قمع المشاعر.... الثالث عشر من الجزء الثاني...
للكاتبة زهراء ( روزايه)...
مو ذاك الاعرفك انت من سنين
اطباعك علية هواي مختلفة
متغيرة الملامح بيك والاشواك
وجياتك احس مابيها اي لهفه
وجنت توكف كبل والعين تحجي العين
هسة شبيها عينك شو صفت صلفة
هسة اختلف حجيك كلة ذم واعتاب
على جتافي حملتك سرت بيك دروب
وبنار العشك جم دوب اتحفة
شسولف نار منك ابد ما تطفة
والهم البلكلب ماضن بعد يغفة
...
قبس.. بسرعه لبست وهو قفل الابواب وطلعت وتليفونه
مالحك يرد كلساع تتصل بسمه وينطيهه مشغول
طلعنه ع راس الشارع جاوبهه
جان صوتهه عالي وتبجي وهي دكله
عمه الحكلي يريدولهه دم بس كالهه جاي
بالطريق على كيفج..
سد التليفون ويسوق سريع كتله ليش كتلهه
امجد هيج هو من هذا النوع وهادىء
بشار.. اكيد مسويه شي مايكتلهه هيج الا اكو
سالفه جبيره
قبس.. اخذني وياك لاتوديني لبيت عمي
بشار.. وين رايحه للمستشفى وانتي حامل تظلين
واكفه
قبس.. لعد تتاخر لازم توديني لبيت عمي وترجع الهم
وهي خبصتك بالاتصالات
بشار.. لا اوديج وارجع
قبس.. جنت مصره الا اروح عقلي يكلي روحي
ليش هيج بشار انفزع وليش عمه خابرته بالذات
ماخابرت عمو عادل اقرب واحد
ماريد اصدك شكوكي بس ردت اروح واشوف بعيني
راد يفوت ع شارع بيت عمي كتله مااروح بشار
والله ماانزل من السياره
بشار.. لاتعاندين !!
قبس.. مااعاند كتلك ماانزل ليش ماتقبل اروح قابل شكو؟؟
باوعلي بطرف عينه وعبالك افتهم تفكيري
ماادري اني حسيت هيج لان متعوده
يفتهمني من عيوني سكت ولزم طريق المستشفى..
وصلنه للباب ركن السياره ونزلنه جنت امشي سريع
صاح بيه ع كيفج ترى ارجعج بالسياره قبس
لاتنسين انتي حامل..
ماحجيت ولاردت اسوي مشكله طبينه اندور عليهه
تلكتنه عمه بسمه خدودهه تجري دم من كدما مخرمشتهم
وتبجي ووحدهه حته امجد ماكو..
ردت اتقرب عليهه شفت نظرتهه شلون خزرتني
وعبالك محملتني المسوؤليه بسرعه ابتعدت
اكتفيت بس بالسلامه وبشار انطاني كرسي كعدت..
وهو يسال بيهه
بشار.. شكو عمه شصاير؟؟ وشبي امجد
بسمه.. ليش جايب قبس وياك؟؟
جان سؤالهه عبالك ضربه ع راس بشار حته جان كاعد
بمستواهه كام وكف وخله ايده بجيبه
وبينت من ملامحهه شلون تعصب رد عليهه بحديه
هسه موضوعج قبس لو بنتج الفاقده؟؟
وقبس ماكدر اعوفهه بالبيت بنص الليل وحدهه
بسمه.. هااا لا بس خطيه لان حامل
بشار.. راح اشوف الدكتور واجي
قبس.. راح بشار واني درت وجهي عنهه والله ولاتستاهل
هاي الطلعه بنص الليل انقهرت خاف اسمع بلاويهه هي وبتهه..
شويه واجه كعد بصفي وهي كاعده كدامنه
شكد حاولت تخلي يسالهه وكلساع وكالت
سوده عليه بنتي
وعسى باليكرهوج. وعسى هيج
بس بشار ابد ماسالهه اكتفى باول سؤال من ردت
شعدهه قبس..
قربت راسي يمي كتله شكال الدكتور؟
بشار.. حجه وياي بصوت ناصي كال مضروبه ع راسهه
وعدهه نزف ومكسوره ايدهه ورجلهه
قبس.. عزاا ليش هيج امجد شجا شمسويه؟
بشار.. ماادري
قبس.. اسال عمه
بشار.. لا مااسال هسه شويه ونروح
قبس.. ليش ماتسالهه
بشار.. ماشفتي ردهه الوحده المثلهه بيا حال وهي تسالني شكو
جبت قبس ومنفعله
جنه نحجي بهدوء جان دكله تعال عمه اريد احجي وياك
السالفه خاصه كام هو والله يالله اعرف الغيره من الشابات
انتي بسمه شبيج ؟؟
ظليت كاعده وحدي مشوار يله اجه مباشرة كال يله كومي
وراي دوام والتفت عليهه عمه اذا احتاجيتي شي خابريني..
بسمه.. ظل وياي ياعمه ماعندي احد
بشار.. هسه اخابرلج غيث يجي مااكدر اظل قبس وحدهه
وتتعب لان حامل خلي تجي اختهه يمهه
بسمه. لااا لاتخابرهم خطيه يفزعون بنص الليل
اني اظل ومن احتاج شي اخابرك
سلمنه عليهه وطلعنه بس صعدت بالسياره جر نفس عالي
وكال شو مشيتج مو نظاميه؟؟
قبس.. ليش شبيهه؟
بشار.. ماادري مومثل قبل كلساع اكول راح توكعين
تحسين بشي؟؟
قبس.. لااا مابيه شي بس نعست
سكت وحرك السياره ردت اساله شبيهه
بس كلت هو يسولفلي وصدك شويه وكال
ماسالتي شبيهه؟؟
قبس.. انتظرك تحجيلي؟؟
بشار.. مممم امجد هسه يله عرف بسالفه شجن
واتفاق وائل وفرح وسالفه الخطوط
وع هاي دكول بسمه اجه واجهه وهن ناكرات بسمه وفرح
وهم منفعل وكاتلهه ماذيهه
قبس.. اكو اسئله ببالي؟؟
ليش خابرتك الك ماخابرت عمو او غيث اقرب؟
وليش انفزعت انت وعبالك فرح شي مهم عندك؟
مع العلم هي تستاهل لابد يجي يوم وتنكشف
بشار.. علاقتهم بغيث موشي ولايغرج كلامهه وتمدح بيهم
غيث هاجر فاطمه من يوم العرس والولد ضايع وحته يبات
برا البيت وفاطمه يم عيالهه..
وليش انفزعت لان اني السبب؟؟
قبس.. انت ليش شعليك؟؟
بشار.. قبل يومين خابرني امجد من صوته مبين تعبان
كال اريدك بشغله واجاني للشركه
ماحجه شي بس سالني صدك فرح مره تهمت قبس وشجن؟؟
واني جاوبته اي وشرحتلهه السالفه كلهه
وحجيتله عداوتي ويه وائل بس مو سالفه الاعتداء
بس سالفه الخطوط والتهم..
كال اني سمعت فرح هي مأذيه شجن
وواجهتهه هي وامي ونكرن وحته حلفن بالقران
واني ماكدرت اهدء وجاي اسالك احجيلي الحقيقه
وحجيتله وهو بعد مامتاكد من كلشي متعارك وكاتلهه
قبس.. هو يحجي واني ساكته حسيت بالذنب
ليش شكيت بيك لج قبس شلون بتفكيرج
فززني وهو يكلي هااا ارتاحيتي لو اكو سؤال ثاني..
قبس.. لاااا
بشار.. ماقبلتي تروحين لاهلي خاف عندي شي ويه فرح؟؟
قبس.. سكتت
بشار.. صارلج شكد وياي ماعرفتيني حته لو وحده غريبه
اروحلهه بغض النظر عن افعالهه بس تبقى انسانه
مع العلم تستاهل بس مدام اختارتني عمتي واتصلت
مستحيل اتعذرهه
قبس..ماعندي جواب اله ظليت ساكته وهو سكت
لحدماوصلنه للبيت بدلنه وراح غسل واني غسلت واجيت
لكيته مدد كعدت كدام المرايه رفعت شعري
واني اباوعله صافن عليه
من كمت فتحلي ايده وكال تعالي خلي انام
باوعتله وسكتت رحت مددت وخليت راسي
ع ايده انفاسه هادئه اباوعله وهو مغمض عيونه
بيمن تفكر؟ وشنو الشاغل بالك يابشار
ليش هيج مهموم وماتشاركني بهمك؟؟
غفيت بسرعه فزيت ع صوت المنبه فتحت عيوني
ماكو بشار اول مره يكعد قبل المنبه
بسرعه كمزت وعبالك طفلي ضايع
ركضت للصاله ماكو بالمطبخ ماكو
مادري شجاني اول مره هيج احس وعبالك
عافني ادور بالبيت واصيح بشار ودموعي
تنزل وحدهن حسيت نفسي مثل المجنونه
ركضت فتحت باب المطبخ سيارته موجوده صحت بشااار
اجاني صوته بالحديقه هناااا قبس !!!
جنت حافيه ركضت علي جان كاعد ع الكرسي
حضنته حيل وعبالك جان بسفر
ايده ع ظهري وهو يكلي شكو حبيبتي
ليش مفزوعه؟؟
قبس.. ليش كاعد هنا خفت من مالكيتك اول مره
ماالكاك
بشار.. صباح الخير .. تعالي اكعدي
قبس.. صباح النور وكعدني ع رجليه وحاوطت ركبته باديه
وراسي ع صدره
بشار.. قابل وين اروح ؟ كاعد على الهوا ليش خايفه؟
قبس.. ماادري بشار اول مره احس هيج حته بجيت
عبالي عفتني
بشار.. ليش اعوفج شصاير؟؟
شو تعالي حبييتي خلي انفوت جوه منا ناس
خله ايده ورا ظهري ودخلنه جوه رحت غسلت رجليه
وغسلت وجهي ومسحت ركبتي احسهه نار
شجاج قبس ولاانتبهت ع تصرفي
حته دكات كلبي سريعه
طلعت للمطبخ شافني ذب الجكاره
كتله اسويلك ريوك؟؟
بشار.. اااي وتريكي وياي ورجعي نامي وجهج اصفر
قبس.. سويت الريوك وكعدنه ناكل من كمل كال
اخذج لطبيبه قبس ماعاجبتني؟
رديت علي لا مابيه شي بس هسه لان انهبطت
بشار.. من البارحه بالمستشفى انتبهت على وجهج اصفر
وحته شفايفج يابسه وقرب ايده ع شفتي الجوه
حرك اصبعه الابهام عليهه
حسيت باحساس حلو غمضت عيني وهو
مستمر بحركته يصعد اصبعه للفوك وينزله للشفه الجوه
واني مغمضه لحدما انطبعت بوسه عميقه عليهن..
ابتعد واني فتحت عيني بابتسامه
قابلني بابتسامه وجرني من ايدي
كومني وكعدني بحضنه
بشار.. بعدج خايفه وخله ايده على كلبي ليش ينبض
سريع؟؟
قبس.. ماادري لان قريب عليه هو هيج يتخربط
مد ايده على ركبتي وباصبعه يحركه ع عظمه كتفي
واني غمضت عيوني واميل براسي
ويه حركة ايده يمنه يسرى لو ارفعهه ليفوك
همس قريب يم اذني شكد تحبيني؟؟؟
وهذا اول مره يسال هالسؤال!!!
قبس.. فتحت عيوني ولزمته من وجهه كتله
بكد حبك الي مرتين...
بشار... مممممم بس اني احبج اكثر
قبس.. لا اني احبك اكثر
بشار.. لا اني..
قبس.. لااا اني اكثر
بشار .. اقنعيني!!
قبس.. انت تحبني كحبيبة وزوجه وصديقه
بس اني احبك حبيب وزوج وصديق وابويه وامي واختي
واخواني وكل اهلي وحبايبي احبك اكثر واكثر..
بشار.. تعالي تعالي وحضني حييييل حته بطني انجعصت
كام من الكرسي وهو شايلني صحت نزلني ثكيله عليك
همس يم اذني اااششش
نزلني ع الجربايه بهدوء وبده بكل جزء
يبوسه ويشمه ويه كل بوسه يهمس كولي
شكد تحبيني؟؟
واني مغمضه عيوني اكله احبك هواي
وهو يرد بعد
احبك بكد الكون
بعد
بكد عمرك وعمري
بعد
بكد خوفك ولهفتك عليه
بعد
واني مستمره اجاوبه
لحدما حسيت بالم صحت اااااخ ابتعد عني
وهو يباوعلي بقلق شبيج؟؟
قبس.. حضنته ونام بصفي مابيه شي بس شويه تاذيت
انت اليوم موطبيعي حته لمساتك قويه..
بشار.. مممم لان مشتاقلج
قبس.. غمرت راسي بحضنه وظلينه ساكتين شويه
وكتله دوامك راح
بشار.. خلي يروح خليج بحضني
قبس.. جنت حاضنته حيل وماادري شبيه خايفه حيل
بشار موطبيعي
ابد موطبيعي حسيت بالم وهاي اول مره يقسي
بلمساته وكانو اكو غضب بداخله وجاي يفرغه..
عده الوقت وهو هادئ واني بس الافكار تضارب براسي
همست حبيبي نمت؟؟
بشار... لاااا
قبس.. ماتروح اليوم
بشار.. لاااااا
قبس.. خليني اكوم انظف لعد وانت ظل نايم
بشار.. لا لاتكومين خليج بحضني
قبس.. سكتت وشددت لزمتي وحضنته اكثر
ماحسيت بنفسي شلون غطيت بالنوم..
فتحت عيوني على حركته باصبعه وهو يحدد ملامحي
ابتسمت مانمت؟؟
بشار.. لااااا
قبس...اكوم
بشار .. الساعه ب١١ كومي اني اروح ب٢ للدوام المسائي..
قبس.. اكوم اسوي غده لعد وبوسته وكمت لبست ملابسي
ورحت للحمام...
سبحت ورحت للمطبخ طلعت الدجاجه نكعتهه وبديت اسوي
التمن اسمع صوت المي بالحمام دخل سبح
التهيت بالمطبخ وهو بالغرفه لحدماكملت كلشي
وعفت الدجاجه بالفرن ورحت غسلت وتوضيت
لان اذن فرشت سجادتي بالصاله صليت
ورحتله للغرفه عبالي نايم
لكيته لازم تليفوني وهاي مومن عوايده
ياربي هوايه تصرفات جديده عنده
ومااعرف افسرهه
من شافني نزله اني حته ماسألته شسوي
قبس.. حبيبي اصب بين ماتصلي
بشار... اي حبيبتي حته اروح من وقت
وانتي هم اخذج لاهلي
قبس.. ليش؟؟
بشار.. احسن شعندج وحدج مااجي ل٩ لان ماداومت الصبح
ع الاقل مايظل بالي يمج
قبس.. ماشي .. ماخابرت عمه بسمه تسال عن فرح
بشار.. لاااا
قبس.. ليش ؟؟ لعد عليمن كعدتك نص الليل
بشار.. حته اذا اريد اساعدهه بطلت
قبس.. ليش؟؟
بشار.. ماشفتيهه السم يمشي بدمهه فوك ما طلعت نص الليل
على جنابهه وتسالني بوقاحه وعينهه ممليه حقد
شعدهه جايه قبس خافت تشمت بيهه
قبس.. وانت ع هاي ضجت؟
بشار.. طبعا معناتهه بعدهه ماتابت ولا متندمه
ماكو داعي تحجي شفت الحقد بعينهه شلون تباوعلج
قبس.. لاتهتم حبيبب هي عمه بسمه صايره
مدري شلونهه؟؟
بشار.. يله كومي حته نطلع من وقت ومناك اخابر امجد يجيني للشركه اشوفه شبي متخبل دكول بسمه
دفعني وواكعه بالكاع يعني حته ع امي متخبل
قبس.. كمت للمطبخ صبيت الغده ورتبته ع الميز
وهو صلى واجه اكلنه سوه رغم تصرفاته هادئه
بس عندي احساس يكول اكو شي؟؟
كام يبدل واني ع السريع غسلت مواعين وركضت
بدلت وطلعنه وصلني لبيت عمو وهو راح للدوام..
طبيت للبيت هدوء الساعه ب٢ دكيت الباب ع غرفه شجن
وفتحته ودخلت لكيت شجن بسابع نومه بس اسراء كاعده
جان اكو شي بيدهه من شافتني فزت وضمته
ظلت عيني عليهه احجي واني اراقبهه
هلو اسراء شلونج كلهه نايمه موو؟؟
اسراء.. ااي شجن نامت من زمان اكعدهه
قبس..لا عوفيهه اني راح امدد ع جربايه نزعت شالي
ومددت بس عيني مركزه عليهه ماكدرت تتحرك وتضمه
لازم اعرفه شنو؟؟
جانت كاعده بالكاع مدت ايدهه سحبت البطانيه
تريد تغطي نفسهه وتضيع السالفه بسرعه
كلت اااااخ اااخ اسراء الحكيلي بطني
ارتبكت حيل سويت نفسي ما اباوعلهه
كامت عليه وهي تحاجيني شبيج قبس
شتحسين؟؟
ركزت زين وشفته تليفون قديم بدون كاميرا
ظل بمكانهه التهت بيه سويت نفسي احسن
وتشكرت منهه
رجعت كعدت وشالت البطانيه خلته ع التليفون
كمت احجي وياهه سالتهه شنو نوع تليفونج؟؟
اسراء.. هذا ورفعته حديث وبي كاميرا ولمس
قبس.. لعد هذا التليفون الثاني الكعدتي علي المن؟؟
عبالي تليفونج شوفي خاف انكسر
اسراء.. هاااا لااا ااي هو تليفون سامر القديم
وجنت اقره برسائله ضامته وكل مده اطلعه..
قبس.. الله يرحمه قرب الدوام شوكت اطلعن تشترن ملابس
اسراء.. مااعرف خاله كالت اشوف يوم نطلع بي
قبس.. راح اداومين تربيه
اسراء.. لااا
قبس.. لعد شنو؟؟
اسراء.. اني عندي فلوس جان سامر الله يرحمه يضمهن يمي
وبيتنه عمو عادل كال اجره وكام يجيبلي الايجار
وحجيت ويه عمو اريد اقدم معهد صحه سنتين ع حسابي
حته اتعين
قبس.. هااا اذا عندج شكو بيهه احسنلج
التربيه حلوه بس مابيهه تعين ع الاقل تتعينين
اسراء..ان شاء الله
قبس..سكتت وهي سكتت نعست تغطيت وهي طفت الضوه
ماحسيت ع نفسي شلون غفيت وغطيت بالنوم
ماحسيت غير ع صوت شجن وهي تكعد بيه..
شجن.. قبس قبس اكعدي اريد احجي وياج
قبس.. خير خوماكو شي
شجن.. قبس لاتجي اسراء وتسمعني اني سويت شي
قبس.. شسويتي؟
شجن.. سولفت لامجد ع سوالف امه واخواته وبابا يكول
امجد مكسر فرح ولسه بالانعاش من البارحه
خاف تموت بسببي
قبس.. عبالي شو شكو؟؟ ادري البارحه رحنالهه اني وبشار
شجن.. لج لسه مامنتبهه وبابا رايح لامجد يحجي ويا
يكول مدري شمسويات للولد يحجي وعيونه حمر
ويكول مو اختي ولا اريد امي خلوهه تموت مااريد اشوفهه
قبس.. الله يشافيهه يمعوده انتي شعليج هو لازم يدري
لو يدري بيهن من زمان جان خلالهن حد خلي يعلمهن
كافي الى متى بسمه تهجم بيوت هي وبتهه
شجن.. لاتسمع اسراء لان من سمعت بفرح تخبلت
لج قبس حته تدعي ع امجد دكول فرح مسكينه
بس انتم ماتحبوهه
قبس.. هاهيج الحجي خاف صارت صديقتهه
شجن.. لا وين شوفي تليفونهه حته بدون رمز وليل نهار مشمور ولاتخابر ولاعدهه شي
وحته من تجي فرح ماتكعد وياهه
بس هي انقهرت لان كالو بالانعاش
قبس.. دكومي شجن خلي نكعد يم خاله
والله يشافي فرح ويهديهه هي وامهه
شجن.. تدري فاطمه حامل؟؟
قبس.. منو كالج
شجن.. اسراء سامعه عمه بسمه تحجي لبيبي
ودكول تعبانه وجايبيهه يم عيالهه
قبس.. انتي بعدج تحبي؟
شجن.. اني مااحبه ولا اكرهه جرحه لسه ينزف
ولا اتابع اخباره بس صدفه كالت اسراء
لان جنه نحجي بموضوع فرح
قبس..جذب حبيبه بشار كالي غيث هاجر فاطمه
من يوم العرس وهي يم عيالهه لان مايريدهه
بس موتبنين امال وهم ياشجن
شجن.. مستحيل اغلط بعد غيث صفحه وانطوت
اني تغيرت موشجن التعرفيهه
لاعبالج اتاثر بالحجي ولا اريد اهجم حياة فاطمة مثل
ماهجمت حياتي يجي يوم ويتقبلهه
قبس.. عفيه خليج هيج ولاتحجين سر
كدام اسراء ترى مانعرفهه بعدنه لاتثقين
شجن.. لاتوصيني هو اني ما اسولف بس الج..
قبس.. كومي خلي نطلع يم خاله جانت هي واسراء وبيبي كاعدات بالمطبخ سلمت عليهن لان من اجيت نايمات
وكعدت يمهن
شويه ونزلت صابرين شايله علوش اخذته منهه
العب ويااا واضحك
رفعت راسي لكيت اسراء صافنه عليه
بس شافتني ابتسمت واني هم ضحكتلهه
مدري شكو بوجهي وصافنه عليه
غريبه هاي البنيه رغم ماحجت ولا كلمه...
بيومهه تعشيت يم بيت عمو وسولفنه ع فرح
من اجه عمو كال مطلعيهه من الانعاش بس مكسره
وامجد متحلف بيهه اذا رجعت يخلي صواب بيهه
وكلت لبسمه جيبيهه يمي بين مايهدء
ام بشار.. عااادل هم رجعنه لنفس السالفه مو رواحتنه خلصت
من هاي السوالف عمر مايقبل
عادل.. لعد اجيب امجد يمنه يامره الولد منهار وجنه مخبل
لايسمع ولا يقتنع واكله خالو احجيلي يكلي
ماكو شي جديد هسه عرفت بالقديم
ام بشار.. لاتزعل مني بس مااقبل تجي صابرين تاذت
وعمر مايقبل وبنتي شجن هنا خلي يجي امجد
ونحجي ويااا ونهدي..
عادل.. الله كريم يابه الله كريم
قبس.. صارت ب٩ اجه بشار طب سلم وكعد جنه كلنه موجودين حته اسراء اني جنت كاعده بالكاع
وهو كعد ع التخم اشرلي بيده ع المكان البصفه
كمت كعدت يمه
وتقربت علي كتله الله يساعدك حبيبي
بشار.. ويساعدج حبييتي تعشيتي؟؟
قبس.. اااي وانت؟؟
بشار.. اي الحمدلله كومي نروح لبيتنه
وكام وصاح يله احنه انروح حاجته خاله يوم بشار باجر
اريد قبس تطلع ويانه نشتري ملابس وهاي شجن
تشلع كلبي الا قبس وياهه
بشار.. الله كريم منا لباجر يله تصبحون ع خير
واني ركضت اخذت جنطتي وطلعت اسويلهم بيباي
ثاني يوم طلعت ويه خاله وشجن واسراء
اشترن ملابس واني اشتريت شكم قطعه مال حوامل
لان راح يبدي الدوام وبطني بدت تكبر
مر اسبوع كامل تكررت حاله يندك الباب
اشوفه بالكاميرا طفله زغيره ادك الباب واني
ما اطلع بيومهه حجيت لبشار وراجع الكاميرا
كال هاي مگديه خليهه ادك وتروح ..
مرت ايام طبيعيه وراجعت لطبيبه كالت حملج
زين والطفل بصحه تامه
بيوم من عندهن مااعرف شلون اوصفه من هذا اليوم
بده عذابي لو من اليوم هيأت نفسي للخسارات..
مثل كل يوم طبخت غده وصليت وعيني ع الساعه
انتظر بشار يجي رغم دكيت اكثر من مره ومارد عليه
كلت هو ع جية
رحت مددت شويه احس ظهري مكسور بالنص
لان سولتي بالتنظيف حته الشي النظيف
ارجع علي بسبيل اتلهه بي..
سمعت الباب انفتح باعت للساعخ بعدهه ماصايره
الوحده شعجب اجه من وقت
كمت اباوع من الشباك شفته دخل والسياره عافهه برا
تلكيته مثل كل يوم بوسته من خده وهو هادىء
بس اني حسيته نار راخ للغرفه واني عيني علي
شبي بشار؟؟
رحت وراا لكيته ينزع بساعته وشمرهه بعصبيه
ع الميز سالته حبيبي صاير شي؟؟
رد عليه بنتر لااا ماكو شي روحي صبي
بين ماابدل واسبح..
سكتت رحت صبيت الغده وهو راح سبح
كملت الغده وانتظره يجي صحت بشااار تعال
تغده ماكو صوت..
كلت خلي اكوم اخلي القوري ع النار
حته بسرعه اصبله جاي خاف يدور حجه
لان اليوم عصبي..
فززني صوته وهو يصيح بعصبيه
قبببببس قببببببس!!
اريد الحك اوصله مااكدر احس رجليه ماتساعدني
بعدني ماواصلته للغرفه طلع هو منهه وبيده تليفوني
كتله هاا بشار ليش عصبي؟؟
سحبني من ايدي حييل وصاح بوجهي
شنو هاااااي ؟؟ احجي شنووووووو
قبس.. ابلع بريكي ومااعرف ع شنو يصيح
كتله باستغراب شنوووو شبيك اخذتني بالصياح
رفع التليفون بوجهي شنوووو هاي قبس
احجي لاتختبرين صبري؟؟
اخذت التليفون منه احس عيوني كامت تلزك
واني مصدومه عندي برنامج فايبر وبي مراسلات
ويه رقم ومسويه البرنامج اخفاء تطبيقات
رجفت ايدي ورفعت راسي حته بدوم مااقره المراسلات
هزيت راسي مااااعرف بشار مو اني
اني ماعندي فايبر بس واتساب
بشار.. شلون ماتدرين الفايبر ع رقمج يعني جايتج رساله تأكيد ع خطج ودورتهه مالكيتهه وضحيلي قبس
منو لازم تليفونج
قبس.. ماادري اني وحدي بلبيت ومن اروح لبيت عمي محد اكو واصلا بحنطتي حته مااطلعه هو وذهبي
بشار مواني والله مواني!!!
جر ايدي حيل للغرفه وهو نار اخاف انطق حرف
نفس عصبيته بسالفة شجن واكثر
سحب التليفون مالتي وفتح الواي فاي
وراح ع المحادثه هو رقم غريب ومامكتوب علي اسم
والاتصال منذ ١٥ دقيقه
صاح بيه احجي المن منطيه تليفونج قبببببس
احجي اي شي كولي مواني كولي اي شي
جان يحجي عبالك بارود حته عيونه تخوف
كلبي يركض ركض ونفسي ضاك ومااعرف شجاوبه
بس احلفله مواني ولا اعرف شصاير اني ماعندي فايبر
وروح اهلي وداعتك بكلبي انت ماعندي
مشه بنص الغرفه قابض ع ايده
رفع ايده لشعره وفرك راسه
يحاول يضبط اعصابه بكل الطرق
شكد استغفر يفتر بالغرفه ويصيح استغفر الله استغفر الله
اعرفه جاي يقاوم باعصابه حته لاياذيني واني
كاعده ارجف موبس اخاف منه
اخاف علي هو وبهاي الحاله لايرتفع ضغطه
دقايق لا والله ثواني فصلت
وهو يحاول يضبط اعصابه
دك تليفوني اشعارات تعلن وصول رسائل وحده ورا الثانيه..
هستوني اريد امد ايدي علي اخذه مني
اباوع لملامحه الي اشتعلت بيهه النار
والرسائل متواصله وحده ورا الثانيه..
بعدني ماسالت شنو ؟؟ مااحس غير ايده
انمدت ع شعري بقوه وخله التليفون كدامي!!
اقره ودموعي تجري من غواش عيوني
ماجاي اركز اختنكت حيل
كلبي احسه راح يوكف من الخوف
وهو يعت بشعري ويصيح شنو هاااي لجججج
قببببس احجي ...
اقرع بيهن مصدومه مااعرف شكم رساله بس مكتوب
هاقبوسه فتحتي نت عبالي بشار اجه
وينج قبس؟؟
حبيبتي الحلوه جاوبي خاف بشار لزم التليفون
قبوسه مشتاقلج لاتعذبيني
ولج هنيال بشار شابع بيج
ماكدرت اقره ولاكدرت اظل واكفه صحت عوف راسي
كتلك مااعرفه عووووفني..
ترك شعري الحسيته تكطع بيده ومااشوف من دموعي
ابجي واصيح مواني هاي منو مسوي بيه هيج
بشار اني قبس لاتشك بيه
بكل قوته بكل ماعنده قدره حاول يضبط اعصابه
اخذ التليفون وطلع من الغرفه
اعصاب واني مدااعرف شسوي
احجي مايصدكني احلفله مايصدك
منو هذا موبايلي ابد ماضاع مني ومحد اخذه
مني وشلون بشار جاي يدور وعرف اكو مخفي
كلشي عندي مبهم
مااتحملت مسحت دموعي وطلعت لكيته
كاعد ع التخم يدخن بس شافني اشرلي بيده فوتي
بشار بس اسمعني ... ماخلاني احجي صاح
بيه امشي فوتي واقفلي الباب عليج
لاتوكفين كدامي اقفلي الباب وحته اذا دكيته لاتفتحي
روووووحي ..
رجعت للغرفه وقفلت الباب عليه ياربي
شسوي الهي ساعدني
ساعدني وساعده اعصابه تلفت
اخاف علي واني مويمه وماكدر اطلع خاف يضربني..
فتحت شعري يوجعني لميته
من جديد ورفعته وكعدت ع الجربايه
واني امسح بدموعي
حسيت بالم فضيع يم المثانه وصعد ليفوك حسيت
بطني صارت ناااار لازمتهه ومدنكه راسي ابجي
من الالم واخاف اطلع احاجي..
رفعت رجليه ع الجربايه وحضنت المخده
وعضيتهه من الالم ودموعي شلال
ياربي وين جانت مضمومه الي
ماعندي غيرك الهي ساعدني..
مااعرف شكد ظليت واني اتلوى من الالم روحي
راحت الالم بي ومايزداد حسيت ببروده على رجليه تجري
رفعت نفسي واني اشوف الدم يجري عبالك
بوري ومفتوح هي صرخه وهي فزه
ركضت فتحت الباب والدم وياي يمشي
واصرخ بشااااااار الحكلي طفلي راااااح...
.
.
يتبببببع ... متابعه شيقه