"وأد القلوب"
بقلمي: ورده الخُزام
ومو يمي عيش الوحدك
وانتهى البيني وبينك
بالبيت وانت مرايتي
وما خلي عيني بعينك
- مُهند العزاوي
★★★★★★★★★★★
بـــــــــــــارت 2️⃣1️⃣
فتحنا الباب گمزنا ثنينا الحقير عمر
ابتعدنا على صفحه حاطين ايدنا على گلبنا من الخرعة ..لازمه گلبي واتنفس سريع ونزلت عليه ..
- وووجع ومرررض كون وزقنبووت ياعمر يابن مريم
- وسممم ميت جوع وادري بيج ام بطن هيج وكت بزونه مطابخ
- دطب طبب المعفن الخايسس هبطتني
- اهوووو راح اذلني عاد
دخلنا جوة شاف اكلنا باوع لأكل ورجع باوعلنا ..
- گبور اي والله شنو هالخبيطة ولجن؟ انتن بشر لو حيوانات شهالتلعووص هذا قحط اماعين خما قحط!
- والله عيوني مابينه حيل نغسل اماعين .. هاي اولا
ثانيا احنه عاجبنة ودناكل والامور عال العال
كعد متربع ونزل ع الاكل دوسه ونص! ،خبصنا خبيط ولويصه تالي طاح بي انوب گمنا اني وشهد نگلي ونخليله وهو ميگول باطل طايح مييت .. اخر شي تعبنا منه نجيب ونخلي وميكول بس.
گلينا لروحنا وكعدنا ناكل وهم رجع علينه ابو بطن .. اكلنا اكل مو قانوني بحيث تمددنا بالمطبخ مابينا حيل نگوم .. اخذنالنه ب الربع ساعه، گام عمر وگال
- يلا گومن
كناله وين؟ گال نطلع للشارع نلعب رياضة ركض حتى يتصرف الاكل ..
كيفنا اني وشهد، طلعنا نتسحب على كيييف لا يحس علينا حسام ويرزلنا، طبعه فد غلثثث وغثيث وشكاك ب كُلشي يحط انَّ.
سدينا الباب وطلعنا للشارع، ضلينا نركض بالنص ساعة لحدما گعدنا بنص الشارع نلهث وگوة نجر النفس.
بقينا كاعدين بالشارع وسكوت كل واحد بينا سافر بأفكاره، الجو حلو وقت فجر، والشارع فارغ مابي جنس مخلوق هدووء، كسر سكوتنا شهد وهي تسأل عمر:
- عمر سؤال
- گولي
-ناز شنو تنعنيلك؟
تعدل بگعدته باوعلي ورجع باوعلها: شوفي اني مااحب امدحها گدامها تنغر علينا وتشوف روحها .. واصلا المدح ميلوگلها انوثه ماكو من اشوفها چني شايف جبار ابو المولده گبالي ياسبحان الله نفس الجهره بس الفرق هي شعفتها صفرا.
لوما عاجبتني الگعده والهدوء جان يعرف شسويله ،بس عديتها ماريد اعكر صفو هدوئي وراحتي ..
شهد ضحكت وتگوله: هسه اعتبرها ماموجوده واحجيلي
- باوعلي بطرف عينه وغمني وبده يحجيلها:
- ناز بالنسبة النا سواء اني او مهيمن او احمد بالنسبة النا مثل بتنا عمرنا مااعتبرناهه اختنا .. شايفه هاي ام شعفه الصفرا روحي من الدنيا والله، اخاف عليها من كلشي رغم مو جبير فرق العمر بينا بس دوم احسها مثل بنيتي مدري الصوج لان قزمه وناعمه متكبر بعيونا ونضل نشوفها طفلة؟ مدري لان وحيدتنا هالگد مكانتها جبيره!
هي صندوق اسرارنا اني ومهيمن من بعد ماراحت رفل
گمزت من يمي معترضة :قصدك صندوق بلاويكم ومصايبكم! ،الي لو بيوم اعترفت بيها تروحون وره الشمس ،احجي ورافعه حاجبي بتهديد ومبتسمه بخباثه
هو ابتسم وكمل: اتذكر مرة بوقتها جان عمرها 3 مدري 4 سنوات .. وجان عاجبني بايسكل وسولفتلها عليه، بوقتها صديقي جان عده منه واني هم عجبني وعود هي القزمه اختي واسولفلها الي بخاطري، شو هاي عافتني وحدي وراحت!
لشوي رجعت وهيه لازمه فلوس بأديناتها الزغيرونات وشعرها مضوجها ينزل على وجها وتوخر بي منزعجه وتسولفلي:
- هاك عمر دني مروفي اني مدمعتهن من دماااان احذهن واشتري باسكل متل صقيقك
حضنتها وابوس بخدودها وهي محتاره بشعرها الي بطولها واشگر مثل شعفتها هسه .. بالها مو يمي تدردم وي شعرها:
- ابووووو دوجني هذا ابووو
من هي وزغيره عدها حنيه وتحطيها بروحج على گدما نادره ومحبوبة وعدها فد سوااالف ودج تگرطيها.
ومرة تمرضت مرضة قووية وگعت بالفراش، گمت انام يم راسها والليل كله انام وافز وافحص نبضها خاف ماتت ..
تدرين جنت شلون افحص تنفسها؟ ههههه اخلي ايدي على خشمها واشوفها تتنفس لا .. وبقيت مراقبها لحدما تحسنت يلا گدرت ارتاح.
اني اميله راسي على جتفه وابتسم بسوالفه، حجت شهد بحزن وحسره:
- تدري مرات احسد ناز لان عدها اخوان يسندوها وكت يميل الزمن بيها؟ ناز رغم الي مرت بيه بس من قررت تعوف كلشي وترجع جانت تدري اكو اخوه وراهه يسندوها ويوگفون وياهه .. اني حتى اخو ماعندي وبابا الي ...
جرت حسره وسكتت .. وعمر رزلها:
- اكلي خ ** انتِ حالج حال ناز ومعزتج صارت من معزتها، اعتبريني اخوج
حجيت واني بعدني حاطه راسي على جتفه:
- عود صار حنين اووي ، ترا انت خالها اخوها شنو؟
- سدي حلگج انتِ لو غرتي؟
سكتت عنه وذيج كيفت اجت تبوس بيه نزلت العاطفة كلش عليهم عشتوو.
لشوي رجعنا للبيت لگينا حسام واكفلنا بالباب ووجهه مايگصه السيف! ،عاط بينا:
- ووووين جنتوووو؟
حجت شهد بخوف تمتمت: ها ااا هنا بابا
انقذنا عمر گاله: ناز نست غراض ابيتنا ورحنا نجيبهن
باوعلي بطرف عينه وهز ايده ودخل للبيت ... عمر تجاهل تصرفاته وگال:
- يلا حبيبتي ناز اني راح اروح هاج هذا مصرف
- لااا والله عندي كوومه
- ميخالف خليهن جوة ايدج يمكن يعجبج لبسه شي ..
-اوك
تقرب حضني وبوسني بخدي وبراسي وراح .. دخلنا جوة طلع حسام بوجهنا منتظرنا باب المطبخ!
وجهه كله غضب وشر اني دنگت ورحت لغرفة شهد،كملت طريقي واسمعه يگلها: هي مستهتره ومالهه رداد انتِ شكوو مرافگتها؟ هي لو بيها خيرر تتطلگ!!
عفته يحجي وراي ومشيت سريع للغرفة انقهررت وحز بخاطري كُللش كلامة بسرعه اتصلت بعمر يجي حتى يجي ياخذني بس ماكو ميجاوب، الظاهر نام .. رحت دخلت بالفراش ودموعي تجري واشهك ،لشوي حسيت احد دخل الغرفة، غطيت راسي وسويت روحي نايمة، بس رفعت الغطة من سمعت صوت بجي!
واشوف شهد تبجي وخدها احمررر، رفعت الغطة ورحت يمها
- ها شبيج شهوده؟
- لج والله تعبت من بابا وطبعه الي مينطاق تخيلي يشك حتى بخياله! ،لج حتى من اضحك واسولف وي عمامي ميقبل؟
مرة شافنه اني وعمو نلعب طوبة، بيومها لزمني موتني ضرب يگولي شلون تلعبين وياه، وهسه العركة كلها شلون شافني وي عمر.
تقريت حضنتها وهي ضلت تبجي على صدري، صح جنت ادري بي شكاك وغلث وغثيث بس ماتوقعت يشك حتى بعمامها وخوالها؟!
لشوي اجت نغم شافتنا ع هالوضع عگدت حاجبها الواضح جانت نايمة متدري .. سولفنالها جرت حسره وغيرت علينا شوي.
- دكافي بجي هسه .. هو اصلا يذبنا ويسافر گومن سبحن وتعدلن وانسن الي سمعتنا لتعكرن سفرتنا خلنا نتونس
صدُك عاد كمنا بدلنه ومكيجنا وكل وحدة سحلت جنطتها وراها ونزلنا .. حسام جان جوة هو ونغم باوعلي من فوك ليجوه وخزرني، والنبي ردت اعيط بي اني مو من طبعي اسكت ابد، بس نغم تأشرلي سكتي عاد غلست عليه ماردت اخرب سفرتنا وهو اصلا يذبنا ويولي ..
صعدنا بالسيارة ويبووو خلص الطريق كله ينافخ شكد شايفه ناس عكره بس مثلة مشفت ابد!
نص الطريق شهد نعست حطت راسها بحضني ونامت، اني جريت سماعاتي شكلتهن بأذاني وشغلت اغنية حسام الرسام اول حب.
رجعتني ذكريات وووين بسرعه دمعت عيوني وسافرت بذكرياتي لموقف مرة گاعدين بالحديقة اني ومازن ماخذ ايدي ويغنيلياهه واني اتمايل وي صوته بوقتها سألته:
- مازن شگد تحبني؟
ابتسم واخذ ايدي باسها: ناز انتِ كلشي بحياتي مرتي وبنتي وصديقتي وكلشي حلو بحياتي
- هم يجي يوم وتتخلى عني؟
جاوبني بسرعه وبدون تفكير: اي
بسرعه برطمت :صدُك!
- ضحك وحضني لصدره: من يحطوني جوة التراب ساعتها اتخلى عنج
ابتسمت وكتله احبك
- اعشگج مووت ميت بيج
رجعت من سفرة خيالي دموعي على خدي، مديت ايدي امسح دموعي، مشتاقة لآدم حيييل، شگد اكابر ومكملة حَــيآتـي واضحك واسولف بس غيابه عني باقي غصة بگلبي ولا يمكن تروح!
بعز ضحكتي اذكره واتنغص بيها، بنص اكلي اذكره واتزوهر باللكمة .. مشتاقه لأبني ولابوه، يي ليش اكابر واجذب؟ اني مازن لسه احبه واشتاقله وگلبي يرف لمجرد سماع اسمه!
بس عقلي الي اخذ القيادة وطلعه من حَــيآتـي .. اذا ترجع وره گلبي ف يسامح ويغفرله كل اغلاطه وذنوبه ..
بهالاثناء وصلتني رساله، باوعت مازن! ،بوقتها ماعرفت اي مثل بيهم ينطبق عليه .. ذكرنا القط نط
لو ابن الحلال بذكره؟
سَـآعــهْْ ب 5 الفجر جانت كاتبلي:
-ناز گاعده؟ شفتج فاتحه نت!
-كتبلتله شتريد؟
ردلي: ناز بيج شي؟ كلبي واجعني عليج
- هه ليش انت عندك گلب من الاساس؟
بقه يگولي ارحميني والله تعذبت بلياج ولا ليلي ليل ولا نهاري نهار، انطيني فرصه واعوضج، شتردين حاضر والله!
بس لا تكسريني اكثر لج لا نومه مثل البشر لا راحه محتاجج ناز؟
بقيت اجاريه بالحجي ماعرفت ليش هالمرة انطيته فرصه يحجي الي عنده لأخير كل مرة احضره گبل .. من گال كلشي تردي حاضر
رديته: تشتريلي بيت وحدي؟
رأسا كتب: اي والله وداعتج مستعد كلشي اسوي في سبيل ترجعيلي!
-اوك شتريلي بيت وارجعلك، صح مااسامحك بسهولة بس علمود ابني مستعده اضحي واتحمل المهم يعيش بين احضاني
بقه هو يشكيلي وضعه من دوني ويسولفلي شلون ادم نسخه مني ،اخذني الوكت بالسوالف وياه ماانتبهت غير احنه واصلين دهوك. سديته منه واني مادري اذا يستاهل هالفرصه الي انطيتهه اله لو غلطت بهالشي؟
بس من يجي ع بالي ادم فورا اگول لا علمود ابني ميخالف .. ومن زمان هذا شرطي لو قابل يخليلي بيت وحدي جان رجعتله .
وصلنه الضحى، المزرعة تجنننن حرفيااا راحه نفسية الخضار الورد الفواكه شي يفتح النفسية ويغير المزاج غصب عنك!
شگد مااوصفها ماانطي حقها جمال المزرعه والجو بعد احلى شمال ويمكم الحساب ..
طلعت حمات نغم ترحب بينا وجهه بشوش وصاحبه ملگه حلوو سلمت على نغم وتشبگ بيها انوب رجعت على شهد خاضنتها وتبجي وتبوس بيها ..
يمي نغم حاجيتها بصوت ناصي: شدعوة صارلكم قرن ممتشاوفين!
ردتني بصوت ناصي هم: اي لج صارلنه 6سنوات ماملتقين
-ياااابة! لعد حقكم
خلصت من نغم وشهد باوعتلي وگالت لنغم: منو هاي اللعابة؟
نغم: اختي الزغيره ناز
تقربت بوستني ومدري شتبسبس وي روحها
طبينا للبيت گعدتنا بالاستقبال، بس كُلش خجلانه هسه اني شجابني؟ شعرفني بيهم، مادري شو ماارتاحيت رغم المكان يجننن بس لان مااعرف احد بيهم ف مادري مااخذت راحتي ..
لشوي دخلوا ولدها سلموا على نغم وشهد وگعدوا، خاف اني ممرتاحه وتندمت على الجيه كلها؟ هسه اجه هذا زودها!
واحد من ولدها طول مگاعدين مشال عينه مني بحيث تضايقت كُلش، تدنيت يم شهد دغيتها
- منو هذا ابو عين زايغه؟
- هذا ابن عمتي الجبير... بس خطيه عيونه راح تنعمي من گدما مامركز بفد ناس
- والنبي جزعني كُلللش اگوم احط هذا الگلاص براسه!
-ضحكت وتگولي: والله مااستغرب تسوينها شو انوثه ماكو
لشوي گمنا من يمهم اني وشهد بقينا نتفرج بالمزرعه بس مارحنه بعيد .. لحدما صار الغده صاحونه
گعدنه ناكل زلم ونسوان سوه .. هو عادي مامستغربه هالشي بس ماخذت راحتي نهائيا واني اشوف هذا حتى وهو ياكل عيونه معلگه بيه حييل ضوجني احس دخنت شي من الخجل شي من الحرگه وشهد حلگها بأذني كالساع مشاورتني:
- يمعوده هذا راح ياكلج بدل الغده بنضراته
- عيونه راح يطلعن المسكين!
ما صدگت خلص الغده حتى ماعرفت اكلي لگمتين على بعضهن رغم جنت ميتةةةة جوع، ندست شهد حتى تگوم وياي اغسل، ام بطن متحاجيني محتاره ابطنها.
اندرت لحماة نغم: عفوا خالة وين اغسل؟
بعدهي محاجيه المرة گمز هو هي حجايه هي گومه
-گومي اني ادليج
اباوع كلهم انتبهوا اله اصلا تصرفاته مبينه مفضوحه ،خجلت حيل منهم، رحت گدامه وهو اجه وراي دلاني بالمغاسل، رحت اغسل هسه غير وصلني يولي؟
ابددد لاطش بوجهي واني اغسل وهو يباوعلي!
صافن بوجهي بس اني اتصرف كانه ماموجود عود حتى يحس ويفك ياخه.. انداريت عليه لكيته صافن بوجهي ويسألني:
- شگد عمرج؟
- جاوبته من وره خشمي 16 سنه
- اممم
ياصف؟
هنا عاد ماتحملت انفجرت بي :اني مبطلة ومطلقة وعندي طفل حجيتهن اله دفعه وحده بلكي يفكك
اباوعله وجهه انگلب گلاب وبقه فاتح عيونه بوجهي
گوة حجه يبلعم: ص صد صددك؟
- شنو متشاقيه وياك قابل؟ لْـۆ مجذبة عليك من قببل!!
خليت ومشيت من يمه .. لحگني يمشي سريع وراي ويگولي: لا والله مو قصدي تجذبين بس تفاجئت حيل
- اي اتفاجئ احسنلك
ضل ضاربله صفنه بوجهي صحت بي بنفاذ صبرر: خيررر مضيع بوجهي شي؟
جان يرد عليه بكل وقاحه وصلافه: اي مضيع عقلي صار ساعات
- خووش
هذا الحجي احنه وصلنه للمطبخ نمشي ونسولف .. باوعت للكاونتر شفت سجينة رحت عليها اخذتها بأيدي واجيته:
- باوع هاي اطببها ابطنك اذا حاولت تتقرب مني مرة لخ! افتهمتتت
- بس صافن بيه جنه ابو صابرر خلصها عليه صفنات .. رجعت كملت كلامي
- اني لا گلب ولا عقل اكتلك هنا وادفنك بمزرعتك ولا من شاف ولا من دره .. اباوعله باقي بمكانه وفاتح عقله، ركضت عليه وسجينتي بأيدي اتخبلت والله من وراه، ذبيت السجينه ورجعت يمهم وهو بقه مصفن بمكانه، الواضح شابع بلحم ابو صابر ..
رجعت يمهم ونغم تباوعلي وتأشر عود تأخرتي؟
اشرلتها ماكو شي ..
كعدت على صفحه بعيد عنهم دقايق واجه وراي .. گالتله امه:
- ماما زين اخذ ناز دليها غرفتها
گمت وكفت واباوعله بخزره ماردت اكوم بس حرجتني ماگدرت افشلها والواضح امه طابختها وياه سوه وعاجبها لطشه ابنها الي ..
مشه گدامي يدليني الغرفة واني وراه، التفت عليه وهو يمشي ويگولي:
- واضح شنو سبب طلاگج، عرمه ووكحه
سكتت مارديته الظاهر هذا راح يطلع السفرة من خشمي .
وگف مقابيل غرفة وگال: هاي غرفتج ست ناز
طبيت للغرفة باوعتله بخزره وطبكت الباب بكل قووتي بوجهه!
اسمعه مدري شيدردم عليه مااهتميت، باوعت الغرفه اطلالتها تجنن شباكها ع الحديقة الخضار الورود يبووو المنضرر يسحر!
ريحه الورد واصله للغرفه، بقيت واگفه ع الشباك واتأمل جمال المكان واسحب نفس اريد اترس ريتي من هالهواء النقي الي يرد الروح.
ضليت وقت طويل بمكاني اتلذذ بالمكان واشبع عيوني ونفسي منه، شهد مادري عنها ولا حتى نغم انسحرت بالمكان ونسيت كُلشي ..
دك تليفوني جريته باوعت منو المتصل؟ مازن
- الوو
-ناز؟
- ها
-احبج
ابتسمت خفيف وسكتت رجع حجه ..
- شو سكتي؟
- مشتاقه تغنيلي مثل قبل
- اني مشتاق الكلشي بيج ضحكتج عيونج شعرج شفايفج، نازز احس روحي تخبلت رسمي والله، الطرگاعه خاف الي نيه انساج ادم نسخة طبق الاصل منج!
- نزلت دموعي بسكوت .. هو بقه يتحسرر
- تردين تشوفينه؟
-اي
- مابقه شي اني طالع ادور بيت وساعتها يصير كدام عيونج 24 ساعه
- سكتت .. هو هم سكت ،دخلت شهد هاجمه تريد تحجي بصوتها الي يلعلع اشرتلها تسكت، وهي تأشرلي شكو ؟ومنو؟
فتحت سبيكر .. رجع كال
- نازز وياي؟
- ها
- لا تكرريها وتعوفيني
-مازن هو منو الي عاف منو؟
- مو بيدي الصار ناز، انتِ تعرفين اني وصلت لمرحله بقيت هاج بالشوارع؟ ولحد الان اثار هالمرحلة ..
سكتت .. بعدها كتله يلا اني اروح
- ماشي من يصيرلج مجال خابريني
سديت الخط منه .. وهاي استلمتني شصار وشلون وشوكت .. ضليت ساكته وهي تلغي تلغي تلغي لحد ماسكتتت
- كملتي؟
- جرت نفس تعبانة من الحجي اي كملت
سولفتلها ورحت نمت نومه موته ماگعدت الا ب 10 من الليل .. اجتني شهد
- گوومي لج شنو احنه جايين انام لو نتونس!
كمت وياهه دخلت سبحت وبدلت وهي هم راحت تبدل كلمنا ونزلنا .. احنه ع الدرج ونغم وحماتها جوة بالصالة بس شافنه گامن يهلهلن
- شكو!
ردت نغم: طلع البدر علينا شنو السالفه خستن من النووم!
- اعذروني والله من التعب ذبيت روحي ميتة
حجت حماتها: براحتج عيوني
طلعنه كلنا سوه حتى ولدها .. احنه بسيارة وهمه بسياره ورانه .. سيارتنه تسوقها حمات نغم، مشغلتنا اغاني واني وشهد اندمجنا گمنا نطك اصبع والهوى يجنن يلعب بشعرنا حيييل تونست بهالسفره حييل.
جنا طالعين للمول، بس وصلنا للمول واني وشهد دخييل الله مفجوعات ملابس ومكياج وعطورات، ماخلينه شي مااشتريناه عبالك هناك مكطوعين لاعدنا سوك ولا نطب ولا نطلع!
المشكله حتى الي منحتاجه نجيب ونخلي واحنه شلون اثنين مترافكات؟وحده اضرب من الثانية..
افترينا هواي كتلها لج شهد عصافير معدتي كامت تصيح مو تزقزق من الجوع
عاد دخلنه مطعم تعشينا كلنا ع نفس الطاولة وهذا اللزگة مافك مني ابد، بس بعد گمت مااهتمله استمريت اكل ومطنشته لعد ابقه كاتلني الجوع!
للأمانه ولدها البقية كُلش حبابين الا هذا ايييع لزگة جنسون.
كملنا عشه ورحنا اكلنا موطه وراهه بقينا نفتر اشتريت هدايا لأخواني وامي وابويه حتى لوجه الطاوة اخذت .. وادم كوومه اخذتله العاب وشنو اشوف كدامي لبسه طفل تعجبني اخذها اله.
مارجعنا للبيت غير ب 1 من الليل، بس كُلش تونست هواي جنت محتاجه هالسفره وتغيير الجو والمكان. بس بدلت ومسحت المكياج تمددت بفراشي دايركت.
فتحت التليفون شفت مازن هواي مخابر وداز رسائل .. اتصلت عليه بقينا نحجي للفجر يلا سديته منه بعد ماطفيت من النعاس ..
ملاك:
رجعت للبيت حجيت لخالتي على زيد اني من زمان مسولفتلها عنه ..بس هي طلبت تلتقي، اباوعها فرحانه على فرحي وتكولي:
-ييي اريد اتعرف على نسيبي اكعد وياه
ضحكت ودنكت خجلانه
- اوووي فدووة للضحكه الي سببها زيودي،تباوعلي وتغمز
خالتي كلللش طيبه وحنونه مثل ماما واكثر بس عيبها الوحيد طماعة.
دنسولف واجتنا سهى بت خالتي الجبيرة تصير اقرب وحده الي من البنات ..
- وووين سمعت طلعة نسيب شكوو ملاااك شنو ناوية تزوجين من ورااااي احجي ووولج
- اطمني ماتزوج من وراج بس هو شسمه
- شسسسسمة احجي شبيييج
حجت خالتي ترزلها: وجعاا شبيج وياهه؟ السالفه ومابيها اليوم حنلتقي بزيد
سهى: اهاااا حلووو لقاءاات من وراي وعزايم حلووو
- لا گلبي هو اني اگدر اسوي شي من وراج،بس ستوني رجعت ومالحكت احجيلج
- ييي ست ملاك ييي من هسه نسيتيني وصرنا كخه
تقربت منها احضنها واشاقيها واگرص بخدودها: اوووي عمري الزعلان اووي لج اني انساج؟ شعدي غيرك الحبييييب
اسلمتني سهى دك مكياج على ترتيبات، هالمرة غيرت طريقه لبسي، لبست بنطلون وقميص قصير وتوربان، بس كملنا اتصل بيه زيد گال راح امرلجن كتله اوك.
ربع ساعه وندك الباب راحت خالتي فتحت الباب وتلكته بذاك الترحيب،هلا حبيبي هلا بعد خالتك نسيبي الاول زوج العزيزه
هو بس يبتسم بوجها ويردد الله يحفظج الله يسلمج امي
تقربت يمها وحجيت بصوت ناصي بس هي تسمعني: خاله فدوة العينج انطي الولد مجال اكلتي بسلامج .. وبعدين ترا بعدنا ماتزوجنا شنو هاي زوج العزيزه!
-سكتي سكتي معليج اني حبيته الهالولد، لج دباعي شلون الترتيب والرزانه والهدوء والثگل، هذا حتى لو صار وبطل اجلب بي ماهده
ضحكت على سوالف خالتي وهو بس شافني فهه بوجهي صافن ع التغيير، طلعنا اني وياه وخالتي،
وخالتي انطلقت وياه ارتاحتله كلش، اسلمته دددك اسئلة وهو يبتسم بهدوء ويجاوب سؤالها.
ندمجوا ثنينهم سوه واني بس اضحك على خالتي شلون مشتغلته تحقيق بس بأسلوب حلو، كملنا ورجعنا هو للبيت وخالتي طايره بي تگولي لج عيني هالولد دره مال الله ينحط بالگلب.
مرت الايام وعلاقتنا تخبل خاليه من كل المشاكل هو بطبعه هادئ ومو عصبي ف حتى من تصير مشكلة بسيطة بسرعه يتلافاها ميخليها تأثر على علاقاتنه ..
بمرور الوقت صار زيد كُلشي بحياتي حتى من اتمرض هو يحير بيه لدكتور مستشفى .. تكفل بكُلشي حتى ملابسي مصروفي، واتقرب من عائلة خالتي كلش عبالك ابنها حتى لو تمرضت رادت شي هو يگولها اعتبريني ابنج وخالتي حبته هوااي.
ماتقبلت هالشي مدام لسه مابينا شي رسمي ف مااكدر اتقبل منه يصرف عليه او يشتريلي شي .. وبوقتها زعل مني زعل قوي شلون احجي هيج يگولي صح لسه مابينا علاقة كاملة بس اني مسؤول منج، ملاك انتِ الي اما موضوع زواجنا ف مسئلة وقت.
ماردت ازعله اكثر بس مجنت مرتاحه الهالشي .. اني اهلي اهل خير وممخليني محتاجه شي بالعكس مدلليني وشنو اريد يجيني ،اهلي حجيتلهم على علاقتي ب زيد وبعد ماتعرفوا عليه ماعارضوا گالوا اهم شي عدنا راحتج وسعادتج ..
بقت مسألة زواجنا بس نتخرج نتزوج ان شاء الله.
ثالث يوم جان غده بالمزرعه بدلت وشسورت شعري ومكيجت خفيف ونزلت صبحت عليهم، ورحت يمهن اساعدهن بالمطبخ كملنا الغده واخذناه ويانه للمزرعه گالو يم الاسطبل نتغده ..
بس وصلنا ركضت للخيل طررت بيهن اباوعلهن بلهفة ومبتسمه بس بنفس الوقت متخوفه منهن .. اجه يمي واحد من الولد بس مو اللزگة ..
- تردين تصعدين عليها؟
- يييي بس اخاف منها ههههه
- دتعاي جربي، تقربت ساعدني اصعد ويعلمني شلون اتصرف وياهه حتى متوگعني شوي شوي حسيت نفسي راح الخوف وبديت اتقرب امسح على شعرها وابتسملها، من زمان احب الخيول بس ماصارت فرصة اجرب اصعدها.
من بعد تجربتي اليوم عشقت شي اسمه خيل، بحيث المرة الثانية صعدتها وحدي بس ماسرعت مشيتها لسه ممسيطرة كُلش، هو يمشي واني مغمضه عيوني والهوى يلعب بشعري الفرحه الي حسيتها وقتها متوصف نفسيتي تغيرت وحياتي وي ابني راح يرجع لحضني ..
نسيت كل الي حواليه واني مغمضه واتنفس بعمق واحس كل نسمه هوى تدخل ترسم خيوط الامل الحياتي الجديده الي اتمنى مااكون هدمتها للگاع بدل مااكون صلحتها ..
انوب صعدت وصعدت شهد وراي وضلينا نفتر بالمزرعه، تونسنا حيل وراهه تغدينا بنص الخضار والورد داير مدايرنا وضحك وسوالف من صدُدك سفره من العمر.
وره الغده انفردنا اني وشهد نتمشى لوحدنا ونسولف انوب گعدنا ناخذ صور ونسوي حركات اكو ورد يصير اصفر زغار منتشر بالگاع اسمه اقحوان اعتقد، كمنا ناخذ منه وسوينا طوگ وخليناه لشعرنا
اني جنت فاتحه شعري على طوله طلعت من خصلتين منا ومنا وخليت الطوك مالت الورد واخذتلي شهد لقطة واني نايمة ع الثيل وضاحكه
بس هالفرحه مادامت هواي الا وتكسر كُلشي بناز الى اشلاء..
هالمرة كانت غير عن سابقتها كانت كفيلة بأنه تهز كيان حياتي وتقطع كل خيط امل تشبثت بي .. اذا كان سابقا الي انكسر گلبي؟ ف حاليا الي خسرته هو عافيتي وصحتي ..
يتبع ...