مشاري و راكان

البارت الثالث

.

رجعت البيت وغفيت من التعب و الألم و القهر !!

في العصر رحت أنا و أمي للمستشفى وهنا كانت المفاجأة

أبوي تحسنت حالته و طلعوه من العناية لغرفة عادية ..

أنا أول ما وصلني هذا الخبر المفرح خريت على الأرض وسجدت سجدة شكر و ثناء لله سبحانه وتعالى ..

كنت أبكي و أضحك من الفرحة .. إللي يشوفني يقول عندي انفصام بالشخصية !!

أمي من شدة فرحتها دخلت عند أبوي إللي توه صحى من الغيبوبة ..

خليتهم لحالهم عشان يأخذون راحتهم بالكلام ..

جلست برا على الكراسي أنتظر تطلع أمي عشان أدخل عنده و أسلم عليه ..

و أنا جالس على الكرسي اتصل علي ناصر رديت عليه ..

ناصر / مشاري هاه كيف أبوي ألحين .. كنت بالمستشفى
من الفجر ألين الظهر تعبببت و هذا أنا رجعت البيت ..
بالله طمني عليه ..

أنا / إيه الحمدلله فاق قبل شوي من الغيبوبة أبشرك ..

ناصر / بالله .. زين الله يبشرك بالخير ..
يله شوي وأنا جاي إن شاء الله ..

سكرت الجوال .. استندت على الكرسي و مؤخرة رأسي كانت على الجدار ..

كانت الأفكار تتصادم بعقلي .. جلست أفكر في حالي و حال أهلي ..
أبوي إللي كان يكرهني و مايطيقني بدون سبب مقنع و مفضل ناصر و سلطان علي .. في المقابل أنا إللي قلبي عليه و ما أبي أشوف فيه مكروه رغم إللي سواه فيني !!

وهذا هو سلطان أخونا الكبير إللي طول عمره مدلل من أبوي إلى ألحين ماشرف و لا سأل حتى !
أكيد زوجته الحرباء بعد منعته أنه يتواصل مع والديه
و يبر فيهم !
لكن أنا ما أشره عليها هي .. أنا أشره عليه هو أشلون
يطاوعه قلبه يسوي كذا في أمه و أبوه !!
آاااخ بس !!!

و أنا سرحان في أفكاري .. فقت على صوت أمي وهي تقول
لي / مشاري حبيبي روح أدخل سلم على أبوك .. أبشرك صار أحسن من أول ..

أنا / طيب يمه ..

أمي / أنا بروح لدورة المياه و إذا خلصت جيتكم ..

أنا / إن شاء الله ..

دخلت عند أبوي و خطواتي كانت بطيئة و مترددة ..
كنت متوقع و متفائل أن أبوي إذا شافني بيفرح و بيحس
بتأنيب الضمير تجاهي ..

لكن كل توقعاتي باءت بالفشل لمن شفت ردة فعله !!

كانت ردة فعله خليط ما بين الدهشة و البرود و الانفعال ..

أنا قربت منه و إبتسامة على وجهي ..

أنا / السلام عليكم ورحمة الله وبركاته .. كيفك يبه
سلامتك يالغالي ماتشوف شر إن شاء الله ..
يعلم الله إني خفت عليك ..

قربت منه و سلمت على رأسه و يده ..

أبوي بحدة / جاي تتشمت و لا جاي تتميلح عندي عشان المصالح !
عموماً أنا الحمدلله بخير و قريب إن شاء الله بطلع من هنا
و أنا احسن من أول بعد .. !

أنا / عساك دايم بخير يبه .. يسعدني دايم إني أشوفك
بخير ..

أبوي بسخرية / اهىء .. بدينا في المثاليات و التمثيل !
أقول فين سلطان و ناصر أبيهم ؟؟

أنا و الألم النفسي كل ماله يخنق صدري / ناصر جاي بالطريق و سلطان ما أدري عنه ..

شوي و أسمع صوت أحد يدق باب الغرفة ألتفت لقيته راكان
جاي و معاه باقة ورد كبيرة والابتسامة في وجهه ..

دخل و سلم على أبوي و تحمد له ع السلامة ..
شوي و يجي ناصر إللي فرح أبوي بشوفته أكثر مني وجلس يتكلم معاه وهو متحمس مو مثل ماكان يكلمني قبل شوي ببرود !

لمن شفته كذا انكسر قلبي و ما قدرت أجلس في الغرفة أكثر لذا سلمت على أبوي وودعته و طلعت ..
لحقني راكان إللي شاف ملامح وجهي و عرف أنه في شيء كبير جوا قلبي خلاه يتألم أكثر و أكثر !!

راكان / مشاري حبيبي وشفيك ؟؟

أنا بابتسامة / مافيني شيء ركون لا تشيل هم ..

راكان / طيب فين بتروح ؟؟

أنا / بروح للبيت أحس أني تعبان نفسياً و جسدياً ..

راكان / مشاري استنى باخذك معي ..

أنا / لا بروح البيت وبع. ...

راكان قاطعني / مو بكيفك يله معي ..

مسك يدي و سحبني معاه وسط دهشتي !!
ياربي هذا وين يبغاني أجي معه !

-----------------------------------------------

# شكككككرا لله من اعممممممااااااق قلللبي ثم لكل من صوت أو أضاف تعليقه على البارتات .. ♡♡

تااابعوني و اضيفوني .. =×

** ملاحظة / البارتات القادمة بإذن الله فيها أحداث حمااااس ..

محبتكم / رورا ♡♡