Pengerindu Sebayan

Lamar 5

Bisi penanggul enggau latih nuan Remy?"pia ku tutor Jessica nanya aku ti merati ke iya ari tadi.

"Nadai penanggul tu " ku aku nyaut iya.

.....................Jessica..........................

JESSICA

“Ngemai bakih nuan saritu neh pengajar, sapa urang enggau nuan nya ?”

Jaku tanya Remy nya ngalit ka ati laban ke temu aku ti semina kami dua aja ba rumah jam tu. Indai enggau apai Remy benung gawa ga, enda patut bisi agi urang enggau kami duai ditu.

Malik ke kiba nadai ga meda urang, pia mega malik ke belakang ti semina rak bup ti ditusun enggau manah aja dipeda. 

Siti utai meri aku enda mereti ke jaku "bakih" ko iya nya, nama utai deka padah ke Remy tu?

Aku berasai enda nyamai ati ngagai Remy laban indai enggau apai iya suba bisi madahka Remy bisi ngembuan penyakit ti nyelai.  Ditanya nama batang penyakit ti nyelai dikembuan Remy, nadai ga apai iya becherita enggau nyemetak ke agi bekenangka penyakit anak iya. Apai Remy semina ninggal ke jaku pesan aja.

“ Pengajar Jessica, enti nyema ulah Remy bisi nyelai dipeda, nuan tau betalipaun enggau naka pengelengkas ngagai kami seduai indai Remy” pia ku pesan apai Remy.

“Nyangka tu dikumbai seduai penyakit nyelai ti dikembuan Remy” pia ku peragam ati ku kediri.

Bisi mega dalam runding aku deka madah ngagai apai iya ulah Remy nyelai mimit ari ngelamatu.

Datai aja ba rumah tadi, Remy semina nunduk kepala sereta nadai bemunyi seleka jaku nya pin nanya utai ti enda menuku.

Enda ngawa ga angka saritu aja Remy bakatu, nyangka nya ari ti bukai ulah iya nyau baka selama.

Patut ka aku nguji ngaga diri nemu ke jaku tanya iya nya tadi?

Bisi mega asai ati deka nemu nama penyakit ti dikembuan Remy tu, ulih mega nulung iya berubat. Enda meh iya sunyi kediri aja deh bisi kaban alai iya betusui ke penyakit diri ku runding aku kediri.

“Au, nadai sapa-sapa nya Remy. Enda ibuh kiruh ka NYA meh, gaga aja latih nuan” pia ku aku nyaut iya.

“ Berapa lama nuan bekelala enggau iya?” ku Remy.

“nadai nya lama deh, kira lima bulan” ku aku ngembula ka iya.

–“enda nyangka! Bisi mega sebaka nasib enggau aku! Hahahahahaha! Fuuuu!”

Sebaka nasib enggau iya ?

Nama utai dalam runding nembiak tu?

Enda mereti nama utai dipadah iya tu ari tadi. Majak mayuh tanda tanya ngagai nembiak tu.

Diperatika aku mua iya ti benung ketawa kediri, nya meh pengabis pengaga mua iya ti udah dipeda, naka meh penyenang ati nuan dia Remy nadai kala meda pengaga iya baka ke diatu ngelama tu.

“ HAHAHAAHHAHAHA! Akai! Enda kala aku kelalu gaga bakatu! Pengajar mega ulih meda sebayan! Patut ngelama tu mua pengajar manah amat dipeda, tampak enggau bau tubuh pengajar ti nyelai nya madahka Aki enggau nuan nya pia?! hahahahaha! 
Aki nya ke bau ngelamatu neh pengajar! Nama meh baru diatu tua bekelala pengajar, enti aku nemu nuan ulih meda sebayan sigi udah minta penemu nuan senentang sebayan tu. Bisi meh urang pechaya ka aku udah tu!” pia ku Remy sambil megai jari aku.

Sapa aki ku Remy tu?

Aku ulih meda sebayan?

Bau tubuh nama ku Remy tu?

Sepemanjai aku idup nadai kala ga meda sebayan anang ka meda aki ku iya nya. Disium aku baju nadai ga bau nyelai munyi ke dipadah ke iya nya sereta nadai mega bekena ka wangi ngelama tu. Nyangka nya aku aja enda nemu bau tubuh diri kini?

Kada enda tu penyakit nyelai ti dikembuan Remy ngelama tu ku indai enggau apai iya. Penyakit meda sebayan. Remy tu behalunasi kediri neh, cherita ka sebayan tu nadai meri pengarap ngagai aku laban cherita sebayan tu ditusi dikena ngeramba bala nembiak aja.

“ Ni pengalama nuan ulih meda sebayan?” ku aku nanya Remy.

Dia meh Remy madahka diri ulih meda sebayan bepun ka iya agi mit sereta mayuh urang enda andal ke iya laban sida nyangka iya ngembuan penyakit mental sereta behalunasi kediri empu.

Iya mega nusi penusah diri diasaika iya laban nadai urang pechaya ke jaku iya enggau nadai urang alai iya becherita ke penusah diri nyentuk ke apai indai diri enda arap ka iya. Iya mega madah pemayuh sebayan udah dipeda iya pia mega begulai enggau bala antu ai.

Kenu ku iya enti lebuh iya pulai ke rumah panjai bemacham-macham  sebayan sereta antu ai dipeda laban ka sida agi merau ke rumah panjai.

Bala antu ai dipeda sebelah pendai, sebelah kerangan, sebelah kampung pia mega bisi mega semengat urang ti udah parai lemas ba sungai. Bisi mega betubuh jelu tang pala baka pala mensia. Semengat sebayan ti parai lemas dia enda ibuh kira ko iya nyau pucat, mua kembai, tubuh kembai sereta buk sebayan ngerembai panjai dibai arus sungai.

Ti lebuh bepansa enggau utai ti nyelai nya bisi mega bau-bau enda nyamai baka bau garu mansa idung iya ku iya.  Nya alai palan endur urang suah lemas dia meh lubuk bala antu ai pansut nganti bala temuai ti deka datai.

Nya meh kebuah iya enda rindu ngelantang ka ati ba sebelah sungai tauka ba tebing tasik laban bala utai tu rindu bendar nundi iya ku iya sereta majak mayuh bala sida datai ngambat penatai iya bisi mega semina jari aja ke ayan terbai ba atas ai.

Nyau ituk ninga cherita ditusui iya enda berasai bulu pegu terangkat, berasai chelap tapa kaki enda nyalah baka baru berendam ba ai chelap.

Sepengudah ninga cherita ari iya, bisi mega tekuing ati sinu ka iya. Tusah deka pechaya ke semua utai dipadahka iya tadi tang dibai penyinu ati ti deka nulung iya, dia aku mutus ati deka madah ke bendar iya ngagai Remy aku tu enda ulih meda sebayan.

Aku semina nguji iya aja ketegal deka nemu nama batang penyakit dikembuan iya ngelama tu. Aku merani kediri taja mega bisi rawan ati deka meri tulung, aku irau pengawa ke nulung iya ngemai penusah ngagai tubuh diri.

“ Pemayuh sebayan udah dipeda aku, semina aki enggau nuan nya aja enda kala dipeda. Antu nama nya pengajar?”  “Errr, nanya iya empu nuan” nyerengat bulu pegu nyaut tanya Remy.

“ Nama iya enda bejaku deh pengajar?”  “ Pia, nyangka iya malu kini nya Remy”

“ Bakani nuan tau betemu enggau aki tu pengajar?” majak mayuh tanya Remy, patut ke enda madah ngagai iya aku enda ulih meda sebayan pia mega aku endang enda arapka sebayan tu bisi ayan dalam dunya.

“…...........” anang guai, sapa aki ku iya tu?

Ari tadi aku enda berati ka utai ku iya tu.

“ Pengajar?” ku Remy ti nganti saut ari aku.

“ Hmm, Remy chukup nakat tu aja  tua saritu belajar. Pagila sambung baru” mua Remy tampak berasai enda nyamai enggau jaku aku laban  iya agi deka berandau ka pasal aki ti enggau aku ari tadi.

Remy nadai mayuh jaku lalu nutup bup latih enggau nyimpan semua perengka tulis iya pia mega enggau aku.

“Mupuk dulu Remy” lalu ninggal ke iya kediri ba rumah.

Kaki aku berengkah ninggal ka alai rumah Remy. Udah jauh singkang ninggal ka rumah Remy,datai ba stesen bas alai selalu aku nganti dia aku berasai pedis belakang asaika bisi utai diundan. Utai dipeda nyau kerabur, nyangka nya lelak sepengudah ti udah ngajar tadi. Tulang kaki nyau berasai lemi tau disemaka seminggu nadai makai. Nyangka Petara agi malik ke aku kini, bas ka selalu dikena nyau ga datai ngambi aku enti enda pia bisi dikemegau ka urang ba stesen tu.