في ضريح العشق حمامـــــه......💙🕊

البارت الأول

#في ضريح العشق حمامة..
البارت الأول....
وئام الشيخلي....

مساء الورد والياسمين ع عيونكم غوالي،،،

،،،،،،،،،

اشتـاگيتلك
وتدري الگلـب لمـن يحـــن
دگاتـــه تبـــدي تـراســلك
شتكول لو نتفق
تنبضلي من جوة الضلع
وانطيك انه شهكة هوه.
،،،،،،،،،،،

الاعظميه..12/1990. شكد عمركم

ميحانه ميحانه... ميحانه ميحانه
غابت شمسنه الحلو ما جانه
حيك.. حيك بابه حيك.. الف رحمه على بيك
هذوله العذبوني .. هذوله المرمروني
وعلى جسر المسيب سيبوني

عافت عيوني النوم .. عافت عيوني النوم
بعدك حبيبي العين ذبلانه
بلوح القدر مكتوب .. بلوح القدر مكتوب
بهجرك حبيبي الروح ضمآنه
حيك.. حيك بابه حيك.. الف رحمه على بيك
هذوله العذبوني .. هذوله المرمروني
وعلى جسر المسيب سيبوني

ضليت انا سهران .. ضليت انا سهران
وارعى نجومي ليش ماجانه
واتسامر ويا الليل .. واتسامر ويا الليل
واجمع همومي وروحي تلفانه
حيك.. حيك بابه حيك.. الف رحمه على بيك
هذوله العذبوني .. هذوله المرمروني
وعلى جسر المسيب سيبوني

خلى الدموع اتسيل .. خلى الدموع تسيل
من عيني دمه الروح ضمانه
واللي فديته الروح .. واللي فديته الروح
روحي ظلمه بسكَم خلاّنه
حيك.. حيك بابه حيك.. الف رحمه على بيك
هذوله العذبوني .. هذوله المرمروني
وعلى جسر المسيب سيبوني...

سمعتها براديو الاذاعه وادندن وياها وي كل كلمه من كلماته اتذكر حبيبي ورحت بذاكرتي ورجعت.. وگلت وي نفسي غابت شمسنا ورجعت شرقت بيوم جديد والحلو ماجانا...
كل هذا واني واگفه اباب المطبخ...
اليوم الخميس عندي اوف ماعندي دوام بالجامعه... والخميس من ايامي المفضله من كنت طفله احبه واشوفه يوم مميز..

طلعت من باب المطبخ متوجهه للحديقه نهايات شهر ال(12) الجو كلش حلو والشمس طالعه الجو دافي رغم اكو خيط بروده.. بس الشمس طاغيه ع البرد..
شايفين الشمس من تطلع بعد اليوم الممطر.. شكد تكون دافيه وحلوه..وريحه تراب الحديقه مبلله المطر هاي الريحه اعتبرها من عطوري المفضله..
بيدي صحن كعك ابو السمسم سويته الصبح دا اجرب وصفه جديده لصنعه..
بعد ماكنت اسويها بالامونيا.. ومن قريت عن مخاطرها إذا زادت الكميه مالت الامونيا تصير مضره..
غيرت الطريقه والحمدلله طلعت طيبه..
صحت ع أطفالي اخذو الصحن مني وراحو للمرجوحه... مسبحتهم ومطلعتهم بالشمس..
وهم نوب يتعاركون نوب يتصالحون. نوب البنات يصيرن حزب ضد الولد.. وع هالوضع.. جنهم العراق ودول الجوار كل يوم بحال مختلفه عن اليوم القبله..
ابتسمت بداخلي واني اشوفهم قسمو الكعك بينهم بالتساوي وبقت وحده رجعوها بالصحن وخلوها على جهه..

حسيت بحركه قويه ابطني تلمست بطني بحب.. حبيب ماما انت..

بس متأكده هالمره متأكده البطني نفر واحد مو توم مثل القبلهم اكول ع نفسي كأني أرنب خلفتي توائم .