اغصان تتحرى البليل

٢٩

صباح الخير

اغصان تتحرى البليل
الجزء التاسع والعشرون

اريد احاجيج بخصوص موضوع الزواج..
اي بس اصبلك جاي ..
لا تونس متغدي ماريد تعالي كعدي..
درت وكعدت بالقنفة الكدامه..باوعلي بنظرات
مليانة هدوء..
رفع حواجبه بسؤال..شلونج مرتاحة هنا؟

الحمدلله..يعني بعد الصار ببيتنا هنا انسب النا..
تعدي وتزول لا تحطين ببالج..
يحجي ومثبت عيونه بعيوني..
بقيت اتهرب بنظراتي..نظراته تحرج..
حجه بهدوووء..لهفة..
مم ..حجيت وانا اعدل كعدتي..

المفروض نتزوج هالفترة احسن..
ليش؟يعني ماكدر ..لازم اكمل السنة..وهم
همام شوي يكبر ..
بس اخاف عليج..كلشي يصير..خاف ياخذوج
فصلية ههه..حجه وركز بنظراته عليه..

باوعتله بنظرات مستهزأة..لا بربك..
ايي غير ابوج معاند مايدفع فلس..وو..
وشنو!
لهفة ابوج لزمو ترى..
شوكت يعني هسه وينه؟
حاليا بالتوقيف ورافض فكرة تسديد الدين
مطلقاً..

شكد صارله يعني؟
بيوم الاجالكم اخذ جوازه..متابعي ولاقين
عليه القبض..حجه وابتسم..
عقدت حاجبي باستغراب..بس ماسالته ليش مبتسم
يمكن شامت بي!ممكن..

الخلاصة ابوج رافض يسدد ومستعد
يخلص سنين بالسجن بس مايدفع فلس..
وهذا الافضل طبعا..
الافضل شنو ترى هو ابوي !
عذريني ماعرف هذا الاحساس يعني !!
ليش مو عندك ابو صفوان؟!
ممتاااز انت كلتيها..ابو صفوان موو ابو باسل..

انت مو اول واحد يموتون اهله ..ليش ناكر
فضل الناس الربوك ويحبوك!!
لو يحبوني جان كلولي منو اهلي ومنو عائلتي..
كلشي ماريد بس اروح ل** الغدر بامي
اذبحه واذبه للجلااب..حجه وعيونه ازدادت حمرة..

انت منو كلك غدر!مو كلولك اهلك ماتو!
هه ..لو ميتين جان كلولي منو عشيرتي منو اقاربي..
تعقلييها!لا عم لا خال لا جد ..كلللش..مكطوع
من شجرة..اخررر سلالة ناادرة..هيج مغفلة
انت ومقتنعة؟!!

تشوفني مغفلة لان انت باني براسك اوهاام..
مرات الذكاء الزايد يعتبر غباااء..مثلك مثل
الي حبسو بغرفة...يحاول يحفر الحايط..يكسر الشبااك
ويطفر منه..بس مايفكر يروح ويحاول وي الباب ..
اخر شي وبالصدفة..اكتشف الباب اصلا
مامقفول...حجيت هيج وكمت وهو يباوعلي
وووجه وعيونه صارت حمرة..

كملت كلامي بكل ثقة..انت لا تتعب عقلك بحكايا
ماموجودة..دور قصتك بين الحواليك تلكاها..
رجع ظهره ع القنفة وابتسم تك خد..انت ماخذة الدنيا
مغالب..لهذا عشتي وتقدمتي..

دنكت ع ظهر القنفة الكدامي وانتجيت..فاهمني
غلط انت..مو مغالب بس قناعة تامة بالواقع..
هذا واقعي!اعيشه واواجهه..هروبي منه والعيش
بنسيج واهن من قصة مفبركتها براسي..راح
يحطني بالخطر ..من اقل هجمة من الدنيا تهد كلشي
فوك راسي..