لقيتك من بعد كل الخساير ربحي الأعظم عوض قلبي وبسماته وزهر عمري و نواويره

Part 32

عند الرجال دخل عوض المجلس و بدا يسلم عليهم ابتسم و سلم على متعب : السموحه المره اللي طافت ما قدرت اسلم عليك
ابتسم له متعب : لا ولا يهمك
تقدم عوض يجلس جنب سيف ناظره و عقد حواجبه و همس : وش فيك
التفت له سيف بقل حيله و هز راسه بالنفي و همس له عوض : وضعك مو عاجبني
نطق طلال : مبروك يا اخوي
ناظره عوض : الله يبارك فيك
اخذ عوض القهوه من فهد و نطق الجد : غايب علينا طلال
ضحك طلال بخفه : والله مشغول بالدوام
نطق الجد : مو مقرر تتزوج
ضحك عبدالرحمن: استلمك
رفع الجد اكتافه : شفيكم على الزواج
طلال : والله يا جد لحد الحين مو مقرر بس يمكن قريب
ابو وليد : الله يكتب لك اللي فيه الخير عاد لا تنسى ملكه سلطان بكرا تعال لنا
طلال و هو يشرب القهوه : ان شاء الله جايكم
ناظر عوض سيف و كيف باله مو معه و همس له : تعال الحوش
ناظر عمر و عبدالله اللي كانوا جالسين جنب بعض و ارسل لهم : تعالوا الحوش
بدوا العيال يطلعون و طلع معهم عبدالرحمن و تقدموا يجلسون بالجلسات الخارجيه و نطق عوض : سيف وش صاير
ناظره سيف و هز راسه بالنفي : مافيني شي
عمر : سيف قول فضفض حالك مقلوب فوق تحت
ناظر سيف عبدالرحمن و التفت لهم و نطق : بعدين
فتح عبدالرحمن علبه الدخان و شغل دخانه و بدا ينفثه و نطق عبدالله و هو يناظر عوض اللي كان كل شوي يبتسم: وش صاير لك انت الثاني
اشر عوض على نفسه : انا مافيني شي
نفث عبدالرحمن دخانه : مافيك شي بس الابتسامه شاقه وجهك
ضحك عوض و بدا يلعب بمسباحه: اخخ يا زين الشعور اللي يجيك من الحب
اخذ عمر دخان من باكيت عبدالرحمن: ولع لي
ولع له عبدالرحمن الدخان و نطق عمر : الله يرزقنا
كان سيف يناظر السماء و النجوم و يلعب بشعره : حلو الشعور اذا الطرف الثاني بادلك الحب و يكسر و يوجع القلب اذا الطرف الثاني مو داري عنك
التفتتوا له كلهم ناظرهم و رفع اكتافه : عيبت و ربي ابلاني بالحب و ابلاني بحب شخص ما يبيني
ناظره عوض و عرف ضيقته و تقدم يجلس جنبه و حاوط كتفه : طلع ذا اللي شاغل بالك و مغيرك
نزل سيف راسه : حبيتها حتى بصدها حبيتها
ناظر عوض و كمل كلامه : كنت اضحك و اعيب عليك و على حبك ما توقعت راح يصير فيني كذا
نفث عمر دخانه : نفسها اللي تضحك مع غيرك
تنهد سيف و حط راسه على كتف عوض : مافي غيرها بقلبي هي غلا عمري و حياتي و محد بالغلا يساويها
ربت عوض على كتف سيف : ما تعرف وش داخل القلوب و ماتعرف ان ربي يقدر يغير موازين الدنيا كلها يمكن هي تكون لك بالاخير
هز راسه سيف بضيق و نطق عبدالله: ما عليك يا اخوي تجيك اللي احسن منها
سيف بضيق : بس ما ابي احسن منها ابيها
عبدالرحمن طفى دخانه : سيف اللي ما يبيك لا تبيه
سيف شبك يدينه ببعض : مو عارف لها مو عارف اذا تبيني ولا لا ساعه تصد و دقيقه تكلميني
ابتسم عوض و نطق : يمكن تبيك بس تكابر
تنهد سيف و وقف و ناظر عوض بقل حيله : بتروح لغيري عوض
عقد حواجبه عبدالله: كيف لغيرك
ناظرهم و هو حيله منهد : اللي احبها جاء شخص و خطبها ، اذا سألوا عني قولوا لهم نايم انا بروح انام
تقدم سيف يدخل البيت و يتوجه لغرفته ناظروا العيال بعض و نطق عوض بأستغراب : تكلم معكم قبل من ذي البنت
عمر اللي كان يدخن : كل اللي اعرفه ان شافها مره تضحك مع غيره و بس ما قال لي اي شي
رفع اكتافه عبدالله : اول مره ادري
انسدح عبدالرحمن: سيف كتوم من زمان
عوض تنهد : دايم كذا سيف بس يا عيال والله كاسر خاطري اول مره اشوفه كذا
بدا عبدالرحمن يلعب بشعره و تذكر فاطمه اللي كان ما يتذكر اسمها و نطق : الحب دايم يجيك وانت قلبك تايب الحب يجيك و يدمر قلبك و يقلب حياتك فوق تحت
تذكر عبدالله العنود و ابتسم و نطق : يجيك بدون تخطيط يجي و يخليك شخص جديد
ابتسم عوض و نطق : يجيك و يعوضك و يحببك بالحياه يجيك وانت فاقد الامل يجي و ينقذك
ضحك عمر بخفه : خلصتوا من الحب و بعدين انت
اشر على عبدالله و كمل : من متى حب
رفع عبدالله اكتافه : صابتني بسهامها
تعدل عبدالرحمن بجلسته و نطق عوض : وانت وش صاير لك قول اللي عندك
عبدالرحمن ابتسم : اذا قلت راح افجرها و اقول كل شي خلني ساكت
ضحك عوض بخفه : مردكم نعرف حبكم ذا
عبدالرحمن: لا تخاف كلنا ثقال ولا يا عيال
هز عمر راسه : ثقال ما شاء الله عليكم
عبدالرحمن اشر على عوض : ذا مفضوح ولا يستحي
ابتسم عوض : حلالييي
عمر ضحك : ذا مفضوح حتى بالجامعه
حط عبدالرحمن يده على جبهته : راح تفضحنا بين الناس
عوض رفع اكتافه : ما سويت شي غلط
بدوا العيال يسولفون سوالفهم المعتاده و كان سيف بغرفته منسدح على السرير و نطق : جرحتيني يا غلاي والله جرحتيني ما عدت سيف القديم اتعبتيني بأسلوبك و راح يأخذك غيري بكل سهوله
تنهد و كمل : اذا لك معه نصيب والله لا تحرم علي كل بنات ادم ولا اخذ غيرك
غمض عيونه بضيق و بعد مده نام و هو حيله مهدود و تعبان الليله كانت ثقيله عليه و كتم كل مشاعره بقلبه ولا صرح فيها كلها