اي حاجة الا هكي ..

الا هكي 2

مرحبتين.. اسف الحق لاني منزلتش النص الثاني امس
عموما .. خلونا نخشوا فيها توا.. وانشالله ممتعه ❤😏

كنت قاعد نتفرج على سقف غرفتي، بهتت شوية في الستارة الي خاشة منها الشمس ومضوية عليا اركان الغرفه وفكرت.. مكانش فيه شيء محدد غير ليش نحن معندنش اماكن مخصصه للدعاره في ليبيا، انقلبت على بطني على سبيل التغيير شوي نسمع نقالي يرن فتحته لقيته رقم غريب.

الو، قلت

محمد؟

كان صوت انثوي ناعم، تفضلي قلت

انا خديجة صاحبة فاتن.

امممم، كنه صوتك هكي، قلت

لالا غير مريضة شوية بس بنكلمك على فاتن،قالت

كنها فاتن؟ ،قلت

هي معش تبيك تكلمها قالتلي،قالت

شنو!!؟ ،منقالك الكلام هذا ،قلت وانا في صدمة
هي قالتلي،قالت

حطيت يدي على جبهتي اللي كانت تسطر فيا لما انوض
كنتي اجلتيها لعند نضت يا خديجة، قلت

شنو!!،قالت

نضت وانتصب ظهري، انتي عاجبتيني يخديجه، قلت
من امتى انشالله، قالت

قلتلها انتي عاجبتيني من زمان بس انتي مكنتيش فاطنه ،قلت

محمد انا صاحبتها منقدرش انخونها، قالت

انتي متخونيش فيها،مش قلتي معش تبيني نكلمها، قلت

عارفه بس منقدرش ..انا نحب عبدالكريم، قالت

حسيت بانزعاج تام.. بهي خديجة قوليلها نتمنالك الخير، قلت

حاضر، يوصل قالت

وسكرت الخط، هذي وحدخره تمشي مني وانا قاعد علسرير، العالم صعب كعادته بيش تحاربه يلزمك انتصاب ذكري.. بس خديجه سكرتها ليا اليوم، كملت يومي بلا انتصاب.

بس تصدقوا.. انا اللي مكنتش مبالي بعلاقاتي، كنت نخسر فيهن وكنت بليد تجاهها لفتره غير قليلة، بس عارف انت لما تبدا من جديد تلقى الموضوع صعب .. صعب كيف ركوب الفيل بروحك، تحس انك مش آمن وحتطيح على راسك في اي وقت.

بس شن ذنب الحب في مشاكل الحياة؟هل انا حبيتها؟ولا غير تسلية وتضييع وقت، بهي كان هذا عليش قعدت معايا هي فتره وبعدين رختني، يمكن لما تشوفني مع وحدخرا تو تغار و تجيني من جديد ، ليش لا.

في كلا الحالتين انا كنت ندور في وحدخرا ومنكذبش عليكم جت في عيني وحده، وانتوا عارفين بمجرد متجي وحدخره المكان القديمه ينملى بسرعه،  لأن نحن الرجاله منبوش البنات.. ومش محتاجينهن في شي، الراجل مره مره يحتاج ولية بيش يعرف انه يقدر يحصل وحده امتى ما يبي.. وانا حصلت وحدخره، في الاخير بكل طارت معاي انها تكون ليا وفعلا حبتني.

وانا في الجامعه كنت واقف مع محمود نراجي في محاضرتي وحكيتله على صار معايا، انا محمود عاجبني يجماعه عاجبني لحاجه وحده بس انه يسمع اكثر ميتكلم، قعدنا نهدرزوا ودخنّا.

طلعت من محاضرة اللغه الانجليزيه، رنت عليا هاجر حبيبتي الجديده.

وين حبي قلت

مش مزال بدري عليها حبي هذي قالت

بدري من عمرك قلت، سمعت صاحبتها تضحك يلاها

شنو وينك قلت

تعال اركب فوق في اللغه الاوروبيه، قاعده في قاعه 8

صاحبتك معاك؟ قلت

لا لا عندها محاضره قالت

انا سمعت هذي ابتسمت، سكرت وانطلقت شور المبنى عوكرت يمين في يمين ويسار لقيت روحي لوطا، خذيت الدروج بتشفيطه سريعه وخشيت مكانش فيه حد غير كراسي ومكتب، وشنطه هاجر، بهتت يساري لقيت هاجر عند الشباك،قربت..

جيت مسكت يدها قعدت تضحك، ضحكت حتى انا قلتلها انتي حتعوضيني على فات يحبي، قربت عطيتها بوسه على خدها اليسار الي كان الجهه اللخرا من الشمس، ومسكتها بيديا الاثنين ازلفطت مني وقالتلي لالا الا هكي، خلينا نقعمزو ونحكوا.

بعد كملنا هدرزه طلعنا من القاعة وقابلتني(قولوا من) فاتن واحنا طالعين من قاعة بروحنا، عينها توسعت وحواجبها بيطيرن من مكانهن، مرينا بجنبها شوي قالتلي هاجر هذي منو اللي قريب تاكلك قلتلها متدوريهش، قالتلي لا كان هذا تو ناخذها ونعزقها من فوق، قلتلها معقوله الحنيه يطلع منها هذا كله، قالتلي كنك تدوي كيف الغبي، قلتلها انا غبي اني كنت نعرفها.

يومها حكيت لمحمود على صار قالي يراجل فكك منهن والله عقولهن مسوسه، قلتله عارفهن مسوسات لكن منقدروش نعيشوا  بدونهن، بهت فيا وبرم وجه.. معجبش.

طلعنا انا وياه من الجامعه ركبت معاه (سيارتي كانت عاطله) ، طلعنا من البوابه جا واحد يحسابنا قطعنا عليه الطريق طلعلنا صبعه الأوسط رديناله بواحد زيه.

خلوكم متابعين في قصص اخرى جايات في الطريق .. اللي عنده تعليق يسيبه ومتنسوش آرائكم المهمه ليا 😘

الى لقاء جديد تحيات الكاتب محمد الزنتاني ❤