طوبى "جنة طوبى"

الجزء الحادي والستين7

‏لمَّا كبرتُ عرفتُ الرِّزق يا ربِّي
‏بأنَّه الأمنُ والإيمانُ والسَّلوى
اثرت فيه هلبه الابيات... وقعد يقرا فيها مرارا وتكرارا في قلبه وع لسانه...
وفي كل مرة يفكر وهو متسائل..
شن اللي خلاها تختارها وتنزلها في منشور..
الابيات فيها مسحة حزن واضحه.. حس انها عايشه حالة حزن وخوف مخلينها فاقده الامن والايمان والسلوى..
عبد القيوم بقهر؛لعند امتى ياربي بس..غمض عيونه وتنفس بقوة بعدين قال..استغفر الله العظيم..
وفتحهم ورجع يكمل في كتابة باقي الابيات..
🍃🍃🍃
وتعدي عليهم الساعات..
لاهو رقد..ولاهي رقدت..
وهمت اميمه انها رقدت..وخلتها ترقد..بعدين ناضت وطلعت من الدار...
ومشت قعمزت في الصاله..
وضي نص القمر خاش عليها من الروشن..
وفيدها المسبحه..وبدت بالصلاة ع النبي...
ويسرح بيها تفكيرها في حياتها...توصل لنقطه تنخنق فيها وتوقف..بعدين تتعوذ من الشيطان..وترجع مرة تانيه تصلي النبي وحاولت ع قد ماتقدر تخلي تفكيرها في شي واحد...
🌿 يا رسول الله أرأيت إن جعلت لك صلاتي كلها
فقال ﷺ : «إذاً تُكْفَى همَّكَ، ويُغْفرُ لك ذنبك»🌿
🍃🍃🍃🍃🍃
ويأذن عليهم الفجر..هي ناضت طول ومشت للحمام بش تتوضا..
وبوها طلع من داره...ومشي للحمام لقي معبي..
لف ومشي طلع للحمام الخارجي..
توضا..وطلع ولى للدار..بدل حوايجه..
هي طلعت من الحمام ومشت طول للصاله..
خدت الملايه لبستها واستقبلت القبله وكبرت للصلاه..
وبوها..طلع من داره ومنها برا الحوش بدون مايشوفها...
🍃طلع من الباب الخارجي..
شاف عبد القيوم كيف طالع حتى هو..
شافه عبد القيوم وابتسم..ومشاله طول..
وصل فيه وقاله؛صباح الخير..
لطفي حط ايديه ورا ظهره وقال؛صباح الخير..شن حالك اليوم؟
عبد القيوم :الحمدلله..شنو حالك انت؟
لطفي:في خير ونعمه من الله والحمد لله..
سمعوا باب حوش علي الواعر انفتح..شبحوله..
شافوه طالع وعكوزه سابقه..سكر الباب وجاهم..
لماقرب يوصل فيهم قالوا..
صباح الخير..
علي:خير خير..
لطفي:خيرك قارنهم؟
علي:الفرخ حسين ماناقص كان نضربه بالزقيه بش ينوض ولاقال نوض..ميت..
عبد القيوم بضحكه؛حاله من حال ربيع..
علي؛بايت عندك؟
عبد القيوم؛ايه..
علي:اسمع ماتخلطش عليه هلبه يخرب طبايعك اني اصلا ملاحظ طبايعك باديه تخرب..
رفع عبد القيوم حواجبه وهو متعجب..
ولطفي ضحك وقال:هيا بوي هيا..هيا ياعبدو..وغمزله بعينه..
ابتسم عبد القيوم وقال؛هيا..
ومشوا مع بعضهم والحاج علي قاعد نازل في ربيع ويعطي فيه ع راسه وينصح في عبد القيوم..
وعبد القيوم يساير فيه..وولده لطفي ع قد ماحاول يغير الموضوع ماقدرش قعد يضحك وخلاص...
🍃وين وصلوا في الجامع وخشوا..
لقوا فيه زوز انفار سباقين..
بلال نجيري اللي من لما اسلم معاش سبقه حد في جيته الاول..
والمهدي...اللي كان مستعين بالصبر والصلاه بش يعدي المحنه اللي هو فيها...
عبد القيوم كان متمني لو يقدر يكلمه ويحصل معاه فرصه يحاول يهون عليه فيها..
بس شاف بعدين افضل طريقة لمواساة المهدي انه يقعد بروحه..
🍃🍃🍃🍃
وفي حوش الصيد..
ناضت عواطف من النوم مالقتش نجاح في السرير..
مررت نظرها ع الدار..لقتها تصلي..
قعدت تشوفلها وهي تفكر..
كل شي تعدل في حياتها وتبدل بعد ماشدت في الرقيه والصلاة والذكر...
باهي علاش مانديرش زيها بش يصيرلي ماصارلها..!؟
خدت نفس..بعدين ناضت من السرير ومشت طلعت من الدار بطريقها للحمام بش تتوضا وتصلي...
فاتت من قدام دار النوم..
اللي كانت فيها امها ساجده تصلي وهي تدعي..
"يارب كملها ع بنتي يارب خليني نشوفها مرتاحه وعاونها تربي هالعيل وارزقها باللي يخاويه ياكريم واعطي وخيتها ماعطيتها ياربي وريح قلبي عليهم ياالله ياكريم"
🍃🍃🍃🍃🍃🍃
في الكوجينه..
مقعمزة وفيدها طاسة ميه تقرا عليها في سورة الفاتحه بصوت مسموع مرارا وتكرارا..
بعدين نفثث فيها وبدت تشرب منها..
سمعت باب الحوش الخارجي انفتح..
كملت شراب الميه وحطت الطاسه وناضت بدير القهوة..
خلطتها وحطتها ع النار..
ولعند هاللحظه ماخشش بوها للحوش..
مشت طلعت للجنان الكوجينه..
لقاته مقعمز في نفس المكان..
حاط يده تحت خده وسرحان..
هي هالمرة مابتش تخليه بروحهو الافكار تاخده وتجيبه
مشتله طول وهي تقول بصوت مبهج...
صباح الفل حاج لطفي...
شبحلها وابتسم بعدين قال؛صباح المسك والعنبر..نشم في ريحة القهوة نحسابها عمتك..
طوبى:لا اليوم مش عارفه خيرهم كلهم نوم ع قد مانوضت يقولوا باهي ويولوا يرقدوا..
هو قال؛امس سهروا شكلهم..
هي بإبتسامه قالت؛ايه..هدرزة وضحك لنص الليل..نديرلك فطور؟
هو قال:لالا جيبيلي توا تمر وقهوة واحسبي جدك شويه وجاي..
هي قالت؛حاضر..غير برا قعمز ع الطاوله المنظر غادي مشرح..
هو ناض وقال بإبتسامه؛باهي..
مشي قدامها وقعمز ورا الطاوله..
وهي قعدت تشوفله بإبتسامه لين خشت للكوجينه..
-🌿وشويه وجي جدها ودارتلهم قهوة وتمر مع بعض.
وخشت للكوجينه..عجنت عجينه ودارت فطاير للفطور..
وبدوا العيله ينوضوا بالواحد...والهدوء تحول لدوشه..
دوشة حلوة كلها بصارة وضحك..
وطوبى بالذات كانت تجاهد بش يبان قدامهم جوها حلو وحالها باهي..وورا هدا كله ياما تخفي من خوف ومواجع..
زي ماقاعده تخفي في سرها ورا ملابسها الواسعه..
🍃وفي مكان بعيد عنهم..
كانت نجاه مقعمزة في الصاله تشرب في عصير..
وتشوف للتليفون تراقب في حساب الجالي وتراجي في رساله من طوبى ليه..
🍃بس الجالي اللي رقد امس بكري بسبب تعب السفر والشغل وناض متأخر..
اول حاجه دارها لما ناض..
🍃"طوبى بالله ع طريقك جيبي الكاكاو.."
طوبى؛حاضر..
ومشت خشت للكوجينه..
ويرن تليفونها..مشتله طول خداته من فوق الثلاجه..
شافت المتصل ضايقت..
ومع هذا فتحت الخط وردت..
طوبى:ايوه..
"صباح الخير"
طوبى؛صباح الخير..
"وينك لاتسألي لادوري معقوله بعد ماخبرتك اني وصلت معاش تعبريني بكل"
عقدت حواجبها بآستغراب وقعدت ساكته وهي تفكر..
معقوله تكون جاته الحاله امس وهو يكلم فيها!؟..
بس كان جاته فعلا..راهو شاف المحادثات وماكانش سألها هالسؤال..!؟
طوبى؛ماشفتش الماسنجر متاعك؟.
"شفته وماريت منك شي"
هي رجعت تفكر مرة تانيه ومعاش فهمت شي..
فكرت تبعتله سكرين للمحادثه بس تراجعت في اخر لحظه لما قاللها عقلها انه ممكن يكون في حالة غير طبيعيه امس لما بعتهم وبعدين مسح المحادثه..
خافت لو تبعتله السكرين تحرجه..او تخليه ينكر ويعصب منها..
لهذا حتى هالمرة اختارت....السكوت..
"طوبى..مش لاهيه انتي صح؟"
طوبى؛لالا لاهيه بس صوتك يهرب شويه قولي فطرت..
"توا كيف نضت وكلمتك طول شفتي الفرق بيني وبينك"
هي بالغصب قالت؛آسفه..
"يللا مش مشكله تعودت عليك مع ماليك تنسي الدنيا ومافيها"
طوبى؛لا والله مش هكي..بس.
قاطعها وقال..
"مش مشكله مادوريش..يللا سلام"
هي مالحقتش ترد سكر الخط في وجهها..
غمضت عيونها وهي تحاول تتمالك نفسها..
بعدين فتحتهم وبانوا دموعها...
"طوبى وين رحتي"
هي مسحتهم طول قبل ماينزلوا وقالت؛هيا جايه جايه..
خدت نفس عميق وطلعاته..بعدين مشت خدت بكرج الكاكاو وطلعت بيه من الكوجينه..
🍃🍃🍃🍃
وتعدي ساعات نهار الجمعه...
ويطل مسائها..وسط الهدوء اللي كان مسيطر ع الاجواء في كل حياش الشارع..
جت مكالمه لفردوس من حماتها الصغيره..
فردوس:قداش ليه زعمه؟
"اني نبي نعرف من آلاء بالك هو قايللها وين ماشي"
فردوس بعصبيه؛شن تقولي انتي بنتي شن دخلها فيه شن عندها دير بيه بش تعرف مكانه!؟
"اني قلت بالك يافردوس والله صايره فينا حاله امه قريب تهبل وبوه زادت مصيبه ع مصايب وضعه مدهور هلبه وولى غارق في الديون"
فردوس؛مادخليش بيهم ولايعنوني في حاجه لااني ولا بناويتي ايوه..
وسكرت عليها وهي متنرفزة..
بعدين مشت طول لدار البنات..
خشت عليهم لقتهم ملتمات ع شناطي بتات العروسه اللي تساعد فيها طوبى..
شافت لآلاء وقالت؛الاء..
شبجولها كلهم..
فردوس؛تعالي..
ومشت..والاء ناضت لحقتها وهي خايفه..وعيون اختها وخالتها ومعاها..
🍃في دار المعيشه..
خشت آلاء هي تقول؛نعم ماما؟
ربعت فردوس ايديها وقالت؛تعرفي ان وليد ولد عمك ليه اسبوع مختفي..
هي خافت بس بينت العكس ودارت روحها عاديه:لالا والله مانعرف..
فردوس:اتصلت عمتك وقالت نسألك بالك تعرفي وينه؟
الاء؛وعلاش اني بنعرف وينه حلوة حتى هادي!
فردوس:قلتلها نفس الكلام بس قلت نتأكد منك قبل..
آلاء؛امي اني العيله هديكا كلها بكبرها معاش تهمني ولاتعنيني ومعاش نبي نعرفهم بالذات هالعيل هدا..
فردوس تنهدت بعدين قالت؛باهي بري بري..
الاء شافتلها بقلق للحظات بعدين مشا طلعت من حداها وهي تفكر..
زعما شن دار خالها في وليد؟!..
جربت تتصل بمختار لقت رقمه خارج الخدمه..
اتصلت بيه ع تليفون الشقه..
ردت الخدامه وقالت..انه مسافر وحيولي يوم الاثنين...
🍀🍀🍀🍀🍀
ويمروا يومين..
الحال فيهم قاعد ع ماهو عليه...
🍃الجالي مازال مسافر ولاعاد كلم طوبى ولاهي كلماته..
🍃وآلاء تراجي في يوم الاثنين بفارغ الصبر بش يروح خالها و تعرف منه شن دار لوليد...
ويجي يوم الاثنين...
اللي حيكون يوم صعب..ع بنات فردوس..
آلاء...واريج..
ويوم حاسم لطوبى في مكان عملها....

#رسائل_انتقام
#طوبى

.....يتبع....