضغط لذلك العلاج الأهم يمكم لا تخلونهة تتعرض لأي شيء من الي ذكرتة حفاظاً علىٰ صحتهة ! وأيضًا الأكل الصحي جداً مُهم ..
بقىٰ يسولف شوية ويانة وينطينا تعليمات وتمارين يسويهة الها من يصير عندها ضيق بالتنفس او وجَع ، بس اذا تفاقم الوضع ينقلهة مُستشفىٰ بنفس الوقت ، الي صدمني وضع عوف عصبية وتوتر قلق ملامحة كلها اتغيرت الخوف بين عليها وأول مرة اشوف عوف خايف ! أول مرة اللاحظ ملامح الخوف بوجهة .. والرجفة بصوتة ..!
ألىٰ أن گال ..
-تگدرون تطلعونهة اليوم أشوف وضعها أفضل.. لكن في حال إذا صار تأزم بوضعها وصار عندهة الآلام بالصدر وبجهة القلب ترجع تدخل مُستشفىٰ ..
اتنهد ومسح وجهة بتوتر وقلق مد أيده سلم علىٰ الدگتور واتعذر منه لأن زمخ بوجهة ، ابتسَمت من تصرفة اي هذا عوف الي يفصل بين تعاملة بالشغل وبين الناس الي خارج عن نطاق شغلة ..
نص ساعة وجهزنا كل شيء وخالة أم مصطفىٰ ماعافتنا ولا دقيقة بس لاحظت مصطفىٰ ماموجود اليوم ، بدلت ملابسها وعدلت نفسهة دخل عوف جايب الها ريوگ أول ماشمت ريحة الأكل دارت وجهة
گال بأستغراب
-عوف: هـآي ليش ؟
-جُمان: مداشتهي الأكل هنا ريحة ديتول ومعقمات ماا تتقبل معدتي
-عوف: يله أغاتي صار ، ناخذة ويانـة وتاكلين بالبيت لأن عندج علاج
نهضت واجتها خالة أم مصطفىٰ لزمتهة ابتسَمت بوجهة وگالت
-جُمان: خالة اگدر أمشي
-آم مصطفىٰ: ميخالف حبوبة حطي أيدج بأيدي نمشي مثل هذول المرتبطين
ضحك عوف وگال الها
-عوف: ماتركدين بمُكانج وينج وين هلسوالف
-ام مصطفىٰ: لا ياسرسري اذا صاحبك مصيطف شحچي بعد
-عوف: ما أسمح الج
-ام مصطفىٰ: امشي ولك
-عوف: يله عيناي
طلعنة وخالة لازمة بأيد جُمان صدگ ماعافتهة ولا شوية حتىٰ حاضنهة من أيدهة حضن وجُمان أحس الضحكة حاصرتهة بس متونسة عليها تخبببل سوالفها واسلوبهة يدخلون الگلب ..
مسافة الطريق كلها أشوف عيونه كل شوية تصير بالمراية ضحكت ونزلت راسي أنتبه الي وتحمحم ، وصلنة وأول مافاتت تلگتها منار حضنتها ودموعها عشرة عشرة ..
انا ضعيفة گدام هذي المواقف درت وجهي حتىٰ ماا ابچي ،أكره البچي بس بيني وبين روحي ابچي ماا ابچي گدام أحد وماتنزل دمعتي عزيزة وهواي علىٰ أنُ يشوفهة شخص ..
ألتفت علىٰ صوت خالة أمل ، جحظت عيوني بصدمة باوعت بذهول ما مصدگة ألي اشوفة گدامي بسرعة حولت نظري لجُمان الي چان شكلهة ميتفسر تباوع ونفسها عالي يخلي صدرها يصعد وينزل من قوتة رجعت نظري لخالة أمل چانت واگفة علىٰ رجليهة ومادة أيديها وتصيح بأسم جُمان لثواني معدودة بعدهة گعدت بالگاع ..
عاطت بصوت يرجف يرجف ومشت الها دنگت لمستواها وحضنتها ومانسمع بس صوت البچي ولهفة خالة أمل وخوفهة علىٰ بنتهة ، للأسف شگد چنت صامدة وقوية لكن ماحسيت إلا ودموعي تنزل علىٰ خدي گدام هذا الموقف
چان موقف يقشعر البدن ، شيء محد منتظرة صدمة وفرحة ، ودموع وحنية الام وكلماتهة بنيتي ، يبعد أُميمتج ، تتحس وجهة وجسمهة بأيديها وتبچي وتگلها :- يمة بيج شيء شني اليوجعج گليلي يابعد امج وگلبها يانظرها .
رفعت عيوني ليفوگ ودعيت ربي ميذوق احد الم الفقدان وخصوصاً الام تبقىٰ كسرة تكسر الظهر وخيبة طول العمر ما تنسي ومحد يگدر يتخطاها .
فززني صوت جُمان من باوعت لمنار وگالت ..
-جُمان: شلوون صار هيچ شلون گدرت تنهض علىٰ رجليهة
-منار: گومتهة من الكُرسي وانصدمت من وگفت علىٰ رجليهة بس لثواني ورجعت وگعت
-جُمان: اللهم لك الحمد حتىٰ ترضىٰ
باست راستهة بدموع وگالت ..
-جُمان: ماما يعني راح تگدرين تمشين راح ترجعين تمشين علىٰ رجليج والله ربنا ماقصر ماقصررر راح نرجع نروح للدكتور ونحچي اله ونبدي نباشر بمرحلة العلاج
-امل: بفضلج يبعد أُميمتج ياحيلي ياروح امچ ، شهور وانتِ مكسور ظهرج بيه تتحملين ثگلي وتنهضيني وتگعديني وتحركين برجلية ليل ونهار تحركينهن وتسويلي بهلتمارين ، يمة بفضلج انتِ
درت وجهي علىٰ عوف الي چان متكئ علىٰ الباب ومبتسم ..
ومشت الأيام بين تحضيراتنا لموعد عرس قاسم الي بقىٰ اله كم يوم وصرنا كل يوم نتجمع بالليل وسوالف وضحك ميخلص والأغرب عوف ! الي بحياتة ما مشاركنة گعدة وسهرة صار كل يوم يگعد ويانة ويضحك ويسولف والكل منصدم ، وبين اهتمامة بجُمان الي كل البيت ركز بيه وانتبه اله ، اللگمة يستنگيها الهه ، والعلاج مايفوت علىٰ وقتة دقيقة ، ومن يطلع مايخلي أحد بالبيت مايوصيه عليها ، ويحدد علىٰ كلمة "دير بالكم تخلونهة تزعل ولا تخلونهة تضوج "
چنت فرحانة وگلبي يرفرف مـن أشوف عيونهم واللمعة الي بيها تجاه بعض ، شخصين نظيفين صادقين ، أدعي ربي يعوضهم ببعضهم خساراتهم ..
******
توترت من حسيت خلص صار الموضوع صدُگ أيام بس تفصلني عن زواجي وعن حياة ثانية مختلفة ماا أعرف اذا راح تكون حياة أفضل من الي عشتهة وتنجبر بيها انكساراتي لو راح أرجع اعيش صدمات وخيبات وخسارة
ما أنكر بعدني علىٰ نفس تفكيري والهوس والخوف ، بس أذكر نفسي أنُ قاسم يختلف يحبني ويريدني
اليَوم طلعت أختار فستان زواجي ، طلعنا اني وقاسم وأكيد متخلىٰ طلعتي من دون رغد وجُمان الي اخذ رأيهم بكل خطوة شگد افترينا محلات فساتين رجلية تعبوا من الفرة وجُمان الي كُل شوية تگعد تلهث وتگول
-جُمان: بعد ماا اگدر أمشي خلي أرتاح گلبي صارر يخفق بشكل مُخيف
-قاسم: عليج الحسين لا تتخربطين هنا
ضربتة علىٰ كتفة وحچيت بأنزعاج ..
-منار: اوووي أسم الله بس هيه تتعب من الفرة هواية هسة ترتاح
-قاسم: گعدن خل أجيب الجن ازبري أجيب صخام تبردن گلوبچن بيه انا ويني وين هاي المطمطة مال النسوان شمالني اجيت وياچن لو متيهجن لوحدجن مو احسن الي
-رغد: شنو طليان ومتيهنة عيوووني اناا كل مكان اندله
-قاسم: دنچبي
-رغد: دروح جيب النا عصير صخام من طلعتنا لهسة حتى ماي ماشربتنا
-منار: صحيحة هاي توني أنتبه اني عطشان
ميلت راسي وگلت اله
-منار: ليش هيج جلف ؟
-قاسم: ولچن انتن غير شادات محرك واوي انطيتني مجال اوگف حتى اشتريلچن صخام الصخمچن !!
-رغد: عريس وماگدر أجاوبك روح جيب النا عصير وخلي نستراح شوية
راح ربع ساعة واجة بأيدة لفات وعصاير ضحكت وگلت أله
-منار: اي من زمان وهيج دلل مرتك
-قاسم: ااخ علىٰ راسي مرتي
-رغد: اوووش خففها يمك احنة
گعدنة ناكل ونفكر بعد وين مُمكن نروح افتريت كل المحلات ومالگيت الفستان الي بنفسي ذووقي نحيسس واذا قفلت علىٰ شيء مستحيل أجيب غيرة حتىٰ اذا محصلتة ..
خلصنا ورجعنة افترينا دخلنة محلات اثنين وهم نفس الشيء بحيث كُلهم بزعوا مني قاسم حط أيديه علىٰ خصرة وصفن عليه
-قاسم: ولچ شتردين حلبتي المحلات كلها
-منار: مااا أريد هيچ ليش مدتفهمونيي مداقتنع
صفنت رغد بوجهي وقلصت عيونها لثواني وگالت ..
-رغد: امشوا وياي
-قاسم: ديله تالي عمري امشي وره رغد
ماگلنة شيء مشينا مسافة ومن التعب صارت خطواتي بطيئة والله رجلية هلكتني هلكتنيي وصلنا للمحل چانت فساتينة تجنن بحيث أول مافتت ابتسمت ونسيت تعبي كله صرت افتر بيه واگلب بالفساتين
صعدنا الطابق الثاني وچانت الفساتين بعد أحلىٰ وارتب اول مافتت عيوني أجت علىٰ فستان ، حسيتة هو الي صاح الي مشيت وگفت يمه چان فستان أبيض يلمععع عباالك فستان أميرات تصميم الصدر والردن والتلة نفسة نفسة الي ببالي وألي اريدة
حسيت صار شخص وراي ألتفت شفتة قاسم ..
-قاسم: عجبج ؟
-منار: لو هو لو ماكو
اخذتة جربتة وعيوني تلمع تلمع ، يموت عليه ناعمة وبيضة ويبرررق حسيت نفسي اميررة مو منار ام الحدود البنات انبهروا بيه حييل ..
وقاسم برة أسمعة يگول لرغد ..
-قاسم: عليج الزهرة خلي أشوفها
-رغد: ممنوع ياوردة
-قاسم: باع حظييييي حتىٰ أختي گالبة عليه
-رغد: لا بس أريدك تنصدم وتنبهر بالعرس ياعيني مايصير تشوفهة هسة
لوعتة بحچيهة سودنتة واني اسمعة متحمس ويتحمس أكثر من تحچي واني وجُمان نضحك ..
أتفقنا علىٰ السعر واخذناه .. دخلنة للبيت من التعب بعد محد شافت وجه الثانية كل وحدة علىٰ فراشهة اني هلگد مهلكانة وتعبانة نمت بملابسي ..
فزيت شفت الضوة يجي من الشباك بس موقوي توة ديكشف الجو يعني فجريات اخذت ملابس وطلعت حتىٰ أسبح واصلي
طلعت دامشي سمعت صوت عوف وقاسم جاي من الصالة أستغربت أخذني فضولي أكو احد گاعد يسولف بهلوقت وصلت يم باب الصالة وصلني صوت قاسم من گال
-قاسم: من يمتىٰ احترگ بيتهم ؟
-عوف: يومين ، كل شيء بيه صاير رماد وبنص البيت لگيت هاي ورقة التهديد
-قاسم: لأن شعلتهة عوف صار أسبوع من خليتهم راس براس يطگ شعلت النار بيناتهم انتّ
رجفت و وگعت ملابسي مني حطيت أيدية الي صارت ترجف مثل السعفة علىٰ صدري فتحت حلگي بذهول وصدمة من سمعتة گال ..
-عوف: مادام حرگوا بيتهم وعافولي ورقة تهديد بنصة وخصوني وخصوها بيها يعني جُمان بخطر قاسم جُمان صارت بنص الخطر ...
يتبع ....
للحكايا خفايا ...
تعالو للتلي انشرلكم صورة لشيء انذكر بالبارت واغلبكم صارت عنده فضول اله هذا معرفهة ( reh0an ) اسمها لـ ريتا
حسابي بالانستا
rita.almukhtar