Pengerindu Sebayan

Lamar 2

Baka ari ti bukai mega sereta ba endur ke sebaka simpang empat alai pendiau sebayan nembiak mit nya nyabak, aku ngaga diri enda meda iya sereta enda ibuh ke iya.

"Maaakkkk...!~ Maaaaaakkkkkkk..... eummmmmmmmmm... eummmmmmm... mmmmmmnnnnnnnnn...... ...... ....."

Semina munyi kaki aku ja didinga. Makin jauh pejalai aku ari simpang empat nya, makin mit sada nyawa ea didinga.

Siti lemai, lebuh aku mulai kediri ari sekula dia aku ngasai kediri nadai ninga sada sabak sebayan nya. Berasai puang jalai alun, semina angin lemai aja didinga. Malik kulu, nadai meda mensia, malik kili ( tunga sekula aku ) semina ayas pagar sekula aja dipeda sereta udah jauh ari sekula.

" Nyelai amat, selalu bisi belama sada nyawa sereta sabak iya didinga. Bakani saritu sada nya tau nadai didinga? " ku runding ku kediri. " Kada enda aku udah enda ulih meda sebayan agi ? Kada enda aku udah gerai baka orang bukai ? ".

Runding aku bechampur baur, bisi mega aku gaga laban enda ulih ninga sada nyawa sebayan nya tang bisi mega aku berasai nyelai.  Bai ati ka nemu kini ke penunga sebayan nya, dia aku mutus ati ngiga iya.

Belubah-lubah kaki ku bejalai nuju alai endur iya selalu tang kali tu iya nadai dipeda. Malik kiba, malik kanan nadai ga semengat iya dipeda. Berasai lantang ati aku meda iya nadai, nyangka amat aku udah gerai. Baru deka malik ke belakang ka mulai ke diri empu dia meh dua igik anak mata ti merah sereta kembai laban  udah balat nyabak ti benung merati ke aku.

Siko nembiak indu bekena baju sekula sebaka enggau aku, peninggi lebih kurang sebaka enggau aku sereta buk iya lurus panjai & tebal nipas tanah bau iya. Ukai sekali tang suah meda sebayan, kali tu amat-amat sebayan betunga mua enggau aku. Iya! Sebayan tu!

"Aaaa.... akuuu nemuuu.... nuaaan ..... ulihhhh... ..... mee...... meedaaaaaa.. akuuu..." jaku iya sambil nunjuk jari nuju aku.

"Enda salah agi, tu meh sada nyawa sebayan anak mit ke selalu didinga aku lebuh pulai sekula "  pia ko aku bejako kediri empu.

Laban nadai runding bukai, aku lalu ngelari kediri empu ari iya. Makin laju tapak kaki ku belari, makin jauh jarak aku ari iya. Iya semina dipeda aku merati ke aku ari jauh enggau sigi tuchum sinis dipeda ayan ba mua ea.

Udah jauh meleka ari iya sampai mua iya nadai dipeda agi baru aku bejalai baka selama. Semina munyi jantung aku ke bedegup laju dibai belanda tadi ja didinga. Aku nengkadah ke langit  "hhhhhh... hhhh.. bangka, aku sigi enda ulih gerai " nesal ke ulah diri empu. Diatu iya udah nemu aku ulih meda iya.