#أسيرت داعش
#الكاتبه اسينات
البارت التاسع
لا تنسون التصويت وتعليقاتكم ومتابعه للحساب
بسم الله الرحمن الرحيم 🤍
••••••••••••••••••••••••••••••••••••••••••
حجه حسـن
:- كون اليوم نطلع شلون حنعوفهن
ضياء:-ما عليهن شي ...طلع من جيبه لاسلكي كعد يفصخه واحنه كاعدين وساكتين ساعه نسولف ساعه نسكت ضجت حيل كامو عمار وضياء بره مدري شيسون هيج نص ساعه روان نامت وزهراء طلعت بره غزال راحت للحمام ردت اطلع بس ملابسي مقيداتني حيل قصيرات كاعده بمكاني ومغطيه رجليه لا اكدر اكوم ولا اكدر اضل كاعده حجه حسـن وهوه يشتغل بالاسلكي وعيونه بي
:-تحبين الجكليت ...باوعتله
:-اي بس ليش ..باوعلي ويضحك
:-هيج ...شوي وكام طلع من جيبه جكليته ضحكت اباوعله
:-هاي ميلك هههه
:-هههه عندي من زمان اكليه بالعافيه ..اخذته منه فتحته أكلته كلت واني لازمه خدي
:-عززا تخبل طعمته تجنن ...صفن بوجهي يباوعلي عيونه بيه واني اكل بالجكليته
كعد كبالـي يباوعلي ومبتسم مد ايده يريد يلزم وجهي دفعته
:-هاي شبيك
مد ايده واني صافنه شجاي يسوي حطه على خدي مسح عليه بهدوء حجه
:-ماكو شي ..كام وهوه يضحك طلع بره واني صافنه شبي هذا باوعت الروان تضحك ضليت كاعده كمت امشي واتلفـت خاف واحد يدخل شفت ملابسي ناشفات
طبيت للحمام ذبيت مي على جسمي ولبست جنت لابسه تراك طويل بجامه سوده وبدي يجي فوك الركبه اسود وبي بيجي ومرسوم ميكي ماوس بالوسط
حاولت امشط شعري باصابعي ماكو دورت بالحمام بلكت اكو مشط مالكيت اخر شي كمت باصابعي احاول اسرحه رغم تكطع وهواي وكع شعر
المهم شوي صار احسن مو كفشه جبت الحجاب لبسته جان مالت امي اخذته منه غمضت عيوني اشم ريحته ريحته بي ابدا مرايحه حيل اشتاقيتلهم هسه شصاير بيهم غمضت عيوني ما اريد اضعف
طلعت من الحمام جانن البنات راجعات كمزت غزال
غـزال:-فدوه امشي خلي نفتر هنا يم البيت
زهراء:-اي فدوه امشــي ...هزيت راسي
ورده:-تمام لعد امشن
طب عمار باوعلنه :-خيـر وين رايحات المسعدات
غـزال:-هاي شبيك نريد نفتر خطيه ورده مطلعت خلي نطلع فدوه
حط ايده على كصته يفكر :-تمام امشن اني وياجن
حسـن:-وين رايحين
عمار:-هنا يمشن ميتاخرن اني وياهن
هز رأسه عدلت حجابي لزمت ايد غزال ومشينه طلعنه نسمع اصوات طلق بس بعيده عنه نمشي واشتم الهوه حيل كال
عمار:-اليوم احنه بليل نطلع عدنه مهمه فانتبهن على نفسجن
ورده:-الله ينصركم بحق محمد وال محمد ويحميكم
غـزال:-امين أن شاءالله ترحون وترجعون بسلامه وتنتصرون
عمار:-اي غـزال ..ويغمز اباعلهم
:- شكو.. باوعلي وغمني وضربني على حلكي
عمار:-سدي حلكج ليطب بي زنبور
ضحكت
:-سم شوف الضحكه مالت سكت كال .. استغفرالله ربي لتخلي لساني يفسد
_ضحكت ضربته على ايده
ورده:-بعد لتضربني افتهمت
عمار:-اي ام حلك الاوعج
ورده:-اسكت لك ماكو غيرك ابو حلك الاعوج ...كلبت وجهي ما عاجبني كلت واني اريد ارجع
:-بعد ما اطلع وياك رايحه اني غـزال ...
غزال:-ولج تعاي يشاقه وياج شبيج هههههه
ورده:-ما عوفيني ليش يحجي هيج تره أني ما احب الشقه
عمار:-يقلدني ..اني ما احب الشقه ..سويت ايدي بوضعيه الضربه سمعت صوت ضياء وراي يضحك
ضياء:- ههه هاي شنو شبيكم تخبلتو
عمار:-تعال شوف هاي ام حلك الاعوج...
ورده:-هسه ليش تكول هيج هاي شبيك والنبي بعد ما احجي وياك
عمار:-عزااا حبجي تعالو الحكولي ورده بعد متحجي وياي دروحي بابا بيعي بيض احسلج
..باوعتله اريد ابجي كلت واني الدمعه بطرف عيني
ورده:-انته شنو ليش اول ما شفتني وانته بس تتناكر وياي ها
ضياء:-شبيج ورده يشاقه وياج قابل صدك
ورده:-لا مو شقه هذا ...خليت ورجعت طبيت عصبيه واحس شوي وابجي عليمن ما ادري شفت حسـن اول ما شافني كبل ضم شي ويباوعلي حجه
حسـن:-ها شبيج ؟
مو علساس طالعه تتمشين
ورده:-مجاوبت نمت وتغطيت زين غمضت عيوني هوه هم سكت ضليت افكر لحد ما نمت ما كعدت الا على صوت زهراء تكعد بيه علمود اكل كمت اكلت وهمه يلبسون بالبدلات العسكريه لبسو البسطال هدور اللثام على وجهمم باوعلنه حسـن
:-منتاخر أن شاءالله انتن ديرن بالجـن على نفسجن
زهراء:-بحفظ الباري
غزال:-ان شاء الله منصورين
باوعلي كلت
:-الله ينصركم
روان:-الله يرجعكم سالمين
طلعو بعد ما ودعونه قفولو الباب علينه أكثر من مره جانو مبين من شكلهم خايفين علينه ضلينه كاعدين نسولف شويه ومنحس بس صوت الطلق والانفجارات غمضت عيوني بخوف خايفه من الصوت حيل عالي حطيت ايدي على اذاناتي زهراء تقره قران بصوت عالي الاصوات ساعه تتقرب ساعه تصير بعيده
ضليت خايفه وابجي لا يصيرلهم شي وادعي انو ينصرون ويرجعون سالمين الاهاليتهم حيل خايفه والبنات مو احسن مني شوي وهدء الوضع ضلينه كاعدين منكدر نام نخاف
ضليت مركزه بالباب واتخيل هسه يطبون الدواعش علينه ويكتولنه ويعذبونه ضليت هيج فتره اخر شي نمت من التعب وهيج نفس شي تقريبا يومين واجو كعدت على أصواتهم وصوت عمار وهوه يصيح
:-كومن ولجن كومن يله ويدك على الباب كمت حجيت واني نعسانه
:-انته منو شوكت اجيت
:-كومي عابت هستونه أجينه
_تمغطت كمت وكتله
:-الحمدلله على السلامه
:-الله يسلمج روحي غسلي الجهره وتعالي خلي نزقنب تعبان اخخ بوي رجليه غسلي وتعاي حتى تجلفيهم
:-اجلفهم؟؟؟
:-قصدي تعصريهم
:- اعصرهن؟
:-اي عصري رمان شبيج عقلج بي شي روحي غسلي وجهج وصححي وتعالي مرغي رجليه افتهمتي ...رحت غسلت وجهي طلعت شفت حسـن يصلي بالصاله رجعت للغرفه لكيته نايم رحت دست على رجله حيل كمز باوعلي خازرني ودفعني برجله وكعت بالكاع كمت مسحت ايدي ودفعته برجله
:-ما امرغلك رجلك
:-عادي هسه زهراء لو غزال يمرغن ما محتاجج اخخ بويه رجليه تكسرن ما احس بيهم شلون بيه اذا تكرمت بعد منو يحارب ويكتل بالدواعش خره بالحظ
_صفنت ..تمام حمرغ رجليك بس بعد لتشاقه وياي ولتضربني
:-صفن اي مرغي ...زحفت وصلت يمه تربعت وهوه مد رجليه بديت امرغ وهوه يصيح عبالك مره عجوز متت ضحك عليه وعلى تعابير وجهه واذا اكرصه يضل يغلط عليه طب ضياء شعره مبلل
:-ها شلونج ورده
:-هلا بخير أنته شلونك الحمدلله على السلامه
:-الحمدلله الله يسلمج ...باوع للبنات
:-شنو نايمات
:-اي بس زهراء كعدت وجاي تصلي ..هز رأسه راح يصلي ..ردت اصلي بس لازم أسبح كلت الزهراء طبيت سبحت عبالك صارلي سنوات ما سابحه كملت وطلعت بعد ما توضيت لبست عبايه وبديت اصلي وبديت أقضي الي ما صليتهن من جنت يم داعش واقضي الرقيـه بجيت هواي ارتاحيت حيل من صليت رفعت ايدي ادعي
:-الهــي بحق الحسين ارحم بحالي تعبت رجعني الامي والاختي.. شحالهم هسه احميهم يا رب تحميهم ولتخلي مخلوق يدنه يمهم.. رجعني الهم تعبت حيل اشتاقيت الامي والنونه.. غصيت اشتاقيت الرقيه والبابا ..ماما حبيبتي أن شاءالله اجيج ضليت ادعي أنو ينتصرون ونخلص من داعش كملت شلت السجاده صار بوجهي حسـن ابتسمت
:- شلونك حسن الحمدلله على سلامتك
:-الله يسلمج انتي شلونج ؟
:-بخير
سكتت وهوه هم كلت
:-اي شصار منا منا
:-مصار شي أن شاءالله عكب باجر هم نطلع
:-امم زين واحنه ؟
:-شبيكم انتو؟
:-يعني شوكت ترجعنه لهلنه
:-ها أن شاءالله قريبا ما بقى شي
:-ان شاء الله..رحت للغرفه كعدت اكلنه وضلينه نسولف وعمار يحشش مرات يضحكنه مرات لا
ساكتين وهمه يشتغلون بالاسلحه ولازمين الاسلكي وبس يحجون بي وكلشي منفتهم منهم
ملل بشكل مو طبيعي لليل نمت نومه عميقه حسيت صوت قريـب حاولت اركز اصوات مو صوت واحـد اخاف افتح عيوني تنفسي صار سريع خفت حيل مدري ليش اسمع بس اصوات همس حاولت افتح عيوني على كيف جان اشوف خيال .....
يتبع 🔥.....