زوجتي التانية أرملة(بالدارجة المغربية)

البارت1

🥀زوجتي الثانية... أرملة🥀
: Aicha Mos 🥀
الجزء : 1🥀
                   

.
الحياة بحال شي قصة او رواية منقدروش نتوقعو احداثها خاص نعيشوها بحلوها و مرها ونتقبلوها ....الانسان خاص يعيش حياتو ويستمتع بيها فحدود شرع الله وميخليش نفسو تجرو للطريق الخطأ

تتمشي بخطاوي زربانين باغة تدخل لدارهم دغيا متتحملش تتعطل فالزنقة....هازة سخرتها وتتشوف قدامها ...بجلابيتها الواسعة ونݣابها على وجهها...نقاب المغرب القديم بحال دوك النسا الكبارات رغم انها مزال شابة فاواخر العشرينات ولكن لقات راحتها فهكذا لباس.....

وقفات ملي سمعات المراة الي تخطاتها تتعيط ليها ضارت لعندها مركزة اهتمامها ليها قصد معرفت مرادها نطقات بصوتها الهادئ : نعام اخالتي

المرأة كبيرة فالعمر تكون عندها ديك 55 سنة او اكثر لابسة جلابيتها ودايرة حجابها هازة ݣفة كبيرة بين ايديها : بنتي سمحيلي وخا بنتيلي زربانة بغيت نسولك

إيمان : خودي راحتك ا خالتي اش حب الخاطر

المرأة حطات الݣفة من ايديها تترتاح من ثقلها : انا اول مرة نجي لهاد البلاصة ماشي من عوايدي نخرج بزاف داكشي لاش تنتلف في ساع وخا يعياو مينعتو ليا ...جيت لعند  ولدي عندو محل  ديال الحوايج  ولكن مبانو ليا حتى شي محلات هنا خفت نكون تلفت

ايمان : المحلات كانين فالشارع اللوراني انا نوصلك ليهم عارفة سميت محل ولدك ؟

المرأة تتمسح العرق على وجهها بكلينكس : نكدب عليك ابنيتي لقلت ليك عارفة

ايمان بتاسمات : عندك تليفون تعيطي ليه ؟

المرأة جبدات تليفونها الي موديلو قديم : هاكي شوفي ليا نمرة عمر

ايمان خدات التليفون تتقلب فالنوامر نسات اصلا واش كانت زربانة هكا هي متتضيعش فرصة تعاون شي انسان تتآمن بلي الله فديك اللحظة سخرها لديك المراة باش تعاونها ....مدارتش فبالها بلي تكون شي نصابة او غير تتفلا عليها حيت فعلا تتبان بريئة وقلبها بيض ....لقات النمرة ودوزاتها عطاتها التليفون ...

المراة : الو ولدي عمر لاباس عليه ...اه انا بخير قوليا شنو   سميت المحل ديالك....التوحيد....ايه الله يفكرك اوليدي فالشهادة (ضحكات) ديما تنساها....اه انا جاية عندك ...لالا صافي غنجي....قلت ليك غنجي صافي (قطعات عليه وشافت ف إيمان) سمحيلي ابنيتي غنبرزطك معايا الله ينورك ويرضي عليك

ايمان تحنات هزات هي الݣفة : مكاين حتى تبزريط بسم الله اخالتي نمشيو نحيدو من هاد الشميشة

المرأة : الله يجازيك خير

إيمان : آمين يارب

خطوات لاباس بيها خطاوها...حتى وصلو لبلاصة المحلات  محلات فالشارع الكبير تتشرا بالملاين والتكرا  بالملاين ....منطقة فيها الرواج مرتفع ....بانت ليها البلاكة ديال البوتيك الي كيبان راقي كيف كاع المحلات الي حداه ...ستغربات للحظة كيفاش أم شخص عندو بوتيك فهاد المنطقة الراقية لابسة ملابس بسيطة وعادية ...استغفرت الله حيت فكرات هكا وحكمات عليها من مظهرها

ايمان : راهو اخالتي وصلنا

وقفوا حدا المحل وحطات الݣفة هزات عينيها فالمحل الي كان للملابس الرجالية فيه جميع الاشكال والتصاميم العصرية والتقليدية ....وفيه الناس تيتقداو

ايمان : خالتي هذا هو دخلي الله يعاونك انا غنمشي

المراة تتبتاسم من قلبها شافت ولدها لداخل ملاهي مع الكليان تأكدت من انها وصلات عندو وشافت ف ايمان شدات ليها ايدها : الله يرضي عليك الله يرضي عليك الله  يصلحك  سمحيلي ابنيتي عذبتك معايا

ايمان طبطبات على ايدها الي كانت دافية  وحسات بالحنان من لمسة وحدة ؛ مكاين عذاب ...دخلي اخالتي الله يعاونك

خلاتها غادي تدخل ومشات تشد طاكسي حيت تعطلات وقفات تستنى وعينيها على تليفونها الي تتشوف فيه الساعة ومرة مرة تتهز عينها تتشوف واش جاية شي طاكسي ....

المراة خرج عندها ولدها باس راسها وايديها هاز من عندها الݣفة وكيعاتبها بصوت حنين : امي علاش عذبتي راسك وجيتي علاش مقلتيهاش ليا نجي نجيبككيفاش وصلتي لعندي واش مخفتيش توضري

المرأة كتضحك : راني مراة وقادة واش منعرفش نجي لمحل ولدي ....وهاني جيت ومتوضرت كاع

عمر باسها فراسها : الله يطول ليا عمرك ...قولي ليا بصح كيف درتي حتى وصلتي عندي واش طاكسي حمر ؟

المراة : جيت فيه وحطني فالشارع الي اللور غير ربي سخر  ليا واحد البنت  ما شاء الله الله يرضي عليها جابتني حتال عندك ( شافت ف ايمان الي باقة تتسنى الطاكسي ) راهي باقة مسكينة تسنى

عمر شاف للجهة الي اشرات عليها مو ....شافها لابسة جلابيتها  الواسعة ونݣابها الي شافو حيت تتشوف جنب رجع شاف فماماه حاوطها بايدو مدخلها للمحل : الله يكثر خيرها ويجازيها خير الجزاء ....مرحبا بيك اول مرة تجي لعندي ....

#يتبع🥀