نيران غياهب الانتقام

البارت الثالث

سيأتي احدهم وبطريقةٍ ما سيُخرج من
جيبهِ لكَ ذاكرةً جديدة
ويعلمك كيف تنسى ...

البارت الثالث
نيران غياهب الانتقام
ليلى محمد

درت راسي علي اعتقد هذا حارس هنا لان شايل بايدة سلاح ، وجه السلاح عليه وهو يكول
... يا مرة منو انتي وشجاي تسوين منو سمحلچ تصورين
... اااني ما ما چنت اعرف ما يصير اصور يعنيي
قبل ما اكمل حجيي قاطعني صوت سمر وهي تجي ناحيتي
سمر : حسين هاي ضيفة عدنا وماتعرف اعذرها
حچت وهي تاخذ نفسها بصعوبة من الركض
حسين : ضيفة او مو ضيفة خل تعطيني الكاميرا او تمسح كلشي گدامي وهسة
نار : هاي شبيك متتفاهم يعني دتگولك ما اعرف وعلى شنو اعطيك كاميرتي بالله
حسين بعصبية وهو يتقدم ناحيتي جار الكاميرا من ايدي بقوة : گلت ممنوع التصوير واي صورة اخذتيها تنمسح
ردت احچي بس سمر منعتني وهي تتوسلني بنظراتها اسكت ...
سكتت مجبورة وانتظرتة مسح اللي يريدة وانطاني الكاميرا وهو يگول
حسين : ممنوع تجون الهنا
سمر: ااي اي يالله نار
لزمتني من ايدي ومشتني معاها وكفتها واني اكوللها
نار: شبيچ متكوليلي عليش هيچ دترجفين قابل شمسوية هي صورة
سمر : لچ انتي شوداچ هناك عفتي البستان والجبال كلها واجيتي هنا
نار : اي شعرفني بعدين شجاكم هيچ كلكم اعصاب
درت وجهي بضوجة عنها ، اجت مقابيلي
سمر : نار حبابة لا تضوجين بس هنا اكو قوانين ممنوع حتى نتناقش بيها
نار : والله انتو مدري شلونكم كلش غريبين
سمر : عوفچ من هالحجي تعاي اوديج اماكن حلوة تصورين بيها
نار : اي وهم يجي واحد يمسحلي الصور مو
سمر بضحكة : لا لا هالمرة راح اوديج مكان يصير تصورين بيها حجتها بغمزة
نار : خوش
حچيتها بضوجة واني امشي وراها...

اخذت صور هواية للمكان وللقرية بشكل عام ولو سمر كل شوية وتدفعني من مكان وتكولي عوفي هذا ما يفيدچ اكو اسرارهواية بهالمكان بس ماكو سر يتخبى فترة طويلة
كلشي اله وقت ينكشف بي ...

سمر وهي تگعد بالكاع : اوف ما تعبتي هاي چم صورة اخذتي ما قصرتي ابد متت من التعب
نار وهي تكعد يمها : هاي ولا شيء هسة اگعد اصفي بيهم واختار احلى شي ما يطلعون صورتين تلاثة
سمر : يبووو هاي شيفضها
نار: اكولج سمر
سمر : همم كولي
نار : ليش ما تعرفيني على عائلتكم بما اني كاعدة عدكم كم يوم خليني عالاقل اعرف مع من كاعدة
سمر بضحكة : ادللي اعرفج ليش لا بس شگد تنطيني
نار : هاي شنو لا عيني مو هيج اتفقنا اشو راح تستغليني
سمر وهي مضيقة عيونها علية : هو منو مستغل منو هاي من الصبح مركضتني وراچ على هالصورة وهالصورة وهسة عرفيني عالعائلة وكل هذا اني اللي استغلج اتقي ربج خية
نار : اااي ماشي ماشي شبيج اكلتيني وشربتيني خلص التردي اني حاضرة
سمر بابتسامة طفولية وهي تضربني على ايدي : لج دا اتشاقة وياج من كل عقلج صدگتي
نار بابتسامة هادئة : لا اني فعلا اليوم تعبتج معاي وتستاهلين تطلبين مني التردي بس بشرط
سمر بفضول : وشنو هالشرط هذا
نار : انج تضلين مساعدتي هنا طول فترة وجودي حتى تساعديني وتوديني للاماكن الحلوة عدكم
سمر : اي ادللي اكيد بس امي يكون توافق انو نبتعد اكو هواية مناطق حلوه ابعد من هنا
نار : ان شاء الله نحاول نقنعها
سمر: ان شاء الله ، ايه خل احجيلج عن عائلتنا المتواضعة اقصد المو متواضعة
ضحكت على حجيها شكد تنحب هالبنية وجودها بينهم حرام للاسف كلتها بداخلي واني اباوعلها ...
سمر : باعي الشيخ هو جدي چبير العشيرة وهاي القرية كلها اسمه ضياء الدين وعندة تلث اولاد نار نار
نار:ها شنو
سمر : شبيچ اتغير وجهج وسكتي فجأة گلت شي غلط
نار : اا لا بس سرحت شوية وهم تعبانة ماكو شي كملي
سمر : اذا تريدين نرجع للبيت وارتاحي
نار : لا عادي والله ما بيه شي
سمر : براحتچ ، نرجع على موضوعنا جدي عندة تلث اولاد مثل ما كتلج ابوية خالد  وعندي اختين واخ واحد، خواتي نسرين وهبة راح يجون اليوم من بيت بيبيتي بغير محافظة راحو عدها يساعدوها لان جانت مريضة الفترة اللي راحت واني بقيت هنا لان ما اكدر اعوف امي وحدها اما اخوية فهو عمار شفتي مو
نار : ايي هذا اللي شايل خشمة اربعة وعشرين ساعة مدري على شنو ، احم اسفة نسيت انه اخوج
سمر بضحكة : لا عادي هو هيج عصبي دائما وما يتحمل كلمة من احد وكلش قريب من جدي يعني تربيته هو واولاد عمي الباقين هسة احجيلج عنهم ،
اما عمي حازم عندة اربع اولاد رغد شفتيها ومازن وغيث و نرمين هاي متزوجة وكاعدة بالمدينة
نار : متزوجة من غريب لو هم من القرية
سمر : لا احنا ما ننطي غربة متزوجة من ابن عمتي عدنا عمة وحدة ميسون وعدها ولدين وبنية مو هواية يجون عدنا لان كاعدين بالمدينة همة عدا علي لا هذا گاعد هنانة دائما حتى يساعد جدي بشغلة
نار : بس اكو واحد نسيتيه ، حچيتها متعمدة
سمر: منو هو
نار: انتي مو گلتي الشيخ عندة تلث اولاد لعد الثالث منو
سمر : صحيح بس لان عمي جمال متوفي هو ومرته بحادث سيارة تقريبا من قبل اكثر من عشرين سنة فخليته اخر شي
نار باهتمام واضح سألتها وببالي هذا اللي شفتة بذيج الليلة اريد اعرف منو هو : اي وما عدهم ولد
سمر : هو
مازن : هاي شنو الحلوين كاعدين بالشمس لا تذوبون يمعودين اخاف عليكم

قاطعها مازن قبل ما تكمل حجيها اتمنيت يكون بايدي مسدس ارمي برصاصة على هالدكة الخايسة مثله شكد تافه كلتها بصوت ناصي واني اتأفأف سمعتني سمر وباوعتلي وهي ماسكة ضحكتها بصعوبة .
نار : هسة لا تبالغ ما احب المبالغات بعدين اني جاية هنا بشغل انت على شنو جاي
مازن : جاي عليج اااقصد يعني هيج دا افتر بالمكان بعدين تعالي شنو هي المزرعة مالتنا راح تحاسبيني يعني
نار : لا يابة شحاسب وين ما تريد تفتر افتر شلي دخل بس لا تجي يمنا وتزعجنا هاي كل السالفة
مازن : هسة ما تكوليلي شبيج من اجيتي ضايجة وما تتحاجين ليش دضوجج بالله ،
بعدين اني مازن اللي البنات يركضون وراية ويتمنون حجاية مني انتي واشر علية باصبعة بطريقة مستفزة تكولين اضوجكم
سمر : مازن ترا نار مو قصدها شي بس لان انت شوية  زودتها بالحجي
مازن : ماشي يابة البغدادية صعبة مبين
نار : ليش شكايليلك عالبغداديات اللي مستغرب هيج
مازن : ما كالو شي بعدين اصلا انتي تنحطين بمتحف ببحدج
جنت راح ارد علي هالقليل الادب شلون معاه هذا بس قبل ما احجي قاطعني صوت رجال باوعت وراي
غيث : ماازن شدتسوي هنا يم البنات وشهالحجي الماصخ هذا انت التالي وياك
حجاها بانفعال مبالغ بيه فاجئني على عصبيته يمكن كل الزلم اللي هنا مشتركين بهالصفة
مازن بخوف واضح : مماكو شي شنو يعني حرام احجي وياهن
غيث بأمر: روح للبيت الوالدة محتاجتك
مازن :ححاضر خوية حاضر
ادري كلة مازن جيب مازن ودي مازن تعال مازن روح ، مشى وهو ديحچي مع نفسه ضحكني تصرفة
غيث : بلا كلام زايد
صاح علي فسكت بعدها دار وجهة علينا وباوعلي بنظرة طويلة وعيونة مليانة حجي بس ساكتة وهذا سكوته هو اللي منرفزني بس لو يحچي ..
غيث : سمر رجعي للبيت هسة نار شوية وتلحكج
سمر كامت وهي تباوعلي : حاضر
غيث : امشي نگعد هناك
كمت من مكاني ومشيت ورا بلكي استفاد من اي شي يحجي ،كعدنا بمكان بعيد شوية ومليان شجر يعني صعب احد يشوفنا منه ، سألني
غيث : مو خايفة
نار باوعتلة بتساؤل : من شنو
غيث: يعني واحد محذرج من اهله وديحاول بكل الطرق يخليج تعوفين المكان بس انتي مصرة على موقفج زين ما عندج ولو ذرة شك ليش هيج ديسوي
نار: بلى اكيد عندي بس اني مو بسهولة استسلم واعوف كلشي
غيث : مبين عليج
نار ابتسمت بهدوء وبقيت اتأمل المكان قبل ما يقاطعني صوتة بعد دقايق
غيث : بالمناسبة اني غيث اشتغل دكتور اسنان عمري ٢٥ سنة عازب وغير مرتبط
حچاها وهو يعدل بشعرة ، ابتسمت على تلقائيتة هاي اول مرة يحجي وياي بهدوء
نار : واني نار اشتغل صحفية عمري ٢٣ سنة وهمينه عزبااء
غيث بضحكة : هو منو يگدر يتحملج اصلا الله يعينه اللي راح يرتبط بيج
نار وهي تتصنع العصبية : هاي منو اني اصلا اني كلش امرأة رقيقة وسهلة التعامل اصلا انت اللي الله يعينها هاي من شفتك مگضيها صياح وعرك
غيث بابتسامة هادئة : لا اني مو عصبي الهلدرجة بس اهلي يوصلوني مرات المرحلة اكره الدنيا كلها وحتى نفسي
نار : وليش هذا الشي يعني ليش انت على خلاف معاهم
غيث : القصة طويلة و جهلچ  بيها احسن الج
نار : ما راح اضغط عليك بالوقت اللي تكون جاهز انو تحجي راح اكو موجودة يعني اعتبرني صديقة ولا ما تريد
باوعلي بابتسامة : اكيد يشرفني هذا الشي يالرقيقة
ضحكت علي وهو ديقلدني
نار: لتقلد دكتور عصبي ، كلتها و  وكفت
غيث: شنو وين
نار : راجعة للبيت اليوم هواية تعبت اريد انام شوية
غيث: ماشي اخذي راحتج اني بس ردت اعتذر منج عاللي سويتة البارحة ادري جان تصرف ابد محلو بس المصلحتج ولو انج مو راضية تسمعين اللي دا اگولة
نار : اولا اعتذارك مقبول واتمنى ما تعيدها مرة اللخ
ثانيا انت مدتگول شي يخليني اتراجع وعالعموم انت حجيت والباقي علية عن اذنك
غيث وهو يباوعلي بغموض : براحتچ مرخوصة

مشيت من يمة واني افكر باللي حطيتة بالمكتب يا ترة راح يفيدني ولا ما راح احصل منه شي غيث كالعادة كلشي ما حجه مبين انو يعرف هواية اشياء بس مفضل السكوت خل نشوف الى متى راح يضل هيج ...
دخلت للبيت شفت بنتين كاعدين بالصالة ومعاهم سمر ورغد اعتقد ذولة خوات سمر اللي كالت عليهم ،رحت يمهم
نار: مرحبا بنات
كامت بنية منهم وسلمت علية بحفاوة
هبة : هلا بيج گلبي سمر سولفتلنا عليج وكالت انج كلش حبابة
نار : هذا من ذوقها
باوعت عالثانية ما كامت حتى بس كالت من بعيد
نسرين : هلا
سمر مبين انها تعرفها لان مباشرة غيرت الموضوع وهي تگولي
سمر : تعالي نار گعدي ويانه شوية
نار : اعذريني والله تعبانة شوية واريد اطلع انام
سمر : يعني ما راح تتغدين ويانه
نار : لا والله ما بيه حيل
هبة : سلامتچ ما بيچ غير العافية
نار : تسلمين يگلبي
مشيت من يمهم بس شد انتباهي نظرات الكره الواضحة من نسرين ورغد مبين انو ذولة مسوين شلة نذالة بينهم وشكلهم ابد مو مريح لازم انتبه واخذ حذري منهم مو امان ابدا ..

دخلت غرفتي وقفلت الباب واتأكدت من الغرفة انها امان لان كلشي ممكن يصير و كلشي يطلع منهم وطلعت الجهاز وشغلت السماعات حتى اسمع اللي ديحجو بالمكتب بعد ما خليت اداة تنصت بالمكتبة لزگتها لمن رجعت الكتاب المكانه،
رميت السماعة بعد ساعة من الگعدة كلشي ما صار مهم بهالفترة ولا حچو شي راح اكوم فعلا انام احسن شي ، كمت بدلت ملابسي ورحت للسرير حتى انام بس مدري ليش احساسي گلي اسمع بلكي حچو شي ،
حطيت السماعات باذاني وانتظرت تقريبا عشر دقايق همينه ماكو شي مهم.
ثواني هذا صوت الشيخ
الشيخ : تفضل
... شيخنا البضاعة كملت
الشيخ : اتأكدتو من تغليفها وتخزينها زين
... اكيد شيخ كلشي تمام ومثل ما تريد
الشيخ : عفية عليكم ولدي ما تقصرون
...هذا واجبنا شي تحتاج شي
ما جاوبة اعتقد مشغول بغير شي بعدها سمعت صوت الباب اعتقد طلع هذا اللي اجه بلغه
صوت الشيخ ديحجي وحده كبين ديتصل
الشيخ : الو وينك يالفهد  
.......
الشيخ : اريدك هنا اليوم كلشي لازم يتم
......
الشيخ : انت تدري ما اثق غير بيك وهاي المرة البيعة جبيرة وينرادلها الفهد
.....
الشيخ : شلون الشغل يمك
....
الشيخ : الله يسهلها مع السلامة وليدي

نزلت السماعة واني مية سؤال براسي مبين اكو بضاعة ثگيلة راح يبيعوها بس شگد كميتها و المنو راح يبيعوها ويمتى راح يكون التسليم
والاهم من هذا كلة الفهد منو ....

يتبع ..

بنات متابعة الصفحة Zaynab298 🥰🥰

لا تنسون اللايك ❤️