جلسات الطبيب النفسي

الحكاية الأولي

- استنيته كتير ، بقالي 5 سنين مستنياه يحس بيا وبحبي ، 5 سنين مبطلتش فيهم يوم افكر فيه واتمناه من ربنا .. بس خلاص انا يئست وبدأت ابقا مريضه بيه وهو شكله مش نصيبي مش مكتوبلي عقلي عارف ده ومقتنع بيه .. بس انا جيت هنا عشان اداوي قلبي ، هو وجع القلب له علاج يدكتور؟
- اتنهد واتعدل ف قعدته : لو كنتي مستنيه مني اكتبلك دواء في روجيته وتروحي تاخديه تصحي تلاقي نفسك مبتحبيهوش هتكون الاجابه لا ، بس خلينا متفقين ان مفيش وجع بيدوم للابد ولا في حاجه ملهاش علاج .. قادره تحكيلي عنه ؟
- ابتسمت بوجع : انا مبحكيش غير عنه ، صحابي من كتر ما بجيب سيرته ف اي حاجه وكل حاجه زهقوا منه ، يمكن المفروض ان من كتر ماانا موجوعه دلوقتي وتعبانه ابقا ندمانه اني حبيته بس انا مش ندمانه ، اعظم حد ف نظري وهو فعلا حد جميل .. تعرف هو عمره مااتخلي عني .. ما هو في الاول والاخر موجود في حياتي اه موجود بشكل غير اللي انا بتمناه بس اهو موجود ولما بحتاجله بلاقيه (دمعت) هو شايفني اخته الصغيره فبينصحني دايما وبيقف جنبي وانا مش عارفه اشوفه اخويا مش عارفه اشوفه من يوم ما وعيت علي الدنيا غير انه حبيبي وجوزي وابو عيالي اللي متمنيتش ابدا اجيبهم من حد غيره !
- قولتيلي انه كان مرتبط ، يعني هو دلوقتي سابها؟
- المفروض .. بس انا مش فاهمالهم حاجه شويه اه وشويه لا ، شويه اتعشم انهم خلاص سابوا بعض وبقت في فرصه اكبر ليا والاقيهم رجعوا تاني ، انا تعبت ... علي فكره انا مش وحشه انا بجد بدعيله لو هيكون مبسوط معاها يهديهم لبعض بس انا حبيته قبلها وقبل ما تعرفه اصلا ، انا احق بيه !
- القلوب فكرتها زي فكرة ال puzzle بتاع الاطفال كده ، كل قطعه منه ليها مكان معين لو حطيتيها ف مكان تاني الشكل مش هيكتمل ! القلوب مخلوقه بشفرات وشخص واحد بس هو اللي هيكون معاه حل الشفره دي ، حاجه معقدة كده من صنع ربنا وحكمته فمتحاوليش تفكري فيها كتير لانك مش هتفهميها بردو ، انتي اي اللي خلاكي تصبري عليه طول السنين دي ! او خليني اسألك بطريقه تانيه ليه دلوقتي بالذات يئستي وقررتي تنسيه؟
- اول ما استوعبت مشاعري ناحيته كنت خايفه اخسره كأخ وصديق عشان كده معرفتوش ، وبعدها هو ارتبط فكنت مستنياه يسيبها ، كان في احساس دايما ملازمني .. ثقه في ربنا او في نفسي معرفش بس كنت دايما عندي يقين واقتناع داخلي انه هيبقا ليا وان ربنا مش هيحرمني من اكبر حلم حلمت بيه ، وعلي فكره لحد دلوقتي لسه في حاجه جوايا بتقولي متيئسيش بس زي ما قولتلك في الأول عقلي هو اللي مقتنع اني لازم انساه اما قلبي ما زال مخلص له ومش عاوز ينبض بالحب لحد غيره
- مجرد ان عقلك قدر يتغلب علي قلبك دي حاجه تخليكي تتطمني انك قريب هتعرفي تقفي علي رجلك من غيره ، خطوه كويسه انك فكرتي في طلب مساعده ف نسيانه مش في انه يحبك ، وعلي فكره هو بيحبك .. مفيش راجل بيعمل كده مع ست بالشكل اللي حكيتيلي عليه ده وميكونش بيحبها ، بس هو بيحبك بطريقه تانيه .. بشكل تاني هو معتبرك حد قريب منه بيسمع ويطبطب ويهون عليه حد بيستحمله اوقات كتير في عصبيته وعشان كده اول حاجه هنعملها : هي اننا نمنع الكلام الكتير والمواضيع اللي كنا بنخلقها من الهوا عشان نقرب اكتر ونتكلم ، مش عاوزك تاخدي اي خطوه من ناحيتك الاسبوع ده لحد ما نتقابل الجلسه الجايه وساعتها اول حاجه هسالك عنها تاثير ده عليكي وعليه ، خلي بالك انا مقولتش اختفي ومقولتش تمسحي الحاجات اللي بتتكلموا عليها ولا تقفلي موبايلك عشان ميوصلكيش ، لان ده هروب وانا عاوزك تواجهي ، عاوز حياتك الاسبوع ده تمشي زي ما هي باستثناءه هو بس ، ولو اتكلم يبقا بردو الرد علي قد الحاجه ، احنا دلوقتي بنمحي اثار حبه من قلبك فبالتالي اي حاجه كنا بنعملها عشان نقرب منه مش هنعملها هنقف مكاننا ، تقدري تعملي ده ؟
- صعب
- عارف انه صعب بس هو ده الدواء اللي طلبتيه مني ، ومظنش ان في حاجه صعبه علي واحده قويه زيك
...........
بعد اسبوع
- احكيلي عن الاسبوع اللي فات
- مكلمتوش زي ما قولتلي ، كنت بنزل استوريز عادي وصور ومكلمتوش عديت 6 ايام من غير ماادخل اتطمن عليه واسأل علي حاله (ابتسمت) عارف بعتلي مسدج الصبح معرفش ليه فرحانه اوي من ساعتها يمكن عشان حسيت ان غيابي اثر فيه وخد باله اني مش موجوده
- بعتلك ايه ؟
- بعتلي ايموشن دايما بيبعته لما بيبقا بيعاتبني علي حاجه او عاوز يحسسني اني غلطانه ، وسالني انا ليه مبسالش ومعدتش بتكلم ، قولتله اني الفتره دي مشغوله شويه بس وسالته اخبارك اي وخلاص
- حاسه ب ايه
- حاسه ان وجودي في حياته له معني واني فارقه معاه
- اتنهد وسكت ثواني : تمام خلينا نفضل ماشيين بنفس النظام فتره وسيبيه هو اللي يبدا الكلام ونشوف هيحصل ايه
..........
(بعد مرور شهرين)