اي حاجة الا هكي ..

اي حاجه الا هكي..

الشخصيات الرئيسية: حمادي (انا 😁)
خديجة ،وفاتن ،عبد الكريم صديقي ومحمود
.
.
.
.

الموضوع بدأ لما انتهى الحظر متاع الكورونا

نضت الصبح بدري بيش نمشي للجامعة، كان وقتها ، خشيت الحمام وقلت بسم الله منشفي علقته وقضيت حاجتي وقلت انشالله منقطرش براا.. ونجحت، غسلت وجهي وسنوني وطلعت للشارع مبيتش انبهت في حد لأنه مكانش فيه حد.

ولعت كرهبتي، شفتلها الزيت واطيت تحت السيارة بنتأكد انه مفيش قطوسه راقدة تحتها، صبيت علقت وطلعت وصلت في مفرق مكانتش الاشارة متاع المرور تخدم اجتزتها وطلعت شور شارع دبي مريت بالكفي خذيت قهوتي وعلقت من جديد، وصلت المفرق شفت يميني ويساري ناس نايضة عيونهم متنفخه من النوم مرت سيارة جيش كاسرة الاشارة، رجل المرور مدوّرش وحتى انا..

علقت من جديد الحمدلله مفيش زحمة في الصبح (قلت لنفسي كان يقعد الوضع ديما هكي)، انعطفت شور شارع الأطفال وكملت شور الجزيرة، خشيت السريع وقعدت نسرع معاهم ، مجانين يجروا مشعارفين انهم ممكن يموت بسرعه اقل من هكي شنو يعني ماهو ياما ماتوا تريس يبال مجانين زي هذوم ، كلمت محمود قالي وصلت ونرجى فيك قتله هي قريب نوصل ، ووصلت.

خشيت لقيته عند سيارته
وين يتشم قلت
حمادي معاك ولاعه
مديت يدي في جيبي وقتله هاك
ولع سبسي
كنه وجك اليوم ،قلت
كنه
مش عاجبني، قلت
جبت اوراقك
جبتهن معايا،قلت
بهي هيا

خشينا من البوابه لقيناها حايسه فوق بعضها .. كلها تجري يمين ويسار ،وقفنا شوية قتله اسمع خلينا نرجوا شوية بلكي تفضى. قلت.
شن نديروا قال
رن على عبد الكريم شوفه وينه كانو راقد واعيه التيس قلت
هاك ولع . مديتله سبسي

شوية رن تليفوني لقيتها فاتن حبيبتي الوو يا ننة قلبي
الوو سمعتها قالت صوتها ذوبني كعادته.. هاا بيبي وينك اليوم قلتلها صوتي كان عالي شوية بهتوا فيا كمشة شباب مقابليني..مدورتش.

قالتلي نشوف فيك من اللي معاك هذا .. قلتلها صاحبي
امممم قالت ، شكلك حلو اليوم قلتلها ..ههه قعدت تضحك قلتلها تعالي شور الكافيتيريا حبي ، قالت بهي ،
قلت لمحمود شوي تو نجي .. وين قالي ، نشوف الكبيده ونجيك ،العبي قالي الله يسهلووو ابتسمت وواصلت المشي.

قصيت من عند الشجر وكملت لقيتها مع صاحبتها كانت سمينة شوية وعيونها عسليات وفي شعرتين طالعات منها كان لونهن مايل للاصفر مفهمتش صبغة ولا طبيعي .. كان اسمها خديجة

فاتن جسمها رقيق وقصيرة ووجها فيه نمش اسود مخليها احلى بنيه في نظري على الرغم من أنها تشكيلي انها متحبش .. وعيونها زيتيات وشعرها اسود تصبغ فيه حمر ، شفته من تحت المحرمه وكنت ديمه نقوللها هذي احلى حاجه فيك (كانت تفرح لما نقوللها هكي)

خذيت حبيبتي فاتن ومشينا للكفتيريا، معقوله حبي نقعد شهور بش نشوفك قلت، قعدت تضحك حتى انا كنت متوحشتك حبيبي قالت ، جيت بنمسك يدها قالتلي حيييي لالا عيب ، عادي انا حبيبك قالتلي لاأه، مرديتش وصلنا لكافيتيريا عوكرت ومشينا شور الشجر قعمزنا علماده واللي ماشي واللي جاي يبهت فينا .. شلة بنات قعدن يضحكن نسمع فيهن .. قلتلها عادي حبي متدوريهنش قالتلي عادي مش مدورتهن محمضات، ههه ضحكتلها ضحكه مجاملة قتلها كنك نحس فيك زعلانه به قالتلي لالا شي غير تعاركت مع ماما ، عليش حبي شن درتيلها قالتلي لالا شي غير لقتني راقده الصبح نوضتني بالقوة وقعدت تدوي تدوي تدوي لعند فرغت الطاقه متاعتها كلها ،تريحتي؟ قلت ..كنك مليت مني ؟ اومئتلها براسي قلتلها بهي عطيني نمسك يدك ضحكت، فرحت انا .. قالتلي بهي بس بسرعه .. مسكنا يدين بعضنا عيني جت في عينها كانت تبهت فيا بخجل وخدودها انحمرن، قربت منها بنعطيها حبيبه قالتلي لالا محمد كله الا هكي ..قلتلها بهي نحبك شندير قلتلي لالا مش حب هذا.. قلتلها شن شكله الحب متاعك

تنهدت وشوربها قعدن يلون قالتلي تحبني قلتلها مشعارف ..

بهتت فيا متاع اللي راقيلها وصبت على كرعيها (بنعدي انسجل) قالتلي تأخرت ، متخلينيش انتوحشك حبي قلتلها ..مردتش، شوي صبيت ومشيت حتى انا.

رديت لمحمود لقيته مع عبد الكريم وقفنا غادي شوية بعدين خشينا تمينا الاوراق بعدها طلعنا واحنا فالطريق لقيت خديجة ترجى في فاتن وكان مصبي معاها عبد الكريم يهدرزوا (اه نسيت نقوللكم انهم على علاقه حب )، .. ، مشينا للكافيتيريا انا ومحمود خذيت ميه وهو مبش ياخذ قلتله محمود كنك متدوي مع بنت ؟!
قالي فكني منه الموضوع قتله عليش قال فكني منه وخلاص وانتوا ربي يهديكم.. تميت اوراق التسجيل بهي؟ ، تميتهن اها.، هي نطلعوا به..

طلعنا من الكافيتيريا رنيت على عبد الكريم .. يا زير النساء! ..كنك قالي ..نبوا نطلعوا، هي بهي ارجوني شوية ..
قعمزنا انا ومحمود علكراسي والناس تمشي وتجي من قدامنا، فيض من الناس يتدفقوا من حيث لا تعلم هاك ولع سبسي قالي .. هات يرفيق السوء ولعت وقعدنا نهدرزوا خطموا كم واحد قدامنا يسألوا علتسجيل دليناهم على مكانه قعدنا شوي بعدها وصل سي الهايك ..خذيناه وطلعنا.

ارجوني في الجزء الثاني بكره حنحكيلكم شن صار معاي ومع فاتن وكيف سيبتني بعد كانت تحبني وشن صار فدراستي وشن درت بعدها.. نشوفكم على خير

مع تحيات الكاتب محمد الزنتاني