بنـيامـّين

1;

‏"سأتعرّى لِأمنح كُلّ أجزاءَ جَسدي
حَقها في تَرسيخ الانغماس و الخُلود بِنعيم
لُقيَاك."
...

___
____________

قبل الحادثة بـ عدة اسابيع .

الساعة كانت تشير لـ٢ منتصف الليل ، الوقت يلي اعتاد هاني يتأمل جمال وجهه بالمراية " شنو هل جمال يلي بيك اروح فدوه " خاطب نفسه بعدما وزع عدة بوسات متفرقه لانعكاسه بالمراية ..

ايده امتدت و رفعت بلوزته فوك لدرجه بين صدره يلي كان ينافس الثلج بالبياض ، لمس معدته المسطحه نزولاً لخصره يلي كان منحوت بمثالية عاليه ..

ضحك بخفه من حس بدغدغه خفيفه بسبب برود ايده بس توقف فجأة من الباب انطرق و دخلت امه يلي كانت واضح انها توها كاعدة من النوم بسبب عيونها يلي كانت تنغلق شوي شوي ..

" بعدك كاعد هاني ؟ " اومئ هاني ونطق بدوره بعدما دخل جوه البطانية " راح انام هسه " ابتسمت امه بتعب و غلقت الضوه " تصبح ع خير حبيبي " رد هاني بعد ثواني " وانتِ بخير "

اغلق عيونه مدعي النوم و فتحها مره ثانيه بعدما سمع باب الغرفه ينغلق ، كام من مكانه و بدل ملابسه بخاصة النوم ..

تعطر بأكثر من نوع بدون لا ينسى يعطر فراشه هم ، مشط شعره و رجع تأمل عيونه يلي كانت تميل لـلون البحر و اغمق ..

ابتعد من حس بملامح وجهه تتغير لمخيفه و هذا ما جعله يخاف لثواني بس ماهتم و تمدد فوك فراشه و غلق عيونه اخيراً مستسلم للنوم ..

مرت دقايق مو طويله بس حس هاني بضغط فضيع ع صدره و همس غريب قريب لاذنه ، كلمات غريبه تمنعه يركز و يعرف الوضع يلي هو بي ، حرارة عالية تحيط بجسمه من هل الجهات مسببة له انزعاج و صعوبه بالتنفس ..

حاول عدة مرات يفتح عيونه بس بدون فائده كون الخوف كان مسيطر عليه بهاي اللحظه لهذا بدأ يتلي بعض الصلاوات يلي تعلمها بالكنيسه ..

اخيراً فتح عيونه و يلي قابله كلب اخو الضخم و كان متسطح فوكاه و نايم بعمق ..

تنهد بأرتياح و حاول يبعده من فوكه بس بدون فائده كون وزنه خيالي و ثقيل لدرجه حس هاني بأنه ديشيل بشر اكثر من حيوان ..

بغضب كام هاني من مكانه و سحب اللحاف مما سبب بسقوط الكلب من فوكاه " تستاهل و هسه بره " بنبرة غاضبه نطق و فتح الباب عسى ولعلَ يطلع بس كان للكلب رأي ثاني ..

كعد مقابل له وهو يهز بذيلة و بعيونه نظرة تحدي لهاني يلي فقد اعصابه و سحبه من الطوق يلي برقبته و طلعه برة الغرفه و غلق الباب بالمفتاح " هذا الناقص جلاب تنام بغرفتي " تلحف بالبطانيه بعدما نفضها و نام بدون حتى ما يحس ب الي واقف بزاويه الغرفه يباوع له بنظرات هائمه و ع شفايفه ابتسامه خبيثه ..

مشى بارجل الخاصه بالمعز و كعد بالقرب من هاني يلي كان عاقد حواجبه وهو نايم بسبب العصبيه يلي كان يحس بيها ..

رفع ايده و بأطراف اصابعه لمس جبينه نزولاً لشفايفه يلي بلون العنقود ، كان راح يحط بوسه خفيفه عليها بس تذكر انه اي لمسه زايده راح تأذي هاني لهذا تراجع و وقف بمكانه المعتاد بالزاويه المظلمه ..

يوم الثاني كعد هاني وهو يحس بجسمه متكسر من كل جهة و صعب عليه يتحرك لهذا تأفأف و قام من مكانه و مشى ناحية المرايه و كان متوقع يلي راح يشوفه ، كدمات بكل مكان غامقة اللون و جبيرة " شكلي لازم ارجع للدكتور " ..

طلع من الغرفه و كعد قريب ع امه حتى يتغدى بدون لا ينسى انُ يغسل وجهه ..

التفت امه ناحيته و باست راسه بحنان " جهز نفسك بالليل نروح لبيت عمتك " غص هاني بالقمه ونطق " عمة بلقيس؟ " اول ما هزت امه راسها صرخ بفرحه ونطق بحماس " شرأيج تنطيني فلوس حتى اشتري ملابس جديده اليوم اطلع ويه مهدي و الشباب "

" شكد تريد ؟ " ابو نطق فجأة من وراه و مد له ١٠٠ الف دينار و اخذها هاني برحابة صدر بدون لا ينسى يشكر ابو يلي مسح ع راسه و كعد ياكل ..

" هاني ؟ " نطقت امه بقلق وهي تشوف الندب الغريبه يلي كانت معكره صفاء بشرته " نعم ؟ " جاوب هاني ببرائه بعدما اخذ له رشفه من كوب اللبن يلي كدامه ..

" الادويه مجابت اي نتيجه ؟ " نزل هاني راسه و رمق الندب بتعب " هل مره لا .. " تأفأفت امه بصوت عالي و ضربت الطاوله براحة ايدها ..

" خبصنه دوه اماراتي و مدري شنو تالي ولا اي مفعول انطى " الغضب كان واضح ع وجهه امه كونها انطت اكثر من ٢٠٠ الف ع الادويه و الاطباء بس بدون اي فائده كون الندب تكبر و تزداد يوم عن يوم ..

" لا تخافين نلكى حل ان شاءالله " نطق الاب و شد ع ايد زوجته يلي ابتسمت له و كملت اكل ..

رفع هاني راسه بعدما سمع صوت اخو بالممر وهو يخاطب الكلب مالته يلي كان ماكل احد المخدات بالغرفه ..

" هذا الجلب راح يموتني " نطق اخو هاني بعدما دخل و كعد ع احد الكراسي يلي كانت قريبه ع ابو ..

" شيفان شرأيك تجي وياي اني والشباب اليوم؟ " بدون حتى لا يرفع راسه او حتى يفكر بكلام هاني نطق " لا " عبس هاني والتفت ناحية امه يلي ضحكت " عوفه ع راحته " بسخريه ضحك شيفان ع كلام امه ورجع نطق بدوره " ما ناقصني طلعه ويه الزعاطيط " قلب هاني عيونه بدون لا ينطق بشي و قام ..

" رايح اسبح لحد يصيحني " دخل لغرفته و اخذ له منشفه وطلع متوجه للحمام حتى يتجهز لطلعته بعد كم ساعه ..

نزع ملابسه و رماها بالسلة يلي بالزاويه و فتح الدوش لمي دافي و دخل جواه ..

تنهيده عميقه طلعت منه بعدما حس بعضلات جسمه ترتخي بشكل تدريجي بسبب دفئ المي  ..

سحب الشامبو و فرغ نص العلبه ع شعره و بدأ يغني وهو يفرك فروة راسه غير عن علبة الشامبو يلي رجع اخذها واستخدمها كمايكروفون ..

فتح عيونه بعدما ازال كل الشامبو من شعره و عيونه و بدأ يتأمل ظل جسمه بأعجاب شديد " اووف شوف مو خصر ضيم " نطق و تمايل جوه الدوش ..

ضحك ع تصرفه الساذج و كان راح يغسل الصابون يلي ع جسمه بس تجمد من حس بظله وهو يتضخم غير عن احساس بنسيم دافي قريب ع اذنه ..
انفاسه بدأت تصير ثقيله شوي شوي من الخوف وكان يحاول يهدي نفسه لهذا بسرعه غسل جسمه وطلع ..

صادف كلب اخو يلي يكرهه بشدة كونه ابداُ ما يطيق الحيوان " هش وخر " نطق هاني من شاف الكلب يكشر انيابه عليه و بدأ ينبح بصوت عالي لدرجه توقع هاني انه ممكن يهجم عليه بأي لحظه ..

للمرة ثانيه حاول هاني يهدي نفسه و كان راح يمر من مكان ثاني بس للكلب كان رأي ثاني ، هجم ع هاني و شد المنشفه يلي تحيط خصرة ..

صرخ هاني بصوت عالي و سحب المنشفه من بين اسنان الكلب بس بدون فائده ..

فجأة الكلب وقف عن الي كان يسوي و بدأ يصدر أنين حاد و كأنه جاي يتألم  مما جعل شيفان يطلع بسبب صوته العالي ..

ركض ناحيه كلبه و ركع مقابل له و بدأ يهز جسمه عسى ولعلَ يفتح عيونه يلي انغلقت بعد ثواني ..

" شسويت له !! " جفل هاني برعب بسبب صوت اخو العالي ونطق " م مدري ! ما سويت شي !! " ركض لغرفته واغلق الباب وراه ..

كعد ع سريره و شرد لدقايق طويله وهو يفكر ب الي صار ، بلمح البصر مات الكلب كدامه بدون حتى ما يسوي له شي ، الفكرة وحدها كانت تخوفه ..

قام من مكانه ولبس ملابسه بأيد مرتجفه و قلب مضطرب بسبب الي صار بس ما يعني انه مراح يكون بأجمل حالاته ..

طلع من الغرفه و صادف امه يلي كانت الدمعه بعينها من القهر ع كلبهم الغالي " صدكيني مو اني الي سويت هيج هو فجأة وكع " اومأت امه و مسحت ع خده بحنان " ادري يا عمري مصدكتك اصلا بدون لا تحجي " حضنها بعدما باس خدها " تمام لعد اني طالع هسه "

" تمام حبيبي روح " ابتسم لها وطلع لصديقه يلي كان ينتظره بره بالسيارة ..

كانوا كاعدين داخل كوفي خاص بالعوائل و الوضع كان هادئ و حلو لدرجه هاني ماكان يريد يطلع ابداً ..

" شباب شرأيكم نطلع لمول شي قريب و هم نرجع هنا ؟ " نطق هاني بعدما اخذ له رشفه من الموهيتو يلي طلبه ..

" لا مالي خلك انت و ايهم روحوا واني انتظركم هنا " نطق واحد منهم و تأفأف هاني بأنزعاج " بشرفك جبران لا تسوي هيج مو حلوة بدونك تدري "

" كلش حلوة وهسه روحوا خل انعم بقهوتي السادة " عفط له ايهم و سحب هاني وياه يلي خرب من الضحك بسبب تعابير جبران يلي تحولت للصدمه ..

المول كان ع بعد شارعين منهم لهذا ماطولوا اكثر من نصف ساعه ورجعوا للكوفي ..

" شبسرعة " نطق جبران يلي كان كدامه اكثر من كوب كهوه فارغ " لك كوم راح يصير بواسير من الكعده و الكهوه هاي " نطق هاني و ضحك ايهم " يابه اتفق "
" شرأيكم نروح لمكان ثاني نتونس احسن؟ لعبت روحي من الكافيهات " نطق جبران بعدما حاسب و طلع ويه جماعته " امشو لبيتنا مشتري اقراص اكس بوكس جديده تموت " نطق ايهم بحماس

" موافق بس ما اكدر اطول هواي لان رايح لبيت عمتي بالليل " نطق هاني و غزة جبران بضحك " هاا عايفنه ع مود براء شكد ما تستحي " انحرج بشدة من ذكر جبران اسم بنت عمته يلي هو معجب بيها من زمان " ياا واني داكول ليش اخذ ملابس جديده طلع هيج الفلم " نطق هل مره ايهم و اقترب من هاني و بدأ يدغدغه ..

كان هاني يضحك بصوت عذب اشبه بصوت الناي يجذب كل الي يسمعه ..

وكف جبران السياره كدام بيت ايهم يلي راسه انضرب بنافذه القريبه عليه و خلف جرح طفيف ع جبينه ..

استغرب جبران كون اصلا ما وكفها بقوة " ولك شصار بيك شي " نفى ايهم و ابعد ايد هاني يلي كانت تضغط ع الجرح بدون قصد ..
" بيك شي خوما تأذيت ؟ " سئل هاني بقلق و نفى ايهم ونطق " لا بس جرح بسيط " طفى جبران السيارة " صار خير يلا ننزل " نزلوا كلهم و دخلوا لبيت ايهم و صادفوا امه كدامهم يلي رحبت بيهم بكل رحابة صدر ..

مرت اكثر من ساعتين وهم يلعبون ببيت ايهم يلي كان بعده متأذي من الجرح ..

" اخ شباب كافي تعبت " نطق جبران وهو خربان ضحك ع هاني المتنرفز بسبب خسراته المستمرة مما جعله يقووم و يعض جبران يلي بدأ يرفس من الألم ..

ابتعد هاني بعدما سمع موبايله يلي رن " الو " وسع عيونه و بسرعه قام من سمع يلي قالته " تمام دقايق ويمكم " غلق المكالمه و عدل ملابسه " شباب اني رايح من رخصتكم " اخذ غراضه و كان راح يطلع من الصالة بس استوقفه جبران " اوصلك ؟ " نفى هاني ونطق  " لا ميحتاج هياته بيتنا خمس دقايق و اوصل يلا مع السلامه "

" الله وياك "
طلع هاني من بيت ايهم و اخذ طريقه لبيتهم يلي كان مسافه ربع ساعة سير بالاقدام ..

ع غير العادة الطريق كان مظلم بسبب انقطاع تيار الكهربائي عن المنطقة بأكملها ..

بالبداية كان الوضع طبيعي بس بعدها بثواني بدأ هاني يحس بأحد يمشي وراه وكانه يلحكه ، بلع ريقه و التفت بسرعه بس ما شاف شي و صوت الاقدام يلي كانت وراه اختفت ، تنهد بخفة و رجع كمل طريقه ..

وقف بمكانه بعدما سمع صوت الاقدام وكانت قريبه ع صوت ارجل حيوان اكثر من بشر مما جعل هاني يلتفت و يفتح فلاش الخاص بموبايله ..

غلق عيونه بنفاذ صبر من شاف قطه بلون اسود و عيون ذهبيه بعيده عنه مسافة متر و تباوع له بنظرات ماكدر يفسرها بس كانت مرعبه بسبب حددتها ..

للمرة الثانيه كمل طريقه بس خطواته هل مره كانت سريعه اقرب للهروله ..
دب الرعب بقلبه من سمع صوت الاقدام تصير اكثر عمق و علو و كانها تخص بشر لهذا بدون اي تفكير بدأ يركض بسرعة جنونيه لبيتهم ..

كدر يلمح باب بيتهم الابيض من بعيد ف حاول يزيد سرعته بس الي ما حسب حسابه هو تعثره و سقوطه بسبب صخره تايهه بنص الطريق ..

صرخ بصوت عالي من حس بأحد يشد عليه و حاول يبتعد عنه ..

" ولك هاني شبيك هذا اني جبران هدي " نطق جبران وهو يسحب هاني لحضنه يلي اخيراً سكن بمكانه ..

" شصار شبيك ليش هيج مرعوب " ابعد شعره الاشقر عن وجهه حتى يعرف شصاير بس بدون فائده كون هاني كان يرجف بيده مثل الورقه و ماكان يكدر حتى ينطق كلمه وحده ..

" صار خير تعال خن افوتك للبيت " اخذ غراض هاني يلي كانت بالكاع و ساعده يدخل للبيت ..
ام هاني مشت بقلق ناحية ابنها يلي كان و مازال يرجف من الخوف " شصار ابني جبران ؟ ليش هيج حالة هاني ؟ " نطقت و هي تمسح وجه هاني بمي ورد ..

" مجموعة جلاب جانوا بره ركضوا وراه مصار شي لا تخافين خالة " طمنها جبران وهو يمسح ع كتف هاني ..

بعد دقايق طلع جبران من بيت هاني ورجع لبيت ايهم يلي حالته ماكانت تختلف عن هاني ابداً ..

" هسه انت الثاني شبيك ؟ " نطق جبران واخذ رشفه من قوطيه الببسي يلي جابها ايهم له " الي صار باليسارة جبران مجان شي طبيعي .. " عقد جبران حواجبه بعدم فهم ونطق " شصار اصلا ؟ "

" من انضربت بشباك السيارة ! " بنفاذ صبر نطق ايهم بسبب غباء جبران المفاجئ " اي ؟ "

" حسيت وكتها احد لزم راسي و ضربه بالشباك " عدل جبران جلسته و نطق بأستغراب " يعني قصدك هسه واحد هيج سوه ؟ "

" اي الي صار ماكان صدفه ابد .. "

...

___
____________

سلام شباب
شونكم شخباركم ؟
اخيراً جزء الاول من بنيامين تم ..

ماحبيت اطول البارت حيل كونه الاول اتنى يكون عجبكم 🤍🤍..

و صح اريد تفاعل للستار حتى حماسي يبقى وما اكنسلها 😔👈👉..

اشوفكم بارت الجاي 🤍..

' هاني '