مساء الگاردينا احبتـي ❤️
/// البارت الاخـــــير /////
#بيوت_بلا_جدران
#شمس_السعدي
----------------------------------------------
أسوأ الفترات حُزناً .. هي التي يكون فيها حزنك بينك وبين نفسك فقط ..
----------------------------------------------
بعد مااجت الشرطة والقت القبض على زهرة ..
السلف انگلب والناس التمت اول مرة يصير هيج بالسلف وتنسجن مرة ..
كلها مستغربة واكو ناس متشمتة ويگولون هاي حوبتنا بالشيخة ربحة وولدها عبن ظلمت السلف كلها وهسا نسلها انگلع واحد ورى الاخر ..
فيصل جان يحجيلنا وضايج ..
كلما يبني شي لازم ينهد شي ..
فيصل ..
عمتي حمدية تعاركت وي عمي رحيم وضربته وگالتله ابني بخطيتك انت واختك لان من صغره علمتوه على الحقد لين وصل يخطف ويكتل بسببكم ..
حبوبتي سمرة وگعت بساع من اخذوا عمتي زهرة بوسط الناس وهي تبجي وتصيح وتگول والله مو اني مامسوية شي ..
جانت تتوسل بينا نخلصها ..
رجلها من سمع طلگها بساع غيابي عود هو جان عنده نية يرجعها ..
بعد الصار والناس اكلت وجه عمي رحيم .. وعمامنا تبروا منه هو وابنه اخذ مرته وجهالها وهج من السلف ..
من غير محد يحس ..
ثاني يوم اجاني طارش صاحب الكية الاجرها .
گايله احجي وي الشيخ فيصل وگله عود اجي غير وكت اخذ نصيبي منك والحوش هم اخذه وانطيني فلوسه ..
استغربت طلعتله ومن غير مايحجي ..
رجعت للحوش حجيت العمتي حمدية ومنيرة ..
" اگلجن شني عمي طالع من السلف "
ردت عمتي حمدية ..
" عساه لا رد "
رديت ..
" اجاني طارش يريد فلوسه والبيت هم يگلي انطيني حصتي لان مااريده بس ماعرفت اخذ حبوبتي وياه يو لا ؟ اريد وحدة تمشي وياي "
اخذ عمتي حمدية ورحنا ..
دگينا الباب محد يفتح .. كسرناها ماكو حس .. دنگت فتحتها من جوة ودخلنا ..
البيت جان فارغ كل الغراض ماخذيها ..
دخلنا ندور بالغرف ..
فتنا الغرفة حبوبتي جانت نايمة وتون من الوجع ..
گامت تحجي عمتي ..
" الله يصخم وجهك يرحيم ماخذ هدوة وعايف امه وحيدها.. اتقربت يمها .. هو هذا الكتلتي روحج عليها شفتي شلون عافج "
همست الها ..
" مو وكت هالحجي امشينا خلي ناخذها الحوشنا .."
شلناها جبت سيارتي اخذتها للمستوصف حولونا للمركز يعني للولاية "
رجعنا وعودن گلت العصر اخذها الاخصائي ..
وصيتهن يديرن بالهن عليها ..
دخلت شفت ولدي وزينب..
شافتني ابتسمت ..
" هلا يبعد طولي تراني اشتاگيت وانت موش الاول شنهي تشرد مني من الجهال "
ضحكت ..
" ليش هو اكو واحد يشرد من هيج گمر .. وجايبتلي ثلاث اگمار .. يسموه بطر لو شردت والله منطيني هيج نعمة "
گربت اشمنهم عبن ريحتهم بس الترد روحي وتخليني انسى همومي ..
وخاصتن فرج ريحته بيها شفا الكل مهموم ..
ردت اطلع سألتني ..
" شني طالع ؟"
رديت ..
" اي اروح للمضيف جبت حبوبتي مريضة وعمي هاج من السلف .. احس الحمل يزيد عليه يوم بعد يوم "
ردت ..
" وانت گدها يبو غزوان وگدود وانه وياك العمر كله"
ابتسمت ..
" كفو منج ياام الويلاد. كفو منج يشيختي وشيخة السلف كله "
ضحكت ..
" ياااع هسة اني صرت شيخة "
رديت ..
" طبعا شيخة بس مو ياهي التجي تصير شيخة مثلج ومثل طيبتج ودفو گلبج "
فرحت من حجيت وياها ادري بروحي مقصر عنها من اخذت الشيخة لسا بس شسوي اذا المصايب اجتني من كل كتر "
ماصدگت كسبت ثقة الناس كلها وصارت تلجألي بالصغيرة والجبيرة وغيرت قوانين السلف والعشاير الموجودة بي ..
تالي اهلي ينكسون راسي وصغروني جدام السلف كله
عملة عمتي وسالفه الشرطة الخذتها من بيتي خلتني صغير بعين السلف وصار الكل يتحاجة بيها ..
ال عناد گالوا ماكو حل غير تعمم بالسلف وجدام العشاير انك تبريت منهم وطردتهم من السلف ..
مارضيت اسوي هيج واگولن طردته واني ماطارده هج من وحده ..
مامتعود اجذب .. الناس كلها تعرفني واليريد يصير وياي بكيفه بعد ..
العصر اخذت حبوبتي للولاية وراحت وياي عمتي حمدية ..
خليتهن يم الطبيب ومشيت الامي اشوفها ..
حجيتلهم الصار ..
واخيرا حسيتهم مرتاحين بعد ماانكمش موسى ..
رغم حالة ماسة الماطلعت منها بعد ..
طلبت منهم يردون للسلف بعد ماراحوا بيت عمي والحوش فرغ ..
بس امي مارضت .. جنت محتاجهم يمي وحذاي .. احس روحي وحيد صفيت ..
جان رد علي ..
" فيصل احنه لليوم ماشفنا خير من السلف وبعد الصار البنتي والناس العرفت مااگدر ارجع هناك واخليها تتأزم وبعدين احنه شغلنا هنا ودرع هم دوامه هنا بعد مايفيد نرجع كلنا النا ذكريات اليمة هناك "
عاينت الرضوان ..
" وانت خوية ماناوي ترجع .. الزم الشيخة بمكاني وبس المهم تردون يمي "
رد ..
" لو جنت رايد الشيخة جان اخذتها من عمري 18 سنة
يوم عرضتها عليه الشيخة ورادتني استلمها تحت طوعها وامرها بس اني مارايدها من صغري .. اليهمني هسا نلتم من جديد ونرجع مثل گبل الصار اثر علينا كلنا وعد حيلنا .. المحافظة هاي صارت ضيگة علينا ومادام كلنا مجموعين راح اقترح عليكم اقتراح "
الكل جان منتظر يسمع واولهم اني ..
كمل كلامه ..
" البارحة اني وامي حجينا بموضوع .. وامي ماردت عليه تگلي شوف اخوتك شنهي رايهم "
سألته رحمة ..
" احجي يرضوان خوفتنا "
رد ..
" خالي عدنان يريدنا نمشي نستقر بديالى هناك نشتري حوش جبير ونگعد بي كلنا .. هو رادنا نگعد وياه عبن الحوش الامي هم بس اني گلت ناخذلنا حوش هناك ونگعد "
رد درع ..
" تحجون صدگ ؟ اني انقلت من بغداد لهين وارجع انقل لديالى لو رحتوا اني ماامشي "
رد رضوان..
" اعرف يخوي بس انت تعرف الوضع هنا والعالم ماتنسى .. تورطنا حجينا واشتكينا واخذنا حگ بتنا حسبالك اجرمنا والناس تحجي ورانا وجدامنا .. واني كل هذا مايهمني بس فكروا بماسة .. هنا ماتگدر تداوم ولا تطلع .. شلون راح تكمل حياتها صح هسا كلنا وياها ومسانديها بس لو طلعت وشافت نظرة وحدة من العالم راح تنكسر من جديد "
رد علي..
" اني وي رضوان جنت مقرر اخذ بنتي واهلي واطلع من المحافظة كلها اشتريلي بيت على گدي وانقل واعيش .. كلها ارض الله "
ضحك درع ..
" بأي عصر احنه عايشين .. شنو هالزمن اليخلي المظلوم ينهزم من بيتو ومحافظتو .. والظالم عايش حياتو "
رد علي ..
" ياعايش حياته اكثر من الصارلهم بعد .. والله بالقليل مؤبد ينحكم "
رد درع ..
" لا تخاف عليه بظهرو الاحزاب مادمو منتمي الهم يمر وقت ويطلعوه "
رد علي ..
" ساعتها اخذ حقي يدي منه "
حجة رضوان ..
" مو وكت هالحجي فكروا وقرروا "
رد درع ..
" اني ابقى هين لو رحتوا مااگدر اغير نظام اولادي ونظامي كل فترة .. لاتدحكين عليه يمه بس اني حياتي مامستقرة من سنين ومااريد اولادي يعانوا مثلي "
اتنهدت امي ..
" ليش كل ماالمكم تتطشرون .. ولك يمة حجي اخوتك صح هالمحافظة ماشفت منها الخير من اليوم الخطت رجلي بيها .. والصار الماسة خلاني اكرها اكثر "
عاينت عليهم واتنهدت..
" تدرون .. اني اليوم يله حسيت بروحي يتيم .. كل واحد بيكم فكر بحاله وحياته ومافكرتوا بيه .. من بعدكم شنهو راح يصير بيه "
تحولت نظراتهم الي وضاجو من كلامي..
ردت امي ..
" ولك يمه انت وليدي الماجبته شلون تگول هيج .. انت حالك من حالهم والله شاهد ماافرقك عنهم .. بس انت صرت شيخ والك ناسك ووادمك وكلها عينها عليك .. وهسا مو مثل گبل اكو تلفونات هاي الصغار ونگدر نروح ونرد الك .. "
ردت رحمة..
" هاي حجايتك عليها حشم شيخنا .. لان المفروض الشيخ يوزن الحجاية گبل لايحجيها .. احنه من يوم الوعينا للدنيا امنا وحدة مافرقتنا عن بعض ابد .. وهذا حال الدنيا لازم كل واحد يشوف حياتها ويعيشها بالطريقه التريحه وتريح اولاده ..
انت ورضوان ودرع واركان واحدكم عيوني الاشوف بيهم بلياكم اعمى ليش منو الي وكت ضيگي ومنو الاخذ حقي وحق بنتي غيركم .. انت شيخنا وسندنا ومانعوفك دوم "
حاوطوني كلهم وصاروا يواسوني ويتداهرون وياي ..
صح اتمنالهم الخير بس بداخلي اتگطع على فراگهم تعودت عليهم ومااگدر بلياهم ..
تعودت كل يوم جمعة يحاوطوني بالمضيف واتشايم بيهم ..
بس مااگدر اجبرهم يگعدون بمكان هم مامرتاحين بي وخاصة امي ادري بيها ماتحب السلف ولا ذاك الحوش وان جانت تجي فعلمودي وحتى ترفع معنوياتي اول ماصرت شيخ ..
رحمة ..
من عرفت زهرة انسجنت فرحت وحمدت الله الماضيع حق بنتي ..
بس بقت بنتي وجرحها شيطيبه .. وخاصة بعد ما انكمش موسى وعرفت من علي شلون ميراد باسطه وذاك مستفزه بحجي يلعب النفس ..
ميراد بعدها راح وماسأل وجن الحجي الحجاه موسى اثر عليه ..
ضجت حيل وخفت على ماسة يو عافها ميراد شيصير بحالها ..
هي اصلا بلا كلشي جنها ميتة بس جسد تمشي بلا روح
حجيت وي علي يشوفه گالي ..
" ششوفه اگله تريد بنتي لو لا .. اخر همي هذا صح اني احب ميراد واحترمه وعجبتني غيرته وموقفه بس بعد هاليوم مايهمني بس بنتي الرادها اخليه على راسي والعافها هو الخسران وبنتي اني اعرف شلون اطيبها وارجعها مثل گبل .. والسنة الجاية ترجع الكليتها وتستمر وتوگف على رجلها .."
اتنهدت ..
" هيج وتصير صدگ .. ويجي هاليوم واشوفها مثل گبل"
رد ..
" لا تخافين يجي .. بنتنا قوية وادري بيها تتحمل "
مرت الايام وبدينا نجهز النقلتنا لديالى .. بس درع راح يبقى ماقبل .. طلعت ماسة من غرفتها مثل عادتها تروح للحمام وترجع مالها حس ..
اول مرة تنتبه شنسوي ..
سألت ..
" وين تردون ماما ليش تلمون بالغراض ؟"
رديت ..
" راح نشيل لديالى هناك يم خوالي "
تغيرت ملامحها ..
" اني مااروح لهناك ؟"
استغربنا ..
رديت ..
" ماما هناك احسن الج ترتاحين وهم تنسين كلشي وتبدين صفحة جديدة واذا تزوجتي قريبة علينا "
تعصبت ..
" منو گالكم اتزوج منو ؟ شبيج ماما شو تعرفوها وتحرفوها .. اني مااريد اتزوج ماافيد ميراد بعد خلص تلوثت .. والاكثر اني صرت اكرهم كلهم .. شكو رجال صرت اكرهة مااحبهم ارحموني شبيكم وياي اني اريد ابعد عنه وانتو تاخذوني يمه "
صارت تصيح وتبجي اتهسترت ..
انهارت .. براء گامت بساع تهدي بيها ..
صارت ترافس بالگاع مدري شبيها .. تخبلت ..
" يمة بنتي راح تموت يمه بنتي "
خابرت علي يجي ..
غسلن وجها وهي فاقدة ..
اجه علي بساع موگف سيارة بالباب ..
اشرلي ..
" لفيها بعباية بساع "
شالها وغطيتها بعباية امي ولبست عباتي ورحت وياهم
اخذناها للطوارئ قاسو ضغطها وخلولها مغطي كال الدكتور احتمال انهيار عصبي اثر عليها .. اكو شي مضوجها ؟
سكتنا ماحجينا ..
كملنا المغذي بدت تفتح عينها ..
رجعت غمضت ماخلت عينها بعينه ..
حاجيتها ..
" ماما ماسة ليش هيج تسوين بينا ليش تخفوينا عليج"
اشرلي علي اسكت ..
سكتت ..
اخذناها وطلعنا .. جانت حافية جابها علي شايلها ..
نزعت شحاطتي لبستهيا عن الگاع ..
رجعنا للبيت اخواني كلهم تلگونا يسألون عنها وامي اخذتها ودخلت لجوة ..
گام يحجي درع ..
" خلوها يمي اذا ماتريد تروح لاتجبروها "
رد علي ..
" جا اني المن ماشي منا غير علمودها ؟ اذا هي ماتروح المن رايحين احنه "
رد رضوان..
" هاهي عوفوا السالفة مانمشي "
فرحت براء من سمعت بطلنا ودرع هم .. والاكثر فرحة فيصل من عرف راح نبقى ..
اركان بعد ماانقطعت عنه فاطمة بأسم امل وماتخابره تسودن ..
وحتى مايخابر على فاطمة ونورا ويسأل عنهم ومرات يخابر امي ..
خابر مرة وحجة وي امي وطلب يحجي وياي ..
سلمت عليه وسألني عن ماسة وحالنا حجيتله وفرح من عرف بموسى وزهرة والصارلهم ..
اخر شي ختمها ..
" رحمة اريدج ترحين المكان "
سألته ..
" وين اروح ؟"
رد..
" شوفي بس مو تحجين عليه وتضوجين اني تعرفت على بنية بالصدفة وحجيت وياها بالبداية كـ صديق بس بعدين تعلقت بيها كلش وصرت احجيلها يومي اول مااجي بس صارلها شهور مگطوعة اخبارها واني احس روحي ضايع بلياها احس صرت مدمن عليها مااعرف بس هي من بغداد بالشعب بس وين بالضبط مااعرف وهسا شلون اوصلها تعبت "
ضحكت بداخلي بس سايرته ..
" انت تحجي صدگ لو تتشاقى "
رد ..
" طبعا صدگ قابل مجذب .. هسا شلون فهميني "
رديت ..
" شفهمك بله ماتستحي من حجيتها عندك مرة وبنية وبدال ماتفكر بيهن وشوكت تلمهن الك .. تروح تتمعشگ بالتلفون وتضحك عليك وحدة مدري منين .. گالتلك من الشعب هي صغيرة لو منطقة ونسألك عنها .. شمالك فهمني گبل تعلقت بنورا وانت ماتعرف اصلها وفصلها وهسا تعلقت بوحدة هم ماتعرفها "
رد ..
" هاي لا تختلف عن نورا .. احسها واعية تصدگين شگد حجيت وياها ماگالتلي فد يوم احبك .. جانت تسمعلي وتفهمني من غير مااحجي .. من صوتي تعرفني مرتاح او لا ماشفت هيج وحدة بحياتي "
سألته ..
" لو مرتك تسويلك هيج تحبها تتقرب منها ؟"
رد ..
" هسا اني وين احجي وانتي وين .. ليش بكلشي تخلين فاطمة بالوسط .. فاطمة انتو الفرضتوها عليه واني قبلت علمود بنتي وهي تعرف بوضعي وقبلت ماجبرتها ؟ بعدين هاي تختلف بيها شي مميز عندي رقمها خلي علي يساعدني حبابه "
رديت ..
" اذا اگلك التدور عليها هي مرتك شتسوي ؟"
سكت بعدها رد مستغرب
" يامرتي ؟"
رديت ..
" فاطمة ؟"
ضحك ضحكة وقوية ومستمرة ..
واني ساكته منتظرة يكمل ضحكته ..
سأل ..
" انت تحجين صدگ لو تتشاقين ؟"
رديت ..
" البنية تحبك وشگد حاولت وياك وانت اثول .. مالگت الا هاي الطريقة علمود تتقربلك وشفت من تعرفت عليها وحجيت وياها شلون حبيتها ؟ لو حاجي وياها من قبل شيصير ؟"
تعصب وتنرفز ..
" لا مستحيل انت تضحكين عليه.. قسما بالله اذا طلع صدگ حجيج وتلعب عليه الا اطلگها شنو اني مضحك ؟"
رديت ..
" ليش لازم ماعجبك الحلال تعودت على الحرام .. براحتك شتسوي سوي بس بنتك مستحيل تروح وياك وتعوفها تعلقت بيها اكثر منك وحتى غيابك الجانت تخاف منه هسا مايفرق عندها خليك هناك متونس واخسر مرتك وبنتك تعبت واني احجي ومايفيد "
سديته ورحت حجيت وي فاطمة ضاجت وبقت تلوم بيه لان حجيت ..
گالتلي لو مخليته مايعرفني احسن هسا خاف يكرهني
رديت ..
" لو يحب امل صدگ جان ماتفرق عنده منو .. واذا عافج معناها مايحبها جذب بس وحدة عجبته وتعلق بيها "
واني احجي وياها خابرها ..
بقت ترجف ..
" هو شلون هسا ؟"
رديت..
" احجي وياه لاتضعفين احجي لاتسكتين عن حقج "
ردت متوترة ..
الو
سألها ..
" انت امل لو لا "
سكتت
صاح بيها ..
شلون ماعرفت صوتج احجي مثلها اريد اعرف شلون تغيرين صوتج ..
بقت ساكته ..
سألها..
" تلعبين عليه انتي ماتحجين شبيج ؟"
ردت ..
" شحجي ؟ ماخليتلي فرصة غير هاي .. "
ضحك ..
" طلعتي خبرة ويمكن مسويتها گبل "
ردت ..
" راح اسوي نفسي ماسمعت .. بس ع الاقل احترم الاسم الانطيته البنتك .. اني ما سويت شي غلط .. ردت اتقربلك .. اتقرب الرجلي الحبيته وفتحت عيني عليه .. ردتك تحس بيه وتعرفني اكثر وتحبني وبعدين اصارحك .. بس انت شسويت .. عفت مرتك وببنتك ورحت للخارج مرتاح وتخابر وتحجي خصوصياتك الوحدة ماتعرفها وتصارحها بأعجابك .. وحتى وياها اناني جنت تحجيلها كلشي ومايوم سألتها عن حالها وشنو بيها وشتحس.. الاهم جان نفسك وبس .. لهنا وخلص اركان اني سويت العليه وحبيتك وردتك وانت البعت .. اخذ قرارك واني راضية لان تعبت واني اركض وراك وانت تتهرب "
طلعت كل الحجي البگلبها حجته وتعصبت وهو ساكت ماتوقعت فطوم هيج تحجي دومها هادية ..
كملت اخذت نفس ابتسمت..
" مااتوقعتج هيج "
ردت ..
" تعبت من اخوج والله بعد مااهتم خلي شيسوي يسوي بس يحلم انطيه بنتي مااخليه ياخذها مني خلي يتزوج ويخلف غيرها "
رديت ..
" والله زين تسوين .. لحد هاليوم وانتي التركضين وهو مامهتم خليه دور هو اليركض وراج .."
وسوت مثل ماگلتلها ..
صار كلما يتصل تنطيه بساع النورا او لأمي .. وهي ماتحجي وياه ابد .. شلعت گلبه ..
وكلما يسأل امي لو نورا وين فاطمة يگلله ماهي لان هي ماتضل يمهن بحجة تسبح لو تخبز ابد ماتتواجد يمهن ..
ويمكن هالشي الخلاه يتعلق بيها ..
وحجة وي امي علمود يسوي معاملتهن ويسويلهن لم شمل بمجرد ماياخذ الاقامة ..
وهالخطوة وحدها كافيه بعد ماجان مقرر يسحب بس نورا ويطلگ فاطمة ..
مرات گلبها يحن عليه .. تفتح ذاك الخط وتلگيه يدز رسائل هناك ..
احجي وياي وريحيني انت منو ؟"
نضحك على سوالفه معناتها لسا مامستوعب امل نفسها فاطمة ..
الى ان مرة من المرات راسل فاطمة على خطها ..
سلم وسأل عن نورا ..
هي قرات وما ردت ..
دز مرة ثانية ..
" اعرفج تقرأين وماتردين اني اعتذر لو جرحتج بس تصرفج جان غلط لان تلاعبتي بمشاعري .. "
بقت تقرأ وماترد ..
وهو يحاول بكل مرة يحجي وياها ويسمع صوتها..
اخر شي خابر وطلبني ..
" رحمة مااگدر احجي وي امي .. اريدج تحجين وي فاطمة تحجي وياي ضروري محتاج احجي وياها اريد اسمع صوتها "
ضحكت ..
" يعني الا المرة تسحلكم وتهملكم يله تركضون وراها عفية زلم ماتجي الا بالعين الحمرة "
رد ..
" ذليني بعد ذليني "
ضحكت عليه ..
حاجيتها وگلتلها هدي اللعب كافي من يتصل عليج ردي
وهنا جان اول مرة يعترفلها انه مايگدر بدونها بعد وراضي بأي عقاب بس كون تسامحه ..
رجعت تحجي وياه مثل ماجانت تحجي وياه من ذاك الخط بس الفرق هنا تحجي كـ فاطمة مو امل ..
وزاد تعلقه بي وهالشي الخلاه يستعجل علمود يسوي الاقامة ولم الشمل ..
من حجينا السالفه الاهلي ..
خربوا من الضحك واتعجبوا بتخطيطنا .. وفرحوا لان اركان واخيرا اختار الطريق الصحيح ..
مرت الاشهر .. وبراء ودمعة بين طفلهم بالسونار .. اثنينهم ولد بيهم ..
رضوان جانت الفرحة ماسايعته .. وراح اشترى طلي وذبحة الوجه الله ووزعه .. مامصدگ انه مابقى الا اشهر قليلة ويصير اب ..
اما الصدمة الثانية وهي انه بعد كم شهر من ولادتها الزينب رجعت حملت مرة ثانية رغم فيصل اخذها للدكتورة وانطتها حب مانع بس هي جانت مصرة تجيب بحجة فيصل وحيد وتريدله سند ..
هو جان خايف عليها وضاج وانقهر وهي تگله شبيك هو رزق الله ..
العجبني بيها رغم عندها ثلاث اطفال الفرق بينهم اشهر او سنة .. بس هي تهتم بيهم اهتمام خاص .. والاهم مامقصرة عن فيصل وخطاره لو اجو تحزمت .. مايلام فيصل من سماها شيخة ..
عمتي سمرة كل يوم وگعة وخاصة بعد ماانكسرت بسبب بنتها وابنها العافها .. دوم بغرفتها وماتطلع نايمة والمرض يزيد ماينقص رغم فيصل مامقصر عنها بس يگولون حالتها النفسية مرضتها اكثر ..
اما ماسة بعد ماانهت كلشي وي ميراد وطلبت نرجعله المهر .. وطلبت الطلاگ ..
بسبب الصار .. قبل عرض جايه من الامريكان بعد ماجان يشتغل وياهم مترجم .. وسافر الامريكا وترك كلشي وراه ..
بس الشغلة الوحيدة الماسواها هو ماقبل يطلگ ماسة
من گلتله طلگها وشوف حياتك .. لان ماسه خلص انسدت نفسها من الزواج وماتريد اي رجال بحياتها ..
جان جوابه ..
" مادامها ماتتزوج خلص ليش اطلگها بعد .. هالشي الوحيد المطمني هي الي .. لو يبقى اخر نفس بيه عقلها اموت وهي على ذمتي ومرتي "
احترم قراراها رغم اثنينهم مجروحين واثنينهم يحبون بعض .. خالي مهران بعد ميراد راح ماضل شي يربطه بالعراق وبألحاح من مرته رجع السوريا بنهاية 2007 ..
ترك گلبه بالعراق مثل ابنه وسافر .. وهالشي واضح من اجه ودعنا او بالاحرى ودع عشگه الماكتمل ..
هالسنة هواي غيرت بينا وهواي حوادث مامتوقعيها صارت وكأنه الزمن توقف بيها لدرجة نريدها تنتهي وماتنتهي ..
ماسة ..
بعد الازمة المريت بيها واحساس الالم والوجع البداخلي
بابا جان ياخذني بالسر بحجة يطلعني ونروح الزوجة صديقة ..
هي دكتورة نفسية بس مامتعينة لان زوجها ماقابل هو صديق بابا ويعرف بشغلتي من وكت المحكمة ..
اني وبابا نروحلهم همة يبقون بالاستقبال واني وياها نگعد بالحديقة او بالهول ونحجي ..
جانت ماتحسسني انه هي طبيبة ..
مرات نسوي كيك وتحجي ..
هواي فادتني بس بنفس الوقت مااگدر انسى الصارلي بس المهم گدرت ارجع اگعد وي اهلي واحجي وياهم ووي اخوتي ..
نوعا ما تغيرت ..
بس موقفي من ناحية ميراد ماتغير ..
رغم اشتياقي اله وحبي المازال موجود .. جنت ادعي يشوف حياته ويستقر وينساني ..
بس بداخلي مااگدر انساه .. واحس بكل مكان اروحله اتذكره..
وخاصة اول يوم من رجعت للجامعة .. جان لازم اداوم وبعدها انقل ..
ماگدرت اروح للقسم ..
حجزلنا بابا غرفة بالفندق وماما ويانا مؤقت بين مايكمل نقلي ..
اول ماداومت جنت مترددة ..
اتذكر ميراد من يجيني ونگعد نحجي ونضحك ..
صارت علا گبالي توترت تذكرت ذاك اليوم والصار الابوها بسببي السواد مغطيها من راسها الرجليها ..
استحيت اتقدم خطوة وحدة ..
بس هي اجتني ..
سلمت ..
" شلونج ماسة "
رديت بتوتر ..
" هلو علا شلونج البقية بحياتج مااعرف شگلج مستحية منج "
ردت ..
" الصار قضاء وقدر انتي ماالج ذنب بس عمامي كبروها والفوا هالحجي اني اللازم اعتذر الصارلج والصارلنا مابيدج ولا بيدنا والسووها اخذوا جزاتهم واصلا انقهرت عليج اكثر من الصارلنا لان صعب بنية تكون بهيج موقف .. وعجبتني قوتج ورجعتج النا رغم ضجت من ماداومتي السنة الفاتت .. "
هزيت راسي ماعرفت شرد عليها ..
استأذنت وردت اروح .. احس اكو فجوة بينا او احساسي بالذنب اتجاهها هو السبب ..
صاحت وراي ..
" القسم مايدري شي عنج وماگلت الاحد.. كل اليعرفوه صارلج حادث وماتداومين "
تشكرت منها ورحت للقسم ..
شفت استاذ مثنى انصدم من شافني وشهگ ..
" ماسة ؟؟"
سلمت عليه ورحت ..
صاح وراي ..
" الحمد لله على سلامتج من عرفت مسوية حادث تأذيت حيل ولو اعرف تلفونج جان خابرت وطمأنيت عليج "
رديت ..
" شكرا استاذ ماتقصر "
جنت ضايعة وتايهة مااعرف وين اروح گعدت بالقسم وي مرحلة واشخاص جدد مو من مرحلتي .. عازلة نفسي عن الكل .. حاسة بوحدة فضيعة ..
المهون عليه انه علا محاجية الاحد..
ابتعدت عن مجموعتنا والبنات رغم اجن وسلمن عليه
دخل استاذ مثنى للقاعة وجانت عينه على ايدي يباوع للحلقة افتهمت نظراته غطيت ايدي ..
بعد يومين سألني ..
" شنو انتي وخطيبج فاسخين الخطوبة .. سألت علا ماتعرف "
رديت ..
" ماكو قسمة بينا "
ابتسم ..
" او احتمال قسمتج يم غير شخص "
فهمت نظراته وكلامه ..
بس المايعرفه انه مالي قسمة يم اي شخص بالدنيا بس گلبي راح يضل عند شخص واحد وبس ..
معرفته بأنفصالي زاد تماديه ..
وصار يحاول يحجي وياي ويتقرب واني اصد عنه ..
ومن عرف راح انقل ضاج ..
وحتى يخليني ابقى بالجامعة..
اجتني علا وبلغتني ..
" ماسة استاذ مثنى اخذ عنوانج مني علمود يدز اهله يريد يخطبج "
انصدمت من عرفت هالشي ..
مرت الايام وماكو اي خبر وهالشي ريحني وتوقعت علا متوهمة لو يريد جان گالي او طلبه مني ..
بس الظاهر جان يريد يسولي مفاجأة .. بس الحقيقة انه هو الي تفاجأ من رايحين وسائلين واهل المنطقة گايليلهم انه اني مخطوفة ومغتصبيني اربعة ..
وناس گايليه شردت وي صاحبها وكتلوا ابو علا بسببها ..
وجاي معاتب علا لان ماگالتله الحقيقه ومن اجت گالتلي لمتها هم وگلتلها الغلط منج انطتيه عنواني وانت تعرفين راح يسأل ويسمع ..
واني احجي وياها مر وباوعلي بحسرة وراح من غير مايحجي .. وصار مايخلي عينه بعيني وهالشي ريحني
بس الغريب انه حكم عليه وصدگ الكلام هو المفروض يعرفني ويعرف اخلاقي بالجامعة شنو ؟
المهم هالشي ماطول لان انقلت بعد شهر من دوامي وداومت بمحافظتنا هناك ..
واكتفيت بنفسي بدون اي صداقة .. من المحاضرة المحاضرة اني وحدة ومااختلط وماعندي غير السلام وي البنات وهذا هو ..
خاله براء ولدت قبل عمتي دمعة .. جابت ولد سموه وسام ..
جان يشبه خالو حيل ..
وعمتي دمعة بعدها بأسبوعين ولدت وسموه محمد جان يشبه جدتي مرمر .. لازم بكل واحد من ولدها عندها حفيد يشبهها..
فرحتنا بمحمد اكبر لان اجه بعد سنين .. وخالو رضوان فرحان ومگابله وگاعد .. وبالليل اذا بجة يتسابقون هو وعمتي عليه ..
جدتي فرحانه بأحفادها وولدها ..
خالو فصولي اجاه ولد رابع .. وبعد هالطفل حلف وگالها مااتقربلج لو ماالتزمتي بالحب المانع ..
بيوم عيد ميلادي جانوا محضريلي مفاجأة من رجعت من الجامعة ..
مزينين البيت وجايبين كيك وجايات خالاتي وفصولي وولده وزنوبة كلهم مجموعين ..
بابا جايبلي موبايل ابو الكاميرا هدية وماما گلادة كل واحد بيهم جايبلي شي ..
الا هدية وحدة جانت غريبة لكيتها بالكنتور ومكتوب عليها ميراد ..
استغربت ..
" شجابها هنا صرت اتخيله قريب عليه من بعد كل هالشهور .. شنو الذكره بيه .. توقعت نساني وعاش حياته .. بس جان يذكر عيد ميلادي "
جنت خايفة افتحها عفتها مااهتميت بس فضولي وگلبي خلوني افتحها ..
فتحتها لگيت بيها مسجل وكاسيت ..
جان مسجل صوته ..
ويحجيلي يومه ..
" ااااخ ماسه رغم مابعدتيني عنج بس دوم وياي .. تدرين صرت احضر النفسي اكل علمود من اجي اوهم نفسي انتي المسويته ونگعد ناكل سوة اني وياج ونضحك ونسولف هاي امنيتي كانت ومازالت .. ادري بيج تحبيني ومستحيل تنسيني بس تتوقعين سهل عليج تعوفيني وتجافيني .. معقولة ماتشتاقيلي "
بعدها طلعت اغنية سهلة عندك .. كل شوية اعيدها واسمع بيها ..
ووي كل كلمة ينزل جمر من عيني مو دمع ..
مااعرف افرح لان يحبني بعده لو احزن لان رجع يذكرني بي واني وياه مستحيل ننجمع ..
شوكت يعرف انه اني بعد خلص ماانفع اله ولا راح اكون اله بيوم .. بس گلبي مااعرف اذا بيوم راح يگدر ينساه ..
اين انت واين انا ؟؟
اين انت مني .. واين انا منك ؟؟
اصبحنا كـ الاغراب لا انا ادري عنك شئ ..
ولا انت تدري عني ..
وفي كل الحالتين الاشتياق يقتل والقلوب لاتبوح ..
وكل شعور نكتمه يأخذ من عافيتنا ..
#يتبع ..
( شمس السعدي )
انتظروا تكملة الجزء الاخير غدا ان شاء الله حاولت اكمله اليوم الكم وانزله بس ابني مريض حيل وهذا الگدرت اكتبه ..
حبايب واخرا وليس اخيرا ..
اريد اطلب منكم متابعة رواية جديدة لـ وئام الشيخلي
Wyaam1990
اسمها في ضريح العشق حمامة متأكدة راح تعجبكم
لتخجلوني ❤️