ni Arnold John S. Galicia
binulabog natin ang Cañacao
sa pagkahulog natin sa kanyang pampang
na lumuwa ng ‘sindambuhala nating mga along
halos naglibing sa Lungsod-Cavite sa baha.
Nanginginig ang aking panga
at nanginginig ang iyong mga tuhod
habang pinapagpag natin
ang mga ulap mula sa ‘ting mga tsalekong
kumupas na sa tagal ng ating hinintay
na paglapag
sa maramot na kabihasnang ating iniwan
nguni’t ngayo’y ating binalikan
upang hanapin ang lalaking tampalasang
ninakaw ang malandi kong harpa
at ang manok mong sukaban!
Pinupulbos ng ating mga paa
ang kongkretong mga kalye’t tulay.
Nagtutungkaban ang kayliliit na mga nitso
ng Malaking Panchong ng San Antonio
sa walang-awa nating mga yabag
nguni’t iniiwasan nating makatapak
ng mga tao
at baka isa sa mga ito’y ang salarin
ng matinding pangangalam
ng ating mga sikmura.
Subali’t kasabay ng pagkahapo ng ating mga paa
mula sa paglalakad sa mga lansangang pinupulbos
ng ating mga talampakan, ‘di ko napigilan
ang sariling gutom
kaya’t hinila ko ang hinliliit mo
nang buong lakas
hanggang ito’y humiwalay
mula sa paa mong nagbukal ng
dugonghumalosatubig-baha.
Pero tinitigan mo lamang ang bibig kong
nginunguya ang hinliliit mo.
Nahihilo ka na ba sa gutom?
Halika, ilapit mo ang labi mo sa labi ko.
Ganyan nga: magbahagian tayo
ng laway nating sinisikreto
habang naghahalikan tayo.
At habang naghahalikan tayo
ay nginunguya na nating gutom na gutom
ang hinliliit mo.
At habang nginunguya natin ang hinlilit mo
ay sumisirit sa ating mga gilagid
ang dugo ng daliri mong
tigib ng mga sikreto.
Sa gitna ng dulot nating kalamidad,
halos panawan ng bait ang siyudad
sa itinatanghal nating tagpong
hindi nila matanggap!
BINABASA MO ANG
LUMAD Scribbles
PoetryA collection of my poems, written both in English & Filipino Published in Lumad Literary Folio, the official literary anthology of San Sebastian College-Recoletos