All for love

Kapitulo Uno

Hindi inaasahan

Nandiandra Azalea Guevarra's

"Ano'ng nangyari, Celeste? Hindi ko inaasahan iyon!"

Natagpuan kong nag-aabang na sa akin si Celeste sa bahay ng mga magulang ko. Isa siya sa punong-abala sa pagbabalik ko. Mama did everything for my coming home. Nag-organize sila ng maliit na party para sa pag-uwi ko. Sa pag-uwi kong ito, tinanggap ko at inihanda ko ang sarili kong masasaktan ako pero hindi nangyari dahil para bang nag-iba ang ikot ng mundo ko.

Sina Juan at Luisa. Hindi ako makapaniwala. Buntis si Luisa at si Juan ang ama!

"Hindi ko rin alam. Abala ako sa pag-aaral, 'no. Tapos noong umuwi ako noong nakaraang pasko, nakita ko silang dalawang nagsimba nang magkasama. Ang usap-usapan, niligawan daw ni Juan si Luisa kaya ayon. Hindi rin ako makapaniwala dahil alam ko kung gaano kamahal ni Luisa si Paeng at kung gaano katapat na kaibigan si Juan kay Paeng pero, grabe! They needed a push. I was that push and looked, it all worked out. Mukhang sa huli, ikaw pa rin ang ihaharap ni Raphael sa altar."

Hindi ko mapigilang ngumiti. Masaya talaga ako ngayon. Kitang-kita ko kung paano nanlumo si Paeng kanina. Inutusan niya agad ang driver na umalis sa lupain ng mga Birada. Hindi na nila ako hinatid na magkakapatid dahil mainit ang ulo ni Paeng. Agad siyang bumaba ng kotse at naglakad palayo. Ang hula ko ay pupunta siya sa kamalig. Siguro ay maglalabas siya ng sama ng loob.

"Hindi natin sigurado iyon, Celeste."

"At ano? Makikipagbalikan pa si Paeng kay Luisa samantalang buntis na ito? Ang usap-usapan sa bayan, ikakasal na raw ang dalawa pero sa huwes muna dahil nga buntis si Luisa. Si Juan naman ay babalik sa barracks nila."

"Basta. Basta." Hindi ako mapakali. Tumayo ako at nagpalakad-lakad pa. Ano'ng gagawin ko? Gusto kong malaman ang nangyayari. Gusto kong puntahan si Paeng. Gusto kong malaman kung ayos ba siya. Siyempre, hindi siya ayos.

"Kakain na." Sumilip si mama sa pinto. "Celeste, tawagan mo ang mama mo para magkausap kami ng amiga kong iyon. Nariyan na rin sina Lemuel at Emmannuel."

"Si Paeng po, Ma?"

"Wala. Wala siya."

Tama ako. Hindi talaga siya pupunta ngayon dahil sa nangyari. Siguro, wasak na wasak ang kanyang puso ngayon. Alam ko kung gaano niya kamahal si Luisa. Saksi ako sa pagmamahal niya sa huli kaya lang palagi kong naiisip na parang napaka-unfair niyon sa akin.

Una kong nakilala si Paeng. Magkababata kaming dalawa. Mula five years old ako, kilala ko na si Paeng. Sabay kaming lumaki, nagdalaga, at nagbinata. Alam ko noong una pa lang na gusto ko siya kaya noong sinabi ng aming mga magulang na kami ang nakatakdang ipakasal sa isa't isa ay tuwang-tuwa ako. Ang akala ko kasi tinanggap ni Paeng ang tadhana naming dalawa. Kaya lang, nagbago ang lahat ng iyon dahil kay Luisa Tejada.

Bumaba ako ng sala. Nakita kong naroon ang mga kapatid ni Paeng—sina Lemuel at Emmanuel, kakuwentuhan nila ang papa. Naupo ako at sumama sa kanilang kuwentuhan. Masaya ang papa na makita ang magkakapatid na Arandia. Tahimik lamang ako ngunit sa isipan ko ay hindi mawala-wala si Paeng. Kumusta na kaya siya?

Napabuntonghininga ako. Niyakag kami ng mama na kumain na sa hapag pero hindi ako sumunod. Hinintay kong mauna si papa sa dining area saka ko hinarap ang magkapatid na Arandia.

"Nasaan si Paeng?" tanong ko kay Lemuel. Nagkatinginan sila ni Emmanuel.

"Hindi siya umuwi kagabi. Iniisip naming baka hinihintay niya si Luisa. He wanted to talk to her. He has too many questions."

"Pero buntis na si Luisa, ano pang sagot ang gusto niya? She clearly chose Juan." I hissed. Tinaas ni Lemuel ang kamay niya na para bang sumusuko siya sa akin.