الشيهانة

٢

مساء الأمان

الشيهانة
الجزء الثاني

بقى مركز عليه انوب بهادر ضل يخزر وذاك اخو
عيونه نطت من الغضب..
حنين جرت الموطا من ايدي وذبتها بالزبل..
هي كلها لحظات الي صار بيها
هالشي..
بس استغربت من ردة فعل حنين وي نظراته
هذول..

حجت وهي تكوم..امشي شاها امشي راح
تتطين عيشتي من وراج!
كمت وانا مافاهمة شتحجي..
ليش شبيج صبري خل نفهم..حجيتها وانا
امشي وراها..
بعدنا عنهم شوية..وهي وكفت وعيونها
مدمعة..

شاها بهادر محذرني احترم نفسي واحافظ
على سمعتي احنا شسوينا..
شنوو؟؟شجاب السمعة وشسوينا؟؟؟
اي ماتشوفيهم شلون يخزرون لان جنا
ناكل موطا كدام الطلاب..

بربج؟يعني واكفة وتتراجفين لان حضرته
مانعج من الاكل والشرب كدام الناس..
يعني بالكافتريا مو تاكلين ويا؟
اي بس هناك هو وياي..
اي هو وياج بدي كارد ويعمي كل واحد يباوع
لحلكج الفاهي وانت تاكلين..

باعي هالتمزعط هذا اكرهه ..الاكل والشرب
ربنا حلله كدام الناس وماكال اكلو بالخفاء..
لا عباله احنا جايين من تياترو ع كولة بيبي..
يااا انصمي ولج شهرتينا..
انت انصمي وسمعيني عدل..جاي احجي وخابر
السايق..

مشينا للسيارة واول ماصعدنا كتلها لرشا تعاي
سمعي..
المدام خطيبها الي بعده قيد التنفيذ ..لا تاكلون
لا تشربون لا تاكلون موطا ..
حجت رشا بضحكة..شاها ترى مو هو السبب هي..
اعرف هي وهي ناطيته مجال اكثر من لازم..

جاوبت حنين بقهر..اي غير من حبه الي..
ونصو صوتكم لا يسمعنا السايق..
صوتنا ناصي ونعرف حدودنا من نحجي..
بس بهادر مصخها ..ترى طالعين من بيوت ناس
ينحلف بشرفها..
وراح نتخرج واحنا الجامعة كلها تمدح باخلاقنا..

مو لبسج عباية عباله جنتي عريانة..
ترى مو بس العباية ستر اي لبس جان مستور
هو ستر وخلاص لهنا وكافي..حطيلج شخصية
باجر يدوسون فوك راسج..

درت وجهي عنها وهي حاولت تحاجيني ماجاوبت..
جنت كاعدة بالطرف وهي بالنص..
دارت ع رشا وبقت تحاجيها رشا وتنصحها..
انا كلش ماشاركت لحد ماوصلنا..

دخلت للبيت امي كاعدة بالهول تباوع تلفزيون
حست عليه ضايجه..
بس ماحجيت كلت ماتسوى السالفة احجي
بيها..
بدلت وحضرنا الغدا وتغدينا ..
رحت نمت شوية وكعدت ع صوت اتصال..
باوعت حنين ..ماجاوبت..
سويته سايلنت ورجعت نمت..
بيومها لليل هي تخابر وماجاوبها..

يوم ثاني داومت وحتى بالسيارة ماحاجيتها..
وهي ماتكدر تلح لان خاف يعلى صوتي
والسايق موجود..
بس نزلنا من السيارة..لزمت ايدي وبقت تبجي..

كافي عااد حقودة من امس اخابرج وانت
مغلسة عليه..
انقهرت من شفتها بجت ..انطيتها كلينكس وجريت
ايدها وكعدنا..
كافي لتنقهرين بس ردت الوي اذنج حتى
تخليلج شخصية وماتخلي يتدخل زيادة..
لا هذا هو بس لا تزعلين عليه بعد ..
بوستها ودخلنا سوا للقسم..