قارورة الـ مُخلد

الحلقة |13|

الڪاتبة | زينب صلاح
في | قارورة الـ مُخلد

♥♥♥♥♥♥♥♥♥♥♥♥♥♥

جنت گاعده اقراء للامتحانات واحس كلشي مجاي افهم! افكاري مخربطة والضوجه الفف..

تمددت بمكاني والكتب شي جواي وشي بصفي مو حالة هاي، سمعت صوت تلفوني بس ما بيه حيل اگوم اشوفه ولا افتحه تنهدت وسديت عيوني گلت اناملي شويه واگعد اكمل..

بعد ما اعرف شوكت فزيت ؏ شخص يهز بيه فركت عيوني بنعاس وگلت..

همسه- اممم ها نغمه

- عمو مُخلد هنا

شنو؟ طفرت من مكاني بهوستي ايععع شنو هالحالة الشعر بحث اخر والدشداشه مال وحدة مسحوله ذهابًا وايابًا بالصحراء..

- من يمته اجه؟

- توه

- روحي گوليلهم هسه تجي

بس طلعت طفرت للكنتور سحبت دشداشه بسرعة وشال لبستهن لميت شعري شوي ورشيت عطر وطلعت اركض غسلت وجهي ورحت للدوانيه دگيت الباب ودخلت..

شو بابا باوعلي ضحك ودنگ راسه اباوع لمُخلد هذا الثاني هم وجهه نطعن بلگوه لازم ضحكته..

شنو السالفة؟؟ معقولة بيه شي؟

همسه- السلام عليكم

ردوا عليه واني گعدت يم بابا الي حاوط كتفي بأيده ويسولف ويه مُخلد..

جابر- وشنو صار ما حليتها

مُخلد- شحل عمي؟ اذا هو قافل وهاي قناعته خلي يسوي الي يريده

جابر- ابن عمتك وانتم من صغركم واحد ساند الثاني شجاكم من كبرتوا شو عم الحقيد بگلوبكم هاي غير سالفتك انتَ وقيصر

مُخلد- ما امدحلك نفسي يا عمي لا بالعكس انه بشر والبشر خطاء بس بالله مالي ذنب بقصة ايهم وكلشي سويته جان بدافع حمايتي اله اما قيصر هاي سالفه منتهيه

جابر- يعني اذا احجيلك ويه ايهم وتتصافون شگلت؟

مُخلد- ما عندي مشكله بس ما اضنه يوافق

- خليها عليه ومعليك

- هاهيه

باوعلي بابا وگال بابتسامه..
- وين الضيافة؟

- هاا؟

- شبيج بابا؟ شنو چنتي نايمه

باوعت لـ مُخلد بطرف عيني شفته مبتسم رديت ؏ بابا واني افرك بعيوني..

- اي

جابر- واضح واضح من نومتج للدوانيه ههههه

- شنو؟

- ماكو شي بابا

رجع صاح بصوت عالي..
- ام مهيب وين الضيافة؟؟

مُخلد- مو غريب انه عمي شسالفه

جابر- اكيد مو غريب بس ما يصير غير چاي ماي

جابت ماما الچاي والماي وبقوا يسولفون بسوالف عامه لحد ما تحمحم مُخلد وگال..

- احمم عمي تعرف الزواج قرب

جابر- اي

مُخلد- من بعد اذنك اريد اخذ همسه من بعد دوامها نكمل الغرفة والذهب وامور العرس

- ليش لا بس كون ما تأثر ؏ دراستها

مُخلد- ها همسه؟

همسه- عادي براحتكم

مُخلد- خلص نبلش من باجر؟

همسه- تمام

مُخلد- يله اترخص انه

مريم- ابقى ؏ العشه يوم

مُخلد- لا والله عمه واعد اصدقائي ما اگدر غير مره ان شاء الله

جابر- وصلي زوجج للباب بنيتي

هزيت راسي ورحت وراه بس شنو دايخه واحس النومه بعدها بيه، وگفت وره الباب وهو احسه ضاج من شافني ساكته وراد يطلع...

لزمته من ايده وگلت..
- سوق ؏ كيف ودير بالك ؏ نفسك

- تخافين عليه؟

- اموت اذا صارلك شي

حط اصبعه السبابه ؏ شفايفي وگال بصوت ناصي..
- اشش اسم الله لا تگولين هالشي بعد

- بس فدوة سوق ؏ كيف اني لاحظتك من اصعد وياك تسوق سريع

- هههه متعود من جنت خارج العراق

- ميخالف لخاطري

- تدللين يابه

باوع وراي وتأكد ماكو شخص، تقرب مني وبعد شعري الي طالع بأهمال من وره الشال..

- زعلانه مني مو؟

- لا

- چؤ زعلانه وحازه بگلبج اعرف

سكتت ما جاوبته لان فعلًا بعده خاطري مكسور، دنگ وباس راسي..

- اليوم ما اگدر اتصل لان نتأخر وانتِ باجر عندج امتحان ان شاء الله باجر من اخذج نحجي ونحل مشكلتنه تمام حبيبي

- تمام

طلع واني سديت الباب وراه دخلت للغرفة نزعت الشال وذبيته ؏ السرير وبالصدفة صرت گدام لمرايه اجيت اغم نفسي لابس الدشداشه بالعكس واني اگول ليش يضحكون..

ثول ثولج همسه، وقتت الفون ونمت حتى بدون عشه..

الفجر گعدت كملت الباقي من دراستي وراجعت بالدوانيه لان البنات نايمات وما حبيت ازعجهن، الباقين گعدوا قبل الامتحان بساعة راجعوا وراحوا واني بس اجه السايق طلعت..

جنت متخوفه بس الحمدلله جاوبت والباقي ؏ الله طلعت يم نبأ انتظر مُخلد يجي..

نبأ- عبالي نگعد نسولف شوي

همسه- ما بقى ؏ العرس هواي لذلك مستعجلين بالتحضيرات

نبأ- يله نعوضها غير مره

- ان شاء الله

- ليش احسج مو ؏ بعضج صاير شي؟

تنهدت بتعب..
- شوية مشاكل بيناتنه

- يمعوده تصير بفترة الخطوبة

- اي

- راح تطلعون تجهزون بهذا شكلج؟

- شبيه؟

- صدُك؟ ولج عبالك رايحه لجنازه شوي ابتسمي

- اني من اضوج طبيعتي هيج

- ما يصير يا عُمري انتِ اذا سويتي هيج برأيج شنو راح يتصلح؟ ولا شي برأيي احجوا وحلوا موضوعكم بهدوء

- ان شاء الله

شوي واتصل عليه وگال تعالي بـ باب الجامعة طلعتله وحاولت ارسم ابتسامه ؏ وجهي هو هم بادلني بس صعدت بالسيارة اخذ ايدي وباسها..

- شلونه الحلو

- الحمدلله وانتَ؟

- شلون ما اصير زين ومليت عيوني بشوفتج

- دومك يارب

- والامتحان؟

- جاوبت

- عفية بهمستي

انطلق ولاحظته يخفف بالسرعة بنص الطريق وگال..
- نتغده لو نروح نشوف الغرفة بالاول؟

- بكيفك

باوعلي ضايج..
- انه اريد اخذ رأيج شنو بكيفك

- اني مو جوعانة بس اذا انتَ جوعان نروح نتغده وبعدين نطلع نشوف الغرفة

- لا مو جوعان

وصلنه وهو لازم ايدي عبالك راح اشرد كل شوي وضغط عليها بدخولنه طاحت عيني ؏ غرفة بحيث ما گدرت اشيل عيوني منها كُلشش بسيطة وراقية عجبتني..

مُخلد- هاا حبيبي؟

- ها؟

- عجبج شي؟

- ندخل نشوف بعد

- تعالي

صدك دخلنه وشفنه بس ذيج الغرفة ضلت بالي سحبت ايده عليه وهو ابتسم وهمس..

- هاا؟

- هناك عجبتني وحدة عادي نرجع؟

- عادي ليش مو عادي كم همسه عندي انه

ضحكتله بس صوتي جان ناصي باوع داير مدايره وعض ؏ شفته وحجه بصوت ناصي عباله ما اسمعه..

- موش ضحكه تهد الحيل

- احبك

باوعلي بصدمه..
- خرب مو هناا امشي

رجعنه لمكان الغرفة وفعلًا حلوة لان هم عجبته وحتى لونها جان كُلش حلوو كريمي هيج شي وهادئة ما بيها شي مو حلو اتفق ويه الولد عليها واني ابتعدت عنهم شوي..

طلعنه گبل للمطعم نتغده احتار شيحط وشينزل اكل گدامي ومن خلصنه اخذنه چاي، هز راسه وگال..

- احجي

- شحجي؟

- احجي زعلج مني عاتبيني اعرف غلطان لا والله والغلط راكبني من ساسي لراسي بس والله بلحظة غضب

- بلحظة غضب تريد ننفصل؟

- اي وبنفس اللحظة تندمت صح جنت ضايج منج بس ما اريد اعوفج

- تدري شصار بيه؟

حط راسه بين ايدي ونزله يبعد عيونه، كملت..
- جنت راح اموت

- اشششش

- شنو سويت من اجيت انتَ؟ عاملتني بجفاء ولا جن صار شي ولا جن اني جنت بالمستشفى

- لان غبي

شهكت بجي غصب عني من تذكرت وهو تقرب مني ولزم ايدي وبايده الثانيه يمسح بدموعي..
- اشش تغسلني دموعج ولج لا تبجين هديتي حيلي

- بسببك

- اخخخ كافي يروحي

دفع لحساب وطلعنه وابتعد بمنطقة فارغه بس وگف سحبني لصدره واني من كُل عقلي انفجرت بجي واشكيله منه وعليه، لزم خدودي يمسح دموعي باس جبيني وعيوني...

- اسف اسف ولج همسه هيج گلبج شايل عليه اخخ وانه الگلت ما انزلج دمعه من عيونج طلعت كاسر بخاطرج ومنومج مهضومه الله ياخذني

- لااا لا تدعي فدوة

- كافي لا تبجين ولج دمرتيني كافي حبيبي

- اي

- شو باوعيلي

رفعت عيني اله وهو سحب اكلنس وبقه يمسح بوجهي لان اكيد الكُحل سال وصار وجهي خريطة ما حجيت شي لحد ما خلص وباس شفايفي بوسه سطحية وبسرعة ابتعد..

وصلني للبيت وطلع حتى ما نزل ويايه السيارة شخطها شخط حتى خفت عليه...

قيصر*

جنت گاعد ؏ الطاولة وبحضني نجمة اوكلها ومُنير وامير وداد هم متوزعين ؏ الجهتين وابوي معزوم مو هنا، طبعًا المكان ما يخله من ضجة امير ومُنير عبالك ببغاء....

قيصر- كافيييي هرجتونه

امير- حاجين بحلگك؟

مُنير- لاا فلا تدخل

قيصر- ببغاء خو مو ببغاء سكتو واكلو

مُنير- ما نشبع اذا ما نتبادل اطراف الحديث على هذه السفرة الرائعة

قيصر- الفصحى تلطم بالزاوية خاب تسكت لا ادفرك واطلع الغدة من عيونك

امير- تريد تعنفنه؟؟ اشتكي عليك والله

قيصر- هذا منو عفط؟ استقر انتَ

امير- شوف قيصر احنه نحب نحجي ف اذا تريد تتغده تستمع بدون تذمر واذا لا فرجاءً ارجع لغرفتك تسوي فضل

قيصر- خاب وحق الله اذا ما سكتوا العب الـ42 ؏ ضهركم بزعتونييييي

من صرخت بيهم يله شوي ركدوا وانه تأذه جرحي بسبب هالغي الزايد...

وما جان ناقص غير مُخلد دخل وكملت السالفة هذول بس شافوا واحد يطگ اصبع والثاني يحرك بحواجبه اله خرب شلون ثنين...

اباوعله ضاغط ؏ ايده ومشى وگعد ؏ القنفه گدامني ويهز برجله وراسه منزله لجوه! حالته مو طبيعية ابد وحتى الولد من شافوا هيج ذبوها صامت، نجمة نزلت من حضني وراحتله...

اباوعلها شلون لزمت ايده وباست خده ههه بنيتي الحنونه ضمها لصدره وبوسها بلگوه يبتسم الها بس علمود لا تضوج..

مُخلد- روحي كملي اكلج بابا

نجمة- وانتَ

مُخلد- اكلت انه حبيبتي

هزت راسها ورجعتلي بس ما اكلت لان شبعانه وانه ما ضغطت عليها خليتها براحته شوي فرغت السفرة وبدت وداد تاخذ المواعين للمطبخ باخر شي گال مُخلد..

- وديهن وتعالي

باوعتلها وجها بهت، طبعًا عرفت شبي هسه اكيد متحاجي هو وزوجته بحكم جان يمها ونفتح الموضوع لذلك واصله وياه للستار وضعه مو طبيعي..

ودتهن ورجعت باوعلها وفرك وجهه..
مُخلد- جيبي القرأن

نصدمت وحجيت باعتراض..
- مُخلد!...

- اششش لا تدخل وانتِ سوي الي گتلج عليه

راحت جابت القرأن بدون كلام اخذه من ايدها وسحبها گعدها يمه ضل لازم ايدها وبأبهامه يمسح عليها...

مُخلد- عرفي شي واحد من تحطين ايدج ؏ هذا القرأن تگولين الصدك ما عندج خيار ثاني لان كتاب ربج مو لعبة

اخذ ايدها وحطها ؏ القرأن اباوعلها ترجف والدموع ملت عيونها هز راسه وگال..

- همسه گلتلج انتِ وحدة رخيصة لو صار العكس؟

شهگت بالبجي وكل هذا اباوع لامير ومُنير ساكتين وبس يباوعون بعيونهم، حجيت انه..

- اخذوا نجمة طلعوها

ما گالوا لا خذوها وطلعوا بيها للحديقة..

مُخلد- وداد

رفعت راسها اله وبس تشهك رجع گال بابتسامه..
- احجي قابل راح اكص راسج بس اريد اعرف الصدك وين

حسيتها راح تكذب في سبيل تتملص من الموضوع..
قيصر- اذا حلفتي بالقرأن كذب عقابه عسير لذلك لا تكذبين

سحبت ايدها وحجت بجي...
- لاا لا والله انه گلتلها

مُخلد سد عيونه بقوة وحط القرأن بصفه ولزم راسه بين ايدي وگال بقهر..

مُخلد- ولجج ضلمتها بسببج اذيتها وكسرت خاطرها وصدگتج فضلت اصدك اختي بس طلعت وحدة بلا ضمير وتحيك سوالف من وره ضهري

وداد- اسفه

مُخلد- هذا الاعتذار مو الي مو اليييي

فزت من صاح بالاخير وبجت دار عليها وحجه بهدوء..
- شنو سبب؟

وداد- هاا؟

- ليش سويتي هيج البنات بشنو أذنج؟

وداد- خفت تتزوجون وتتغير معاملتكم ويايه

قيصر- من كل عقلج تحجين؟!!!

وداد- اي والله خفت منهن يجن وياخذنكم وتتغيرون

مُخلد- بهذا تصرفج جاي تجبريني اتغير عليج مو هنه

بسرعة طفرت وشبگت مُخلد..
وداد- لاا فدوة ما اسوي شي بعد

مُخلد- تليفونج وين؟

- بالغرفة

- گومي جيبي

راحت جابته واجت اخذه حطه بجيبه وگام..
- التلفون يبقى عندي لحد ما اقرر اسامحج وبالنسبة لبنات عمج اشوفلي فراغ وتعتذرين منهن

- تمام

عافنه وصعد لغرفته..
قيصر- المفروض تفرحيلنه مو تسوين مشاكل علمود نفصخ لج بابه من كل عقلج انتِ شنو تفكير الاطفال هذا احنه من نتزوج قابل نسوان تغيرنه غير هذا تره بنات عمج فقيرات خو ايه بس صوت عالي الا هي احنه واطيب من گلبها ماكو بس جربي تتقربين منهن وشوفي شلون يحتونج

وداد- خلص وروح ماما ما تنعاد

قيصر- وانه مصدگج واتمني مو بس كلام يكون

- ان شاء الله

- رايح انام جيبيلي نجمة انومها يمي

- ما اصبلك چاي؟

- لا حبيبتي نعست وتعبت

رحت تمددت ؏ السرير شوي واجت جايبه نجمة نوب هاي الوكحة بلگوه نامت توني اغفي ودگ تلفوني بسرعه سحبته...

شفتها اية لا ومتصله فيديو حلو، رديت عليها بسرعة ضحكت همست..

قيصر- شلونها حبيبتي

اية- ههه الحمدلله انتَ شلون صرت حبيبي؟

- ما بيه شي والله

- الحمدلله طمنتني

- مطوره يابه

- ههههه ياا غير اشتاقيتلك اوي مو وجه نعمه

ابوعلها تدلع وتلف بشعرها الذهب ؏ اصبعها عضيتلها اشفه..
- ميت عليج

- اممم واضح اتصالاتك عبرت الالف وخو رسائلك تلفوني شكل ؏ گد ما ترسل

- ههههه ام لسان ولا اگدرلج

- قيصر جاي تخوني؟

- شنو؟

- ليش تحجي بصوت ناصي منو يمك والله اذا خنتني اموتك

- العقل نعمة

درت الشاشه ؏ نجمة وبعدين رجعتها عليه..
- ضرتج هاي راح تشاركج صدري من نتزوج

- فدوة كون كُل الضراير هيج

- تحبينها؟

- اي لطيفة وتنحب

- وانه؟

- شبيك انتَ؟

- تحبيني؟

- لاع

- ههههههه عرمه مو بيدج

- اففف تعبت

- من شنو يروحي

- شوف..

دارته ؏ كتبها الي مطشره ليگول صايره الحرب العالمية الثالثة..
اية- مجاي احفظ وباجر امتحاني فيزياء

- ههه سهل شيرادله

- اي صح ما تجي تحفظ بدالي

- اجي؟

- لا اشاقه ههههه

- مشتاق اتنفس رگبتج

اباوعلها ارتبكت ومدري منو جان يمها شوي وخزرتني وحجت بضوجه..
- اففف عيبب والله اسل سمعتك

- واسل شسوي حاشره نفسها ما تطلع خلي ناخذ راحتنه

- طلعت

- مشتاقلج اكثر شي زاعجني باصابتي انُ مانعتني من الجيه الج ومن شوفتج وشمة عطرج

- فترة وترجع زين وتجي

- ان شاء الله، يله حبيبي روحي درسي وركزي زين محد يفيدج غير دراستج اريد درجات ترفع الراس الود ودي اگابلج واسولف بس مو هسه لان وكت امتحاناتج ما اريد اشوش عليج

- تمام حبيبي اخذ راحتك

دزتلي بوسه ورجعتها الها وسديته منها ح تمددت عدل وشبگت نجمة ونمت..

ㅤㅤㅤㅤㅤㅤㅤ
همسه*

مريم- ماما حطي شال ؏ راسج وشوفي الباب ايدي وصخه

جان بوكتها دنيا الظهر وبابا بالشغل ومهيب وقُتيبة نايمين لان اجو من الامتحان قبل ساعة، اخذت شال من الغرفة وركضت للباب متجاهله تساؤلات اسل وگفت وره الباب ونطقت..

همسه- منو؟

- اني ايهم

- تفضل منو رايد؟

- خالي ابو مهيب موجود؟

- لا بالشغل

- مو گال اجيه! لحظة خويه راح اتصل عليه

بنفس اللحظة سمعت صوت بابا..
جابر- ها وليدي

اسمعهم تسالموا بيناتهم شوي ودگ الباب بابا فتحته وحجيت بابتسامه..

همسه- الله يساعدك تچايتي

جابر- ويساعد الحلوات... تعال ادخل ايهم

دخل ماكو لحظات حط عينه بعيني ورجع نزلها وگال جان صوته خشن وهادئ..

ايهم- شلونج خويه

همسه- الحمدلله تفضلوا ادخلوا

اخذه بابا للدوانية واني وگفت اتذكر كلام مُخلد الي بداية خطوبتنه «المكان البي ايهم لا تكونين بي»...

تنهدت ورجعت انطيت خبر لـ ماما رادتني اودي الضيافة بس رفضت وتحججت باستحي وما اعرفه اخذتهن وراحت مقتنعة بكلامي..

شوي ورجع ندگ الباب مديت راسي واشوفه مُخلد عضيت شفتي بخوف من الي راح يصير بس دخل گبت العيطة حطيت ايدي ؏ ڪلبي..

يتبع...

عگب باجر هم انزللكم برتوت ثاني ان شاء الله 🤍